IGITABO CY’AMASOMO
YA MISA
KU CYUMWERU
UMWAKA B
EDITIONS PALLOTTI – PRESSE
IGITABO CY’AMASOMO YA MISA MU KINYARWANDA cyemejwe n’Inama y’Abepiskopi Gatolika bo mu Rwanda yateraniye i Kigali ku itariki ya 10-13 Nzeri 2002.
Iki gitabo cyateguwe hakurikijwe inyandiko rebero y’Urutonde rw’amasomo ya Misa mu kilatini uko rwatangajwe ku wa 30 Nzeri 1970 n’lbiro bikuru by a Kiliziya gatolika ya Roma bishinzwe imisengere y’abakristu, rukanonosorwa mu nyandiko rebero ya kabiri yatangajwe ku wa 21 Mutarama 1981.
Amagambo y’lbyanditswe bitagatifu akubiye muri iki gitabo, yose ahuje n’ayo muri Bibiliya Ntagatifu uko yatangajwe mu kinyarwanda mu mwaka wa 1990.
IMPRIMATUR
Kigali ku wa 14 Nzeri 2002,
ku munsi mukuru w’lkuzwa ry’Umusaraba wa Kristu.
✠ Agusitini MISAGO
Umwepiskopi wa Gikongoro,
akaba na Prezida wa Komisiyo y’lnama y’Abepiskopi Gatolika bo mu Rwanda ishinzwe ibyerekeranye n’Amahame y’Ukwemera gatolika.
© Conférence Episcopale du Rwanda
© Pallotti - Presse Ltd
IGIHE CYA Adiventi
KU CYUMWERU CYA 1 CY’Adiventi
ISOMO RYA MBERE
Isomo ryo mu gitabo cy’Umuhanuzi Izayi Iz 63, I6b-17.19b, 64,2-7
63, 16bUhoraho, ni wowe Data n’Umucunguzi wacu, ngiryo izina ryawe kuva kera kose. 17Uhoraho, kuki ureka duteshuka inzira zawe, tukanangira imitima yacu kugeza n’aho tutakikubaha? Tugarukire, turi abagaragu bawe, turi n’imiryango y’umunani wawe.
19bNone iyaba wari ukinguye ijuru ngo umanuke! Imisozi yose yarindimukira imbere yawe, 64, 2kubera ibintu biteye ubwoba waba ukoze tutabyiteguye. 3Nta na rimwe bigeze babyumva, nta na rimwe bigeze babibwirwa. Nta jisho ryigeze ribona indi mana ikora ityo, ngo irengere uwayizeye uretse wowe. 4Usanganira abishimira gukurikira ubutabera, bakwibuka bagakurikira inzira zawe. None waraturakariye kuko twagucumuyeho, ariko kandi tuzakizwa n’uko tugarutse mu nzira zawe. 5Twese twari nk’abahumanye, n’ibikorwa byacu by’ubutabera bimeze nk’umwenda urimo imyanda; twese twararabiranaga nk’amababi yahungutse, ibicumuro byacu bikatugurukana nk’umuyaga. 6Nta n’umwe wari ukiyambaza izina ryawe ngo yisubireho maze akwizirikeho, kuko wari wadukuyeho amaso ukatugabiza ibicumuro byacu. 7Nyamara kandi Uhoraho, ni wowe Mubyeyi, turi ibumba ribumbwa na we, twese turi igikorwa cy’ibiganza byawe.
Iryo ni Ijambo ry’Imana
ZABURI Zab 80 (79), 2-3b,15-16,18-19
Inyik/ Mana tuzahure, ubengeranishe uruhanga rwawe maze dukire.
Mushumba wa Israheli, tega amatwi wowe uyobora Yozefu nk’ubushyo,
wowe wicaye hejuru y’Abakerubimu garagaza uwo uri we!
Garagaza ububasha bwawe maze udutabare!
Uhoraho, Mugaba w’ingabo, dukundire ugaruke,
urebere mu ijuru witegereze,
maze utabare uwo muzabibu.
Urengere igishyitsi witereye,
n’umucwira ugukesha imbaraga.
Ikiganza cyawe kizahore kiramburiye
kuri ya Ntore ishyigikiwe n’ukuboko kwawe,
uwo mwana w’umuntu ugukesha imbaraga.
Bityo ntituzongera kuguhungaho,
uzatubeshaho twiyambaze izina ryawe.
ISOMO RYA KABIRI
Isomo ryo mu ibaruwa ya mbere Mutagatifu Pawulo Intumwa yandikiye Abanyakorinti 1 Kor 1, 3-9
Bavandimwe, 3tubifurije ineza n’amahoro biva ku Mana Umu-byeyi wacu, no kuri Nyagasani Yezu Kristu. 4Mpora nshimira Imana yanjye kubera mwebwe, nibuka ineza yayo mwaherewe muri Kristu Yezu. 5Koko rero Imana yabasenderejeho ingabire z’amoko yose muri We, cyane cyane iyo kumumenya no kumumenyesha abandi. 6Bityo guhamya Kristu mukaba mwarabyikomejemo, 7ku buryo nta ngabire n’imwe y’Imana mubuze, mu gihe mugitegereje ukwigaragaza kwa Yezu Kristu Umwami wacu. 8Ni we uzabakomeza kugeza mu ndunduro, kugira ngo muzabe muri indakemwa kuri uwo munsi wa Nyagasani Yezu Kristu. 9Ni indahemuka, Imana yabahamagariye kugirana ubumwe n’Umwana wayo Yezu Kristu, Umwami wacu.
Iryo ni Ijambo ry’Imana
IBANGONDIRIMBO RIBANZIRIZA IVANJILI 1 Zab 85 (84), 8
Alleluya Alleluya.
Uhoraho twereke impuhwe zawe,
kandi uduhe agakiza kawe.
Alleluya.
IVANJILI
✠ Amagambo yo mu Ivanjili Ntagatifu uko yanditswe na
Mariko Mk 13, 33-37.
Muri icyo gihe, Yezu yabwiraga abigishwa be ibyerekeye ihindukira rye ati 33«Mwitonde, mube maso kuko mutazi igihe bizabera. 34Bizaba bimeze nk’umuntu wagiye mu rugendo, agashinga abagaragu be urugo rwe, akagenera buri wese umurimo we, naho umunyarugi akamutegeka kuba maso.
35Murabe maso rero kuko mutazi igihe nyir’urugo azazira, ari ku mugoroba, ari mu gicuku, ari mu nkoko cyangwa mu gitondo, 36kugira ngo atazaza abatunguye agasanga musinziriye. 37Ibyo mbabwiye mbibwiye n’abandi bose: Murabe maso! »
Iyo ni Ivanjili Ntagatifu
KU CYUMWERU CYA 2 CY’Adiventi
ISOMO RYA MBERE
Isomo ryo mu gitabo cy’Umuhanuzi Izayi Iz 40,1-5.9-11
1Nimuhumurize umuryango wanjye, nimuwuhumurize- ni ko Imana ivuze- 2nimukomeze Yeruzalemu; muyimenyeshe ko ubucakara bwayo burangiye, igihano cyayo kikaba gihanaguwe; Uhoraho yayihannye yihanukiriye kubera amakosa yayo.
3Ijwi rirarangurura riti «Nimutegure mu butayu inzira y’Uhoraho, muringanirize Imana yacu umuhanda ahantu h’amayaga. 4Akabande kose gasibanganywe, umusozi wose n’akanunga kose bisizwe, n’imanga ihinduke ikibaya. 5Nuko ikuzo ry’Uhoraho rizigaragaze, ibinyamubiri byose bizaribonere icyarimwe bimenye ko Uhoraho yavuze. »
9Naho wowe zamuka ku musozi muremure, urangurure ijwi wowe uzaniye Siyoni inkuru nziza, ntutinye wowe ntumwa y’inkuru nziza igenewe Yeruzalemu! Rangurura ijwi ubwire imigi ya Yuda uti «Dore Imana yanyu. » 10Ni byo koko, dore Nyagasani Imana! Araje n’imbaraga nyinshi, afite amaboko, aje gutegeka; dore azanye n’iminyago, abo yatabaye bamubanje imbere. 11Ameze nk’umushumba uragiye ubushyo, akabwegeranya n’ukuboko kwe; abana b’intama akabatwara mu gituza cye, intama z’imbyeyi akazemera mu rwuri rutoshye.
Iryo ni Ijambo ry’Imana
ZABURI Zab 85 (84), 9ab-10,11-12,13-14.
Inyik/ Uhoraho, twereke impuhwe zawe,
kandi uduhe agakiza kawe.
Ndashaka kumva icyo Uhoraho Imana avuze,
aravuga iby’amahoro y’umuryango we n’abayoboke be.
Koko ubuvunyi bwe buba hafi y’abamutinya,
kugira ngo ikuzo rye rigume mu gihugu cyacu.
Impuhwe n’ubudahemuka byarahuriranye,
ubutabera n’amahoro birahoberana.
Ubudahemuka buzamera busagambe ku isi,
maze ubutabera bubururukireho buva mu ijuru.
Uhoraho ubwe azabaha ihirwe,
maze isi yacu izarumbuke imbuto.
Ubutabera buzamugenda imbere,
n’intambwe ze zigaragaze inzira.
ISOMO RYA KABIRI
Isomo ryo mu ibaruwa ya kabiri ya Mutagatifu Petero Intumwa
2 Pet 3, 8-14
8Nkoramutima zanjye, hari ikintu mutagomba kwibagirwa: ni uko kuri Nyagasani umunsi umwe ari nk’imyaka igihumbi, n’imyaka igihumbi ikaba nk’umunsi umwe. 9None rero, Nyagasani ntatinze kurangiza isezerano rye nk’uko bamwe biha kuvuga ko atinze; mu by’ukuri ni mwebwe yihanganira kuko adashaka ko hagira n’umwe worama, ahubwo ko bose bisubiraho bakamugarukira. 10Umunsi wa Nyagasani uzaza nk’umujura; uwo munsi ijuru rizazimirana n’urusaku rukaze, ibirimo byose bizakongokeshwe n’umuriro; maze isi n’ibiyirimo byose bizagurumane. 11Ubwo rero ibyo byose bigomba kurimbuka kuri ubwo buryo, nimwumve uko imyifatire yanyu igomba kumera. Nimurangwe n’imigenzereze itunganye, mwubahe Imana, 12mwebwe abategereje kandi mugashaka gutebutsa umunsi w’Imana, umunsi uzatuma ijuru rizimira rigakongokeshwa n’umuriro, n’ibiririmo byose bikazayoka. 13Ariko nk’uko Imana yabisezeranye, dutegereje ijuru rishya n’isi nshya, aho ubutungane buzatura.
14Ni yo mpamvu nkoramutima zanjye, mu gihe mugitegereje ibyo, mugomba gukora uko mushoboye kose kugira ngo Nyagasani azabasange mu mahoro, muri abaziranenge n’inyangamugayo.
Iryo ni Ijambo ry Imana
IBANGONDIRIMBO RIBANZIRIZA IVANJILI Lk 3, 4.6
Alleluya Alleluya.
Nimutegure inzira ya Nyagasani, muringanize aho azanyura :
maze umuntu wese azabone umukiro uturutse ku Mana.
Alleluya.
IVANJILI
✠ Amagambo yo mu Ivanjili Ntagatifu uko yanditswe na
Mariko Mk 1,1-8
1Intangiriro y’Inkuru Nziza ya Yezu Kristu, Umwana w’Imana. 2Mu gitabo cya Izayi umuhanuzi handitswemo ngo « Dore nohereje intumwa yanjye imbere yawe, kugira ngo izagutegurire inzira. 3 Ni ijwi ry’uvugira mu butayu aranguruye ati ‘Nimutegure inzira ya Nyagasani, muringanize aho azanyura.’ »
4Nuko Yohani Batisita atunguka mu butayu yamamaza mu bantu batisimu yo kwisubiraho kugira ngo bakire ibyaha.5 Maze intara yose ya Yudeya ikagenda imugana, n’abaturage bose ba Yeruzalemu. Nuko bakabatizwa na we mu ruzi rwa Yorudani, babanje kwirega ibyaha byabo. 6Yohani yambaraga umwenda uboheshejwe ubwoya bw’ingamiya, agakenyeza umukoba; yatungwaga n’isanane n’ubuki bw’ubuhura. 7Yamamazaga avuga ati « Uje ankurikiye andusha ububasha; sinkwiye no kunama ngo mfundure udushumi tw’inkweto ze. 8Jyewe nababatirishije amazi, naho We azababatirisha Roho Mutagatifu.»
Iyo ni Ivanjili Ntagatifu
KU CYUMWERU CYA 3 CY’Adiventi
ISOMO RYA MBERE
Isomo ryo mu gitabo cy’Umuhanuzi Izayi Iz 61, 1-2a. 10-11
1Umwuka w’Uhoraho urantwikiriye, kuko Uhoraho yantoye akansiga amavuta; yanyohereje gushyira abakene inkuru nziza, komora abafite umutima wamenaguritse, gutangariza imbohe ko zibohowe, n’abapfukiranwaga ko bafunguwe, 2akwamamaza umwaka w’impuhwe z’Uhoraho.
10Ndasabagizwa n’ibyishimo muri Uhoraho, umutima wanjye uhimbajwe n’Imana yanjye kuko yanyambitse umwambaro w’umukiro, akansesuraho umwitero w’ubutungane. Nishimye nk’umukwe utamirije ikamba rye, cyangwa umugeni witatse imirimbo ye. 11Uko ubutaka bumeza imbuto zabwo, n’ubusitani bugakuza icyo bwabibwemo, ni na ko Uhoraho azameza ubutungane n’ibisingizo imbere y’amahanga yose.
Iryo ni Ijambo ry’Imana
INDIRIMBO Lk 1, 47-48, 49-50, 53-54
Inyik/ Ndasabagizwa n’ibyishimo mu Mana, Umukiza wanjye !
Umutima wanjye urasingiza Nyagasani,
kandi uhimbajwe n’Imana Umukiza wanjye.
Kuko yibutse umuja we utavugwaga,
rwose kuva ubu amasekuruza yose azanyita umuhire.
Ushoborabyose yankoreye ibitangaza,
Izina rye ni ritagatifu.
Impuhwe ze zisesekarizwa abamutinya bo mu bihe byose.
Abashonje yabagwirije ibintu,
abakungu abasezerera amara masa.
Yagobotse Israheli umugaragu we,
bityo yibuka impuhwe ze.
ISOMO RYA KABIRI
Isomo ryo mu ibaruwa ya mbere Mutagatifu Pawulo Intumwa yandikiye Abanyatesaloniki 1 Tes 5,16-24
Bavandimwe, 16mujye muhora mwishimye, 17musenge ubudahwema, 18mushimire Imana muri byose kuko ari byo ibashakaho muri Yezu Kristu. 19Muramenye ntimuzimye Roho w’Imana, 20ntimugahinyure ibyahanuwe; 21ahubwo mujye mugenzura byose, ibyiza mubigumane, 22naho ikibi cyose mucyirinde.
23Imana y’amahoro ubwayo nibatagatifuze binonosoye, kugira ngo izasange muri indahemuka mwese nta makemwa mufite ku mutima no ku mubiri, ku munsi Umwami wacu Yezu Kristu azaziraho. 24Ubahamagara ni indahemuka, azakora n’ibyo ngibyo.
Iryo ni Ijambo ry’Imana
IBANGONDIRIMBO RIBANZIRIZA IVANJILI Lk 1, 76 ; Yh 1, 7
Alleluya Alleluya.
Yohani, umuhanuzi w’umusumbabyose yaraje, aza gutegura inzira ya Nyagasani, no kuba umugabo uhamya iby’urumuri.
Alleluya.
IVANJILI
✠ Amagambo yo mu Ivanjili Ntagatifu uko yanditswe na Yohani
Yh 1, 6-8.19-28.
6Habayeho umuntu woherejwe n’Imana, izina rye rikaba Yohani. 7azanywe no kuba umugabo wo guhamya iby’urumuri, kugira ngo bose bamukeshe kwemera. 8Si we wari urumuri, ahubwo yari umugabo uhamya iby’urwo rumuri.
19Dore ubuhamya bwa Yohani igihe Abayahudi b’i Yeruzalemu bamutumyeho abaherezabitambo n’Abalevi kumubaza, ngo «Uri nde ?» 20Yohani yaremeje ntiyahakana, ahamya agira ati «Sindi Kristu.» 21Na bo baramubaza bati «Bite se ? Uzabe uri Eliya ?» Arabasubiza ati «Sindi we.» «Uzabe se uri wa Muhanuzi ugomba kuza ?» Arabasubiza ati «Oya.» 22Baramubwira bati «Rwose uri nde kugira ngo tugire icyo dusubiza abadutumye. Wibwira ko uri nde ?» 23Arabasubiza ati «Ndi ijwi ry’uvugira mu butayu aranguruye ati ‘Nimutunganye inzira ya Nyagasani’, nk’uko umuhanuzi Izayi yabivuze.»
24Abari batumwe bari abo mu Bafarizayi. 25Bongera kumubaza bati «None se ko ubatiza kandi utari Kristu, ntube Eliya, ntube na wa Muhanuzi, ubiterwa n’iki ?» 26Yohani arabasubiza ati «Jyewe mbatiriza mu mazi, ariko hagati yanyu hari Uwo mutazi. 27Ni we ugiye kuza ankurikiye ; sinkwiye no gupfundura umushumi w’inkweto ze.» 28Ibyo byabereye i Betaniya hakurya ya Yorudani, aho Yohani yabatirizaga.
Iyo ni Ivanjili Ntagatifu
KU CYUMWERU CYA 4 CY’Adiventi
ISOMO RYA MBERE
Isomo ryo mu gitabo cya kabiri cya Samweli 2 Sam 7,1-5.8b-12. 14a.16
1Umwami Dawudi atura mu ngoro ye kandi Uhoraho amuha ihumure, amukiza abanzi bose bari bamukikije. 2Bukeye umwami abwira umuhanuzi Natani ati «Dore ntuye mu nzu y’ibiti by’amasederi, naho Ubushyinguro bw’Imana bukaba mu ihema!» 3Natani abwira umwami ati «Icyo utekereza gukora cyose genda ugikore, kuko Uhoraho ari kumwe nawe.»
4Nuko muri iryo joro, ijambo ry’Uhoraho rigera kuri Natani muri aya magambo riti 5«Genda ubwire umugaragu wanjye Dawudi uti ‘Dore uko Uhoraho avuze : aho ni wowe uzanyubakira inzu kugira ngo nyituremo ? 8bNi jye wakuvanye mu rwuri inyuma y’amatungo, kugira ngo ube umutware wa Israheli umuryango wanjye. 9Nari kumwe nawe aho wajyaga hose, ngukiza abanzi bose bari baguhagurukiye. Izina ryawe nzarigira ikirangirire, mbese nk’iry’abandi bakomeye bo ku isi. 10Nzagenera Israheli umuryango wanjye ahantu nyihashyire, ihature ari ahayo bwite. Ntizajegajega ukundi kandi abagome ntibazongera kuyibuza uburyo nk’uko byagendaga kera, 11mbese kuva igihe nshyizeho Abacamanza ngo bategeke Israheli umuryango wanjye kugeza na n’ubu. Naguhaye ihumure, ngukiza abanzi bawe bose, ndetse Uhoraho akubwiye ko we ubwe azakubakira inzu.
12N’igihe iminsi yawe izaba yarangiye maze ukazaba uri kumwe n’abasokuruza bawe, nzakomeza inkomoko yawe inyuma yawe ; nzimika uzagukomokaho wowe ubwawe kandi nkomeze ubwami bwe. 14aNzamubera umubyeyi, na we ambere umwana. 16Inzu yawe n’ubwami bwawe bizahora imbere yanjye iteka, n’ingoma yawe izakomere iteka ryose.’»
Iryo ni Ijambo ry’Imana
ZABURI Zab 89 (88) 4-5, 27-28, 29-30
Inyik/ Nyagasani, ni wowe ufite amagambo y’Isezerano rihoraho.
Nagiranye isezerano n’intore yanjye,
nuko ndahira Dawudi umugaragu wanjye nti
«Inkomoko yawe nyishyizeho ubuziraherezo,
kandi intebe yawe y’ubwami,
nzayikomeza kuva mu gisekuruza kujya mu kindi.»
We azanyiyambaza agira ati «Uri Data,
uri Imana yanjye, uri urutare nkesha agakiza !»
Nanjye nzamugira imfura yanjye,
n’ikirenga mu bami b’isi.
Nzamukomereza impuhwe zanjye ubuziraherezo,
kandi iryo sezerano ntirizasubirwaho.
Ingoma ye nzayikomeza iteka,
n’intebe ye y’ubwami izarambe nk’ijuru.
ISOMO RYA KABIRI
Isomo ryo mu ibaruwa Mutagatifu Pawulo Intumwa yandikiye Abanyaroma Rom 16, 25-27
Bavandimwe, 25nihasingizwe Imana, Yo ifite ububasha bwo kubakomeza bihuje n’Inkuru Nziza nabashyikirije namamaza Yezu Kristu, nkurikije iyobera ryari ryaracecetswe kuva kera kose, 26ubu rikaba ryahishuriwe abanyamahanga bose, rikagaragarira mu byanditswe by’abahanuzi. Nguko uko Imana Ihoraho yabigennye, kugira ngo na bo ibageze ku kwemera bayumvire.
27Imana Nyir’ubuhanga nihabwe ikuzo muri Yezu Kristu, uko ibihe bihora bisimburana iteka ! Amen.
Iryo ni Ijambo ry’Imana
IBANGONDIRIMBO RIBANZIRIZA IVANJILI Lk 1, 38
Alleluya Alleluya.
Ndi umuja wa Nyagasani, byose bimbeho nk’uko ubivuze.
Alleluya.
IVANJILI
✠ Amagambo yo mu Ivanjili Ntagatifu uko yanditswe na Luka
Lk 1,26-38
Muri icyo gihe, 26Malayika Gaburiyeli atumwa n’Imana mu mugi wo mu Galileya witwa Nazareti, 27ku mukobwa w’isugi wari warasabwe n’umusore witwa Yozefu wo mu muryango wa Dawudi ; uwo mukobwa yitwaga Mariya.
28Malayika aza iwabo aramubwira ati «Ndakuramutsa mutoni w’Imana ; Nyagasani ari kumwe nawe.» 29Yumvise ayo magambo arikanga, yibaza icyo iyo ndamutso ivuga. 30Malayika aramubwira ati «Wigira ubwoba, Mariya, kuko wagize ubutoni ku Mana. 31Dore ugiye gusama inda ukazabyara umuhungu, maze ukazamwita izina rya Yezu. 32Azaba umuntu ukomeye kandi bazamwita Mwene Nyir’ijuru. Nyagasani Imana azamwegurira ingoma ya se Dawudi; 33azategeka umuryango wa Yakobo ubuziraherezo, ingoma ye ntizashira.»
34Nuko Mariya abwira Malayika ati «Ibyo bizashoboka bite kandi nta mugabo mfite ?» 35Malayika aramusubiza ati «Roho Mutagatifu azakumanukiraho, maze ububasha bwa Nyir’ijuru bukubundikire mu gicucu cye, ndetse ugiye kuvuka azaba intungane kandi azitwa Umwana w’Imana. 36Dore Elizabeti mwene wanyu na we yasamiye mu zabukuru ; uku kwezi ni ukwa gatandatu kandi ubundi yitwaga ingumba ; 37koko nta kinanira Imana.»
38Mariya aravuga ati «Ndi umuja wa Nyagasani ; byose bimbeho nk’uko ubivuze.» Nuko Malayika amusiga aho aragenda.
Iyo ni Ivanjili Ntagatifu
I G I H E C YA NOHELI
KU WA 25 UKUBOZA
IVUKA RYA NYAGASANI (NOHELI)
MISA YO KU MUGOROBA UBANZIRIZA NOHELI
(24 Ukuboza)
ISOMO RYA MBERE
Isomo ryo mu gitabo cy’Umuhanuzi Izayi Iz 62,1-5
Uhoraho aravuze ati 1«Sinzigera ntererana Siyoni, sinzareka guhihibikanira Yeruzalemu kugeza ubwo ubutungane bwayo butangaje nk’icyezezi, n’umukiro wayo ukakirana nk’urumuri. 2Bityo amahanga azabone ubutungane bwawe, abami bose babone ikuzo ryawe. Nuko bazakwite izina rishya rizatangazwa n’Uhoraho.
3Uzamera nk’ikamba ribengerana mu kiganza cy’Uhoraho, nk’igisingo mu ntoki z’Imana yawe. 4Ntibazongera kukwita «Nyirantabwa», n’igihugu cyawe ngo cyitwe «Itongo», ahubwo uzitwa «Inkundwakazi» n’igihugu cyawe cyitwe «Umugeni», kuko Uhoraho azaba agukunze, igihugu cyawe akibengutse. 5Uko umusore ashaka umugeni w’isugi, ni ko Uwaguhanze azakubenguka; kandi nk’uko umukwe yishimira umugeni we, Imana yawe ni ko izakwishimira.»
Iryo ni Ijambo ry’Imana
ZABURI Zab 89 (88), 20ab. 21, 27-28,29-30
Inyik/ Nyagasani, ni wowe ufite amagambo y’Isezerano rihoraho.
Kera wavuganiye n’abayoboke bawe mu ibonekerwa,
maze uravuga uti «Nateye inkunga umuntu w’intwari.
Nsanga Dawudi yambera umugaragu,
maze musiga amavuta yanjye matagatifu.»
Azanyiyambaza agira ati « Uri Data,
uri Imana yanjye, uri urutare nkesha agakiza.»
Nanjye nzamugira imfura yanjye,
n’ikirenga mu bami b’isi.
Nzamukomereza impuhwe zanjye ubuziraherezo,
kandi iryo sezerano ntirizasubirwaho.
Ingoma ye nzayikomeza iteka,
n’intebe ye y’ubwami izarambe nk’ijuru.
ISOMO RYA KABIRI
Isomo ryo mu gitabo cy’Ibyakozwe n’Intumwa Intu 13,16-17.22-25
Pawulo ageze i Antiyokiya ho muri Pisidiya, yinjira mu isengero ku isabato aricara. Maze abari bahateraniye bamusaba kugira ijambo ababwira.
16Nuko Pawulo arahaguruka, amaze kubacecekesha ikiganza araterura ati «Bayisraheli, namwe abatinya Imana nimunyumve. 17Imana ya Israheli umuryango wacu yitoreye abasekuruza bacu, ibaha kororoka igihe bari abasuhuke mu gihugu cya Misiri. Hanyuma ihabavanisha ububasha bwayo bukomeye. 22Imana imaze guhigika umwami Sawuli ishyiraho Dawudi ngo ababere umwami, ari na we yatanzeho icyemezo iti ‘Nabonye Dawudi mwene Yese, umuntu unguye ku mutima, uzakora ibyo nshaka byose.’ 23Mu rubyaro rwe nk’uko Imana yari yarabimusezeranyije ni ho yakuye Yezu, Umukiza wa Israheli. 24Mbere y’ukuza kwe, Yohani yatangarije Abayisraheli bose batisimu yo kwisubiraho. 25Nuko ajya kurangiza ubutumwa bwe aravuga ati ‘Nta bwo ndi uwo mukeka ! Ahubwo hari ugiye kuza ankurikiye, nkaba ntakwiriye no guhambura udushumi tw’inkweto ze.’»
Iryo ni Ijambo ry’Imana
IBANGONDIRIMBO RIBANZIRIZA IVANJILI
Alleluya Alleluya.
Icyaha cy’isi kigiye guhanagurwa,
maze tugengwe n’Umukiza w’isi yose.
Alleluya.
IVANJILI (Isomo rirerire)
✠ Amagambo yo mu Ivanjili Ntagatifu uko yanditswe na
Matayo Mt 1,1-25
1Dore igitabo cy’amasekuruza ya Yezu Kristu, umwana wa Dawudi, mwene Abrahamu.
2Abrahamu yabyaye Izaki, Izaki abyara Yakobo, Yakobo abyara Yuda n’abavandimwe be,
3Yuda abyara Faresi na Zara kuri Tamara, Faresi abyara Esiromi, Esiromi abyara Aramu,
4Aramu abyara Aminadabu, Aminadabu abyara Nahasoni, Nahasoni abyara Salimoni,
5Salimoni abyara Bowozi kuri Rahabu, Bowozi abyara Yobedi kuri Ruta, Yobedi abyara Yese,
6Yese abyara umwami Dawudi.
Dawudi abyara Salomoni ku mugore wa Uriya,
7Salomoni abyara Robowamu, Robowamu abyara Abiya, Abiya abyara Asa, 8Asa abyara Yozafati, Yozafati abyara Yoramu, Yoramu abyara Oziyasi, 9Oziyasi abyara Yowatamu, Yowatamu abyara Akazi, Akazi abyara Ezekiyasi,
10Ezekiyasi abyara Manase, Manase abyara Amoni, Amoni abyara Yoziyasi,
”Yoziyasi abyara Yekoniyasi na barumuna be, igihe bajyanwa bunyago i Babiloni.
,2Ijyanwabunyago ry’i Babiloni rirangiye Yekoniyasi abyara Salatiyeli, Salatiyeli abyara Zorobabeli,
13Zorobabeli abyara Abiyudi, Abiyudi abyara Eliyakimu, Eliyakimu abyara Azori,
14Azori abyara Sadoki, Sadoki abyara Akimu, Akimu abyara Eliyudi,
15 Eliyudi abyara Eleyazari, Eleyezari abyara Matani, Matani abyara Yakobo,
16Yakobo abyara Yozefu umugabo wa Mariya, ari we wabyaye Yezu witwa Kristu.
17Ibisekuruza byose hamwe rero ni ibi : kuva kuri Abrahamu kugeza kuri Dawudi, ni ibisekuruza cumi na bine ; kuva kuri Dawudi kugera ku ijyanwabunyago ry’i Babiloni, ni ibisekuruza cumi na bine ;
18Dore uko Yezu Kristu yavutse. Nyina Mariya yari yarasabwe na Yozefu; mu gihe batarabana aza gusama inda ku bubasha bwa Roho Mutagatifu. 19Yozefu umugabo we wari intungane kandi utashakaga kumuteza urubwa, yigira inama yo kumusezerera rwihishwa. 20Igihe yari akibizirikana, Umumalayika wa Nyagasani amubonekera mu nzozi, aramubwira ati «Yozefu, mwana wa Dawudi, witinya kuzana umugeni wawe Mariya, kuko yasamye ku bubasha bwa Roho Mutagatifu. 21Azabyara umwana uzamwite Yezu, kuko ari we uzakiza umuryango we ibyaha byawo.» 22Ibyo byose ariko byabereye kugira ngo huzuzwe ibyo Nyagasani yavugishije umuhanuzi ati 23«Dore Umukobwa w’isugi agiye gusama inda maze azabyare umuhungu, nuko bazamwite Emanweli», ari byo kuvuga ngo «Imana turi kumwe.» 24Yozefu akangutse abigenza uko Umumalayika wa Nyagasani yamutegetse, nuko azana umugeni we.25Ariko ntiyamwegera kugeza igihe Mariya abyariye umwana w’umuhungu, nuko amwita Yezu.
Iyo ni Ivanjili Ntagatifu
IVANJILI (Isomo rigufi)
✠ Amagambo yo mu Ivanjili Ntagatifu uko yanditswe na Matayo Mt 1,18-25
18Dore uko Yezu Kristu yavutse. Nyina Mariya yari yarasabwe na Yozefu; mu gihe batarabana aza gusama inda ku bubasha bwa Roho Mutagatifu. 19Yozefu umugabo we wari intungane kandi utashakaga kumuteza urubwa, yigira inama yo kumusezerera rwihishwa. 20Igihe yari akibizirikana, Umumalayika wa Nyagasani amubonekera mu nzozi, aramubwira ati «Yozefu, mwana wa Dawudi, witinya kuzana umugeni wawe Mariya, kuko yasamye ku bubasha bwa Roho Mutagatifu. 21Azabyara umwana uzamwite Yezu, kuko ari we uzakiza umuryango we ibyaha byawo.» 22Ibyo byose ariko byabereye kugira ngo huzuzwe ibyo Nyagasani yavugishije umuhanuzi ati 7«Dore Umukobwa w’isugi agiye gusama inda maze azabyare umuhungu, nuko bazamwite Emanweli», ari byo kuvuga ngo «Imana turi kumwe.» 24Yozefu akangutse abigenza uko Umumalayika wa Nyagasani yamutegetse, nuko azana umugeni we.25Ariko ntiyamwegera kugeza igihe Mariya abyariye umwana w’umuhungu, nuko amwita Yezu.
Iyo ni Ivanjili Ntagatifu
* Mu misa za Noheli bakoresha aya masomo akurikira, ariko bashobora no guhitanio mu masomo ya za misa uko ari eshatu, bagafata ayo babona ko arusha ayandi kugirira akamaro ikoraniro ry’abakristu.
MISA YA MU GICUKU
ISOMO RYA MBERE
Isomo ryo mu gitabo cy’Umuhanuzi Izayi Iz 9,1-6
1Abantu bagendaga mu mwijima babonye urumuri nyamwinshi, abari batuye mu gihugu cy’icuraburindi, urumuri rwabarasiyeho. 2 Wabagwirije ineza, ubasakazaho ibyishimo, none bariho bariyereka imbere yawe boshye abishimira umusaruro, baranezerewe nk’abagabana iminyago, 3kuko wabakijije umuzigo bari bikoreye, ingiga yabashenguraga ibitugu n’ikiboko cy’uwabakoreshaga agahato, warabijanjaguye nko kuri wa munsi w’Abamadiyani.
4Inkweto zose z’intambara zarimburaga ubutaka, n’igishura cyose cyazirinzwe mu maraso, byarakongotse boshye inkwi baroshye mu muriro. 5Kuko umwana yatuvukiye, twahawe umuhungu. Ubutegetsi bumuri ku bitugu, ahawe izina : «Umujyanama w’agatangaza, Imana Idahangarwa, Umubyeyi iteka, Umwami w’amahoro.» 6Hazaba ingoma irambye n’amahoro atagira iherezo, ku ntebe ya Dawudi n’ubwami bwe, azabishinga kandi abikomeze mu butungane n’ubutabera, ubu n’iteka ryose. Uhoraho umugaba w’ingabo azabisohoza, kubera umwete we wuje urukundo.
Iryo ni Ijambo ry’Imana
ZABURI Zab 96 (95), l-2a, 2b-3, ll-12a, 12b-13a.c
Inyik/ Uyu munsi Umukiza yatuvukiye,
ari we Kristu Nyagasani.
Nimuririmbire Uhoraho indirimbo nshya,
isi yose niririmbire Uhoraho !
Nimuririmbire Uhoraho, musingize Izina rye.
Uko bukeye mwogeze agakiza ke !
Nimwamamaze ikuzo rye mu mahanga,
n’ibyiza bye mu miryango yose !
Ijuru niryishime kandi isi nihimbarwe !
Inyanja niyorome n’ibiyirimo byose !
Imisozi nisabagire kimwe n’ibiyisesuyeho byose.
Ibiti byose by’ishyamba nibivugirize impundu icyarimwe,
mu maso y’Uhoraho kuko aje.
Azacira isi urubanza mu butabera.
ISOMO RYA KABIRI
Isomo ryo mu ibaruwa Mutagatifu Pawulo Intumwa yandikiye Tito Tito 2,11-44
Bavandimwe, 11koko ineza y’Imana, soko y’umukiro ku bantu bose yarigaragaje, 12itwigisha kureka kugomera Imana no gutwarwa n’irari ry’iby’iyi si, kugira ngo guhera ubu ngubu tubeho turangwa n’ubwitonzi, ubutungane n’ubusabaniramana, 13mu gihe tugitegereje ya mizero mahire hamwe n’Ukwigaragaza kwa Yezu Kristu yisesuyeho ikuzo, We Mana yacu y’igihangange akaba n’Umukiza wacu, 14witanze kubera twebwe kugira ngo aturokore ubugome bwose, kandi yuhagire umuryango ugenewe kuba ubukonde bwe no kugira ishyaka ryo gukora icyiza cyose.
Iryo ni Ijambo ry’Imana
IBANGONDIRIMBO RIBANZIRIZA IVANJILI Lk 2,10-11
Alleluya Alleluya.
Mbazaniye inkuru ikomeye cyane.
None Umukiza yatuvukiye, ari we Kristu Nyagasani.
Alleluya.
IVANJILI
✠ Amagambo yo mu Ivanjili Ntagatifu uko yanditswe na Luka
Lk 2,1-14
1Muri iyo minsi, Kayizari Ogusito yaciye iteka ryo kubarura abantu bo mu bihugu byose yategekaga. 2Iryo barura rya mbere ryabaye igihe Kwirini yari umutware wa Siriya. 3Bose bajyaga kwiyandikisha, buri muntu mu mugi we. 4Yozefu na we ava mu mugi wa Nazareti ho mu Galileya, ajya mu mugi wa Dawudi witwaga Betelehemu yo mu Yudeya, kuko yari uwo mu muryango wa Dawudi, 5agira ngo abarwe we n’umugore we Mariya wari utwite.6Nuko bagezeyo, umunsi wo kubyara uragera. 7Abyara umuhungu we w’imfura, amworosa utwenda, amuryamisha mu kavure, kuko nta wundi mwanya ukwiye bari babonye aho bacumbika.
8Muri ako karere hari abashumba barariraga amatungo yabo ku gasozi. 9Nuko Umumalayika wa Nyagasani abahagarara iruhande, ikuzo rya Nyagasani ribasesekazaho urumuri, maze bashya ubwoba. 10Malayika arababwira ati «Mwigira ubwoba, kuko mbazaniye inkuru ikomeye cyane, izashimisha umuryango wose. 11None mu mugi wa Dawudi mwavukishije Umukiza, ari we Kristu Nyagasani. 12Dore ikimenyetso kimubabwira : murasanga uruhinja rworoshe utwenda ruryamye mu kavure.» 13Nuko ako kanya inteko y’ingabo zo mu ijuru yifatanya na wa Mumalayika, basingiza Imana bavuga bati 14«Imana nikuzwe mu bushorishori bw’ ijuru, kandi mu nsi abo ikunda bahorane amahoro.»
Iyo ni Ivanjili Ntagatifu
MISA YO MU RUKERERA
ISOMO RYA MBERE
Isomo ryo mu gitabo cy’Umuhanuzi Izayi Iz 62,11-12
«Dore ibyo Uhoraho atangaza kugera ku mpera z’isi : Nimubwire umukobwa wa Siyoni muti «Dore Umukiza wawe araje, azanye iminyago, abo yatabaye bamubanje imbere.
12Bazabita ‘Umuryango mutagatifu’, ‘Abacunguwe n’Uhoraho’. Naho wowe bazakwite ‘Agahebuzo’ ‘Umugi utaratereranywe’.»
Iryo ni Ijambo ry’Imana
ZABURI Zab 97 (96), 1.6.11-12
Inyik/ Uyu munsi urumuri rwaturasiyeho,
Umukiza yatuvukiye.
Uhoraho ni Umwami ! Isi nihimbarwe,
abaturiye inkombe nibasagwe n’ibyishimo !
Ijuru riramamaza ubutabera bwe,
maze imiryango yose ikarangamira ikuzo rye.
Urumuri rurasira ku ntungane,
ab’umutima ugororotse bakagira ibyishimo.
Ntungane, nimwishimire Uhoraho,
maze mumusingirize ubutungane bwe.
ISOMO RYA KABIRI
Isomo ryo mu ibaruwa Mutagatifu Pawulo Intumwa yandikiye Tito Tito 3,4-7
Bavandimwe, 4igihe higaragaje ubuntu bw’Imana Umukiza wacu n’urukundo ifitiye abantu, 5yaradukijije itabitewe n’ibyiza twaba twarakoze, ahubwo ibitewe n’impuhwe igira, idukirisha icyuhagiro dukesha kuvuka bwa kabiri no guhinduka abantu bashya muri Roho Mutagatifu. 6Kandi uwo Roho yamudusakajemo ku bwa Yezu Kristu Umukiza wacu, 7kugira ngo tube intungane kandi twiringire kuzahabwa umurage w’ubugingo bw’iteka, tubikesha ubuntu bwayo.
Iryo ni Ijambo ry’Imana
IBANGONDIRIMBO RIBANZIRIZA IVANJILI Lk 2,14
Alleluya Alleluya.
Imana nikuzwe mu bushorishori bw’ijuru,
kandi mu nsi abo ikunda bahorane amahoro.
Alleluya.
IVANJILI
✠ Amagambo yo mu Ivanjili Ntagatifu uko yanditswe na Luka
Lk 2,15-20.
15Abamalayika bamaze gusubira mu ijuru, abashumba bajya inama bati “Nimucyo tujye i Betelehemu, turebe ibyabaye Nyagasani atumenyesheje.: 16Nuko bagenda bihuta, basanga Mariya na Yozefu n’uruhinja ruryamye mu kavure. 17Bamaze kureba bamenyesha hose ibyo bari babwiwe kuri uwo mwana. 18Maze ababumvaga bose batangazwa n’ibyo abashumba bavugaga. 19Mariya we yashyinguraga mu mutima we ibyabaye byose, akabizirikana. 20Nuko abashumba bataha bakuza Imana kandi bayisingiza, babitewe n’ibyo bari babonye kandi bumvise bihuje n’uko bari babibwiwe.
Iyo ni Ivanjili Ntagatifu
MISA YA KU MANYWA
ISOMO RYA MBERE
Isomo ryo mu gitabo cy’Umuhanuzi Izayi Iz 52, 7-10
7Mbega ngo biraba byiza kurabukwa mu mpinga y’imisozi, ibirenge by’intumwa izanye inkuru nziza, ivuga amahoro, igatangaza amahirwe, ikabwira Siyoni iti «Imana yawe iraganje !» 8Umva ukuntu abarinzi bawe bahanikiye icyarimwe ijwi ry’ibisingizo, kuko biboneye n’amaso yabo Uhoraho agaruka muri Siyoni. 9Matongo ya Yeruzalemu nimuhanike, murangururire icyarimwe amajwi y’ibisingizo, kuko Uhoraho ahumurije umuryango we, agacungura Yeruzalemu. 10Uhoraho agaragaje mu maso y’amahanga ububasha bw’ukuboko kwe gutagatifuza, bityo impande zose z’isi zizabone agakiza k’Imana yacu.
Iryo ni Ijambo ry’Imana
ZABURI Zab 98 (97), 1, 2-3ab. 3c-4.5-6
Inyik/ Imipaka yose y’isi yabonye ugutsinda kw’Imana yacu.
Nimuririmbire Uhoraho indirimbo nshya,
kuko yakoze ibintu by’agatangaza.
Indyo ye, ukuboko kwe k’ubutagatifu,
byatumye atsinda.
Uhoraho yagaragaje ugutsinda kwe,
atangaza ubutabera bwe mu maso y’amahanga.
Yibutse ubuntu bwe n’ubudahemuka bwe,
agirira inzu ya Israheli.
Imipaka yose y’isi yabonye ugutsinda kw’Imana yacu.
Nimusingize Uhoraho ku isi hose,
nimuvuze impundu kandi muririmbe.
Nimucurangire Uhoraho ku nanga,
ku nanga no mu majwi y’indirimbo,
mu karumbeti no mu ijwi ry’impanda,
nimusingize Umwami, Uhoraho.
ISOMO RYA KABIRI
Isomo ryo mu ibaruwa yandikiwe Abahebureyi, Heb 1, 1-6
Bavandimwe, Imana imaze kubwira abasokuruza bacu kenshi no ku buryo bwinshi ikoresheje abahanuzi, 2natwe muri iyi minsi turimo, ari na yo y’imperuka, yatubwirishije Umwana wayo ari We yageneye kwegurirwa byose, akaba ari na We yabiremesheje byose iyo biva bikagera. 3Mwana uwo, ni We buranga bw’ikuzo ry’Imana n’ishusho rya kamere yayo, ni na We kandi uhagaritse byose ku bubasha bw’ijambo rye. Amaze rero kuhagira abantu ibyaha byabo, yicaye iburyo bwa Nyir’ikuzo mu ijuru. 4Asumba atyo abamalayika kuko n’izina yahawe ritambutse kure ayabo. 5Koko rero ni nde wo mu bamalayika Imana yigeze ibwira iti «Uri Umwana wanjye; ni Jye wakwibyariye uyu munsi?» Cyangwa se iti «Nzamubera umubyeyi, na we ambere umwana?» 6Kandi igihe yohereje imfura yayo ku isi yaravuze iti «Abamalayika bose b’Imana bazamupfukamire. »
Iryo ni Ijambo ry’Imana
IBANGONDIRIMBO RIBANZIRIZA IVANJILI
Alleluya Alleluya.
Uyu munsi urumuri rwamurikiye isi.
Mahanga yose, nimwinjire mu ikuzo ry’Imana, nimuze mwese kwambaza Nyagasani.
Alleluya
IVANJILI (Isomo rirerire)
✠ Intangiriro y’Ivanjili ntagatifu uko yanditswe na Yohani
Yh 1,1-18
1Mu ntangiriro Jambo yariho, kandi Jambo yabanaga n’Imana, kandi Jambo akaba Imana. 2Ubwe mu ntangiriro yabanaga n’Imana. 3Ni we ibintu byose bikesha kubaho, nta n’ikiremwa na kimwe cyabayeho bitamuturutseho. 4Yari asanzwe yifitemo ubugingo, kandi ubwo bugingo bukaba urumuri rw’abantu. 5Nuko urumuri rumurika mu mwijima, ariko umwijima wanga kurwakira.
6Habayeho rero umuntu woherejwe n’Imana, izina rye rikaba Yohani. 7Yazanywe no kuba umugabo wo guhamya iby’urwo rumuri, kugira ngo bose bamukeshe kwemera. 8Si we wari urumuri, ahubwo yari umugabo uhamya iby’urwo rumuri. 9Jambo ni we wari urumuri nyakuri, rumurikira umuntu wese uza kuri iyi si. 10Yari mu isi kandi isi yabayeho ku bwe, ariko isi irarenga ntiyamumenya. ”Yaje mu bye, ariko abe ntibamwakira. 12Nyamara abamwakiriye bose yabahaye ububasha bwo guhinduka abana b’Imana, abo ni abemera Izina rye. 13Ntibavutse ku bw’amaraso cyangwa ku bushake bw’umubiri, cyangwa se ku bushake bw’umuntu, ahubwo bavutse ku bw’Imana.
,4Nuko Jambo yigira umuntu maze abana natwe kandi twibo- nera ikuzo rye, ikuzo Umwana w’ikinege akomora kuri Se, akaba asendereye ubuntu n’ukuri. 15Yohani yabaye umugabo wo guhamya ibimwerekeyeho, maze arangurura ijwi avuga ati «Nguyu uwo navuze nti ‘Uje ankurikiye aranduta, kuko yariho mbere yanjye.’» 16Kandi twese twahawe ku busendere bwe, tugirirwa ubuntu bugeretse ku bundi. l7Uko Amategeko yatanzwe anyuze kuri Musa, ni na ko ubuntu n’ukuri byatugejejweho binyujijwe kuri Yezu Kristu. 18Nta wigeze abona Imana na rimwe ; Umwana w’ikinege uba muri Se ni We wayimenyekanishije.
Iyo ni Ivanjili Ntagatifu
IVANJILI (Isomo rigufi)
✠ Intangiriro y’Ivanjili ntagatifu uko yanditswe na Yohani
Yh 1,1-5. 9-14
1Mu ntangiriro Jambo yariho, kandi Jambo yabanaga n’Imana, kandi Jambo akaba Imana. 2Ubwe mu ntangiriro yabanaga n’Imana. 3Ni we ibintu byose bikesha kubaho, nta n’ikiremwa na kimwe cyabayeho bitamuturutseho. 4Yari asanzwe yifitemo ubugingo, kandi ubwo bugingo bukaba urumuri rw’abantu. 5Nuko urumuri rumurika mu mwijima, ariko umwijima wanga kurwakira. 9Jambo ni we wari urumuri nyakuri, rumurikira umuntu wese uza kuri iyi si. 10Yari mu isi kandi isi yabayeho ku bwe, ariko isi irarenga ntiyamumenya. 11Yaje mu bye, ariko abe ntibamwakira. 12Nyamara abamwakiriye bose yabahaye ububasha bwo guhinduka abana b’Imana, abo ni abemera Izina rye. 13Ntibavutse ku bw’amaraso cyangwa ku bushake bw’umubiri, cyangwa se ku bushake bw’ umuntu, ahubwo bavutse ku bw’Imana. 14Nuko Jambo yigira umuntu maze abana natwe kandi twibonera ikuzo rye, ikuzo Umwana w’ikinege akomora kuri Se, akaba asendereye ubuntu n’ukuri.
Iyo ni Ivanjili Ntagatifu
KU CYUMWERU CYA 1 NYUMA YA NOHELI
UMURYANGO MUTAGATIFU WA YEZU, MARIYA NA YOZEFU
ISOMO RYA MBERE
Isomo ryo mu gitabo cy’Intangiriro, Intg 15,1-6 ; 21,1-3
Muri iyo minsi, 15, 1Uhoraho abwirira Abramu mu nzozi, ati «Abramu, ntutinye ndi ingabo igukingiye; ibihembo byawe bizaba byinshi cyane.» 2Abramu aramusubiza ati «Nyagasani Mana, wampa iki? Jyewe ngiye gupfa nta kana, kandi uzanzungura ni Eliyezeri w’i Damasi.» 3Ati «Dore nta rubyaro wampaye, none ngiye kuzungurwa numwe mu bagaragu banjye.» “Uhoraho ni ko kumubwira ati «Nta bwo ari we uzakuzungura, ahubwo uzazungurwa n’uzaturuka mu maraso yawe.» 5Nuko Uhoraho amujyana hanze aramubwira ati «Ubura amaso urebe hejuru, maze ubare inyenyeri niba ushobora kuzibara.» Nuko aramubwira ati «Dore ni kuriya urubyaro rwawe ruzangana.» 6Abramu yemera Uhoraho, bituma amubonamo ubutungane. 21,1Uhoraho agenderera Sara nk’uko yari yarabivuze, amugenzereza uko yari yaramubwiye. 2Sara asama inda, abyarira umusaza Abrahamu umwana w’umuhungu, ku gihe Imana yari yavuze. 3Abrahamu yita umuhungu we Izaki, uwo Sara yari yamubyariye.
Iryo ni Ijambo ry’Imana
ZABURI Zab 105 (104), 1-2, 3-4, 5-6, 8-9
Inyik/ Uhoraho ahora yibuka ibyo yasezeranye.
Nimushimire Uhoraho mwambaze Izina rye,
nimurate ibigwi bye mu yandi mahanga.
Nimumuririmbire, mumucurangire,
nimuzirikane ibitangaza yakoze.
Nimwishimire Izina rye ritagatifu,
muhimbarwe, mwebwe abashakashaka Uhoraho !
Nimugarukire Uhoraho Nyir’ububasha,
mushakashake uruhanga rwe ubudahwema.
Nimwiyibutse ibikorwa bye bihebuje,
ibitangaza yakoze, n’amatangazo yivugiye,
mwebwe nkomoko ya Abrahamu umugaragu we,
bahungu ba Yakobo, abatoni be !
Ahora yibuka ibyo yasezeranye bidasubirwaho,
ijambo yarahiriye amasekuruza igihumbi,
rya sezerano yagiranye na Abrahamu,
akarisubiriramo Izaki mu ndahiro.
ISOMO RYA KABIRI
Isomo ryo mu ibaruwa yandikiwe Abahebureyi Heb 11,8.11-12.17-19
Bavandimwe, 8ukwemera kwatumye Abrahamu yumvira Imana, agenda agana igihugu yari agiye guhabwa ho umurage, kandi agenda atazi iyo ajya. 1lUkwemera kwatumye na Sara wari ugeze mu zabukuru, ahabwa ubushobozi bwo gusama inda, kuko yari yizeye ubudahemuka bw’Uwabagiriye amasezerano. 12Ni na yo mpamvu umuntu umwe, ndetse wari wegereje urupfu, yakomotsweho n’imbaga ingana n’inyenyeri zo mu kirere, kandi itabarika nk’umusenyi wo ku nkombe y’inyanja. 17Ukwemera kwatumye mu gihe cy’igeragezwa, Abrahamu atura Izaki ho igitambo; atura umwana we w’ikinege kandi yari yarahawe amasezerano 18abwirwa ati «Izaki ni we uzaguhesha urubyaro ruzakwitirirwa.» 19Yiyemezaga ko Imana ishobora no kuzura uwapfuye, bituma asubizwa umwana we, biba n’amarenga y’ibizaza.
Iryo ni Ijambo ry’Imana
IBANGONDIRIMBO RIBANZIRIZA IVANJILI Zab 118 (117), 26-27
Alleluya Alleluya.
Nihasingizwe uje mu izina ry’Uhoraho !
Uhoraho ni Imana aratumurikira.
Alleluya.
IVANJILI (Isomo rirerire)
✠ Amagambo yo mu Ivanjili Ntagatifu uko yanditswe na Luka
Lk 2, 22-40
22Umunsi w’isukurwa wategetswe na Musa uragera, Ababyeyi ba Yezu bamujyana i Yeruzalemu kumutura Nyagasani, 7nk’uko byanditse mu itegeko rya Nyagasani ngo «Umuhungu wese w’imfura azaba intore y’umwihariko wa Nyagasani.» 24Bari bajyanywe kandi no gutura igitambo cy’intungura ebyiri cyangwa inuma ebyiri bakurikije itegeko rya Nyagasani.
25Icyo gihe i Yeruzalemu hari umuntu witwaga Simewoni; yari intungane kandi yubaha Imana. Yari ategereje ihumure rya Israheli, kandi Roho Mutagatifu yari amurimo. 26Byongeye Roho Mutagatifu yari yaramuhishuriye ko atazapfa atabonye Kristu wa Nyagasani. 27Nuko Simewoni aza mu Ngoro abibwirijwe na Roho Mutagatifu. Igihe Ababyeyi b’Umwana Yezu bamuzanye ngo bamurangirizeho ibyategetswe, 28na we amwakira mu biganza bye, ashimira Imana avuga ati 29«Nyagasani, noneho sezerera umugaragu wawe mu mahoro nk’uko wabivuze ; 7kuko amaso yanjye yabonye agakiza kawe 31wageneye imiryango yose. 32Ni we rumuri ruboneshereza abanyamahanga, akaba n’ikuzo ry’umuryango wawe Israheli !». 33Se na nyina batangazwaga n’ibyo bamuvugagaho.
34Nuko Simewoni arabashima, maze abwira Mariya nyina wa Yezu ati «Dore uyu nguyu yashyiriweho kubera benshi muri Israheli impamvu yo korama cyangwa gukira, azaba n’ikimenyetso bazagiriraho impaka. 35Nawe kandi inkota izakwahuranya umutima. Bityo ibitekerezo biri mu mitima ya benshi bigaragare.» 36Hakaba n’umuhanuzikazi Ana, umukobwa wa Fanuweli wo mu muryango wa Azeri; yari ageze mu zabukuru. Nyuma y’ubusugi bwe yamaranye n’umugabo we imyaka irindwi, 37hanyuma aba umupfakazi kugeza mu kigero cy’imyaka mirongo inani n’ine. Ntiyavaga mu Ngoro, agakorera Imana umunsi n’ijoro, asiba kurya kandi asenga. 38Nuko uwo mwanya na we arahagoboka, atangira gusingiza Imana no gutekerereza iby’uwo mwana abari bategereje ugukira kwa Yeruzalemu. 39Bamaze gutunganya ibyategetswe na Nyagasani, basubira mu Galileya mu mugi wabo wa Nazareti. 40Nuko umwana arakura, arakomera, abyirukana ubwenge, yuzuye ubwitonzi, afite n’ubutoni ku Mana.
Iyo ni Ivanjili Ntagatifu
IVANJILI (Isomo rigufi)
✠ Amagambo yo mu Ivanjili Ntagatifu uko yanditswe na
Luka Lk 2, 22. 39-40
22Umunsi w’isukurwa wategetswe na Musa uragera, Ababyeyi ba Yezu bamujyana i Yeruzalemu kumutura Nyagasani. 39Bamaze gutunganya ibyategetswe na Nyagasani, basubira mu Galileya mu mugi wabo wa Nazareti. 40Nuko umwana arakura, arakomera, abyirukana ubwenge, yuzuye ubwitonzi, afite n’ubutoni ku Mana.
Iyo ni Ivanjili Ntagatifu
KU WA 1 MUTARAMA
UMUNSI WA MUNANI MU BIRORI BYA NOHELI
MARIYA MUTAGATIFU
UMUBYEYI W’IMANA
ISOMO RYA MBERE
Isomo ryo mu gitabo cy’Ibarura Ibar 6, 22-27
7Uhoraho abwira Musa ati 23 «Dore ibyo uzabwira Aroni n’abahungu be : Abayisraheli muzajya mubaha umugisha muvuga muti 24‘Uhoraho aguhe umugisha kandi akurinde ! 25Uhoraho akurebane impuhwe kandi agusakazemo inema ze ! 26Uhoraho akwiteho kandi aguhe amahoro !’ 27Nguko uko bazambariza izina ryanjye ku Bayisraheli, nanjye mbahe umugisha.»
Iryo ni Ijambo ry’Imana
ZABURI Zab 67 (66), 2b.3, 5, 7.8b
Inyik/ Imana nitubabarire maze iduhe umugisha !
Imana nitwereke uruhanga rwayo rubengerana,
kugira ngo ku isi bazamenye ko ari wowe ugenga,
n’amahanga yose amenye ko ari wowe ukiza.
Amoko yose niyishime aririmbe,
kuko utegekana ubutabera ibihugu byose,
ukagenga amahanga yose y’isi.
Ubutaka bwacu bweze imbuto,
Nyagasani Imana yacu aduhunda atyo imigisha.
Niyubahwe n’isi yose aho iva ikagera.
ISOMO RYA KABIRI
Isomo ryo mu ibaruwa Mutagatifu Pawulo Intumwa yandikiye Abanyagalati Gal 4,4-7
Bavandimwe, 4igihe cyagenwe kigeze Imana yohereje Umwana wayo avuka ku mugore, kandi avuka agengwa n’amategeko, 5kugira ngo acungure abari bakigengwa n’amategeko, maze duhabwe kuba abana Imana yihitiyemo. 6Kandi koko muri abana b’Imana, yo yohereje Roho w’Umwana wayo mu mitima yanyu ngo arangurure ijwi agira ati «Abba, Data.» 7Bityo rero ntukiri umugaragu, ahubwo uri umwana; kandi ubwo uri umwana, Imana iguha kuba n’umugenerwamurage .
Iryo ni Ijambo ry’Imana
IBANGONDIRIMBO RIBANZIRIZA IVANJILI Heb 1,1-2
Alleluya Alleluya.
Kera Imana yavugishije abasokuruza bacu ikoresheje abahanuzi.
Ubu itubwirisha Umwana wayo.
Alleluya.
IVANJILI
✠ Amagambo yo mu Ivanjili Ntagatifu uko yanditswe na
Luka Lk 2,16-21
Abamalayika bamaze gusubira mu ijuru, 16abashumba bagenda bihuta, basanga Mariya na Yozefu n’uruhinja ruryamye mu kavure. 17Bamaze kureba bamenyesha hose ibyo bari babwiwe kuri uwo mwana. 18Maze ababumvaga bose batangazwa n’ibyo abashumba bavugaga. l9Mariya we yashyinguraga mu mutima we ibyabaye byose, akabizirikana. 20Nuko abashumba bataha bakuza Imana kandi bayisingiza, babitewe n’ibyo bari babonye kandi bumvise bihuje n’uko bari babibwiwe. 21Hashize iminsi munani igihe cyo kugenya Umwana kiragera ; bamwita izina rya Yezu, Malayika yari yamwise atarasamwa.
Iyo ni Ivanjili Ntagatifu
KU CYUMWERU CYA 2 NYUMA YA NOHELI
ISOMO RYA MBERE
Isomo ryo mu gitabo cya Mwene Siraki Sir 24,1-2.8-12
1Ubuhanga buvuga igisingizo cyabwo, bukivugira rwagati mu ikoraniro. 2Mu mbaga y’Umusumbabyose bubumbura umunwa, maze imbere ya Nyir’ububasha bukisingiza bugira buti 8«Umuremyi wa byose yampaye itegeko, Uwandemye antegeka gushinga ihema ryanjye, arambwira ati ‘Shinga ihema ryawe kwa Yakobo, uhabwe umugabane wawe muri Israheli.’ 9Yandemye mbere y’ibihe byose kuva mu ntangiriro, kandi kugeza ubuziraherezo sinzareka kubaho. 10Naramukoreye imbere ye mu ihema ritagatifu, naje gutura ntyo muri Siyoni ; 11ni na ko yampaye kuruhukira mu mugi w’inkundwakazi, none nkaba ntwara muri Yeruzalemu. 12Nashinze imizi mu muryango ufite ikuzo, mu mugabane w’Uhoraho, mu murage we.»
Iryo ni Ijambo ry’Imana
ZABURI Zab 147 (146-147), 12-13,14-15,19-20
Inyik/ Jambo yigize umuntu maze abana natwe,
tumusingize.
Yeruzalemu, amamaza Uhoraho,
Siyoni, singiza Imana yawe !
Kuko yakajije ibihindizo by’amarembo yawe,
agaha umugisha abana bawe bagutuyemo.
Yasakaje amahoro mu bwatsi bwawe,
aguhaza inkongote y’ingano zeze neza.
Yohereza amategeko ye ku isi,
ijambo rye rikihuta bitangaje.
Amenyesha bene Yakobo ijambo rye,
agatangariza Israheli amategeko ye.
Nta yandi mahanga yigeze agenzereza atyo,
ngo ayamenyeshe amateka ye.
ISOMO RYA KABIRI
Isomo ryo mu ibaruwa Mutagatifu Pawulo Intumwa yandikiye Abanyefezi Ef 1, 3-6.15-18
Bavandimwe, 3nihasingizwe Imana Se w’Umwami wacu Yezu Kristu, Yo yadusakajemo imigisha y’amoko yose ituruka kuri Roho, mu ijuru, ku bwa Kristu. 4Nguko uko yadutoreye muri We nyine mbere y’ihangwa ry’ibiriho byose, kugira ngo tuzayihore imbere mu rukundo, turi intungane n’abaziranenge. 5Igena ityo mbere y’igihe ko tuzayibera abana yihitiyemo, tubikesheje Yezu Kristu. Uko ni ko yabyishakiye ku buntu bwayo, 6kugira ngo izahore isingirizwa ingabire yaduhereye ubuntu mu Mwana wayo w’Inkoramutima.
15Ni cyo gituma nanjye kuva aho menyeye ukwemera mufitiye Nyagasani Yezu, n’urukundo mugirira abatagatifujwe bose, 16ntahwema gushimira Imana kubera mwe, mbibuka mu masengesho yanjye. 17Imana y’Umwami wacu Yezu Kristu, Yo Mubyeyi wuje ikuzo, nibahe umutima w’ubwenge n’ubujijuke maze muyimenye rwose. 18Ubonye yamurikiye amaso y’umutima wanyu, mugasobanukirwa n’ukwizera mukesha ubutorwe bwanyu, n’ikuzo rihebuje muzigamiweho umurage hamwe n’abatagatifujwe !
Iryo ni Ijambo ry’Imana
IBANGONDIRIMBO RIBANZIRIZA IVANJILI 1 Tim 3,16
Alleluya Alleluya.
Uragasingizwa Nyagasani Yezu,
wowe wigaragarije muri kameremuntu,
ukamamazwa mu banyamahanga,
uragasingizwa !
Alleluya.
IVANJILI (Isomo rirerire)
✠ Amagambo yo mu Ivanjili Ntagatifu uko yanditswe na
Yohani Yh 1,1-18
1Mu ntangiriro Jambo yariho, kandi Jambo yabanaga n’Imana, kandi Jambo akaba Imana. 2Ubwe mu ntangiriro yabanaga n’Imana. 3Ni we ibintu byose bikesha kubaho, nta n’ikiremwa na kimwe cyabayeho bitamuturutseho. 4Yari asanzwe yifitemo ubugingo, kandi ubwo bugingo bukaba urumuri rw’abantu. 5Nuko urumuri rumurika mu mwijima, ariko umwijima wanga kurwakira.
6Habayeho rero umuntu woherejwe n’Imana, izina rye rikaba Yohani. 7Yazanywe no kuba umugabo wo guhamya iby’urwo rumuri, kugira ngo bose bamukeshe kwemera. 8Si we wari urumuri, ahubwo yari umugabo uhamya iby’urwo rumuri. 9Jambo ni we wari urumuri nyakuri, rumurikira umuntu wese uza kuri iyi si.10Yari mu isi kandi isi yabayeho ku bwe, ariko isi irarenga ntiyamumenya. 11Yaje mu bye, ariko abe ntibamwakira. 12Nyamara abamwakiriye bose yabahaye ububasha bwo guhinduka abana b’Imana, abo ni abemera Izina rye. 13Ntibavutse ku bw’amaraso cyangwa ku bushake bw’umubiri, cyangwa se ku bushake bw’umuntu, ahubwo bavutse ku bw’Imana.
14Nuko Jambo yigira umuntu maze abana natwe kandi twibo- nera ikuzo rye, ikuzo Umwana w’ikinege akomora kuri Se, akaba asendereye ubuntu n’ukuri. 15Yohani yabaye umugabo wo guhamya ibimwerekeyeho, maze arangurura ijwi avuga ati «Nguyu uwo navuze nti ‘Uje ankurikiye aranduta, kuko yariho mbere yanjye.’» 16Kandi twese twahawe ku busendere bwe, tugirirwa ubuntu bugeretse ku bundi. 17Uko Amategeko yatanzwe anyuze kuri Musa, ni na ko ubuntu n’ukuri byatugejejweho binyujijwe kuri Yezu Kristu.18 Nta wigeze abona Imana na rimwe ; Umwana w’ikinege uba muri Se ni We wayimenyekanishije.
Iyo ni Ivanjili Ntagatifu
IVANJILI (Isomo rigufi)
✠ Amagamb yo mu Ivanjili Ntagatifu uko yanditswe na
Yohani Yh 1,1-5. 9-14
1Mu ntangiriro Jambo yariho, kandi Jambo yabanaga n’Imana, kandi Jambo akaba Imana. 2Ubwe mu ntangiriro yabanaga n’Imana. 3Ni we ibintu byose bikesha kubaho, nta n’ikiremwa na kimwe cyabayeho bitamuturutseho. 4Yari asanzwe yifitemo ubugingo, kandi ubwo bugingo bukaba urumuri rw’abantu. 5Nuko urumuri rumurika mu mwijima, ariko umwijima wanga kurwakira. 9Jambo ni we wari urumuri nyakuri, rumurikira umuntu wese uza kuri iyi si. 10Yari mu isi kandi isi yabayeho ku bwe, ariko isi irarenga ntiyamumenya. «Yaje mu bye, ariko abe ntibamwakira. 12 Nyamara abamwakiriye bose yabahaye ububasha bwo guhinduka abana b’Imana, abo ni abemera Izina rye. 13Ntibavutse ku bw’amaraso cyangwa ku bushake bw’umubiri, cyangwa se ku bushake bw’umuntu, ahubwo bavutse ku bw’Imana. 14Nuko Jambo yigira umuntu maze abana natwe kandi twibonera ikuzo rye, ikuzo Umwana w’ikinege akomora kuri Se, akaba asendereye ubuntu n’ukuri.
Iyo ni Ivanjili Ntagatifu
KU CYUMWERU GIKURIKIRA UWA 1 MUTARAMA
UKWIGARAGAZA KWA NYAGASANI
ISOMO RYA MBERE
Isomo ryo mu gitabo cy’Umuhanuzi Izayi Iz 60,1-6
1Yewe Yeruzalemu, haguruka ubengerane kuko urumuri rwawe ari nguru, kandi ikuzo ry’Uhoraho rikaba rikurasiyeho. 2Nyamara dore umwijima utwikiriye isi, n’icuraburindi ritwikiriye amahanga ; ariko wo we Uhoraho azakurasiraho, n’ ikuzo rye rikubengeraneho. 3Amahanga azagana urumuri rwawe, abami basange umucyo ukurasiyeho. 4Kebuka impande zose maze witegereze : dore bose barakoranye baje bakugana, abahungu bawe baturutse iyo bigwa, n’abakobwa bawe baje bahagatiwe.
5Nuko uzabirebe maze unezerwe, umutima wawe wisimbize, utaratswe n’ibyishimo kuko ari wowe bazazanira ubukire bwo hakurya y’inyanja, n’umutungo w’amahanga ukazataha iwawe. 6Amashyo y’ingamiya azakuzuranaho, ingamiya zikiri nto z’i Madiyani n’i Eyifa; abantu bose b’i Saba bazaza bikoreye zahabu n’ububani, kandi baze baririmba ibisingizo by’Uhoraho.
Iryo ni Ijambo ry’Imana
ZABURI Zab 72 (71), 1-2, 7-8,10-11,12-13
Inyik/ Nyagasani, abami bose bazapfukama imbere yawe,
amahanga yose akuyoboke.
Mana, umwami umwegurire ubucamanza bwawe,
uwo mwana w’umwami umutoze ubutabera bwawe ;
acire umuryango wawe imanza ziboneye,
kandi arengere n’ingorwa zawe.
Mu gihe cye ubutabera buzasagamba,
n’amahoro asesure mu mezi atabarika.
Azategeka kuva ku nyanja kugera ku yindi,
avane ku Ruzi ageze ku mipaka y’isi.
Abami b’i Tarishishi n’ab’ibirwa bazamutura,
abami b’i Seba n’ab’i Saba bamurabukire.
Abami bose bazapfukama imbere ye,
amahanga yose amuyoboke.
Azarokora ingorwa zitakamba,
n’indushyi zitagira kirengera.
Azagirira ibambe ingorwa n’utishoboye,
aramire ubuzima bwabo.
ISOMO RYA KABIRI
Isomo ryo mu ibaruwa Mutagatifu Pawulo Intumwa yandikiye Abanyefezi Ef 3, 2-3a. 5-6
Bavandimwe, 2ngira ngo mwamenye ingabire Imana yampaye ku buntu ari mwe ibigirira, kugira ngo isohoze umugambi wayo, 3aikampishurira ibanga ryayo. 5Iryo banga Imana ntiyigeze iribwira abantu bo hambere, nk’uko ubu imaze kurihishurira intumwa zayo ntagatifu n’abahanuzi bayo, ku bwa Roho Mutagatifu. 6None dore n’abanyamahanga na bo bemerewe gusangira umurage umwe natwe, bakaba ingingo z’umubiri umwe hamwe natwe, kandi bakabona uruhare ku isezerano rimwe hamwe natwe muri Kristu Yezu, babikesha Inkuru Nziza.
Iryo ni Ijambo ry’Imana
IBANGONDIRIMBO RIBANZIRIZA IVANJILI Mt 2,2
Alleluya Alleluya.
Twabonye inyenyeri ya Nyagasani mu burasirazuba,
none tuje kumuramya.
Alleluya.
IVANJILI
✠ Amagambo yo mu Ivanjili Ntagatifu uko yanditswe na
Matayo Mt 2,1-12
1Yezu amaze kuvukira i Betelehemu ya Yudeya ku ngoma y’umwami Herodi, abanyabwenge baturutse iburasirazuba baza i Yeruzalemu 2babaza bati «Umwami w’Abayahudi uherutse kuvuka ari hehe? Twabonye inyenyeri ye mu burasirazuba, none tuje kumuramya.» Umwami Herodi abyumvise akuka umutima, we na Yeruzalemu yose. 4Akoranya abatware bose b’abaherezabita- mbo n’abigishamategeko b’umuryango, abasiganuza aho Kristu yagombaga kuzavukira. 5Baramusubiza bati «Ni i Betelehemu ya Yudeya ; kuko ari byo umuhanuzi yanditse ati 6 ‘Nawe Betelehemu, umusozi wo muri Yudeya, si wowe giseswa mu migi yaho yose; kuko ari wowe uzaturukaho umutware uzaragira umuryango wanjye Israheli’.» 7Nuko Herodi atumiza ba banyabwenge rwihishwa, abasiganuza igihe inyenyeri yabonekeye, 8abohereza i Betelehemu ababwira ati «Nimugende mubaririze iby’uwo mwana; maze nimumubona muzabimenyeshe kugira ngo nanjye njye kumuramya.» 9Bamaze kumva amagambo y’umwami baragenda. Nuko ya nyenyeri bari baboneye mu burasirazuba ibajya imbere, irinda igera hejuru y’aho umwana yari ari irahahagarara. 10Ngo babone inyenyeri barishima cyane. 11Binjiye mu nzu babona umwana na nyina Mariya; nuko barapfukama baramuramya. Hanyuma bapfundura impago zabo bamutura zahabu, ububane n’imibavu. l2Cyakora baburirwa mu nzozi kudasubira kwa Herodi, banyura indi nzira basubira mu gihugu cyabo.
Iyo ni Ivanjili Ntagatifu
KU CYUMWERU GIKURIKIRA
UKWIGARAGAZA KWA NYAGASANI
BATISIMU YA NYAGASANI
ISOMO RYA MBERE
Isomo ryo mu gitabo cy’Umuhanuzi Izayi Iz 55,1-11
1Yemwe abafite inyota nimugane ku mazi, n’iyo mwaba mudafite feza, nimuze mwese ! Nimusabe ingano zo kurya ku buntu ; nimuze kandi munywe amata na divayi nta feza nta n’ubwishyu ! 2Kuki mwatagaguza feza yanyu ku biribwa bitari byo, n’imari yanyu mukayitanga ku bidashobora kubahaza ? Nimutege amatwi rero munyumve kandi murye ikiri cyiza; muronkere ibyishimo byanyu mu biribwa biryohereye. 3Nimutege amatwi, nimunsange, mwumve maze muzabeho. Nzagirana namwe isezerano rizahoraho, nzabakomereze ibyiza nasezeranyije Dawudi. 4Dore nari naramugize umuhamya mu miryango yose, aba umutware n’umutegetsi w’amahanga. 5Nawe ihanga utazi uzarihamagara, n’ihanga ritigeze rikumenya rizakwirukira, ku mpamvu y’Uhoraho ari we Mana ya we, no kubera Nyir’ubutagatifu wa Israheli waguhaye ikuzo rye.
6Nimushakashake Uhoraho igihe agishobora kubonwa, nimumwi-yambaze igihe akiri hafi. 7Umugome nareke inzira ye, n’umugiranabi areke ibitekerezo bye. Nagarukire Uhoraho uzamwereka impuhwe ze, ahindukirire Imana ikenutse ku mbabazi. 8Kandi ni koko ibitekerezo byanyu si byo byanjye, n’inzira zanjye si zo zanyu, uwo ni Uhoraho ubivuze. 9Nk’uko ijuru ryisumbuye cyane ku isi, ni na ko inzira zanjye zisumbye kure izanyu, n’ibitekerezo byanjye bigasumba ibyanyu. 10Nanone kandi nk’uko imvura n’urubura bimanuka ku ijuru, ntibisubireyo bitabobeje ubutaka, bitabumejejeho imyaka kandi ngo biyikuze, ngo bihe umubibyi imbuto n’ifunguro rimutunga,
«ni na ko ijambo risohotse mu munwa wanjye : ritangarukaho amara masa, ritarangije ugushaka kwanjye ngo risohoze icyo naritumye.
Iryo ni Ijambo ry’Imana
INDIRIMBO Iz 12, 2. 4b-e. 5b-6
Inyik/ Muzavoma amazi ku masoko y’agakiza, mwishimye.
Dore Imana, Umukiza wanjye,
ndamwiringira kandi sinkigira ubwoba.
Kuko imbaraga zanjye n’indirimbo yanjye ari uhoraho,
ni we wambereye agakiza.
Nimushimire Uhoraho, murate izina rye,
nimwamamaze ibikorwa bye mu mahanga.
Nimubisubiremo muti «Izina rye ni ikirangirire.»
Nimuririmbe Uhoraho kuko yakoze ibintu by’agatangaza,
kandi mubyamamaze mu nsi hose.
Rangurura ijwi uvuze impundu wowe utuye i Siyoni,
kuko Nyir’ubutagatifu wa Israheli,
utuye iwawe rwagati ari Igihangange.
ISOMO RYA KABIRI
Isomo ryo mu ibaruwa ya mbere ya Mutagatifu Yohani Intumwa 1 Yh 5,1-9
Nkoramutima zanjye, 1umuntu wese wemera ko Yezu ari Kristu yabyawe n’Imana ; kandi n’umuntu wese ukunda Imana Umubyeyi, akunda n’uwabyawe na Yo. 2Dore icyo tumenyeraho ko dukunda abana b’Imana : ni uko dukunda Imana kandi tugakurikiza amategeko yayo. 3Dore gukunda Imana icyo ari cyo : ni uko twakurikiza amategeko yayo. Kandi amategeko yayo ntavunanye, 4kuko icyabyawe n’Imana cyose gitsinda isi. Intsinzi kandi yaganje isi ni ukwemera kwacu.5 Ni nde utsinda isi atari uwemera ko Yezu ari Umwana w’Imana ? 6Uwo nyine ni We waje ku bw’amazi n’amaraso, aba Yezu Kristu. Yaje atari ku bw’amazi yonyine, ahubwo ku bw’amazi n’amaraso ; ni Roho ubihamya kuko uwo Roho nyine ari ukuri. 7Ubwo rero hari ibintu bitatu byo kubihamya : 8Roho, amazi n’amaraso, kandi byose uko ari bitatu birahuje. 9Niba twakira ubuhamya bw’abantu, ubuhamya bw’Imana bwo burushijeho, kuko ari ubuhamya Imana yatanze ku Mwana wayo.
Iryo ni Ijambo ry’Imana
IBANGONDIRIMBO RIBANZIRIZA IVANJILI Mt 3, 16-17 ; Zab 29 (28), 3
Alleluya Alleluya.
Uyu munsi ijuru ryakingutse, maze Roho w’Imana amanukira kuri Yezu, ubwo ijwi ry’Imana Data rimanuka mu ijuru rivuga riti «Uyu ni Umwana wanjye nkunda cyane unyizihira.»
Alleluya.
IVANJILI
✠ Amagambo yo mu Ivanjili Ntagatifu uko yanditswe na
Mariko Mk 1, 7-11
Muri icyo gihe, Yohani Batisita 7yigishirizaga mu butayu avuga ati «Uje ankurikiye andusha ububasha; sinkwiye no kunama ngo mfundure udushumi tw’inkweto ze. 8Jyewe nababatirishije amazi, naho We azababatirisha Roho Mutagatifu» 9Muri iyo minsi Yezu ava i Nazareti ho muri Galileya, aza kubatizwa na Yohani muri Yorudani. 10Akiva mu mazi abona ijuru rirakingutse, na Roho Mutagatifu amumanukiraho nk’inuma. 11Nuko ijwi rituruka mu ijuru riti «Uri Umwana wanjye nkunda cyane unyizihira.»
Iyo ni Ivanjili Ntagatifu
* Ku cyumweru gikurikira Umunsi mukuru wa Batisimu ya Nyagasani, ni icyumweru cya 2 cyo mu Gihe gisanzwe cy’umwaka.
IGIHE CY’Igisibo
KU WA GATATU W’IVU
ISOMO RYA MBERE
Isomo ryo mu gitabo cy’Umuhanuzi Yoweli Yow 2,12-18
Uhoraho aravuze ati 12 «Nimungarukire n’umutima wanyu wose, mwigomwe mu byo kurya, murire kandi muganye. 13Nimushishimure imitima yanyu mureke ibyo mwambaye, maze mugarukire Uhoraho Imana yanyu, kuko agwa neza akanagira impuhwe ; atinda kurakara akaba n’indahemuka, kandi ntakunda guteza ibyago. 14Hari uwabimenya se ? Ahari wenda ntiyazisubiraho! Ahari wenda icyago ntiyazagisimbuza umugisha, akongera gushimishwa n’amaturo n’ibitambo mwatura Uhoraho Imana yanyu!
15Nimuvugirize ihembe i Siyoni, mutangaze hose Igisibo gita- gatifu, kandi mutumize bose mu iteraniro. 16Nimukoranye rubanda, muhamagaze ikoraniro ryose. Nimukoranye abasaza n’abato, ndetse n’abakiri ku ibere. Umukwe nasohoke mu nzu ye, umugeni na we ave mu cyumba cye. 17Abaherezabitambo ari bo bashinzwe imirimo y’Uhoraho, nibaririre hagati y’umuryango w’Ingoro n’urutambiro; nibatakambe bagira bati «Uhoraho babarira imbaga yawe ; wikoza isoni umurage wawe ngo amahanga awuhindure urw’amenyo. Ni iki cyatuma mu mahanga bavuga ngo : Mbese Imana yabo iba he?» 18Ni bwo Uhoraho agiriye ishyaka igihugu cye, maze ababarira umuryango we.»
Iryo ni Ijambo ry’Imana
ZABURI Zab 51 (50), 3-4,5-6 ab, 12-13,14.17
Inyik/ Tugirire imbabazi Nyagasani, kuko twagucumuyeho.
Mana yanjye, ngirira imbabazi ukurikije ineza yawe,
kubera impuhwe zawe nyinshi, umpanagureho ibyaha byanjye.
Nyuhagiraho wese ibicumuro byanjye,
maze unkize icyaha nakoze.
Koko nemeye ibicumuro byanjye,
icyaha cyanjye kimpora imbere.
Uwo nacumuyeho ni wowe wenyine,
maze ikibi wanga mba ari cyo nkora !
Mana yanjye, ndemamo umutima usukuye,
maze umvugururemo ibitekerezo biboneye.
Ntunyirukane ngo unte kure yawe,
cyangwa ngo unkuremo umwuka wawe uzira inenge.
Ahubwo mpa kwishimira ko nakijijwe,
kandi unkomezemo umutima wuje ineza.
Nyagasani, bumbura umunwa wanjye,
maze akanwa kanjye gatangaze ibisingizo byawe.
ISOMO RYA KABIRI
Isomo ryo mu ibaruwa ya kabiri Mutagatifu Pawulo Intumwa yandikiye Abanyakorinti 2 Kor 5,20-21 ; 6,1-2
Bavandimwe, 5,20ubu rero duhagarariye Kristu ; nk’aho Imana ubwayo yabashishikarije muri twe. Ngaho rero turabinginze mu izina rya Kristu : nimureke Imana ibigarurire ! 21Utigeze arangwaho icyaha Imana yamugize impongano y’ibyaha, kugira ngo muri We duhinduke abatunganiye Imana. 6,1Ubwo turi abafasha b’Imana, turabashishikariza kudapfusha ubusa ubuntu bwayo. 2Kuko ubwayo yivugira iti «Mu gihe gikwiye numvise isengesho ryawe, no ku munsi w’uburokorwe naragutabaye.» Ngiki rero koko igihe gikwiye ; nguyu koko umunsi w’uburokorwe.
Iryo ni Ijambo ry’Imana
IBANGONDIRIMBO RIBANZIRIZA IVANJILI Mt 4,17
Nyagasani, Ijatnbo ryawe ni ukuri, n’itegeko ryawe rikaba agakiza. Nyagasani aravuze ati «Nimwisubireho, kuko Ingoma y’ijuru yegereje !»
Nyagasani, Ijantbo ryawe ni ukuri, n’itegeko ryawe rikaba agakiza.
IVANJILI
✠ Amagambo yo mu Ivanjili Ntagatifu uko yanditswe na
Matayo Mt 6,1-6.16-18
Muri icyo gihe, abigishwa bari bateraniye iruhande rwa Yezu ku musozi, maze arababwira ati 1«Murajye mwirinda kugira neza mu maso y’abantu mugira ngo babarebe ; mwaba mwivukije ingororano kwa So mu ijuru. 2Igihe rero utanga imfashanyo ntukavugishe ihembe imbere yawe, nk’uko indyarya zibigira mu masengero no mu mayira, kugira ngo baratwe n’abantu. Ndababwira ukuri : baba bashyikiriye ingororano yabo. 3Naho wowe nutanga imfashanyo, ikiganza cyawe cy’ibumoso ntikikamenye icyo icy’iburyo gikora, 4bityo imfashanyo yawe ijye igirirwa mu ibanga ; maze So umenya ibyihishe azabikwiture.
5Igihe musenga ntimukagenze nk’indyarya, zikunda gusenga zihagaze mu masengero no mu mayirabiri ngo zibonwe n’abantu. Ndababwira ukuri: baba bashyikiriye ingororano yabo. 6Naho wowe nushaka gusenga, ujye winjira mu nzu yawe ukinge, maze usenge So uri aho atagaragara ; maze So umenya ibyihishe azabikwiture.
16Igihe musiba kurya ntimukijime mu maso nk’uko indyarya zibigira: zikambya agahanga kugira ngo babone ko zisiba. Ndababwira ukuri: ziba zashyikiriye ingororano yazo. 17Wowe rero nusiba kurya ujye wisiga mu mutwe, wiyuhagire mu maso 18kugira ngo utamenyesha abantu ko usiba, ahubwo bimenywe na So uri aho atagaragara ; maze So umenya ibyihishe azabikwiture.»
Iyo ni Ivanjili Ntagatifu
KU CYUMWERU CYA 1 CY’Igisibo
ISOMO RYA MBERE
Isomo ryo mu gitabo cy’Intangiriro Intg 9,8-15
Amazi y’umwuzure amaze gukama ku isi, 8Imana ibwira Nowa n’abahungu be iti 9«Dore ngiranye Isezerano namwe n’urubyaro rwanyu, 10kimwe n’ibinyabuzima byose muri kumwe : inyoni n’amatungo n’inyamaswa zose zo ku isi, mbese ibivuye mu bwato byose ntavanyemo n’inyamaswa z’ishyamba. 11Ngiri rero Isezerano ngiranye namwe: nta kinyamubiri kizongera kurimburwa n’amazi y’umwuzure, kandi nta n’umwuzure uzongera kurimbura isi.» 12Imana iravuga iti «Dore ikimenyetso cy’Isezerano ngiranye namwe, n’ibifite ubuzima byose muri kumwe, uko ibisekuruza byanyu bisimburana : 13nshyize umukororombya wanjye mu gicu, uzaba ikimenyetso cy’Isezerano ngiranye n’isi. 14Ninkoranyiriza ibicu hejuru y’isi mukabona uwo mukororombya,15 nzibuka Isezerano nagiranye namwe n’ikinyabuzima cyose ; amazi ntazongera kuba umwuzure warimbura ibinyamubiri byose.»
Iryo ni Ijambo ry’Imana
ZABURI Zab 25 (24), 4-5ab, 6-7, 8-9
Inyik/ Amayira yose y’Uhoraho ni urukundo n’ubudahemuka, akabigirira abakomera ku Isezerano rye.
Uhoraho, menyesha inzira zawe,
untoze kugendera mu tuyira twawe.
Nyobora mu kuri kwawe kandi ujye umbwiriza,
kuko ari wowe Mana nkesha umukiro wose.
Uhoraho, ibuka ineza n’urukundo
wagaragaje kuva kera na kare.
Ntiwite ku byaha n’amafuti nakoze nkiri muto,
ahubwo unyiteho ukurikije impuhwe zawe,
ugirire ubuntu bwawe, Uhoraho.
Uhoraho agwa neza akaba n’indakemwa,
ni cyo gituma abanyabyaha abagarura mu nzira nziza.
Abiyoroshya abaganisha ku butungane,
abacisha make akabatoza kunyura mu nzira ye.
ISOMO RYA KABIRI
Isomo ryo mu ibaruwa ya mbere ya Mutagatifu Petero Intumwa 1 Pet 3,18-22
Bavandimwe, 18Kristu ubwe yapfuye rimwe rizima azize ibyaha by’abantu; bityo n’ubwo ari intungane, apfira abagome kugira ngo abayobore ku Mana, abanje gupfa ku bw’umubiri, hanyuma agasubizwa ubuzima ku bwa Roho.
19Nuko ajya kwigisha ndetse n’abari bafungiye mu buroko bw’Ikuzimu, 20ba bandi bigomekaga ku Mana kera, mu gihe Yo yihanganaga birebire, kugeza kuri ya minsi Nowa yubakaga ubwato, ari bwo bwinjiwemo n’abantu bake bagera ku munani, maze bagakizwa n’amazi. 21Ayo mazi yagenuraga batisimu ibakiza ubu ngubu : ariko atari iyuhagira ubwandure bw’umubiri, ahubwo ya yindi ibaha kugana Imana mufite umutima utunganye, ikabakirisha izuka rya Yezu Kristu 22wazamutse mu ijuru, none akaba ari iburyo bw’Imana, akayobokwa n’Abamalayika, Abanyabutegetsi n’Abanyabubasha.
Iryo ni Ijambo ry’Imana
IBANGONDIRIMBO RIBANZIRIZA IVANJILI
Nyagasani, ijambo ryawe ni ukuri, n’itegeko ryawe rikaba agakiza. Umuntu ntatungwa n’umugati gusa,
ahubwo atungwa n’ijambo ryose rivuye mu kanwa k’Imana.
Nyagasani, ijambo ryawe ni ukuri, n’itegeko ryawe rikaba agakiza.
IVANJILI
✠ Amagambo yo mu Ivanjili Ntagatifu uko yanditswe na
Mariko Mk 1,12-15
Muri icyo gihe, Yezu amaze kubatizwa 12Roho Mutagatifu amuga-nisha mu butayu. 13Ahamara iminsi mirongo ine ashukwa na Sekibi. Yahabanaga n’inyamaswa, abamalayika bakamuhereza. 14Yohani amaze gutangwa, Yezu aza mu Galileya. Yamamaza Inkuru Nziza y’Imana avuga ati 15«Igihe kirageze, none Ingoma y’Imana iregereje. Nimwisubireho maze mwemere Inkuru nziza !»
Iyo ni Ivanjili Ntagatifu
KU CYUMWERU CYA 2 CY’Igisibo
ISOMO RYA MBERE
Isomo ryo mu gitabo cy’Intangiriro Intg 22,1-2.9a. 10-13.15-18
Muri iyo minsi 1Imana igerageza Abrahamu, iramubwira iti «Abrahamu!» Arayisubiza ati «Ndi hano.» 2Imana iti «Fata umwana wawe, umwana wawe w’ikinege ukunda, Izaki ; ujye mu karere ka Moriya. Nuhagera uzamutambeho igitambo gitwikwa, ku musozi nzakwereka.» 9aBageze aho Imana yari yaramweretse, 10Abrahamu abangura ukuboko, afata icyuma ngo atambe umwana we. 11Ubwo Malayika w’Uhoraho amuhamagarira mu ijuru ati «Abrahamu! Abrahamu !» Undi ati «Ndi hano.» l2Malayika w’Uhoraho ati «Ntukoze ukuboko kuri uwo mwana ! Ntugire icyo umutwara kuko ubu ngubu menye ko wubaha Imana, ukaba utanyimye umwana wawe w’ikinege.»
13Abrahamu ngo yubure amaso, abona inyuma ye imfizi y’intama; amahembe yayo yari yafatiwe mu gihuru. Abrahamu aragenda, arayifata, ayituraho igitambo gitwikwa mu kigwi cy’umwana we. 15Malayika w’Uhoraho ahamagarira Abrahamu mu ijuru ubwa kabiri, 16aramubwira ati «Ndahiye mu izina ryanjye - uwo ni Uhoraho ubivuze - ubwo wangenjereje utyo ntunyime umwana wawe w’ikinege, 17nzaguha umugisha ; abazagukomokaho nzabaha kororoka nk’inyenyeri zo mu kirere, n’umusenyi wo ku nkombe y’inyanja, maze bazigarurire amarembo y’abanzi babo. 18Kandi urubyaro rwawe, ni rwo amahanga yose y’isi azifurizanyamo umugisha, kuko wumviye ijambo ryanjye.»
Iryo ni Ijambo ry’Imana
ZABURI Zab 116 (114-115), 10.15,16ac-17,18-19
Inyik/ Nzakomeza gutunganira Uhoraho ku isi y’abazima.
Nagumanye icyizere, ndetse n’igihe navugaga nti
«Ndi umunyabyago bikabije !»
Koko Uhoraho ababazwa n’urupfu rw’abayoboke be !
None rero Uhoraho, wagiriye ko ndi umugaragu wawe,
maze umbohora ku ngoyi !
Nzagutura igitambo cy’ishimwe,
kandi njye niyambaza izina ry’Uhoraho.
Nzarangiza amasezerano nagiriye Uhoraho,
imbere y’iteraniro ry’umuryango we wose,
mu ngombe z’Ingoro y’Uhoraho,
muri wowe nyirizina, Yeruzalemu !
ISOMO RYA KABIRI
Isomo ryo mu ibaruwa Mutagatifu Pawulo Intumwa yandikiye banyaroma Rom 8,31b-34
Bavandimwe, 31bniba Imana turi kumwe ni nde waduhangara ? 32Yo itimanye ndetse n’Umwana wayo, ahubwo ikamudutangira twese, yabura ite kandi kutugabira byose kumwe na We ? 33Ni nde wagira icyo ashinja intore z’Imana ? Ko Imana iziha kuba intungane. 34Ni nde uzazicira urubanza ? Ko Kristu Yezu yapfuye, ndetse ko yazutse, We uri iburyo bw’Imana akaba anadutakambira.
Iryo ni Ijambo ry’Imana
IBANGONDIRIMBO RIBANZIRIZA IVANJILI Mt 17,5
Uragasingizwa Kristu, wowe Jambo rihoraho ry’Imana Nzima. Uragasingizwa Nyagasani.
Ijwi ry’Imana Data ryumvikaniye mu gihu kibengerana riti «Uyu ni Umwana wanjye nkunda cyane unyizihira; nimumwumve!» Uragasingizwa Kristu, wowe Jambo rihoraho ry’Imana Nzima. Uragasingizwa Nyagasani.
IVANJILI
✠ Amagambo yo mu Ivanjili Ntagatifu uko yanditswe na
Mariko Mk 9, 2-10
Muri icyo gihe, 2Yezu ajyana na Petero, na Yakobo, na Yohani ukwabo mu mpinga y’umusozi muremure. Nuko yihindura ukundi mu maso yabo. 3Imyambaro ye irererana, irabengerana bitambutse kure uburyo umumeshi wo ku isi yashobora kuyeza. 4Ubwo Eliya arababonekera hamwe na Musa, baganira na Yezu. 5Petero ni ko guterura abwira Yezu ati «Mwigisha, kwibera hano nta ko bisa ; reka tuhace ibiraro bitatu, kimwe cyawe, ikindi cya Musa , n’ikindi cya Eliya.» 6Yari yabuze icyo avuga kuko bari bahiye ubwoba. 7Nuko igicu kirabatwikira, maze muri icyo gicu haturukamo ijwi riti «Uyu ni umwana wanjye nkunda cyane, nimumwumve !» 8Ako kanya barebye hirya no hino, ntibagira undi wundi bongera kubona, uretse Yezu wenyine wari kumwe na bo. 9Mu gihe bamanukaga umusozi, Yezu abategeka kutazagira uwo batekerereza ibyo bari bamaze kubona, kugera igihe Umwana w’umuntu azaba amaze kuzuka mu bapfuye. 10Bakomeza kuzirikana iryo jambo, ariko banabazanya bati «Kuzuka mu bapfuye bivuga iki ?»
Iyo ni Ivanjili Ntagatifu
KU CYUMWERU CYA 3 CY’Igisibo
ISOMO RYA MBERE (Isomo rirerire)
Isomo ryo mu gitabo cy’Iyimukamisiri Iyim 20,1-17
Ku musozi wa Sinayi, 1Imana ivuga aya magambo yose iti 2«Ni jyewe Uhoraho Imana yawe wagukuye mu gihugu cya Misiri, mu nzu y’ubucakara:
3Nta mana zindi uzagira kereka jyewe.
4Ntuzikorere ishusho ry’iribazanyo cyangwa se ikindi kibonetse cyose; cyaba gisa n’ibiri hejuru mu kirere cyangwa n’ibiri hasi ku isi, cyangwa se n’ibiri mu mazi akikije isi. 5Ntuzapfukame imbere y’ibyo bigirwamana kandi ntuzabiyoboke; kuko Imana yawe ari jyewe Uhoraho, nkaba Imana ifuha, ihanira icyaha cy’ababyeyi mu bana babo, kugeza mu gisekuruza cya gatatu no mu cya kane cy’abanyanga, 6nyamara abankunda bagakurikiza amategeko yanjye, mbagaragariza ubudahemuka bwanjye ingoma ibihumbi.
7Ntuzavuge izina ry’Uhoraho Imana yawe mu bintu by’amanjwe, kuko Uhoraho atazareka guhana uzaba yavuze izina rye mu bintu by’amanjwe.
8Urajye wibuka umunsi w’isabato, uwegurire Imana. 9Uzakore imirimo yawe yose mu minsi itandatu, 10naho uwa karindwi ni isabato y’Uhoraho Imana yawe ; ntuzagire umurimo n’umwe ukora : ari wowe, ari umuhungu wawe, ari umukobwa wawe, ari umugaragu wawe, ari umuja wawe, ari itungo ryawe, ari n’umusuhuke waje iwanyu. 11Kuko mu minsi itandatu Uhoraho yahanze ijuru n’isi, inyanja n’ibiyirimo byose, maze akaruhuka ku munsi wa karindwi. Ni cyo cyatumye Uhoraho aha umugisha umunsi w’isabato, akawiyegurira.
12Wubahe so na nyoko, kugira ngo uzarambe mu gihugu Uhoraho Imana yawe aguhaye.
13Ntuzice umuntu.
14Ntuzasambane.
15Ntuzatware umuntu ngo umugire uwawe ku ngufu.
16Ntuzavuge ibinyoma ubeshyera mugenzi wawe.
17Ntuzararikire inzu ya mugenzi wawe, ntuzararikire umugore wa mugenzi wawe, cyangwa umugaragu we cyangwa umuja we, cyangwa inka ye cyangwa indogobe ye, mbese ikintu cya mugenzi wawe icyo ari cyo cyose.»
Iryo ni Ijambo ry’Imana
ISOMO RYA MBERE (Isomo rigufi)
Isomo ryo mu gitabo cy’Iyimukamisiri Iyim 20,1-3.7-8.12-17
Ku musozi wa Sinayi, 1Imana ivuga aya magambo yose iti 2«Ni jyewe Uhoraho Imana yawe wagukuye mu gihugu cya Misiri, mu nzu y’ubucakara :
3Nta mana zindi uzagira kereka jyewe.
7Ntuzavuge izina ry’Uhoraho Imana yawe mu bintu by’amanjwe, kuko Uhoraho atazareka guhana uzaba yavuze izina rye mu bintu by’amanjwe.
8Urajye wibuka umunsi w’isabato, uwegurire Imana.
12 Wubahe so na nyoko, kugira ngo uzarambe mu gihugu Uhoraho Imana yawe aguhaye.
13Ntuzice umuntu.
14Ntuzasambane.
l5Ntuzatware umuntu ngo umugire uwawe ku ngufu.
16Ntuzavuge ibinyoma ubeshyera mugenzi wawe.
17Ntuzararikire inzu ya mugenzi wawe, ntuzararikire umugore wa mugenzi wawe, cyangwa umugaragu we cyangwa umuja we, cyangwa inka ye cyangwa indogobe ye, mbese ikintu cya mugenzi wawe icyo ari cyo cyose.»
Iryo ni Ijambo ry’Imana
ZABURI Zab 19 (18), 8, 9,10,11
Inyik/ Nyagasani, ni wowe ufite amagambo y’ubugingo bw’iteka.
Itegeko ry’Uhoraho ni indakemwa,
rikaramira umutima.
Amabwiriza y’Uhoraho ni amanyakuri,
abacisha make akabungura ubwenge.
Amateka y’Uhoraho araboneye,
akanezereza umutima.
Amategeko y’Uhoraho ni uruhehemure,
akamurikira umuntu.
Igitinyiro cy’Uhoraho kiraboneye,
kigahoraho iteka ryose.
Ibyo Uhoraho yemeje ni amanyakuri,
byose biba bitunganye.
Bikwiriye kwifuzwa kurusha zahabu,
kurusha ikirundo cya zahabu iyunguruye.
Biryohereye kurusha ubuki,
kurusha ubuki bw’umushongi bukiva mu binyagu !
ISOMO RYA KABIRI
Isomo ryo mu ibaruwa ya mbere Mutagatifu Pawulo Intumwa yandikiye Abanyakorinti 1 Kor 1, 22-25
Bavandimwe, 22mu gihe Abayahudi bigomba ibitangaza, Abagereki bo bashimikiriye iby’ubuhanga, 7twebweho twamamaza Kristu wabambwe ku musaraba, bigashengura Abayahudi kandi bikitwa ibisazi ku Bagereki. 24Naho ku batowe, baba Abayahudi cyangwa Abagereki, Kristu uwo ni we bubasha bw’Imana n’ubuhanga bwayo. 25Kuko icyakwitwa ibisazi ariko giturutse ku Mana gitambutse kure ubuhanga bw’abantu, kandi icyakwitwa intege nke giturutse ku Mana gisumbye imbaraga z’abantu.
Iryo ni Ijambo ry’Imana
IBANGONDIRIMBO RIBANZIRIZA IVANJILI Yh 2,9
Inyik/ Uragasingizwa Kristu, wowe Buhanga buhoraho bw’Imana Nzima.
Uragasingizwa Nyagasani.
Nimusingize Kristu Nyagasani ;
kuko ari We ubusendere bwose bwa kameremana butuyemo mu buryo bw’umubiri.
Uragasingizwa Kristu, woive Buhanga buhoraho bw’Imana Nzima.
Uragasingizwa Nyagasani.
IVANJILI
✠ Amagambo yo mu Ivanjili Ntagatifu uko yanditswe na
Yohani Yh 2,13-25
Muri icyo gihe, 13Pasika y’Abayahudi yari yegereje ; Yezu azamu- ka ajya i Yeruzalemu. 14Asanga mu Ngoro y’Imana hari abantu bahagurira ibimasa, n’intama n’inuma, n’abicaye bavunja ibiceri. 15Nuko aboha imigozi mo ikiboko bakubitisha, bose abasuka hanze y’Ingoro, yirukanamo n’intama n’ibimasa; anyanyagiza ibiceri by’abavunjaga, ahirika n’ameza yabo. 16Abwira abacuruza- ga inuma ati «Nimuzikure aha ngaha ; inzu ya Data mwiyigira inzu y’ubucuruzi !» 17Nuko abigishwa be bibuka ko handitswe ngo «Ishyaka mfitiye Ingoro yawe riramparanya.»
18Nuko Abayahudi baramubaza bati «Utanze kimenyetso ki gitu- mye wiha kugira utyo ?» 19Yezu arabasubiza ati «Nimusenye iyi Ngoro, mu minsi itatu nzaba nongeye kuyubaka.» 20Abayahudi baramubwira bati «Kubaka iyi Ngoro byamaze imyaka mirongo ine n’itandatu, none wowe ngo wayihagarika mu minsi itatu ?» 21 Iyo Ngoro Yezu yavugaga, yari umubiri we.22Amaze kuzuka ava mu bapfuye, abigishwa be bibutse ko yari yarabivuze, nuko bemera Ibyanditswe, bemera n’ijambo Yezu yari yaravuze.
23Igihe yari i Yeruzalemu mu minsi mikuru ya Pasika, abantu benshi babonye ibimenyetso yatangaga bemera izina rye. 24Nyamara Yezu ubwe ntiyabizeraga kuko yari abazi bose, 25kandi ntiyari akeneye umuntu wo kumubwira ikiri muri muntu, kuko ubwe asanzwe azi imigambi ya buri muntu.
Iyo ni Ivanjili Ntagatifu
* Bashobora guhitamo Ivanjili ndetse n’andi masomo y’Icyumweru cya 3 cy’Igisibo “Umwaka A”, cyane cyane mu makoraniro arimo abigishwa bakuru bitegura Batisimu. Reba “Umwaka A” ku rupapuro rwa 64.
ICYUMWERU CYA 4 CY’Igisibo
ISOMO RYA MBERE
Isomo ryo mu gitabo cya kabiri cy’Amateka 2 Matek 36,14-16.19-23
Ku ngoma y’umwami Sedekiya, 14abakuru b’abaherezabitambo n’abatware ba rubanda, na bo barushaho gucumura bakurikiza imihango yose mibi y’abanyamahanga, ndetse bandavuza Ingoro Uhoraho yari yaratagatifurije i Yeruzalemu. 15Uhoraho, Imana y’abasekuruza babo, arabihanangiriza bikomeye kandi abatuma- ho kenshi intumwa ze, abitewe n’imbabazi yari afitiye umuryango we n’Ingoro ye bwite. 16Nyamara bo bagakubita intumwa z’Imana, bagasuzugura amagambo yazo kandi bagaseka abahanuzi bayo, bigeza aho Uhoraho yarakariye umuryango we ubuziraherezo. 19Abanyababiloni batwika Ingoro y’Uhoraho, barimbura inkike z’amabuye z’i Yeruzalemu, amazu yaho barayatwika yose, maze ibintu byose by’agaciro barabitsemba. 20Hanyuma umwami wabo ajyana bunyago i Babiloni abari basigaye bacitse ku icumu, abagira abacakara be n’ab’abahungu be kugeza ku ngoma y’Abaperisi. 21Nuko huzura ijambo Uhoraho yari yaravugishije Yeremiya, agira ati «Igihugu kizamara imyaka mirongo irindwi nta muntu ucyitayeho, kugira ngo bandihe ibiruhuko by’amasabato yose batubahirije.» 22Mu mwaka wa mbere w’ingoma ya Sirusi, umwami w’Abaperisi, Uhoraho yiyemeza kuzuza ijambo yari yaravugishije Yeremiya. Nuko akangura umutima wa Sirusi, umwami w’Abaperisi, kugira ngo atangaze mu bihugu bye byose ari mu mvugo ari no mu nyandiko, iri teka : 23 «Sirusi umwami w’Abaperisi, aravuze ngo : Abami bose bo ku isi, Uhoraho Imana Nyir’ijuru yarabangabije, kandi antegeka ubwe kumwubakira Ingoro i Yeruzalemu, yo muri Yuda. Muri mwebwe, umuntu wese wo mu muryango we nabane n’Imana ye, kandi nazamuke...»
Iryo ni Ijambo ry’Imana
ZABURI Zab 137 (136), 1-2, 3, 4-5, 6
Inyik/ Yeruzalemu, ururimi rwanjye ruzumire mu gisenge cy’akanwa, niba ndetse kukuzirikana, niba ntakugize imena mu binshimisha.
Cyangwa : Nyagasani, ibuka impuhwe zawe, maze uze udukize.
Ku nkombe z’inzuzi z’i Babiloni,
ni ho twicaraga maze tukarira,
iyo twibukaga Siyoni.
Mu mashami y’imizibaziba yaho,
ni ho twamanikaga inanga zacu.
Ni bwo abari baratwigaruriye
badusabaga kubaririmbira,
n’abatwicishaga agahato
bakatwinginga ngo tubabyinire,
bagira bati «Nimuturirimbire akaririmbo k’i Siyoni.»
Twaririmba dute indirimbo y’Uhoraho
mu gihugu cy’amahanga ?
Yeruzalemu, ningira ubwo nkwibagirwa,
indyo yanjye izumirane !
Ururimi rwanjye ruzumire mu gisenge cy’akanwa,
niba ndetse kukuzirikana,
niba ntagize Yeruzalemu,
imena mu binshimisha !
ISOMO RYA KABIRI
Isomo ryo mu ibaruwa Mutagatifu Pawulo Intumwa yandikiye Abanyefezi Efez.2, 4-10
Bavandimwe, 4Imana ni Nyir’impuhwe zihebuje ; kubera urukundo rwinshi yadukunze, 5n’ubwo twari twarapfuye tuzize ibyaha byacu bwose, yadushubije ubugingo hamwe na Kristu : rwose kuba mwarakijijwe, mubikesha ubuntu bwayo ! 6Nuko hamwe na We iratuzura, maze itwicaza mu ijuru turi muri Kristu Yezu. 7Bityo igiriye ubuntu bwayo yatugaragarije muri Yezu Kristu, yashatse kwerekana mu bihe bizaza ubukungu butagereranywa bw’ineza yayo. 8Koko mwakijijwe ku buntu mubikesha ukwemera ; nta bwo ari ku bwanyu rero, ahubwo ni ku bw’ingabire y’Imana. 9Ntibyatewe n’ibyo mwakoze, kugira ngo hatazagira uwirata. «Koko rero Imana ni Yo yaduhanze, kandi twaremewe muri Kristu Yezu, kugira ngo dushishikarire ibikorwa byiza Imana yateguye kuva kera igira ngo bijye bituranga iteka.
Iryo ni Ijambo ry’Imana
IBANGONDIRIMBO RIBANZIRIZA IVANJILI Yh 3, 3-16
Ikuzo n’ibisingizo ni ibyawe, Nyagasani Yezu.
Imana yakunze isi cyane, bigeza aho itanga Umwana wayo
w’ikinege. Umwemera wese agira ubugingo bw’iteka.
Ikuzo n’ibisingizo ni ibyawe, Nyagasani Yezu.
IVANJILI
✠ Amagambo yo mu Ivanjili Ntagatifu uko yanditswe na
Yohani Yh 3,14-21
Muri icyo gihe Yezu abwira Nikodemu ati 14«Nk’uko Musa yamanitse inzoka mu butayu, ni ko n’Umwana w’umuntu azagomba kumanikwa, 15kugira ngo umwemera wese agire ubugingo bw’iteka.
16Koko Imana yakunze isi cyane, bigeza aho itanga Umwana wayo w’ikinege, igira ngo umwemera wese atazacibwa, ahubwo agire ubugingo bw’iteka. 17Icyakora, Imana ntiyohereje Umwana wayo ku isi ngo ayicire urubanza, ahubwo yagira ngo akize isi. 18Umwemera wese ntacirwa urubanza, ariko utemera aba yaciriwe urubanza, kuko atemera izina ry’Umwana w’ikinege w’Imana. 19Dore urwo rubanza urwo ari rwo : ni uko urumuri rwaje mu isi, abantu bakikundira umwijima kuruta urumuri, kuko ibikorwa byabo byari bibi. 20Koko rero ukora ibibi wese, yanga urumuri kandi ntarwegere, agira ngo ibyo akora bitagaragara. 21Naho rero ukora iby’ukuri ajya ahabona, agira ngo agaragaze ko ibyo akora biba bikorewe Imana.»
Iyo ni Ivanjili Ntagatifu
*Bashobora guhitamo Ivanjili ndetse n’andi masomo y’lcyumweru cya 4 cy’lgisibo «Umwaka A», cyane cyane mu makoraniro arimo abigishwa bakuru bitegura Batisimu. Reba «Umwaka A» ku rupapuro rwa 70.
KU CYUMWERU CYA 5 CY’Igisibo
ISOMO RYA MBERE
Isomo ryo mu gitabo cy’Umuhanuzi Yeremiya Yer 31,31-34
31 Igihe kiregereje - uwo ni Uhoraho ubivuze - maze nzagirane Isezerano rishya n’umuryango wa Israheli n’uwa Yuda. 32Rizaba ritandukanye n’iryo nagiranye n’abasekuruza babo, igihe nabafataga ukuboko nkabakura mu gihugu cya Misiri. Bo bishe Isezerano ryanjye - uwo ni Uhoraho ubivuze - ariko jye nakomeje kubabera umutegetsi. 33Dore iryo Sezerano nzagirana n’umuryango wa Israheli nyuma y’iyo minsi - uwo ni Uhoraho ubivuze - amategeko yanjye nzayabacengezamo, nyabandike mu mutima, bityo mbabere Imana na bo bambere umuryango. 7Ntibazongera kwigishanya bavuga ngo «Menya Uhoraho», kuko bose bazaba banzi, uhereye ku muto kugeza ku mukuru - uwo ni Uhoraho ubivuze - nkabababarira ubugome bwabo, sinongere no kwibuka icyaha cyabo ukundi.
Iryo ni Ijambo ry’Imana
ZABURI Zab 51 (50), 3-4,12-13,14-15
Inyik/ Mana yanjye, ndemamo umutima mushya.
Mana yanjye, ngirira imbabazi ukurikije ineza yawe ;
kubera impuhwe zawe nyinshi, umpanagureho ibyaha byanjye.
Nyuhagiraho wese ibicumuro byanjye,
maze unkize icyaha nakoze.
Mana yanjye, ndemamo umutima usukuye,
maze umvugururemo ibitekerezo biboneye.
Ntunyirukane ngo unte kure yawe,
cyangwa ngo unkuremo umwuka wawe uzira inenge.
Ahubwo mpa kwishimira ko nakijijwe,
kandi unkomezemo umutima wuje ineza.
Abagome nzabatoza inzira yawe,
n’abanyabyaha bakugarukire.
ISOMO RYA KABIRI
Isomo ryo mu ibaruwa yandikiwe Abahebureyi Heb 5,7-9
Bavandimwe,7 mu gihe cy’imibereho ye yo ku isi, Kristu ni we wasengaga atakamba mu miborogo n’amarira, abitura Uwashoboraga kumurokora urupfu, maze arumvirwa kuko yagororokeye Imana. 8Nubwo yari Mwana bwose, ibyo yababaye byamwigishije kuitivira; 9maze aho amariye kuba intagereranywa, abamwumvira bose abaviramo isoko y’ubucungurwe bw’iteka.
Iryo ni Ijambo ry’Imana
IBANGONDIRIMBO RIBANZIRIZA IVANJILI Yh 3,14-15
Singizwa Nyagasani Yezu, kandi uhabwe ikuzo iteka.
Mwana w’umuntu, wamanitswe ku musaraba,
kugira ngo abantu bose bagire ubugingo bw’iteka.
Singizwa Nyagasani Yezu, kandi uhabwe ikuzo iteka.
IVANJILI
✠ Amagambo yo mu Ivanjili Ntagatifu uko yanditswe na
Yohani Yh 12, 20-33
Muri icyo gihe, 20 mu bari baje gusengera i Yeruzalemu ku munsi mukuru, harimo n’Abagereki. 21Begera Filipo wari uw’i Betsayida ho mu Galileya, baramwinginga bati «Nyakubahwa, turashaka kubona Yezu.» 22Filipo na we ajya kubibwira Andereya. Andereya na Filipo bajya kubibwira Yezu.
23Yezu abasubiza avuga ati «Koko igihe kirageze cyo kugira ngo Umwana w’umuntu akuzwe. 24Ndababwira ukuri koko : imbuto y’ingano iyo itaguye mu gitaka ngo ihugute, ikomeza kuba yonyine; naho iyo ihuguse yera imbuto nyinshi. 25Ukunda ubuzima bwe arabubura, kandi uwanga ubuzima bwe muri iyi si azabukomeza kugeza mu bugingo bw’iteka. 26Ushaka kumbera umugaragu nankurikire, maze aho ndi, abe ari na ho umugaragu wanjye azaba. Byongeye, ungaragira Data azamwubahiriza. 27Ubu ariko umutima wanjye urahagaze, mvuge ngo iki se ? Dawe, iyi saha uyinkize ? Nyamara nzi ko ari cyo cyanzanye kugeza kuri iyi saha. 28Dawe, iheshe ikuzo !» Nuko ijwi rituruka mu ijuru riti «Nihesheje ikuzo kandi nzakomeza kuryihesha.» 29Abantu bari bahagaze aho kandi bari bumvise, baravuga bati «Ni inkuba ikubise.» Abandi na bo bati «Ni umumalayika umuvugishije.»
30Yezu arabasubiza ati «Iryo jwi si jye rivugiye, ahubwo ni mwebwe. 31Ubu igihe cyo gucira isi urubanza kirageze ; ubu umutware w’iyi si agiye gusukwa hanze. 32Nanjye nimara kwererezwa hejuru y’isi, nzareshya bose mbiyegereze.» 33Ibyo yabivuze yerekana urupfu yari agiye gupfa.
Iyo ni Ivanjili Ntagatifu
*Bashobora guhitamo Ivanili ndetse n’andi masomo y’Icyumweru cya 5 cy’lgisibo «Umwaka A», cyane cyane mu makoraniro arimo abigishwa bakuru bitegura Batisinm. Reba «Umwaka A» ku rupapuro rwa 76.
ICYUMWERU GITAGATIFU
KU CYUMWERU CY’AMASHAMI
N’UBUBABARE BWA NYAGASANI
YEZU YAKIRWA I YERUZALEMU NK’UMWAMI
IVANJILI
✠ Amagambo yo mu Ivanjili Ntagatifu uko yanditswe na
Mariko Mk 11,1-10
Hari hasigaye iminsi mike ngo Pasika ibe. 1 Bagiye kugera i Yeruzalemu, ahagana i Betifage n’i Betaniya, hafi y’umusozi w’Imizeti, Yezu yohereza babiri mu bigishwa be, 2arababwira ati «Nimujye mu ngo ziri imbere yanyu ; mukihagera murabona icyana cy’indogobe kiziritse, kitigeze kigira uwo giheka, mukiziture maze mukinzanire. 3Nihagira ubabwira ati ‘Ibyo mukora ni ibiki ?’ musubize muti ‘Umwigisha aragikeneye, kandi aracyohereza vuba.» 4Baragenda, basanga icyana cy’indogobe kiziritse ku irembo iruhande rw’inzira, barakizitura. 5Bamwe mu bari aho ngaho barababwira bati «Ibyo mukora ni ibiki ? Kuki muzitura iyo ndogobe ?» 6Bo babasubiza uko Yezu yari yababwiye, nuko barabihorera. 7Icyana cy’indogobe bakizanira Yezu, bagisasaho ibishura byabo acyicaraho. 8Nuko abantu benshi basasa ibishura byabo mu nzira ; abandi basasa amashami bari batemye mu mirima. 9Abamugendaga imbere n’abari bamukurikiye barangurura ijwi bati «Hozana ! Hasingizwe uje mu izina rya Nyagasani ! l0Hasingizwe Ingoma y’umubyeyi wacu Dawudi itugezeho ! Hozana, Imana nihabwe impundu mu ijuru !»
Iyo ni Ivanjili Ntagatifu
* Cyangwa bashobora guhitamo iyi Vanjili ikurikira :
✠ Amagambo yo mu Ivanjili Ntagatifu uko yanditswe na
Yohani Yh 12,12-16
Icyo gihe hari hasigaye iminsi mike ngo Pasika ibe. 12Abantu benshi bari baje mu munsi mukuru, bamenya ko Yezu na we aje i Yeruzalemu. 13Bafata amashami y’imikindo bajya kumusanganira, ari na ko batera hejuru bati «Hozana ! Nahabwe impundu uje mu izina rya Nyagasani, ni we Mwami wa Israheli !» 14Yezu abonye icyana cy’indogobe acyicaraho, nk’uko byari byaranditswe ngo 15 «Witinya, Mwari wa Siyoni, dore Umwami wawe aje akugana, yicaye ku cyana cy’indogobe.» 16Abigishwa be babanza kuyoberwa icyo ibyo bivuga, ariko Yezu amaze gukuzwa, babona kwibuka ko ibyo bintu ari we byari byaranditsweho, ari na ko banabimugiriye.
Iyo ni Ivanjili Ntagatifu
MISA Y’UBUBABARE BWA NYAGASANI
ISOMO RYA MBERE
Isomo ryo mu gitabo cy’Umuhanuzi Izayi Iz 50, 4-7
4Nyagasani Uhoraho yampaye ururimi, ambwira icyo mvuga kugira ngo menye kuramira uwarushye. Buri gitondo arankangura, akanyigisha gutega amatwi nk’abigishwa. 5Nyagasani Uhoraho yanzibuye amatwi, nanjye sinabyangira, ndetse sinatezuka. 6Nategeye umugongo abankubitaga, imisaya yanjye nyitegeza abamfuraga ubwanwa ; uruhanga rwanjye sinaruhisha abantukaga, bancira mu maso. 7Cyakora Nyagasani Uhoraho arantabara, agatuma ibitutsi bitanca intege. Uruhanga rwanjye ndarukomeza nk’ibuye, kandi nzi ko ntazakorwa n’ikimwaro.
Iryo ni Ijambo ry’Imana
ZABURI Zab 22 (21), 8-9,17-18a, 19-20, 23-24a
Inyik/ Mana yanjye, Mana yanjye, ni iki cyatumye untererana ?
Abambonye bose barankwena,
bakampema kandi bakazunguza umutwe,
bavuga bati «Ko yiringira Uhoraho, ngaho namubohore !
Ngaho namukize, umva ko amukunda !»
Rwose imbwa nyamwinshi zankubakubye,
igitero cy’abagiranabi cyantaye hagati.
Bamboshye ibiganza n’ibirenge,
amagufwa yanjye yose nayabara !
Bigabanyije imyambaro yanjye,
igishura cyanjye bakigiriraho ubufindo.
None rero Uhoraho, ntumbe kure,
wowe mbaraga zanjye, banguka untabare !
Nzogeza izina ryawe mu bo tuva inda imwe,
ngusingirize mu ruhame rw’ikoraniro,
nti «Yemwe abubaha Uhoraho, nimumusingize !»
ISOMO RYA KABIRI
Isomo ryo mu ibaruwa Mutagatifu Pawulo Intumwa yandikiye Abanyafilipi Fil 2,6-11
Bavandimwe, Kristu Yezu 6 n’ubwo yari afite imimerere imwe n’iy’Imana, ntiyagundiriye kureshya na Yo. 7Ahubwo yihinduye ubusabusa, yigira nk’umugaragu, maze mu migirire ye agaragaza ko ari umuntu. Nuko aho amariye kwishushanya n’abantu, 8yicisha bugufi kurushaho, yemera kumvira, ageza aho gupfa, apfiriye ndetse ku musaraba. 9Ni cyo cyatumye Imana imukuza, imuha Izina risumbye ayandi yose, 10kugira ngo nibamara kumva izina rya Yezu bose bamupfukamire, mu ijuru, ku isi n’ikuzimu, l1kandi indimi zose zamamaze ko Yezu Kristu ari We Nyagasani, biheshe Imana Se ikuzo.
Iryo ni Ijambo ry’Imana
IBANGONDIRIMBO RIBANZIRIZA IVANJILI Fil 2,8-9
Ikuzo n’ibisingizo ni ibyawe, Nyagasani Yezu.
Kristu yemeye kwumvira ari twebwe agirira ageza aho gupfa,
apfiriye ndetse ku musaraba. Ni cyo cyatumye Imana imukuza, imuha Izina risumbye ayandi yose.
Ikuzo n’ibisingizo ni ibyawe, Nyagasani Yezu.
IVANJILI (Isomo rirerire)
✠ Ububabare bw’Umwami wacu Yezu Kristu uko bwanditswe
na Mariko Mk 14,1 - 72; 15,1-47
14,1Icyo gihe hari hasigaye iminsi ibiri ngo Pasika ibe, n’umunsi mukuru w’imigati idasembuye. Nuko abatware n’abahere- zabitambo n’abigishamategeko bashaka gufata Yezu ku mayeri ngo bamwice. 2Icyakora baravugaga bati «Ntibizabe ku munsi mukuru, ejo rubanda rudatera imidugararo.»
3Igihe Yezu yari i Betaniya kwa Simoni umubembe, ari ku meza, haza umugore ufite agakopo kuzuye umubavu umininnye w’igiciro gikomeye. Nuko amaze kugakonyora, umubavu awusuka ku mutwe wa Yezu. 4Bamwe ariko birabarakaza, barabwirana bati «Uriya mubavu uzize iki? 5Uyu mubavu wajyaga kugurwa amadenari arenze magana atatu, maze agahabwa abakene !» Nuko batonganya uwo mugore. 6Ariko Yezu arababwira ati «Nimumureke! Muramutonganyiriza iki ? Dore ibyo amaze kungirira ni byiza. 7Abakene muzabahorana iteka, kandi aho mushakiye mubagirira neza ; naho jyewe ntimuzamporana iteka. 8Yakoze ibyo ashoboye: yasize umubiri wanjye ateganya ihambwa ryanjye. 9Ndababwira ukuri : ku isi yose, aho Inkuru Nziza izamamazwa hose, bazajya bavuga n’ibyo uyu mugore amaze gukora bamwibuke.» 10Nuko Yuda Isikariyoti, umwe muri ba Cumi na babiri, asanga abatware b’abaherezabitambo bakuru, agira ngo azamubagabize. nNgo babyumve barishima, maze bamusezeranya kuzamuha ikiguzi. Yuda asigara ashaka uburyo bwo kumutanga.
12Umunsi wa mbere wo kurya Imigati idasembuye, ari na wo babagagaho intama za Pasika, abigishwa be baramubaza bati «Urashaka ko tujya gutegura he, ngo uharire Pasika?» 13Yezu yohereza babiri mu bigishwa be, arababwira ati «Nimujye mu murwa, muri buhure n’umuntu wikoreye ikibindi cy’amazi, mumukurikire 14maze aho yinjira mubwire nyir’urugo muti ‘Umwigisha aravuze ngo : Icyumba cyanjye nza kuriramo Pasika hamwe n’abigishwa banjye kiri hehe ?’ 15Ari bubereke mu nzu yo hejuru icyumba kigari, gishashe kandi giteguye neza, abe ariho mudutegurira ibya Pasika.» 16 Abigishwa baragenda bagera mu murwa, maze basanga bimeze uko yabibabwiye, batunganya ibya Pasika.
17Bugorobye, Yezu azana na ba Cumi na babiri. 18Nuko igihe bari ku meza barya, Yezu aravuga ati «Ndababwira ukuri : umwe muri mwe dusangira, agiye kungambanira.» 19Nuko barashavura, batangira kumubaza umwe umwe bati «Mbese yaba ari jyewe ?» 20Arabasubiza ati «Ni umwe muri ba Cumi na babiri ; dore dukoreye ku mbehe rimwe. 21Koko Umwana w’umuntu aragiye, nk’uko ibyanditswe bimuvuga, ariko hagowe uwemeye kumugambanira ! Ibyiza ni uko uwo muntu aba ataravutse.»
22Nuko igihe bafunguraga, Yezu afata umugati, amaze gushimira Imana arawumanyura, arawubahereza avuga ati «Nimwakire : iki ni umubiri wanjye.» 23Hanyuma afata inkongoro, amaze gushimira Imana arayibahereza, maze bayinyweraho bose. 24Nuko arababwira ati «Iki ni amaraso yanjye y’Isezerano, amenewe abantu batabarika. 25Ndababwira ukuri : Nta bwo nzongera kunywa ku mbuto y’imizabibu, kugeza ku munsi nzanywera divayi nshya mu Ngoma y’Imana.»
26Bamaze kuririmba Zaburi, barasohoka bajya ku musozi w’Imizeti. 27Yezu arababwira ati «Mwese ibigiye kumbaho biratuma muhungabana, kuko byanditswe ngo ‘Nzakubita umushumba, maze intama zitatane.’ 28Ariko nimara kuzuka, nzabatanga mu Galileya.» 29Petero aramubwira ati «N’aho bose bahungabana, jye ntibizambaho !» 30Yezu aramusubiza ati «Ndakubwira ukuri : None muri iri joro, isake itarabika ubwa kabiri, uraba umaze kunyihakana gatatu.»31 Ariko we arakomeza ati «N’aho nagomba gupfana nawe, sinakwihakana !» Abandi bose na bo bavuga batyo.
32Nuko bajya mu murima witwa Getsemani, maze Yezu abwira abigishwa be ati «Nimube mwicaye hano, umwanya ngiye gusenga.» 33Yezu ajyana na Petero na Yakobo na Yohani, maze atangira kugira ubwoba n’ishavu. 34Arababwira ati «Umutima wanjye ushavuye byo gupfa ; nimugume aha, maze mube maso.» 35Yigiye imbere gato yikubita hasi, arasaba ngo niba bishoboka, iyo saha ice kure ye. 36Yaravugaga ati «Abba, Dawe ! byose biragushobokera : igizayo iyi nkongoro ; nyamara ntibibe uko nshaka, ahubwo bibe uko wo we ushaka.» 37Yezu aragaruka, asanga basinziriye ; abwira Petero ati «Simoni, urasinziriye, ntiwashoboye kuba maso isaha n’imwe ? 38Nimube maso, musenge kugira ngo mutaza kugwa mu gishuko; koko umutima w’umuntu uharanira ibyiza, ariko umubiri we ukagira intege nke.»
39Yezu asubirayo, yongera kwambaza avuga nka mbere. 40Hanyuma agarutse, asanga na none basinziriye, kuko amaso yabo yari aremerewe ; nuko ntibabona icyo bamusubiza. 41Ubwa gatatu araza arababwira ati «Noneho nimusinzire, muruhuke ! Nimurekere aho. Isaha irageze ; dore Umwana w’umuntu agiye gushyirwa mu maboko y’abanyabyaha. 42Nimuhaguruke tugende! Dore untanga ari hafi.»
43Nuko ako kanya akivuga, Yuda umwe muri ba Cumi na babiri azana n’igitero cy’abantu bafite inkota n’ibibando, boherejwe n’abaherezabitambo bakuru, n’abigishamategeko, n’abakuru b’imiryango. 44Umugambanyi yari yabahaye ikimenyetso ati «Uwo nza guhobera nkamusoma, araba ari we : mumufate maze mumujyane, mumenye ntabacike.» 45Nuko Yuda araza yegera Yezu ati «Mwigisha ! » ; nuko aramusoma. 46Ba bandi bahita basumira Yezu ubwo, baramufata. 47Umwe mu bari aho, akura inkota ayikubita umugaragu w’umuherezabitambo mukuru, amuca ugutwi. 48Nuko Yezu arababwira ati «Mwaje kumfata mufite inkota n’ibibando nk’aho ndi igisambo ! 49Nyamara iminsi yose nabaga ndi kumwe namwe mu Ngoro nigisha, ntimwamfashe. Ariko ibi bibereye kugira ngo Ibyanditswe byuzuzwe.» 50Nuko bose bamusiga aho barahunga. 51Hari umusore wari ukurikiye Yezu, yifubitse igishura cyonyine ; nuko baramufata. 52We rero arabiyaka, abasigira igishura mu ntoki, ahunga yambaye ubusa.
53Nuko Yezu bamushyira umuherezabitambo mukuru, maze abatware b’abaherezabitambo, n’abakuru b’imiryango, n’abigishamategeko baraterana bose. 54Petero akaba yari yamukurikiriye kure, kugera mu ngoro y’umuherezabitambo mukuru, maze yicarana n’abagaragu ku ikome, arota. 55Ubwo rero abatware b’abaherezabitambo n’inama nkuru yose bashaka icyo bashinja Yezu kugira ngo bamucire urwo gupfa, ariko barakibura. 56Benshi nanone bamushinjaga ibitari byo, n’ibyo bamushinje ntibabihuze. 57Bamwe barahaguruka, bamushinja ibinyoma bavuga bati 58«Twamwumvise avuga ati ‘Jyewe nzasenya iyi Ngoro yubatswe n’amaboko y’abantu, maze mu minsi itatu nubake indi itubakishijwe amaboko y’abantu.» 59Ariko no kuri ibyo, uko bamuregaga ntibabihuze.
60Nuko umuherezabitambo mukuru arahaguruka, ahagarara hagati y’iteraniro abaza Yezu ati «Nta cyo usubiza ku byo aba bantu bakurega?» 61We rero araceceka, ntiyagira icyo asubiza. Umuherezabitambo mukuru arongera aramubaza ati «Mbese uri Kristu, Umwana wa Nyagusingizwa ?» 62Yezu arasubiza ati «Ndi we, byongeye kandi muzabona Umwana w’umuntu yicaye iburyo bwa Nyir’ububasha, munamubone aje ku bicu by’ijuru.» 63Nuko umuherezabitambo mukuru ashishimura imyambaro ye, avuga ati «Abagabo bandi dushaka ni ab’iki ? 64Mwiyumviye ukuntu atutse Imana. Mubitekerezaho iki ?» Bose bahamya ko akwiye gupfa. 65Hanyuma bamwe batangira kumuvunderezaho amacandwe no kumupfuka mu maso, no kumukubita inshyi bamubwira bati «Ngaho duhanurire !» Abagaragu na bo bamukubita inshyi.
66Icyo gihe Petero yari mu rugo, maze haza umwe mu baja b’umuhere-zabitambo mukuru. 67Abonye Petero yota aramwitegereza, maze aramubwira ati «Nawe wari kumwe na Yezu w’i Nazareti !» 68Petero ahakana avuga ati «Ibyo simbizi, sinumva icyo ushaka kuvuga.» Arahaguruka ajya ku irembo. 69Wa muja yongera kumwitegereza, abwira abari aho ati «Koko uriya ni umwe muri bo !» 70We ariko arongera arahakana. Hashize akanya, abari aho babwira Petero bati «Ni ukuri, uri umwe muri bo ! Byongeye kandi uri Umunyagalileya.» 71Nuko we atangira kurahira yimazeyo ati «Uwo muntu muvuga nta bwo muzi !» Ako kanya isake ibika ubwa kabiri. 72Nuko Petero yibuka ijambo Yezu yari yamubwiye ati «Isake itarabika ubwa kabiri uzaba unyihakanye gatatu.» Nuko araturika ararira.
15/1 Mu gitondo kare, abatware b’abaherezabitambo bateranira hamwe n’abakuru b’imiryango n’abigishamategeko, mbese abagize inama nkuru bose. Bamaze kuboha Yezu, baramujyana bamushyikiriza Pilato. 2Nuko Pilato aramubaza ati «Mbese uri umwami w’Abayahudi ?» Yezu aramusubiza ati «Urabyivugiye.» 3Abatware b’abaherezabitambo bamurega byinshi. 4Pilato arongera aramubaza ati «Nta cyo usubiza ? Ntiwumva ibyo bakurega byose ?» 5Yezu ariko ntiyongera kugira icyo asubiza, Pilato biramutangaza cyane.
6Buri munsi mukuru yabarekuriraga imwe mu mfungwa babaga bamusabye. 7bwo rero mu buroko hakaba uwitwa Barabasi, wari wafatanywe n’abandi bagome bari biciye umuntu mu myivu- mbagatanyo. 8Nuko rubanda rurazamuka, batangira gusaba Pilato ngo abagirire uko yabamenyereje. Pilato arababaza ati «Murashaka ko mbarekurira umwami w’Abayahudi ?» 10Yari azi neza ko abaherezabitambo bakuru bari bamutanze babitewe n’ishyari. 11Ubwo ariko abaherezabitambo bakuru boshya rubanda gusaba ko abarekurira Barabasi. 12Pilato arongera arababaza ati «Maze se ngire nte uwo mwita umwami w’Abayahudi ?» 13Bo rero batera hejuru bati «Mubambe ku musaraba !» 14Pilato arababaza ati «Ikibi yakoze ni ikihe ?» Bo rero barushaho gutera hejuru bati «Mubambe ku musaraba !» 15Pilato ahitamo gushimisha rubanda, abarekurira Barabasi. Amaze gukubitisha Yezu, aramutanga ngo bajye kumubamba.
16Nuko abasirikare bajyana Yezu mu gikari cy’ingoro ya Pilato, maze bakoranya igombaniro ryose. 17Bamwambika igishura gituku- ra, nyuma baboha ikizingo cy’amahwa, bakimushyira ku mutwe. 18Nuko batangira kumushungera bavuga bati «Turakuramya, Mwami w’Abayahudi !» l9Ubwo bamukubitisha urubingo mu mutwe, bakamuvunderezaho amacandwe, maze bagatera ivi imbere ye byo kumuramya. 20Bamaze kumukwena batyo bamwambura igishura gitukura, bamwambika imyambaro ye, baramushorera bajya kumubamba.
21 Mu nzira bafatirana Simoni w’i Sireni, se wa Alegisanderi na Rufusi wiviraga mu murima, ngo amutwaze umusaraba. 22Nuko bajyana Yezu ahantu hitwa Gologota, bikavuga ku Kigihanga. 23Bamuha divayi ivanze n’indurwe ngo abinywe, ariko ntiyabyakira. 24Nuko baramubamba. Hanyuma bigabanya imyambaro ye, bayikoreraho ubufindo ngo bamenye icyo buri wese yegukana. 25Bamubambye ari ku isaha ya gatatu. 26Hari kandi urubaho rwanditseho icyo azize, ngo «Umwami w’Abayahudi.» 27Maze bamubambana n’abagome babiri, umwe iburyo undi ubumoso bwe. (28*) 29Abahisi bakamutuka bazunguza umutwe kandi bavuga ngo «Ngaho da ! Wowe usenya Ingoro y’Imana maze ukongera ukayubaka mu minsi itatu, 30ikize ubwawe wimanure ku musaraba !» 31 Abatware b’abaherezabitambo hamwe n’abigishamategeko bamushinyaguriraga bavuga ngo «Yakijije abandi, none yananiwe kwikiza ubwe ! 32Kristu, Umwami wa Israheli, namanuke ku musaraba ubu ngubu, kugira ngo tubone maze twemere !» Ndetse n’abari babambanywe na we, na bo baramutukaga.
33Bigejeje ku isaha ya gatandatu, umwijima ucura ku isi yose, kugeza ku isaha ya cyenda. 34Nuko ku isaha ya cyenda, Yezu avuga mu ijwi riranguruye ati «Eloyi, Eloyi, lama sabaktani ?» bivuga ngo «Mana yanjye, Mana yanjye, icyatumye untererana ni iki?» 35Bamwe mu bari aho bamwumvise baravuga bati «Dore aratabaza Eliya !» 39Umwe ariruka avika icyangwe muri divayi irura, maze agitunga ku rubingo, aramuhereza ngo anywe avuga ati «Nimureke turebe niba Eliya aza kumumanura.» 37Yezu arangurura ijwi cyane, nuko araca.
(Aha barapfukama bagaceceka akanya gate)
38Maze umubambiko wo mu Ngoro y’Imana utanyukamo kabiri, kuva hejuru kugeza hasi. 39Nuko umutegeka w’abasirikare wari uhagaze imbere ye, abonye ko aciye atyo aravuga ati «Koko, uyu yari umwana w’Imana !» 40Hari n’abagore bareberaga kure. Barimo Mariya Madalena, na Mariya nyina wa Yakobo muto na Yoze, na Salome, 41bajyaga bakurikira Yezu kandi bakamukorera igihe yari mu Galileya. Bari kumwe n’abandi bagore benshi bari barazamukanye na we ajya i Yeruzalemu.
42Bugorobye, kuko hari ku mwiteguro w’isabato, 43Yozefu w’i Arimatiya, umujyanama w’umunyacyubahiro wari utegereje na we Ingoma y’Imana, ashirika ubwoba aza kwa Pilato, maze asaba umurambo wa Yezu. 44Pilato atangazwa n’uko yaba yapfuye, ahamagaza umutegeka w’abasirikare, amubaza niba hashize igihe apfuye. 45Amaze kubyemezwa n’uwo mutegeka, yemerera Yozefu kujyana umurambo. 46 Yozefu ngo amare kugura umwenda, amanura umurambo wa Yezu ku musaraba, awuzingiraho uwo mwenda, maze awushyingura mu mva yari yacukuwe mu rutare. Hanyuma ahirikira ibuye ku muryango w’imva. 47Nuko Mariya Madalena na Mariya nyina wa Yoze bitegereza aho bamushyize. (*)
IVANJILI (Isomo rigufi)
✠ Ububabare bw’Umwami wacu Yezu Kristu uko bwanditswe
na Mariko Mk 15,1-39
1Mu gitondo kare, abatware b’abaherezabitambo bateranira hamwe n’abakuru b’imiryango n’abigishamategeko, mbese abagize inama nkuru bose. Bamaze kuboha Yezu, baramujyana bamushyikiriza Pilato. 2Nuko Pilato aramubaza ati «Mbese uri umwami w’Abayahudi ?» Yezu aramusubiza ati «Urabyivugiye.» 3Abatware b’abaherezabitambo bamurega byinshi. 4Pilato arongera aramubaza ati «Nta cyo usubiza ? Ntiwumva ibyo bakurega byose ?» 5Yezu ariko ntiyongera kugira icyo asubiza, Pilato biramutangaza cyane.
6Buri munsi mukuru yabarekuriraga imwe mu mfungwa baba- ga bamusabye. 7Ubwo rero mu buroko hakaba uwitwa Barabasi, wari wafatanywe n’abandi bagome bari biciye umuntu mu myi- vumbagatanyo. 8Nuko rubanda rurazamuka, batangira gusaba Pilato ngo abagirire uko yabamenyereje. 9Pilato arababaza ati «Murashaka ko mbarekurira umwami w’Abayahudi ?» 10Yari azi neza ko abaherezabitambo bakuru bari bamutanze babitewe n’ishyari. 1lUbwo ariko abaherezabitambo bakuru boshya rubanda gusaba ko abarekurira Barabasi. 12Pilato arongera arababaza ati «Maze se ngire nte uwo mwita umwami w’Abayahudi?» 13Bo rero batera hejuru bati «Mubambe ku musaraba !» I4Pilato arababaza ati «Ikibi yakoze ni ikihe?» Bo rero barushaho gutera hejuru bati «Mubambe ku musaraba!» 15Pilato ahitamo gushimisha rubanda, abarekurira Barabasi. Amaze gukubitisha Yezu, aramutanga ngo bajye kumubamba.
16Nuko abasirikare bajyana Yezu mu gikari cy’ingoro ya Pilato, maze bakoranya igombaniro ryose. 17Bamwambika igishura gitukura, nyuma baboha ikizingo cy’amahwa, bakimushyira ku mutwe. 18Nuko batangira kumushungera bavuga bati «Turakuramya, Mwami w’Abayahudi !» 19Ubwo bamukubitisha urubingo mu mutwe, bakamuvunderezaho amacandwe, maze bagatera ivi imbere ye byo kumuramya. 20Bamaze kumukwena batyo bamwambura igishura gitukura, bamwambika imyambaro ye, baramushorera bajya kumubamba.
21Mu nzira bafatirana Simoni w’i Sireni, se wa Alegisanderi na Rufusi wiviraga mu murima, ngo amutwaze umusaraba. 22Nuko bajyana Yezu ahantu hitwa Gologota, bikavuga ku Kigihanga. 23Bamuha divayi ivanze n’indurwe ngo abinywe, ariko ntiyabyakira. 24Nuko baramubamba. Hanyuma bigabanya imyambaro ye, bayikoreraho ubufindo ngo bamenye icyo buri wese yegukana. 25Bamubambye ari ku isaha ya gatatu. 26Hari kandi urubaho rwanditseho icyo azize, ngo «Umwami w’Abayahudi». 27Maze bamubambana n’abagome babiri, umwe iburyo undi ibumoso bwe. (28*) 29Abahisi bakamutuka bazunguza umutwe kandi bavuga ngo «Ngaho da ! Wowe usenya Ingoro y’Imana maze ukongera ukayubaka mu minsi itatu, 30ikize ubwawe wimanure ku musaraba !» 31Abatware b’abaherezabitambo hamwe n’abigishamategeko bamushinyaguriraga bavuga ngo «Yakijije abandi, none yananiwe kwikiza ubwe ! 32Kristu, Umwami wa Israheli, namanuke ku musaraba ubu ngubu, kugira ngo tubone maze twemere !» Ndetse n’abari babambanywe na we, na bo baramutukaga.
33Bigejeje ku isaha ya gatandatu, umwijima ucura ku isi yose, kugeza ku isaha ya cyenda. 34Nuko ku isaha ya cyenda, Yezu avuga mu ijwi riranguruye ati «Eloyi, Eloyi, lama sabaktani ?» bivuga ngo «Mana yanjye, Mana yanjye, icyatumye untererana ni iki ?» 35Bamwe mu bari aho bamwumvise baravuga bati «Dore aratabaza Eliya !» 36Umwe ariruka avika icyangwe muri divayi irura, maze agitunga ku rubingo, aramuhereza ngo anywe avuga ati «Nimureke turebe niba Eliya aza kumumanura.» 37Yezu arangurura ijwi cyane, nuko araca.
(Aha barapfukmna, bagaceceka akanya gato)
38Maze umubambiko wo mu Ngoro y’Imana utanyukamo kabiri, kuva hejuru kugeza hasi. 39Nuko umutegeka w’abasirikare wari uhagaze imbere ye, abonye ko aciye atyo aravuga ati «Koko uyu yari umwana w’Imana !» (*)
IMINSI NYABUTATU
YA PasikaN’IGIHE CYA Pasika
KU WA KANE MUTAGATIFU
MISA Y’AMAVUTA MATAGATIFU
ISOMO RYA MBERE
Isomo ryo mu gitabo cy’Umuhanuzi Izayi Iz 61, 1-3a. 6a.8b-9
1Umwuka w’Uhoraho urantwikiriye,
kuko Uhoraho yantoye akansiga amavuta ;
yanyohereje gushyira abakene inkuru nziza,
komora abafite umutima wamenaguritse,
gutangariza imbohe ko zibohowe,
n’abapfukiranwaga ko bafunguwe,
2kwamamaza umwaka w’impuhwe z’Uhoraho,
umunsi w’ukwihorera kw’Imana yacu,
guhumuriza abari mu cyunamo bose,
3kwambika ikamba abashavuye b’i Siyoni.
Bazambikwa ikamba mu kigwi cy’ivu,
umwambaro w’umurimbo mu cyimbo cy’ibigunira,
basigwe amavuta y’ibyishimo mu mwanya w’umubabaro.
6Naho mwebwe muzitwa «abaherezabitambo b’Uhoraho»,
bazabite «abagaragu b’Imana yacu».
8Nzabaha igihembo cyanyu nta buryarya,
nzagirane namwe Isezerano rizahoraho iteka.
9Ababakomokaho bazamenyekana mu mahanga,
urubyaro rwanyu rwamamare mu miryango ;
abazarubona bose bazamenyereho
ko ari urubyaro Uhoraho yahaye umugisha.
Iryo ni Ijambo ry’Imana
ZABURI Zab 89 (88), 20a. 21, 22.25, 27.29
Inyik/ Nyagasani, ni wowe ufite amagambo y’Isezerano rihoraho.
Kera wavuganiye n’abayoboke bawe mu ibonekerwa,
maze uravuga uti «Nasanze Dawudi yambera umugaragu,
maze musiga amavuta yanjye matagatifu.
«Ikiganza cyanjye kizamuramira,
n’ukuboko kwanjye kuzamutize imbaraga !
Ubudahemuka bwanjye n’impuhwe zanjye bizahorana na we,
maze azegure umutwe kubera izina ryanjye.
«We azanyiyambaza agira ati ‘Uri Data,
uri Imana yanjye, uri urutare nkesha agakiza !’
Nzamukomereza impuhwe zanjye ubuziraherezo,
kandi iryo sezerano ntirizasubirwaho.»
ISOMO RYA KABIRI
Isomo ryo mu gitabo cy’Ibyahishuriwe Yohani Intumwa Hish 1, 5-8
Bavandimwe, nimugire ineza n’amahoro 5bituruka kuri Yezu Kristu, umuhamya w’indahemuka umuvukambere mu bapfuye n’umugenga w’abami bo ku isi. Koko Kristu aradukunda ; yadukijije ibyaha akoresheje amaraso ye, 6maze atugira ihanga rya cyami n’abaherezabitambo, kugira ngo dukorere Imana Se. Naharirwe rero ikuzo n’ububasha, uko ibihe bihora bisimburana iteka ! Amen ! 7Nguyu araje rwagati mu bicu, maze icyitwa ijisho cyose kizamubone, ndetse n’abamuhinguranyije : imiryango yose y’isi izajya mu cyunamo ku mpamvu ye. Ni byo koko ! Amen ! 8Ni jyewe Alufa na Omega, Intangiriro n’Iherezo, - uwo ni Nyagasani Imana ubivuga - Uriho, Uwahozeho kandi Ugiye kuza, Umushoborabyose.
Iryo ni Ijambo ry’Imana
IBANGONDIRIMBO RIBANZIRIZA IVANJILI Iz 61, 1
Ikuzo n’ibisingizo ni ibyawe, Nyagasani Yezu.
Umwuka w’Uhoraho uragutwikiriye,
yakohereje gushyira abakene Inkuru Nziza y’umukiro.
Ikuzo n’ibisingizo ni ibyawe, Nyagasani Yezu.
IVANJILI
✠ Amagambo yo mu Ivanjili Ntagatifu uko yanditswe na Luka
Lk 4,16-21
Muri icyo gihe 16Yezu ajya i Nazareti aho yari yararerewe, maze nk’uko yabimenyereye, yinjira mu isengero ku munsi w’isabato ; nuko arahaguruka ngo asome Ibyanditswe bitagatifu. 17Bamuhereza igitabo cy’umuhanuzi Izayi, arakibumbura, abona ahanditse ngo
18«Roho wa Nyagasani arantwikiriye,
kuko yantoye akansiga amavuta,
agira ngo ngeze Inkuru Nziza ku bakene,
ntangarize imbohe ko zibohowe,
n’impumyi ko zihumutse,
n’abapfukiranwaga ko babohowe,
19kandi namamaze umwaka w’impuhwe za Nyagasani.» 20Yezu abumba igitabo, agisubiza umuhereza maze aricara ; mu isengero bose bari bamuhanze amaso.21 Nuko atangira kubabwira ati «Ibiri mu isomo mumaze kumva, mumenye ko byujujwe uyu munsi.»
Iyo ni Ivanjili Ntagatifu
MISA YA NIMUGOROBA
URWIBUTSO RW’ISANGIRA RYA
NYUMA RYA NYAGASANI
ISOMO RYA MBERE
Isomo ryo mu gitabo cy’Iyimukamisiri Iyim 12,1-8.11-14
Muri iyo minsi, 1Uhoraho abwira Musa na Aroni bari mu gihugu cya Misiri ati 2«Uku kwezi kuzababere intangiriro y’amezi, kuzabe ukwa mbere mu mezi y’umwaka wanyu. 3Nimubwire imbaga yose y’Abayisraheli muti ‘Ku munsi wa cumi w’uku kwezi muzafate itungo rimwe muri buri muryango, itungo muri buri rugo. 4Niba urugo rurimo abantu bake kuri iryo tungo, bazarifatanye n’umuturanyi ubari hafi cyane, baringanize n’umubare w’abantu. Muzahitemo iryo tungo mukurikije icyo buri muntu ashobora kurya. 5Iryo tungo rizabe ridafite inenge, kandi ari isekurume imaze umwaka umwe. Muzaritoranye mu bana b’intama cyangwa mu bana b’ihene. 6Muzarigumane kugeza ku munsi wa cumi n’ine w’uku kwezi, maze ikoraniro ryose ry’imbaga y’Abayisraheli bazaribage mu mugoroba w’akabwibwi. 7Bazende ku maraso y’iryo tungo bayasige ku nkomanizo z’imiryango, no ku mitambiko y’inzugi z’amazu bazaririramo. 8Bazarye inyama zaryo muri iryo joro. Bazazirye zokeje, bazirishe imigati idasembuye n’imboga zisharira. 11Iryo tungo muzarirya mutya : muzabe mukenyeje umukoba, mwambaye inkweto mu birenge, mufite inkoni mu ntoki ; kandi muzarye mugira bwangu kuko ari Pasika y’Uhoraho. 12Muri iryo joro nzambukiranya igihugu cya Misiri, maze nice icyavutse uburiza cyose mu gihugu cya Misiri, guhera ku bantu kugeza ku nyamaswa, kandi n’ibigirwamana bya Misiri byose mbicire imanza. Ni jye Uhoraho !
13Amaraso azababera ikimenyetso ku mazu muzaba murimo. Nzabona amaraso maze mbahiteho, mwoye kuzarimburwa
igihe nzaba ndiho noreka igihugu cya Misiri. 14 Uwo munsi uzababere urwibutso ; buri mwaka muzajye mukora urugendo rwo kujya gusingiza Uhoraho. Muzajye muhimbaza uwo munsi uko ibihe bigenda bisimburana. Ngiryo itegeko ridakuka mbahaye.’»
Iryo ni Ijambo ry’Imana
ZABURI Zab 116 (114-115), 12-13,15-16a.c, 17-18
Inyik/ Haragasingizwa inkongoro n’umugati,
bibeshaho umuryango wawe.
Ibyiza byose Uhoraho yangiriye,
rwose nzabimwitura nte ?
Nzashyira ejuru inkongoro y’umukiro,
kandi njye niyambaza izina ry’Uhoraho.
Koko Uhoraho ababazwa n’urupfu rw’abayoboke be !
None rero Uhoraho, wagiriye ko ndi umugaragu wawe,
maze umbohora ku ngoyi !
Nzagutura igitambo cy’ishimwe,
kandi njye niyambaza izina ry’Uhoraho.
Nzarangiza amasezerano nagiriye Uhoraho,
imbere y’iteraniro ry’umuryango we wose.
ISOMO RYA KABIRI
Isomo ryo mu ibaruwa ya mbere Mutagatifu Pawulo Intumwa yandikiye Abanyakorinti 1 Kor 11,23-26
Bavandimwe, 23jyewe rero dore ibyo nashyikirijwe na Nyagasani, bikaba ari byo nabagejejeho : Nyagasani Yezu araye ari butangwe, yafashe umugati, 24amaze gushimira, arawumanyura avuga ati «Iki ni umubiri wanjye ubatangiwe; mujye mubikora namwe bibe urwibutso rwanjye.» 25Barangije kurya, n’inkongoro ayigenzereza atyo avuga ati «Iyi ni inkongoro y’Isezerano rishya rishingiye ku maraso yanjye; mujye mubikora namwe, kandi igihe cyose muyinywereyeho bibe urwibutso rwanjye.» 26Kuko igihe cyose murya uyu mugati, mukanywa no kuri iyi nkongoro, muba mwamamaza urupfu rwa Nyagasani kugeza igihe azazira.
Iryo ni Ijambo ry’Imana
IBANGONDIRIMBO RIBANZIRIZA IVANJILI Yh 13,34
Ikuzo n’ibisingizo ni ibyawe, Nyagasani Yezu.
Nyagasani, uduhaye itegeko rishya,
uti «Nimukundane, kandi mukundane nk’uko nabakunze.»
Ikuzo n’ibisingizo ni ibyawe, Nyagasani Yezu.
IVANJILI
✠ Amagambo yo mu Ivanjili Ntagatifu uko yanditswe na
Yohani Yh 13,1-15
1Mbere y’umunsi mukuru wa Pasika, Yezu amenye ko igihe cye cyageze cyo kuva muri iyi si agasanga Se, uko yagakunze abe bari mu nsi, abakunda byimazeyo. 2Nuko nimugoroba igihe bafunguraga, Sekibi akaba yashyize mu mutima wa Yuda mwene Simoni Isikariyoti igitekerezo cyo kumugambanira, 3Yezu azirikanye ko Se yamweguriye byose, ko yaturutse ku Mana kandi akaba ari Yo asanga, 4ni ko guhaguruka ava ku meza. Yikuramo umwitero we, afata igitambaro aragikindikiza. 5Nuko asuka amazi mu ibesani, atangira koza ibirenge by’abigishwa be, akajya abihanaguza igitambaro yari akindikije. 6Aza kugera imbere ya Simoni Petero, maze Petero aramubwira ati «Nyagasani, abe ari wowe unyoza ibirenge ?» Yezu aramusubiza ati «Ibyo nkora ubu ntiwabimenya, ariko uzabimenya hanyuma.» 8Petero aramubwira ati «Ntuzigera na rimwe unyoza ibirenge.» Yezu aramusubiza ati «Ndamutse ntakogeje, ntuzagira umugabane hamwe nanjye.» 9Petero aramusubiza ati «Nyagasani, noneho si ibirenge gusa, dore n’amaboko ndetse n’umutwe !» 10Yezu aramusubiza ati «Uwiyuhagiye nta kindi aba ashigaje kitari ukoga ibirenge, kuko aba yisukuye wese. Namwe murasukuye, ariko si mwese.» «Yari azi neza uri bumugambanire, bituma avuga ati «Mwese ntimusukuye.»
12Amaze kuboza ibirenge no gusubizamo umwitero we, asubira ku meza arababwira ati «Aho mwumvise ibyo maze kubagirira? 13Munyita Umwigisha na Nyagasani, ni koko muvuga neza kuko ndi we. 14Ubwo rero mbogeje ibirenge kandi ndi Nyagasani n’Umwigisha, namwe murajye mwozanya ibirenge ubwanyu. 15Ni urugero mbahaye, kugira ngo uko nabagiriye, abe ari ko namwe mugirirana ubwanyu.»
Iyo ni Ivanjili Ntagatifu
KU WA GATANU MUTAGATIFU
UMUNSI W’UBUBABARE
BWA NYAGASANI
ISOMO RYA MBERE
Isomo ryo mu gitabo cy’Umuhanuzi Izayi Iz 52,13 -15 ; 53,1-12
13Dore umugaragu wanjye azasagamba, azakuzwa, yererezwe asumbe byose. 14Nkuko imbaga y’abantu yamubonye igakangarana kuko yari yangiritse bitavugwa, imisusire ye ntaho igihuriye n’iy’umuntu, n’uburanga bwe ntibuse n’ubwa bene muntu, 15ni na ko bizatangaza amahanga menshi, abami nibamugera imbere bumirwe kuko bazaba babonye icyo batigeze babwirwa, bakitegereza ikintu kitigeze kibaho.
53,1Ni nde wakwemera ibyo twebwe twumvise ? Ni nde wahishuriwe ukuboko kwa Nyagasani ? 2Yakuriye imbere y’Uhoraho nk’umumero ushibutse, ameze nk’umuzi wanamye mu gitaka cyumiranye ; nta buranga nta n’igikundiro byo kurembuza amaso yacu, yewe nta n’igihagararo cyamutera igikundiro. 3Yari yasuzuguwe kandi yatereranywe n’abantu, umunyamibabaro n’umumenyerane w’ibyago ; mbese nk’uwo bagera imbere bakipfuka mu maso, kuko yari asuzuguritse, twese nta we umwitaho.
4Nyamara kandi ni imibabaro yacu yari yikoreye, ni ibyago byacu byari bimuremereye; ariko twe tukamubonamo uwahawe igihano, nk’uwibasiwe n’Imana ikamucisha bugufi. 5Nyamara we yahinguranyijwe kubera ibyaha byacu, ajanjagurirwa ibicumuro byacu : igihano cye cyadukomoreye amahoro, ibikomere bye tubikesha umukiro. 6Twese twarabuyeraga nk’intama zazimiye, tugenda intatane buri wese atomereye inzira ye, maze Uhoraho amugerekaho ububi bwacu bwose. 7Yarashinyaguriwe ariko yicisha bugufi, ntiyabumbura umunwa boshye umwana w’intama bajyanye mu ibagiro, cyangwa intama yicecekera imbere y’abayogosha ubwoya, na we ntiyaruhije abumbura umunwa. 8Yafashwe ku gahato bamucira urw’akarengane, kandi nta n’umwe wigeze amwitaho. Ni koko yakuwe mu isi y’abazima, ahanirwa ubugome bw’umuryango we. 9Yahambwe hamwe n’abagiranabi, imva ye ishyirwa hamwe n’iy’abakungu, n’ubwo we nta bugome yigeze agira, akaba nta n’ikinyoma cyigeze mu munwa we. 10Uhoraho yashatse kumujanjaguza imibabaro, kandi namara gutura ubuzima bwe ho impongano z’ibyaha, azabona abamukomokaho, azarambe maze azuzuze atyo umugambi w’Uhoraho. «Nyuma y’iyo mibabaro yose azabona urumuri azanezerwe ; namara kumenyekana ko ari intungane, azageza benshi ku butungane. Umugaragu wanjye azakiranura imbaga y’abantu, kuko yikoreye ubwe ibicumuro byabo. 12Ni cyo gituma nzamugenera umugabane mu bihangange, akazagabana umunyago n’abanyamaboko; kuko ubwe yigabije urupfu, akabarirwa mu banyabyaha. Ubwe yikoreye ibicumuro by’imbaga, nuko atakambira abagiranabi.
Iryo ni Ijambo ry’Imana
ZABURI Zab 31 (30), 2ab.6,12,13-14ad, 15-16,17.25
Inyik/ Dawe, nshyize ubugingo bwanjye mu maboko yawe.
Uhoraho, ni wowe buhungiro bwanjye,
singateterezwe bibaho !
Nshyize ubugingo bwanjye mu maboko yawe,
ni wowe uncungura Uhoraho, Mana nyir’ukuri.
Abanzi banjye bose barampundazaho ibitutsi,
n’abaturanyi banjye ntibakincira akari urutega.
Incuti zanjye z’amagara nsigaye nzitera ishozi,
abo duhuriye mu nzira barambona bagahunga.
Nsigaye naribagiranye nk’uwapfuye,
meze nk’akabindi kasandaye.
Numva rubanda bamvuga nabi,
bajya imigambi yo kuncuza ubugingo.
Ariko ndakwiringiye, Uhoraho,
ndavuga nti «Imana yanjye ni wowe !»
Ibihe byanjye biri mu kiganza cyawe,
ngaho rero ngobotora mu maboko y’abanzi banyibasiye !
Uruhanga rwawe nirumurikire umugaragu wawe,
maze unkize ugiriye impuhwe zawe.
Nimukomere kandi mwireme agatima,
mwebwe mwese abizera Uhoraho !
ISOMO RYA KABIRI
Isomo ryo mu ibaruwa yandikiwe Abahebureyi Heb 4,14-16 ; 5,7-9
Bavandimwe,1, 14ubwo dufite Umuherezagitambo mukuru uhe- buje watashye mu ijuru, Yezu Umwana w’Imana, nitwikomezemo ukwemera. 15Koko rero, ntidufite Umuherezagitambo mukuru wananirwa kudutabara mu ntege nke zacu ; yageragejwe muri byose ku buryo bumwe natwe, ariko ntiyatsindwa n’icyaha. 16Nitwegerane rero ubwizere intebe ya Nyir’ineza, kugira ngo tugirirwe impuhwe kandi duhabwe imbaraga zizadufasha igihe kigeze. 5, 7Mu gihe cy’imibereho ye yo ku isi, ni We wasengaga atakamba mu miborogo n’amarira, abitura Uwashoboraga kumurokora urupfu, maze arumvirwa kuko yagororokeye Imana. 8Nubwo yari Mwana bwose, ibyo yababaye byamwigishije kumvira ; 9maze aho amariye kuba intagereranywa, abamwumvira bose abaviramo isoko y’ubucungurwe bw’iteka.
Iryo ni Ijambo ry’Imana
IBANGONDIRIMBO RIBANZIRIZA IVANJILI Fil 2,8-9
Kristu wapfuye azira ibyaha byacu,
Kristu wazukiye kuduha ubugingo bw’iteka.
Kristu yemeye kwumvira ari twe agirira ageza aho gupfa,
apfiriye ndetse ku musaraba.
Ni cyo cyatumye Imana imukuza, imuha Izina risumbye ayandi yose.
Kristu wapfuye azira ibyaha byacu,
Kristu wazukiye kuduha ubugingo bw’iteka.
IVANJILI
✠ Ububabare bw’Umwami wacu Yezu Kristu uko bwanditswe
na Yohani Yh 18,1- 40 ; 19,1- 42
Bamaze gufungura, 18, 1Yezu ajyana n’abigishwa be yambuka umugezi wa Sedironi. Hakaba ubusitani, we n’abigishwa babwinjiramo. 2Yuda wajyaga kumugambanira akamenya aho hantu, kuko Yezu yakundaga kuhaza kenshi aherekejwe n’abigishwa be. 3Nuko Yuda amaze kubona abasirikare n’abagaragu yahawe n’abatware b’abaherezabitambo n’Abafarizayi, ajyayo ; bari bitwaje amatara n’imuri n’intwaro. 4Yezu wari uzi ibigiye kumubaho byose, aza abagana arababaza ati «Murashaka nde ?» 5Baramusubiza bati «Yezu w’i Nazareti.» Yezu arababwira ati «Ni jyewe.» Yuda wamugambaniraga akaba ahagararanye na bo. 6Yezu amaze kubabwira ati «Ni jyewe», basubira inyuma bitura hasi. Yongera kubabaza ati «Murashaka nde ?» Barongera bati «Yezu w’i Nazareti.» 8Yezu arabasubiza ati «Nababwiye ko ari jye. Niba rero ari jye mushaka, nimureke aba ngaba bigendere.» 9Bityo harangira ijambo yari yaravuze ati «Abo wampaye nta n’umwe najimije muri bo.»
10Nuko Simoni Petero wari ufite inkota arayikura, ayikubita umugaragu w’umuherezabitambo mukuru, amuca ugutwi kw’iburyo. Uwo mugaragu yitwaga Malikusi. «Yezu abwira Petero ati «Subiza inkota yawe mu rwubati. Inkongoro Data ampaye ndeke se kuyinywa ?» 12Abasirikare n’umutware wabo, n’abagaragu b’Abayahudi, bafata Yezu baramuboha. 13Babanza kumujyana kwa Ana wari sebukwe wa Kayifa, umuherezabitambo mukuru w’uwo mwaka. 14Kayifa uwo ni we wari waragiriye Abayahudi inama, y’uko ikiruta ari uko umuntu umwe yapfira imbaga.
15Simoni Petero yari yakurikiye Yezu hamwe n’undi mwigishwa. Uwo mwigishwa wundi akaba yaraziranye n’umuherezabitambo mukuru, yinjirana na Yezu mu rugo rw’umuherezabitambo mukuru. 16Petero we asigara ahagaze hanze inyuma y’irembo ; wa mwigishwa wundi wari uzwi n’umuherezabitambo mukuru, araza abwira umuja ukumira ngo yinjize Petero. 17Nuko uwo muja w’umukumirizi abwira Petero ati «Aho none ntiwaba uri uwo mu bigishwa b’uriya muntu ?» Petero arasubiza ati «Sindi we.» 18Abagaragu n’abafasha bari bacanye umuriro bota, kuko hari imbeho. Petero na we yari ahagararanye na bo yota.
19Nuko umuherezabitambo mukuru abaza Yezu iby’abigishwa be n’inyigisho ze. 20Yezu aramusubiza ati «Navugiye ahagaragara mbwira isi yose. Nigishirije iteka mu masengero no mu Ngoro y’Imana, aho Abayahudi bose bateranira, nta cyo navuze rwihishwa. 21Urambaza iki ? Baza abanyumvise icyo nababwiye. Bo bazi ibyo navuze.»22 Amaze kuvuga ibyo, umwe mu bafasha wari aho ngaho akubita Yezu urushyi ati «Ni uko usubiza umuherezabitambo mukuru ?» 23Yezu aramusubiza ati «Niba mvuze nabi garagaza ikibi mvuze ; niba kandi mvuze neza, unkubitiye iki ?» 24Nuko Ana amwohereza aboshye kwa Kayifa, umuherezabitambo mukuru.
25Simoni Petero yari ahagaze aho yota. Nuko baramubaza bati «Aho nawe nturi uwo mu bigishwa be ?» Arahakana ati «Sindi we.» 26Umwe mu bagaragu b’umuherezabitambo mukuru, mwene wabo w’uwo Petero yari yaciye ugutwi ati «Sinakubonye mu busitani muri kumwe ?» 27Petero yongera guhakana. Ako kanya isake irabika.
28Nuko bavana Yezu kwa Kayifa bamujyana mu rugo rw’Umutware w’igihugu, hakaba mu gitondo, ariko bo ntibinjira mu rugo rw’Umutware ngo batandura batararya Pasika. 29Pilato arasohoka arabasanga ati «Uyu muntu muramurega iki ?» 30Baramusubiza bati «Iyo ataba umugiranabi ntituba tumukuzaniye.» 31Nuko Pilato arababwira ati «Nimumujyane mumucire urubanza, mukurikije amategeko yanyu.» Abayahudi bati «Nta bubasha dufite bwo kugira uwo ducira urubanza rwo gupfa.» 32Bityo ijambo Yezu yari yaravuze ryerekeye ku rupfu yari agiye gupfa riruzuzwa.
33Nuko Pilato asubira mu rugo rwe, ahamagaza Yezu aramubaza ati «Mbese ni wowe mwami w’Abayahudi koko ?» 34Yezu aramusubiza ati «Ibyo ubivuze ku bwawe, cyangwa se ni abandi babikumbwiyeho?» 35Pilato arasubiza ati «Aho ntugira ngo nanjye ndi Umuyahudi ? Bene wanyu n’abatware b’abaherezabitambo ni bo bakunzaniye ; wakoze iki ?» 36Yezu arasubiza ati «Ingoma yanjye si iyo kuri iyi si ; iyo ingoma yanjye iza kuba iyo kuri iyi si, abantu banjye baba bandwanyeho kugira ngo ntagabizwa Abayahudi. None rero Ingoma yanjye si iy’ino aha.» 37Nuko Pilato aramubaza ati «Noneho rero uri umwami ?» Yezu aramusubiza ati «Urabyivugiye : ndi umwami ! Cyakora icyo jyewe navukiye kandi kikanzana ku isi, ni ukugira ngo mpamye ibyerekeye ukuri. Unyurwa n’ukuri wese yumva icyo mvuga.» 38Pilato aramubaza ati «Ukuri ni iki ?» Amaze kuvuga atyo yongera gusohoka, asanga Abayahudi arababwira ati «Nta kirego na kimwe nsanze kimuhama. 39Birasanzwe ko mbarekurira imbohe imwe mwishakiye ku munsi wa Pasika ; murashaka ko mbarekurira Umwami w’Abayahudi ?» 40Nuko bose barongera batera hejuru bati «Si uwo dushaka, ahubwo duhe Barabasi.» Barabasi uwo yari umujura.
19,1Ni bwo Pilato ategetse ko bafata Yezu ngo bamujyane, maze bamukubite. 2Abasirikare bamushyira ku mutwe ikamba babo- hesheje amahwa, bamwambika n’igishura gitukura ; 3nuko bamu- jyaho bavuga bati «Turakuramutsa Mwami w’Abayahudi», baka- mukubita n’inshyi. Pilato yongera gusohoka abwira Abayahudi ati «Dore ndamubazaniye kugira ngo mumenye ko nta kirego na kimwe kimuhama musanganye.»
5Nuko Yezu asohoka yambaye ikamba ry’amahwa n’igishura gitukura. Pilato arababwira ati «Nguyu wa muntu.» 6Abatware b’abaherezabitambo n’abagaragu babo bamukubise amaso, batera hejuru bati «Nabambwe ku musaraba ! Nabambwe !» Pilato arababwira ati «Ngaho nimumujyane mumwibambire, jye nta kirego kimuhama musanganye.» 7Abayahudi baramusubiza bati «Dufite itegeko, kandi dukurikije iryo tegeko agomba gupfa, kuko yigize Umwana w’Imana.» Pilato abyumvise arushaho kugira ubwoba. 9Asubira mu rugo maze abaza Yezu ati «Ukomoka he ?» Yezu ariko ntiyagira icyo amusubiza. 10Pilato ni ko kumubwira ati «Nta cyo unshubije ? Ntuzi ko mfite ububasha bwo kukurekura, nkagira n’ubwo kukubambisha ?» 11Yezu aramusubiza ati «Nta bubasha na buke wajyaga kungiraho, iyo utabihabwa no hejuru. Ni cyo gituma uwangambaniye ari we ufite icyaha kiruta icyawe.» 12Pilato yumvise ibyo ashaka uko yamurekura, ariko Abayahudi batera hejuru bati «Uramutse umurekuye, uraba utakibaye incuti ya Kayizari. Uwigira umwami wese, aba arwanya Kayizari.» 13Nuko Pilato amaze kumva ayo magambo ajyana Yezu hanze, yicara ku ntebe y’ubucamanza ahantu hiherereye hitwa «Litostrotosi», mu gihebureyi «Gabata». 14Wari n’umunsi w’umwiteguro wa Pasika, bigeze nko ku isaha ya gatandatu. Pilato abwira Abayahudi ati «Nguyu umwami wanyu.» 15Batera hejuru bati «Kuraho, kuraho, mubambe ku musaraba!» Pilato arababwira ati «Mbambe umwami wanyu ?» Abatware b’abaherezabitambo barasubiza bati «Nta mwami wundi tugira utari Kayizari.» 16Nuko aramutanga ngo bamubambe ku musaraba.
17Nuko bafata Yezu maze agenda yikoreye umusaraba we, yerekeza ahantu hitwa «ku Kigihanga», mu gihebureyi hakitwa «Gologota». 18Aho ni ho bamubambye ku musaraba ari kumwe n’abandi babiri, umwe hino, undi hirya, Yezu we akaba hagati. 19Nuko Pilato yandikisha itangazo arimanikisha hejuru y’umusaraba ; hari handitse ngo «Yezu Umunyanazareti, umwami w’Abayahudi.» 20Abayahudi benshi basoma iryo tangazo, kuko aho hantu Yezu yabambwe hari hafi y’umugi kandi ryari ryanditse mu gihebureyi, mu kilatini no mu kigereki. 21Abatware b’abaherezabitambo b’Abayahudi babwira Pilato bati «Oya, wikwandika ngo ‘umwami w’Abayahudi’ ; ahubwo andika ko uyu muntu yihaye kuvuga ngo ‘Ndi umwami w’Abayahudi.’» 22Pilato arabasubiza ati «Icyo nanditse nacyanditse.»
“Abasirikare bamaze kubamba Yezu, bafata imyenda ye bayicamo imigabane ine, umusirikare wese ajyana umugabane we. Hari n’ikanzu, ariko iyo kanzu ntigire iteranyirizo, kuko yari iboshywe buzima kuva hejuru kugera hasi. Bajya inama bati 24«Ntituyitanyure, ahubwo reka tuyikorereho ubufindo tumenye uri bube nyirayo.» Bityo harangira Ibyanditswe ngo «Bigabanije imyambaro yanjye, maze ikanzu yanjye bayikoreraho ubufindo.» Nguko uko abasirikare babigenjeje.
25Iruhande rw’umusaraba wa Yezu hari hahagaze Nyina, na nyina wabo Mariya muka Kilopa, na Mariya Madalena. 26Yezu abonye Nyina ahagararanye na wa mwigishwa yakundaga, abwira Nyina ati «Mubyeyi, dore umwana wawe.» 27Abwira na wa mwigishwa ati «Dore Nyoko.» Guhera icyo gihe, uwo mwigishwa amujyana iwe. 28Nyuma y’ibyo Yezu wari uzi ko byose birangiye, kugira ngo Ibyanditswe byuzuzwe aravuga ati «Mfite inyota.» 29Aho hakaba hari hateretse urweso rwuzuye divayi irura. Bahambira ku rubingo icyangwe kinitswe muri iyo divayi irura, bacyegereza umunwa we. 30Yezu amaze kunywa kuri iyo divayi irura, aravuga ati «Birujujwe.» Nuko umutwe uregukira imbere, araca.
(Aha barapfukama, bagaceceka akanya gato)
3lUbwo hari ku munsi w’Umwiteguro wa Pasika ; kugira ngo rero imirambo itaguma ku musaraba kuri sabato, kandi iyo sabato ari umunsi mukuru cyane, Abayahudi binginga Pilato ngo bavune amaguru yabo, maze imirambo bayimanure. 32Nuko abasirikare baraza bavuna amaguru y’uwa mbere, n’ay’undi wari ubambanywe na we; 33ariko bageze kuri Yezu basanga yapfuye, we ntibirirwa bamuvuna amaguru; 34ahubwo umwe mu basirikare amutikura icumu mu rubavu, maze ako kanya havamo amaraso n’amazi. 35Uwabibonye ni we ubyemeza kandi icyemezo cye ni ukuri ; na we azi ko avuga ukuri kugira ngo namwe mwemere. 36Ibyo byabaye ari ukugira ngo huzuzwe Ibyanditswe ngo «Nta gufwa rye rizavunika.» 37N’ahandi mu Byanditswe havuga ngo «Bazarangamira uwo bazaba bahinguranyije.»
38Ibyo birangiye, Yozefu w’ahitwa Arimatiya wari umwigishwa wa Yezu rwihishwa kuko yatinyaga Abayahudi, asaba Pilato gutwara umurambo wa Yezu. Pilato arabimwemerera. Nuko araza ajyana umurambo wa Yezu. 39Haza na Nikodemu, wa wundi wigeze gusanga Yezu nijoro ; azana ikivange cy’ishangi n’amarira y’igikakarubamba, bipima nk’ibiro mirongo itatu. 40Nuko benda umurambo wa Yezu bawuhambira mu myenda hamwe n’imibavu, uko Abayahudi bagenzaga bahamba. 41Ahantu bari bamubambye hari ubusitani, muri ubwo busitani hari imva nshya itaragira uyihambwamo n’umwe.42 Nuko kubera umwiteguro wa Pasika y’Abayahudi, aba ari ho bahamba Yezu kuko iyo mva yari hafi. (*)
___________________________
(*)Nyuma y’Ivanjili y’Ububabare bwa Nyagasani, inyikirizo ngo “Iyo ni Ivanjili Ntagatifu» barayihorera, kimwe no ku Cyumweru cy’Amashami.
IGIHE CYA Pasika
KU CYUMWERU CYA Pasika
UMUNSI W’IZUKA RYA NYAGASANI
IGITARAMO CYA Pasika MU IJORO RITAGATIFU
ISOMO RYA MBERE (Isomo rirerire)
Isomo ryo mu gitabo cy’Intangiriro Intg 14 - 31 ; 2,1- 2
1,1Mu ntangiriro Imana yaremye ijuru nisi. 2Isi yari ikivangavange kitagira ishusho kandi iriho ubusa. Umwijima wari ubundikiye inyanja y’amazi, numwuka w’Imana wahuhiraga hejuru yayo.
3Imana iravuga iti «Nihabeho urumuri !» Urumuri rubaho. 4Imana ibona ko urumuri ari rwiza, nuko itandukanya urumuri n’umwijima. 5Urumuri irwita amanywa, umwijima iwita ijoro. Burira buracya, uba umunsi wa mbere.
6Imana iravuga iti «Nihabeho ikirere hagati y’amazi, gitandukanye amazi n’ayandi mazi !» 7Imana ihanga ikirere, maze itandukanya amazi ari mu nsi y’ikirere n’amazi ari hejuru y’ikirere. Biba bityo. 8Ikirere Imana icyita ijuru. Burira buracya, uba umunsi wa kabiri.
9Imana iravuga iti «Amazi ari mu nsi y’ijuru nateranire hamwe, maze ahumutse hagaragare !» Biba bityo. 10Ahumutse Imana ihita ubutaka, ibidendezi by’amazi ibyita inyanja. Imana ibona ari byiza.
11 Imana iravuga iti «Ubutaka nibumere ubwatsi butoshye, n’ibyatsi bifite imbuto zibyara ibindi, n’ibiti byeraho imbuto zifitemo umurama, bikurikije ubwoko bwa buri giti !» Biba bityo. 12Ubutaka bumera ubwatsi butoshye, n’ibyatsi bifite imbuto zibyara ibindi, n’ibiti byeraho imbuto zifitemo umurama, bikurikije ubwoko bwa buri giti. Imana ibona ari byiza. 13Burira buracya, uba umunsi wa gatatu.
14Imana iravuga iti «Nihabeho ibinyarumuri mu kirere cy’ijuru, bitandukanye amanywa n’ijoro, bibe ibimenyetso biranga ibihe by’amakoraniro, bijye kandi biranga iminsi n’imyaka ; 15byakire mu kirere cy’ijuru kugira ngo bimurikire isi !» Biba bityo. 16Nuko Imana ihanga ibinyarumuri binini bibiri : ikinyarumuri kinini kugira ngo kigenge amanywa, n’ikinyarumuri gito ngo kigenge ijoro; ihanga n’inyenyeri. 17Imana ibishyira mu kirere cy’ijuru kugira ngo bimurikire isi, 18no kugira ngo bigenge amanywa n’ijoro, bitandukanye urumuri n’umwijima. Imana ibona ari byiza. 19Burira buracya, uba umunsi wa kane.
20Imana iravuga iti «Amazi najagatemo utunyamaswa tuzima, n’ibiguruka biguruke hejuru y’isi, mu nsi y’ikirere cy’ijuru !» 21Imana irema ibikoko nyamunini by’inyanja, n’ibyinyagambura by’amoko yose byuzura amazi, irema n’ibiguruka byose bya buri bwoko. Imana ibona ari byiza. 22Imana ibiha umugisha ivuga iti «Nimwororoke mugwire, mwuzure amazi y’inyanja, n’ibiguruka bigwire ku isi !» 23Burira buracya, uba umunsi wa gatanu.
24Imana iravuga iti «Ubutaka nibubyare inyamaswa nzima zikurikije amoko yazo: izishobora gutungwa, izikururuka hasi, izo mu ishyamba, zose zikurikije amoko yazo !» Biba bityo. 25Imana ihanga inyamaswa z’ishyamba, n’izishobora gutungwa zikurikije ubwoko bwazo, n’intondagizi zose zikurikije ubwoko bwazo. Imana ibona ari byiza.
26Imana iravuga iti «Noneho duhange Muntu mu ishusho ryacu, mu misusire yacu, maze ategeke ifi zo mu nyanja, ibiguruka byo mu kirere, inyamaswa zitungwa n’izo mu ishyamba, n’intondagizi zose !» 27Nuko Imana irema Muntu mu ishusho ryayo, imurema mu ishusho ry’Imana ; ibarema ari umugabo n’umugore. 28Imana ibaha umugisha, irababwira iti «Nimwororoke mugwire, mukwire isi yose, muyitegeke. Mugenge ifi zo mu nyanja n’ibiguruka byo mu kirere, n’ikizima cyose kikurura ku butaka !» 29Imana iravuga iti «Dore mbahaye icyatsi cyose cyera imbuto ku isi hose, n’igiti cyose cyeraho imbuto zifitemo umurama ; bizaba ibiryo byanyu. 30Inyamaswa zose zo mu gasozi, ibiguruka byose byo mu kirere, icyikurura hasi cyose, icyifitemo ubuzima cyose, mbihaye ibimera bitohagiye ngo birishe !» Nuko biba bityo. 31 Imana ireba ibyo yari imaze gukora byose isanga ari byiza rwose. Burira buracya, uba umunsi wa gatandatu.
2,1Ijuru n’isi n’ibirimo byose byashojwe bityo. 2Ku munsi wa karindwi Imana isoza umurimo yakoraga, nuko kuri uwo munsi wa karindwi iruhuka umurimo yari imaze gukora.
Iryo ni Ijambo ry’Imana
ISOMO RYA MBERE (Isomo rigufi)
Isomo ryo mu gitabo cy’Intangiriro Intg 1, 1. 26-31a
1Mu ntangiriro Imana yaremye ijuru n’isi. 26Imana iravuga iti «Noneho duhange Muntu mu ishusho ryacu, mu misusire yacu, maze ategeke ifi zo mu nyanja, ibiguruka byo mu kirere, inyamaswa zitungwa n’izo mu ishyamba, n’intondagizi zose !»
27Nuko Imana irema Muntu mu ishusho ryayo, imurema mu ishusho ry’Imana ; ibarema ari umugabo n’umugore. 28Imana ibaha umugisha, irababwira iti «Nimwororoke mugwire, mukwire isi yose, muyitegeke. Mugenge ifi zo mu nyanja n’ibiguruka byo mu kirere, n’ikizima cyose kikurura ku butaka !» 29Imana iravuga iti «Dore mbahaye icyatsi cyose cyera imbuto ku isi hose, n’igiti cyose cyeraho imbuto zifitemo umurama ; bizaba ibiryo byanyu. 30Inyamaswa zose zo mu gasozi, ibiguruka byose byo mu kirere, icyikurura hasi cyose, icyifitemo ubuzima cyose, mbihaye ibimera bitohagiye ngo birishe !» Nuko biba bityo. 31aImana ireba ibyo yari imaze gukora byose isanga ari byiza rwose.
Iryo ni Ijambo ry’Imana
ZABURI Zab 104 (103), l-2a, 5-6,10.12 ; 13-14b, 24.35c
Inyik/ Nyagasani, wohereza umwuka wawe maze bikaremwa,
maze imisusire y’isi ukayihindura mishya.
Mutima wanjye, singiza Uhoraho !
Uhoraho, Mana yanjye, uri igihangange rwose !
Wisesuyeho icyubahiro n’ububengerane,
wambaye urumuri nk’igishura.
Isi wayiteretse mu kibanza cyayo,
ntizigera na rimwe ihungabana.
Wayisesuyeho inyanja nk’umwambaro,
amazi yayo agomererwa hejuru y’imisozi.
Uvubukisha amasoko y’amazi mu myoma,
agatemba hagati y’imisozi.
Hafi yayo inyoni zo mu kirere zihubaka ibyari,
zikaririmba zibereye mu mashami.
Imisozi uyivomerera uri hejuru iyo,
isi ukayihaza imbuto z’ibikorwa byawe.
Umeza ubwatsi bw’amatungo,
n’imyaka muntu ahinga.
Uhoraho, mbega ngo ibikorwa byawe biraba byinshi !
Byose wabikoranye ubwitonzi,
isi yuzuye ibiremwa byawe !
Mutima wanjye, singiza Uhoraho !
Cyangwa bashobora guhitamo iyi Zaburi ikurikira :
ZABURI Zab 33 (32), 4-5, 6-7,12-13, 20.22
Inyik/ Nyagasani, isi yose yuzuye ineza yawe.
Ni koko ijambo ry’Uhoraho ni intagorama,
n’ibikorwa bye byose bikaba indahinyuka.
Akunda ubutungane n’ubutabera,
isi yuzuye ineza y’Uhoraho.
Ijuru ryaremwe n’ijambo ry’Uhoraho,
umwuka we uhanga ingabo zaryo zose.
Amazi y’ibiyaga ayagomerera hamwe,
inyanja azikoranyiriza mu bigega.
Hahirwa ihanga Uhoraho abereye Imana,
hahirwa umuryango yitoreye ngo ube imbata ye !
Uhoraho arebera mù bushorishori bw’ijuru,
akabona bene muntu bose.
Twebwe rero twizigiye Uhoraho,
ni we buvunyi bwacu n’ingabo idukingira.
Uhoraho, ineza yawe iraduhoreho,
nk’uko amizero yacu agushingiyeho.
ISOMO RYA KABIRI (Isomo rirerire)
Isomo ryo mu gitabo cy’Intangiriro Intg 22,1-13.15-18
Muri iyo minsi 1Imana igerageza Abrahamu, 1iramubwira iti «Abrahamu !» Arayisubiza ati «Ndi hano.» 2Imana iti «Fata umwana wawe, umwana wawe w’ikinege ukunda, Izaki ; ujye mu karere ka Moriya. Nuhagera uzamutambeho igitambo gitwikwa, ku musozi nzakwereka.» 3Abrahamu arazinduka yasa inkwi z’igitambo gitwikwa ; ategura indogobe ye, nuko aragenda hamwe n’abagaragu be babiri na Izaki umwana we w’umuhungu, berekeza mu karere Imana yari yamubwiye. 4Ku munsi wa gatatu Abrahamu yubura amaso, aho hantu ahabonera kure. 5Maze abwira abagaragu be ati «Nimugume hano n’iyi ndogobe; jye n’umwana turabanza tugende tujye gusenga, hanyuma turahindukira tubasange.»
6Abrahamu yenda inkwi z’igitambo gitwikwa azikorera umuhungu we Izaki ; ajyana urujyo rurimo amakara yaka, n’icyuma. Nuko bombi barajyanirana. 7Izaki abwira se Abrahamu ati «Dawe !» Undi ati «Ni ibiki, mwana wanjye !» Izaki ati «Ko mbona umuriro n’inkwi, intama yo gutamba iri hehe ?» 8 Abrahamu aramusubiza ati «Imana iri burebe aho yibonera intama yo gutamba, mwana wanjye !» Nuko bombi barakomeza barajyanirana.
9Bageze aho Imana yari yaramweretse, Abrahamu ahubaka urutambiro arugerekaho inkwi, aboha umwana we Izaki amushyira kuri urwo rutambiro hejuru y’inkwi. 10Nuko Abrahamu abangura ukuboko, afata icyuma ngo atambe umwana we. 11Ubwo Malayika w’Uhoraho amuhamagarira mu ijuru ati «Abrahamu ! Abrahamu !» Undi ati «Ndi hano.» 12Malayika w’Uhoraho ati «Ntukoze ukuboko kuri uwo mwana ! Ntugire icyo umutwara kuko ubu ngubu menye ko wubaha Imana, ukaba utanyimye umwana wawe w’ikinege.» 13Abrahamu ngo yubure amaso, abona inyuma ye imfizi y’intama; amahembe yayo yari yafatiwe mu gihuru. Abrahamu aragenda arayifata, ayituraho igitambo gitwikwa mu kigwi cy’umwana we.
15Malayika w’Uhoraho ahamagarira Abrahamu mu ijuru ubwa kabiri, 16aramubwira ati «Ndahiye mu izina ryanjye -uwo ni Uhoraho ubivuze - ubwo wangenjereje utyo ntunyime umwana wawe w’ikinege, 17nzaguha umugisha; abazagukomokaho nzabaha kororoka nk’inyenyeri zo mu kirere, n’umusenyi wo ku nkombe y’inyanja, maze bazigarurire amarembo y’abanzi babo. 18Kandi urubyaro rwawe, ni rwo amahanga yose y’isi azifurizanyamo umugisha, kuko wumviye ijambo ryanjye.»
Iryo ni Ijambo ry’Imana
ISOMO RYA KABIRI (Isomo rigufi)
Isomo ryo mu gitabo cy’Intangiriro Intg 22,1-2.9a. 10-13.15-18
Muri iyo minsi 1Imana igerageza Abrahamu, iramubwira iti «Abrahamu!» Arayisubiza ati «Ndi hano.» 2Imana iti «Fata umwana wawe, umwana wawe w’ikinege ukunda, Izaki; ujye mu karere ka Moriya. Nuhagera uzamutambeho igitambo gitwikwa, ku musozi nzakwereka.»
9aBageze aho Imana yari yaramweretse,10Abrahamu abangura ukuboko, afata icyuma ngo atambe umwana we. 11Ubwo Malayika w’Uhoraho amuhamagarira mu ijuru ati «Abrahamu ! Abrahamu !» Undi ati «Ndi hano.» 12Malayika w’Uhoraho ati «Ntukoze ukuboko kuri uwo mwana ! Ntugire icyo umutwara kuko ubu ngubu menye ko wubaha Imana, ukaba utanyimye umwana wawe w’ikinege.» 13Abrahamu ngo yubure amaso, abona inyuma ye imfizi y’intama; amahembe yayo yari yafatiwe mu gihuru. Abrahamu aragenda arayifata, ayituraho igitambo gitwikwa mu kigwi cy’umwana we.
15Malayika w’Uhoraho ahamagarira Abrahamu mu ijuru ubwa kabiri, 16aramubwira ati «Ndahiye mu izina ryanjye - uwo ni Uhoraho ubivuze - ubwo wangenjereje utyo, ntunyime umwana wawe w’ikinege, 17nzaguha umugisha ; abazagukomokaho nzabaha kororoka nk’inyenyeri zo mu kirere, n’umusenyi wo ku nkombe y’inyanja, maze bazigarurire amarembo y’abanzi babo. 18Kandi urubyaro rwawe, ni rwo amahanga yose y’isi azifurizanyamo umugisha, kuko wumviye ijambo ryanjye.»
Iryo ni Ijambo ry’Imana
ZABURI Zab 16 (15), 5.8, 9-10, lb.ll
Inyik/ Mana yanjye, unyiragirire kuko ari wowe buhungiro bwanjye.
Uhoraho, wowe munani wanjye n’umugabane wanjye,
uko nzamera ni wowe ukuzi.
Uhoraho mpora muzirikana ubudahwema,
ubwo andi iruhande sinteze guhungabana.
Ni cyo gituma umutima wanjye unezerewe,
amagara yanjye akamererwa neza,
n’umubiri wanjye ukadendeza mu ituze,
kuko utazantererana ngo mpere ikuzimu,
kandi ukaba utazemera ko umuyoboke wawe agupfana.
Mana yanjye, ni wowe buhungiro bwanjye,
uzamenyesha inzira y’ubugingo.
Hafi yawe ni ho haba umunezero usendereye,
iburyo bwawe hakaba umudabagiro udashira.
ISOMO RYA GATATU
Isomo ryo mu gitabo cy’Iyimukamisiri Iyim 14,15-31 ; 15, 1a
Abayisraheli babonye Abanyamisiri babakurikiranye, bagira ubwoba cyane baganyira Uhoraho. 14, 15Uhoraho abwira Musa ati «Igituma ukabya kuntakambira ni iki ? Bwira Abayisraheli bashyire nzira. 16Naho wowe ngaho bangura inkoni yawe, urambure ukuboko ukwerekeza ku nyanja uyicemo icyambu, maze Abayisraheli bagende ku maguru mu ngeri y’inyanja humutse. I7Naho jyewe ngiye gutera umutima w’Abanyamisiri kunangira, kugira ngo bayishokemo babakurikiye, maze ngaragaze ikuzo ryanjye nkorera ishyano Farawo n’ingabo ze zose, n’amagare ye n’abanyamafarasi be. 18Abanyamisiri bazamenya ko ari jyewe Uhoraho, nimara kugaragaza ikuzo ryanjye nkorera ishyano Farawo n’amagare ye n’abanyamafarasi be.»
19Umumalayika w’Imana wari urangaje imbere y’ingabo z’Abayisraheli, aragenda maze noneho ajya inyuma yabo; na ya nkingi y’agacu yabahoraga imbere, irimuka ihagarara inyuma yabo, 20ijya hagati y’ingando y’Abanyamisiri n’ingando y’Abayisraheli. Haba ka gacu kamurika, ariko haba n’umwijima mwinshi, bituma ingamba zombi zidashyikirana ijoro ryose.
21Musa arambura ukuboko kwe akwerekeza ku nyanja, maze muri iryo joro ryose Uhoraho atsurisha inyanja umuyaga w’inkubi uturuka mu burasirazuba. Inyanja irakama ; amazi yayo yigabanyamo kabiri, 22ku buryo Abayisraheli bagendaga ku maguru mu ngeri y’inyanja, naho amazi yemaraye nk’inkike iburyo n’ibumoso bwabo. 23Nuko Abanyamisiri babirukaho, amafarasi yose ya Farawo hamwe n’amagare ye n’abanyamafarasi be, bashoka mu nyanja nyirizina babakurikiye.
24Ngo bigere mu museke, Uhoraho arebera ingabo z’Abanyamisiri muri ya nkingi y’umuriro n’agacu, maze atera impagarara mu ngabo z’Abanyamisiri ; 25abuza ibiziga by’amagare yabo kugenda, kuyatwara bikabagora. Ubwo Abanyamisiri barabwirana bati «Nimuze duhunge Abayisraheli, kuko Uhoraho arwana mu kigwi cyabo yibasiye Misiri !» 26Nuko Uhoraho abwira Musa ati «Rambura ukuboko kwawe werekeza ku nyanja, kugira ngo amazi agaruke yibumbire hejuru y’Abanyamisiri, hejuru y’amagare yabo n’abanyamafarasi babo !» 27Musa rero arambura ukuboko kwe akwerekeza ku nyanja ; maze izuba rigiye kurasa, amazi agaruka mu mwanya yari asanzwemo. Abanyamisiri bakubana bayahunga, ariko Uhoraho yararika Abanyamisiri mu ngeri y’inyanja. 28Amazi asubiranye atwikira amagare n’abanyamafarasi, n’izindi ngabo zose za Farawo zari zashotse mu nyanja zikurikiranye Abayisraheli ; ntihagira n’umwe ucika ku icumu. 29Nyamara Abayisraheli bo bari binyuriye mu nyanja nyirizina humutse, amazi yemaraye nk’inkike iburyo n’ibumoso bwabo.
30Nuko uwo munsi Uhoraho akiza Abayisraheli igitero cy’Abanyamisiri; maze Abayisraheli babona ku nkombe y’inyanja Abanyamisiri babaye imirambo. 31Abayisraheli babona ukuntu Uhoraho yatse-mbesheje Abanyamisiri ububasha bukomeye ; maze imbaga yose itangira gutinya Uhoraho, yemera Uhoraho na Musa umugaragu we. 15’ 1aNuko Musa hamwe n’Abayisraheli baririmbira Uhoraho iyi ndirimbo bavuga bati:
INDIRIMBO Iyim 15, 2-3, 4-5, 6.10a.U, 17
Inyik/ Ndaririmba Uhoraho kuko yisesuyeho ikuzo, ifarasi n’uyirwaniraho yabiroshye mu nyanja !
Uhoraho ni we mbaraga zanjye, ni we ndirimba.
Ni we wankijije !
Ni we Mana yanjye reka musingize,
ni we Imana ya data reka mushimagize.
Uhoraho ni intwari ku rugamba, izina rye ni Uhoraho !
Amagare ya Farawo hamwe n’ingabo ze yabiroshye mu nyanja, abanyamafarasi be b’imena, bamirwa n’Inyanja y’Urufunzo.
Ibizenga by’ikuzimu birabatwikira,
barigita mu mazi ikuzimu boshye ibuye !
Uhoraho, indyo yawe irangwa n’ububasha,
indyo yawe, Uhoraho, yajanjaguye umwanzi.
Wabyukije umuyaga wawe maze inyanja irabatwikira,
Uhoraho, mbese ni iyihe mana yahwana nawe ?
Ni iyihe ihwanye nawe, wowe urabagirana ubutungane ?
Ugatera ubwoba mu byo ukora bitangaje ?
Ugakora ibintu bihebuje ?
Abawe uzabijyanira,
maze ubatuze ku musozi wagize ubukonde bwawe,
ahantu wigiriye ikibanza cyawe,
Uhoraho, mu Ngoro wiyubakiye n’amaboko yawe, Nyagasani.
Cyangwa iyi Zaburi ikurikira :
ZABURI Zab 136 (135), 1.11-12,13-15,16.21-22, 23-24.26
Inyik/ Kuko urukundo rwe ruhoraho iteka !
Nimushimire Uhoraho kuko ari umugwaneza. Yavanye Abayisraheli mu Misiri,
abigiranye ububasha n’ukuboko kwe kureze. Inyik/ Inyik/ Inyik/
Ni we wasatuyemo kabiri inyanja y’Urufunzo,
maze ayinyuzamo Abayisraheli,
ayirohamo Farawo n’ingabo ze. Inyik/ Inyik/ Inyik/
Ni we wayoboye umuryango we mu butayu,
kugira ngo abahe Igihugu ho umunani,
umunani yageneye Israheli umuyoboke we. Inyik/ Inyik/ Inyik/
Ni we watwibutse igihe twari ducishijwe bugufi,
maze atugobotora abanzi bacu.
Nidushimire Imana iganje mu ijuru ! Inyik/ Inyik/ Inyik/
ISOMO RYA KANE
Isomo ryo mu gitabo cy’ Umuhanuzi Izayi Iz 54, 5-14
Nimwumve ijambo ry’Uhoraho ryabwiwe Yeruzalemu.
5 Uwaguhanze ari we mugabo wawe, izina rye rikaba Uhoraho Umugaba w’ingabo ; uwagucunguye, Nyir’ubutagatifu wa Israheli, yitwa Imana y’isi yose ! 6Mugore w’intabwa kandi ushavuye, Uhoraho aguhamagaye agira ati «Umugore wo mu busore bwanjye se yasendwa ?» Iyo ni Imana yawe ibivuze. 7Nabaye ngutaye akanya gato, ariko kubera impuhwe nguhoranira ngiye kugucyura. 8Mu burakari bwinshi nagize naguhishe uruhanga rwanjye akanya gato, ariko mu rukundo ruzira iherezo ngufitiye ngiye kukugaragariza impuhwe zanjye, uwo ni Uhoraho, uwagucunguye ubivuze.
9Bizamera nko mu gihe cya Nowa, ubwo ndahiye ko amazi atazongera kurengera ku isi; nko muri icyo gihe cya Nowa, ni na ko narahiye ko ntazongera kukurakarira, no kutazasubira kukwirukana ukundi.
10N’iyo imisozi yava mu myanya yayo ndetse n’udusozi tugahu-ngabana, urukundo rwanjye ntiruzavaho, n’isezerano ryanjye ry’amahoro ntirizahugana, uwo ni Uhoraho ubivuze, ukugaragariza impuhwe ze. 11Wagize ibyago, uhuhwa n’umuyaga ubura uguhumuriza, none dore amabuye yawe ngiye kuyakikizaho imitako, bityo nkubake ku masarabwayi abengerana. 12Inkuta zawe nzazubakisha amabuye atukura, inkike zawe nzizengurutseho amabuye y’agaciro gakomeye. 13Abahungu bawe bose bazaba abigishwa b’Uhoraho, kandi bazagira amahoro atagira uko angana. 14Uzashingira imizi ku butabera, ubwo ukize ugushikamira nta cyo uzatinya ; kuko ukize uwagukangaranyaga, akaba atazongera kukwegera.
Iryo ni Ijambo ry’Imana
ZABURI Zab 30 (29), 3-4, 5-6b, 6cd. 12,13
Inyik/ Ndakurata Uhoraho, kuko wampaye kwegura umutwe.
Uhoraho Mana yanjye, naragutakiye maze urankiza,
Uhoraho, wanzamuye ikuzimu,
maze ungarurira kure nenda gupfa.
Nimucurangire Uhoraho, mwebwe abayoboke be,
mumwogeze muririmba ubutungane bwe ;
kuko uburakari bwe butamara akanya,
naho ubutoneshe bwe bugahoraho iteka.
Ijoro ryose riba amarira gusa,
ariko igitondo kigatangaza impundu z’ibyishimo.
Nuko amaganya yanjye uherako uyahindura imbyino,
ikigunira nari nambaye ugisimbuza imyenda y’ibirori.
Ni yo mpamvu umutima wanjye uzakuririmba ubudatuza,
Uhoraho Mana yanjye, nzagusingiza iteka ryose.
ISOMO RYA GATANU
Isomo ryo mu gitabo cy’Umuhanuzi Izay Iz 55,1-11
1Yemwe abafite inyota, nimugane ku mazi, n’iyo mwaba mudafite feza, nimuze mwese ! Nimusabe ingano zo kurya ku buntu; nimuze kandi munywe amata na divayi, nta feza nta n’ubwishyu! 2Kuki mwatagaguza feza yanyu ku biribwa bitari byo, n’imari yanyu mukayitanga ku bidashobora kubahaza ? Nimutege amatwi rero munyumve kandi murye ikiri cyiza ; muronkere ibyishimo byanyu mu biribwa biryohereye. 3Nimutege amatwi, nimunsange, mwumve maze muzabeho. Nzagirana namwe isezerano rizahoraho, nzabakomereze ibyiza nasezeranyije Dawudi. 4Dore nari naramugize umuhamya mu miryango yose, aba umutware n’umutegetsi w’amahanga. 5Nawe ihanga utazi uzarihamagara, n’ihanga ritigeze rikumenya rizakwirukira, ku mpamvu y’Uhoraho ari we Mana yawe, no kubera Nyir’ubutagatifu wa Israheli waguhaye ikuzo rye.
6Nimushakashake Uhoraho igihe agishobora kubonwa, nimumwi-yambaze igihe akiri hafi. 7Umugome nareke inzira ye, n’umugiranabi areke ibitekerezo bye. Nagarukire Uhoraho uzamwereka impuhwe ze, ahindukirire Imana ikenutse ku mbabazi. 8Kandi ni koko, ibitekerezo byanyu si byo byanjye, n’inzira zanjye si zo zanyu, uwo ni Uhoraho ubivuze. 9Nk’uko ijuru ryisumbuye cyane ku isi, ni na ko inzira zanjye zisumbye kure izanyu, n’ ibitekerezo byanjye bigasumba ibyanyu. 10Na none kandi nk’uko imvura n’urubura bimanuka ku ijuru, ntibisubireyo bitabobeje ubutaka, bitabumejejeho imyaka kandi ngo biyikuze, ngo bihe umubibyi imbuto n’ifunguro rimutunga, 11ni na ko ijambo risohotse mu munwa wanjye ritangarukaho amara masa, ritarangije ugushaka kwanjye ngo risohoze icyo naritumye.
Iryo ni Ijambo ry’Imana
INDIRIMBO Iz 12,2,4b-e, 5-6
Inyik/ Muzavoma amazi ku masoko y’agakiza mwishimye.
Dore Imana Umukiza wanjye,
ndamwiringira kandi sinkigira ubwoba,
kuko imbaraga zanjye n’indirimbo yanjye ari Uhoraho,
ni we wambereye agakiza.
Nimushimire Uhoraho, murate izina rye,
nimwamamaze ibikorwa bye mu mahanga.
Nimubisubiremo muti «Izina rye ni ikirangirire.»
Nimuririmbe Uhoraho kuko yakoze ibintu by’agatangaza,
kandi mubyamamaze mu nsi hose.
Rangurura ijwi uvuze impundu wowe utuye i Siyoni,
kuko Nyir’ubutagatifu wa Israheli,
utuye iwawe rwagati, ari Igihangange.
ISOMO RYA GATANDATU
Isomo ryo mu gitabo cy’Umuhanuzi Baruki
Bar 3,9-15.32 ; 4,1-4
3,9Israheli, umva amategeko atanga ubuzima, tega amatwi kugira ngo umenye gushishoza. 10Bite se Israheli, ni kuki uba mu gihugu cy’abanzi, ukaba uriho usazira mu gihugu cy’amahanga ? 11Dore warihumanyije wegera intumbi, none urabarirwa mu bajya iku- zimu. 12Wabitewe n’uko waciye ukubiri n’Isoko y’Ubuhanga ! 13Iyo uza gukurikiza inzira y’Imana, uba uriho mu mahoro adashira.
14Ngaho siganuza ahari ubushishozi, imbaraga n’ubumenyi, kugira ngo umenye ahari ukuramba n’ubugingo, n’aho urumuri rw’amaso n’amahoro biherereye. 15Ariko se ni nde wabonve aho ubuhanga butuye, akinjira mu bubiko bwabwo ? 32 Nyamara Nyir’ubumenyi bwose arabuzi, yarabucengeye abikesheje ubwenge bwe, we waremye isi ngo ibeho iteka ryose, akayikwizaho inyamaswa n’amatungo y’amoko yose.
4’1 Ubuhanga ni igitabo cy’amabwiriza y’Imana, bukaba n’Itegeko rizahoraho iteka. Ababwiziritseho bose bazaronka ubugingo, naho ababucaho bazapfe nabi. 2Yakobo, garuka ubwakire, ugendere mu nzira izakugeza ku mucyo, umurikiwe n’urumuri rwabwo. 3Wigira undi wegurira ikuzo ryawe, cyangwa ngo ibyiza warazwe ubigabize igihugu cy’abanyamahanga. 4Turahirwa twebwe Abayisraheli, kuko twahishuriwe igishimisha Imana !
Iryo ni Ijambo ry’Imana
ZABURI Zab 19 (18), 8, 9,10,11
Inyik/ Nyagasani, ni wowe ufite amagambo y’ubugingo bw’iteka.
Itegeko ry’Uhoraho ni indakemwa,
rikaramira umutima.
Amabwiriza y’Uhoraho ni amanyakuri,
abacisha make akabungura ubwenge.
Amateka y’Uhoraho araboneye,
akanezereza umutima.
Amategeko y’Uhoraho ni uruhehemure,
akamurikira umuntu.
Igitinyiro cy’Uhoraho kiraboneye,
kigahoraho iteka ryose.
Ibyo Uhoraho yemeje ni amanyakuri,
byose biba bitunganye.
Bikwiriye kwifuzwa kurusha zahabu,
kurusha ikirundo cya zahabu iyunguruye.
Biryohereye kurusha ubuki,
kurusha ubuki bw’umushongi bukiva mu binyagu !
ISOMO RYA KARINDWI
Isomo ryo mu gitabo cy’Umuhanuzi Ezekiyeli Ezk 36,i6-i7a. 18-28
16Uhoraho ambwira iri jambo ati 17a«Mwana w’umuntu, abo mu muryango wa Israheli bari batuye igihugu cyabo, bacyandu- rishije imyifatire yabo n’ibikorwa bibi byabo.18 None rero ngiye kubamariraho uburakari bwanjye, mbaryoza amaraso bame- nnye mu gihugu, kimwe n’ibigirwamana bacyandurishije. 19Nabatatanyirije mu mahanga, mbakwiza imishwaro mu bindi bihugu. Nabaciriye urubanza nkurikije imyifatire yabo n’ibiko- rwa byabo. 20Umuryango wanjye wagiye mu mahanga, ugezeyo wandavuza izina ryanjye ritagatifu, bituma babataramiraho bavuga ngo ‘Uyu ni umuryango w’Uhoraho, ariko bavuye mu gihugu cye.’ 21Nyamara nagiriye izina ryanjye ritagatifu, ari ryo umuryango wa Israheli wandavurije mu mahanga wajemo.
22Ngaho rero bwira umuryango wa Israheli uti ‘Dore uko Nyagasani Uhoraho avuze : Ibyo byose simwe mbigirira, muryango wa Israheli, ahubwo ndagirira izina ryanjye ritagatifu mwandavurije mu mahanga mwajemo. 23Nzakuza izina ryanjye ry’ikirangirire mwandavurije muri ayo mahanga - uwo ni Nyagasani Uhoraho ubivuze - maze amahanga azamenye ko ndi Uhoraho, nimara kugaragariza muri mwe ubutungane bwanjye babyirebera n’amaso yabo. 24Nzabavana mu mahanga, mbakorakoranye mbavane mu bindi bihugu, maze nzabagarure ku butaka bwanyu. 25Nzabuhagiza amazi asukuye maze mube abasukure ; mbahanagureho ubwandure bwanyu bwose muce ukubiri n’ibigirwamana byanyu byose. 26Nzabaha umutima mushya, mbashyiremo n’umwuka mushya. Mu mubiri wanyu nzakuramo umutima w’ibuye, nshyiremo umutima wumva. 27Nzabuzuzamo umwuka wanjye, mbatere gukurikiza amategeko yanjye, mwubahirize amabwiriza yanjye. 28Muzatura igihugu nahaye abakurambere banyu, mumbere umuryango nanjye mbe Imana yanyu.’»
Iryo ni Ijambo ry’Imana
INDIRIMBO
Iyo hari Batisimu: baririmba indirimbo yo muri Iz 12 (reba haruguru nyuma y’Isomo rya gatanu), cyangwa iyi Zaburi ikurikira:
ZABURI Zab 51 (50), 12-13,14-15,18-19
Inyik/ Mana yanjye, ndemamo umutima mushya.
Mana yanjye, ndemamo umutima usukuye,
maze umvugururemo ibitekerezo biboneye.
Ntunyirukane ngo unte kure yawe,
cyangwa ngo unkuremo umwuka wawe uzira inenge.
Ahubwo mpa kwishimira ko nakijijwe,
kandi unkomezemo umutima wuje ineza.
Abagome nzabatoza inzira yawe,
n’abanyabyaha bakugarukire.
Igitambo cyanjye si cyo ushaka,
n’aho nagutura igitwikwa nticyakunezeza.
Ahubwo igitambo Imana ishima ni umutima washengutse.
Mana yanjye, ntuzirengagize umutima washegeshwe kandi wihana.
Iyo nta Batisimu ihari :
ZABURI Zab 42 (41), 2, 5bcd ; 43 (42), 3, 4
Inyik/ Umutima wanjye ufite inyota y’Imana, Imana Nyir’ubuzima; mbese nzajya ryari kureba uruhanga rw’Imana ?
Uko impara yahagira ishaka amazi afutse,
ni ko umutima wanjye ugufitiye inyota, Mana yanjye.
Najyaniranaga n’inteko z’abantu,
nyoboye umutambagiro ugana Ingoro y’Imana,
mu rwamu rw’impundu n’ibisingizo by’imbaga yakereye ibirori.
Ohereza urumuri rwawe n’ukuri kwawe,
bijye binyobora inzira,
maze bizangeze ku musozi wawe mutagatifu,
aho Ingoro yawe yubatse.
Ubwo nzegera urutambiro rw’Imana,
nsange Imana nkesha umunezero wose ;
maze Uhoraho Mana yanjye ngusingize,
ngucurangira inanga.
IBARUWA
Isomo ryo mu ibaruwa Mutagatifu Pawulo Intumwa yandikiye Abanyaroma Rom 6,3-11
Bavandimwe, 3ntimuzi se ko twebwe twese ababatijwe muri Kristu Yezu, ari mu rupfu rwe twabatirijwemo ? 4Koko rero ku bwa batisimu twahambanywe na we mu rupfu rwe, kugira ngo uko Kristu yazuwe mu bapfuye n’ikuzo rya Data, bityo natwe tugendere mu bugingo bushya.
5Niba koko twarabaye umwe na We dusangira urupfu rwe, ni ko bizagenda no mu izuka. 6Tumenye neza ko muntu w’igisazira twari we kera yabambanywe na We, kugira ngo umubiri w’icyaha utsiratsizwe, bityo twoye kuzongera ukundi kuba abagaragu b’icyaha. 7Kuko upfuye, aba ahanaguweho icyaha. 8Niba rero twarapfanye na Kristu, twemera ko nanone tuzabaho hamwe na We. 9Tuzi ko Kristu yazutse mu bapfuye akaba atazongera gupfa ukundi, urupfu rukaba rutakimufiteho ububasha. 10Kuko igihe apfuye, yapfuye ku cyaha rimwe rizima; naho kuba ariho, abereyeho Imana. 11Bityo namwe mumenye ko ubwanyu mwapfuye ku cyaha, mukaba mubereyeho Imana muri Kristu Yezu.
Iryo ni Ijambo ry’Imana
ZABURI Zab 118 (117), 1.4,16-17, 22-23
Inyik/ Alleluya, Alleluya, Alleluya !
Nimusingize Uhoraho kuko ari umugwaneza,
kandi urukundo rwe rugahoraho iteka !
Abatinya Uhoraho nibabivuge babisubiremo,
bati «Urukundo rwe ruhoraho iteka !»
Indyo y’Uhoraho yarihanukiriye,
maze indyo y’Uhoraho igaragaza ibigwi !
Oya ntabwo nzapfa, ahubwo nzaramba,
maze mpore namamaza ibikorwa by’Uhoraho.
Ibuye abubatsi bari barajugunye,
ni ryo ryahindutse ibuye ry’indemyanzu !
Uhoraho ni we wagennye ko biba bityo,
maze biba agatangaza mu maso yacu.
IVANJILI
✠ Amagambo yo mu Ivanjili Ntagatifu uko yanditswe na
Mariko Mk 16,1-8
1Isabato irangiye, Mariya Madalena na Mariya nyina wa Yakobo na Salome, bagura imibavu yo gusiga umurambo wa Yezu. 2Nuko mu gitondo cya kare, ku wa mbere w’isabato bajya ku mva, izuba rirashe. 3Baravugana bati «Ni nde uri buduhirikire ibuye riri ku muryango w’imva ?» 4Nuko bitegereje babona ibuye rihirikiye iruhande ; nyamara ryari rinini cyane. 5Binjiye mu mva babona umusore wari wicaye iburyo, yambaye ikanzu yera, maze bashya ubwoba. 6Nuko arababwira ati «Mwigira ubwoba. Murashaka Yezu w’i Nazareti, uwabambwe ku musaraba ; yazutse ntakiri hano. Ngaho nimwirebere n’aho bari bamushyize. 7Ahubwo nimujye kubwira abigishwa be na Petero, ko abatanze mu Galileya ; ni ho muzamubonera nk’uko yabibabwiye.» 8Basohoka mu mva bahunga, kuko umushyitsi n’ubwoba byari byabatashye. Nuko ntibagira uwo babibwira, kuko bari bafite ubwoba.
Iyo ni Ivanjili Ntagatifu
MISA YO KU MUNSI MUKURU WA Pasika
ISOMO RYA MBERE
Isomo ryo mu gitabo cy’Ibyakozwe n’Intumwa Intu 10,34a. 37-43
Petero ageze i Kayizareya ku mutegeka w’ingabo z’Abanyaroma, 7aterura agira ati 37«Mwese muzi ibyabaye muri Yudeya yose, bihereye mu Galileya nyuma ya batisimu Yohani yigishaga. 38Muzi n’ibya Yezu w’i Nazareti : ukuntu Imana yamusize amavuta y’ubutore ibigirishije Roho Mutagatifu, ikamuha n’ububasha ; n’uko yagendaga agira neza aho anyuze hose, akiza abahanzweho na Sekibi bose kuko Imana yari kumwe na we. 39Natwe rero turi abahamya b’ibyo yakoze mu gihugu cy’Abayahudi kimwe n’i Yeruzalemu. Bamwishe bamumanitse ku giti, 40ariko Imana yamuzuye ku munsi wa gatatu imuha no kwigaragaza ; 41 atari kuri rubanda rwose, ahubwo ku bahamya batoranyijwe n’Imana hakiri kare, twebwe abariye kandi tukanywa kumwe na we aho amariye kuzuka mu bapfuye. 42Nuko adutegeka kwamamaza no guhamya muri rubanda, ko ari we washyizweho n’Imana kuba umucamanza w’abazima n’abapfuye; 43abahanuzi bose bemeza ko umwemera wese azaronka imbabazi z’ibyaha, abikesha ububasha bw’izina rye.»
Iryo ni Ijambo ry’Imana
ZABURI ZAB 118 (117), 1.4, 16-17, 22-23
Inyik./ Nguyu umunsi Nyagasani yigeneye:
Nutubere umunsi w’ibirori n’ibyishimo, alleluya!
Cyangwa: Alleluya, Alleluya, Alleluya!
Nimusingize Uhoraho kuko ari umugwaneza,
kandi urukundo rwe rugahoraho iteka!
Abatinya Uhoraho nibabivuge babisubiremo,
bati “Urukundo rwe ruhoraho iteka!”
Indyo y’Uhoraho yarihanukiriye,
maze indyo y’Uhoraho igaragaza ibigwi!
Oya ntabwo nzapfa, ahubwo nzaramba,
maze mpore namamaza ibikorwa by’Uhoraho.
Ibuye abubatsi bari barajugunye,
ni ryo ryahindutse ibuye ry’indemyanzu!
Uhoraho ni we wagennye ko biba bityo,
maze biba agatangaza mu maso yacu.
ISOMO RYA KABIRI
Isomo ryo mu ibaruwa ya mbere Mutagatifu Pawulo Intumwa yandikiye Abanyakolosi Kol 3, 1-4
Bavandimwe, 1Ubwo mwazukanye na Kristu, nimuharanire ibyo mu ijuru aho Kristu ari, yicaye iburyo bw’Imana; 2nimurangamire iby’ijuru, aho kurarikira iby’isi. 3Koko mwapfanye na Kristu, none ubugingo bwanyu bwihishe hamwe na We mu Mana. 4Aho Kristu azigaragariza We bugingo bwanyu, icyo gihe namwe muzagaragara muri kumwe na We mu ikuzo ryisesuye.
Iryo ni Ijambo ry’Imana
Cyangwa bashobora guhitamo iri somo rikurikira:
Isomo ryo mu ibaruwa ya mbere Mutagatifu Pawulo Intumwa yandikiye Abanyakorinti 1 Kor 5,6b-8
Bavandimwe, 6bmbese ntimuzi ko agasemburo gake gatutumbya ifu yose ? 7Nimwiyunyuguzemo rero umusemburo wose ushaje, kugira ngo mubone kuba nk’umugati mushya udasembuye. Kuko Kristu ari we Ntama ya Pasika yacu, yishweho igitambo. 8Niduhimbaze rero uwo munsi mukuru, tudakoresheje umusemburo ushaje ari wo w’ubugiranabi n’ubukozi bw’ibibi, ahubwo dukoreshe imigati idasembuye, ari yo ubumanzi n’ukuri.
Iryo ni Ijambo ry’Imana
INDIRIMBO Y’IGISINGIZO CY’IYOBERA
RY’IZUKA RYA NYAGASANI
Bakristu nimwishimire Pasika,
mutura Ntama igitambo cy’ishimwe.
Umwana w’intama wakijije intama,
ni Kristu Muziranenge,
wunze Se n’abanyabyaha.
Urupfu n’ubugingo byararwanye,
Umugenga w’ubuzima arapfa,
ariko ubu ni muzima araganje.
Ngaho Mariya Madalena tubwire,
wabonye iki aho wari wagiye ?
«Nabonye imva ya Kristu Muzima,
mubona afite ishema.
Nabonye n’abamalayika bahamya Izuka rye,
mbona n’imyambaro n’ibyo bari bamuhambyemo.
Kristu amizero yanjye yazutse,
agiye kubatanga mu Galileya.»
Turabyemera : koko Kristu yazutse mu bapfuye.
Nuko rero Mwami Nyir’imitsindo,
twese utugirire ibambe ! Amen (Alleluya) !
IBANGONDIRIMBO RIBANZIRIZA IVANJILI
Alleluya Alleluya.
Kristu, Pasika yacu yishweho igitambo.
Nitwishimire ibirori by’isangira rya Nyagasani.
Alleluya.
IVANJILI
✠ Amagambo yo mu Ivanjili Ntagatifu uko yanditswe na
Yohani Yh 20,1-9
1Ku wa mbere w’isabato, Mariya Madalena azindukira ku mva butaratandukana; asanga ibuye ryavuye ku mva. 2Nuko yirukanka asanga Simoni Petero n’undi mwigishwa, wa wundi Yezu yakundaga, arababwira ati «Nyagasani bamukuye mu mva, none ntituzi aho bamushyize.» Petero arabaduka na wa mwigishwa bajya ku mva. 4Bombi bagenda birukanka, ariko wa mwigishwa arusha Petero amaguru, amutanga kugera ku mva. 5Nuko arunama abona imyenda irambitse, ariko ntiyinjira mu mva. «Simoni Petero wari umukurikiye aba arahageze, yinjira mu mva abona imyenda irambitse, 7n’igitambaro bari bapfukishije umutwe we kitarambitse hamwe n’ imyenda, ahubwo kizingiye ukwacyo ahandi hantu. 8Nuko wa mwigishwa wari wageze mbere ku mva na we arinjira, aritegereza maze aremera. 9Kugeza ubwo bari batarasobanukirwa n’Ibyanditswe, bivuga ko yagombaga kuzuka ava mu bapfuye.(*)
Iyo ni Ivanjili Ntagatifu
KU CYUMWERU CYA 2 CYA Pasika
ISOMO RYA MBERE
Isomo ryo mu gitabo cy’Ibyakozwe n’Intumwa Intu 4,32-35
32Imbaga y’abemera yari ifite umutima umwe n’amatwara amwe, kandi nta n’umwe wibwiraga ko icyo atunze cyose ari icye bwite, ahubwo byose byari rusange kuri bo. 33Nuko Intumwa zikomeza guhamya izuka rya Nyagasani Yezu n’ububasha bukomeye, kandi ubugwaneza bwinshi bwari bubuzuyemo bose. 34Koko rero nta mukene wababagamo, kuko ababaga bafite amasambu cyangwa amazu babigurishaga, bakazana ikiguzi cyabyo 35 bakagishyikiriza Intumwa. Nuko bakabisaranganya, bakurikije ibyo buri muntu akeneye.
Iryo ni Ijambo ry’Imana
ZABURI Zab 118 (117), 1.4,16-17, 22-23, 24-25
Inyik/ Urukundo rwe ruhoraho iteka !
Cyangwa : Alleluya
Nimusingize Uhoraho kuko ari umugwaneza,
kandi urukundo rwe rugahoraho iteka !
Abatinya Uhoraho nibabivuge babisubiremo,
bati «Urukundo rwe ruhoraho iteka !»
Indyo y’Uhoraho yarihanukiriye,
maze indyo y’Uhoraho igaragaza ibigwi !
Oya ntabwo nzapfa, ahubwo nzaramba,
maze mpore namamaza ibikorwa by’Uhoraho.
Ibuye abubatsi bari barajugunye,
ni ryo ryahindutse ibuye ry’indemyanzu !
Uhoraho ni we wagennye ko biba bityo,
maze biba agatangaza mu maso yacu.
Nguyu umunsi Uhoraho yigeneye :
Nutubere umunsi w’ibirori n’ibyishimo.
Emera Uhoraho, emera utange umukiro !
Emera Uhoraho, emera utange umutsindo !
ISOMO RYA KABIRI
Isomo ryo mu ibaruwa ya mbere ya Mutagatifu Yohani Intumwa 1 Yh 5,1-6
Nkoramutima zanjye, 1umuntu wese wemera ko Yezu ari Kristu, yabyawe n’Imana ; kandi n’ umuntu wese ukunda Imana Umubyeyi, akunda n’uwabyawe na Yo. 2Dore icyo tumenyeraho ko dukunda abana b’Imana : ni uko dukunda Imana kandi tugakurikiza amategeko yayo. 3Dore gukunda Imana icyo ari cyo: ni uko twakuri-kiza amategeko yayo. Kandi amategeko yayo ntavunanye, 4kuko icyabyawe n’Imana cyose gitsinda isi. Intsinzi kandi yaganje isi, ni ukwemera kwacu. 5Ni nde utsinda isi atari uwemera ko Yezu ari Umwana w’Imana ? 6Uwo nyine ni We waje ku bw’amazi n’amaraso, aba Yezu Kristu. Yaje atari ku bw’amazi yonyine, ahubwo ku bw’amazi n’amaraso ; ni Roho ubihamya, kuko uwo Roho nyine ari ukuri.
Iryo ni Ijambo ry’Imana
IBANGONDIRIMBO RIBANZIRIZA IVANJILI Yh 20, 29
Alleluya Alleluya
Tomasi yabonye Nyagasani, aramwemera.
Hahirwa abemera batabanje kwirebera.
Alleluya.
IVANJILI
✠ Amagambo yo mu Ivanjili Ntagatifu uko yanditswe na
Yohani Yh 20,19-31
Nyuma y’urupfu rwa Yezu, 19kuri uwo munsi wa mbere ku cyumweru nimugoroba, inzugi z’aho abigishwa bari bateraniye zari zikinze bitewe no gutinya Abayahudi. Nuko Yezu agira atya araza, ahagarara hagati yabo arababwira ati «Nimugire amahoro.» 20Amaze kuvuga atyo, abereka ibiganza n’urubavu rwe. Abigishwa babonye Nyagasani, ibyishimo birabasaga. 21Yezu yongera kubabwira ati «Nimugire amahoro. Nk’uko Data yantumye, nanjye ndabatumye.» 22Amaze kuvuga atyo abahuhaho, arababwira ati «Nimwakire Roho Mutagatifu. 23Abo muzakiza ibyaha bazabikizwa, abo mutazabikiza bazabigumana.»
24Tomasi umwe muri ba Cumi na babiri witwaga Didimi, we ntiyari kumwe na bo igihe Yezu aje. 25Nuko abandi bigishwa baramubwira bati «Twabonye Nyagasani.» Naho we arababwira ati «Nintabona mu biganza bye umwenge w’imisimari, kandi nindashyira urutoki rwanjye mu mwenge w’imisimari, n’ikiganza cyanjye mu rubavu rwe, sinzemera.» 26Hashize iminsi munani, abigishwa na bwo bari bikingiranye mu nzu, noneho Tomasi ari kumwe na bo. Yezu agira atya aba ahagaze hagati yabo, inzugi zikinze, arababwira ati «Nimugire amahoro.» 27Hanyuma abwira Tomasi ati «Shyira urutoki rwawe hano, urebe n’ibiganza byanjye ; zana n’ikiganza cyawe ugishyire mu rubavu rwanjye, maze ureke kuba umuhakanyi, ahubwo ube umwemezi.» 28Tomasi amusubiza avuga ati «Nyagasani, Mana yanjye !» 29Yezu aramubwira ati «Wemejwe n’uko umbonye; hahirwa abemera batabanje kwirebera.» 30Yezu yongeye guha abigishwa be ibindi bimenyetso byinshi, bitanditse muri iki gitabo. 31Ibi byanditswe ari ukugira ngo mwemere ko Yezu ari Kristu, Umwana w’Imana, no kugira ngo nimumwemera mugire ubugingo mu izina rye.
Iyo ni Ivanjili Ntagatifu
KU CYUMWERU CYA 3 CYA PASIKA
ISOMO RYA MBERE
Isomo ryo mu gitabo cy’Ibyakozwe n’Intumwa Intu 3,13-15.17-19
Muri iyo minsi, Petero abwira rubanda ati 13«Imana ya Abrahamu, ya Izaki na Yakobo, Imana y’abakurambere bacu yakujije umugaragu wayo Yezu mwebwe mwatanze, mukamwihakanira imbere ya Pilato kandi we yari yiyemeje kumurekura. 14Mwihakanye Umutagatifu n’Intungane, maze musaba ko babarekurira umwicanyi. 15Mwicishije Umugenga w’ubugingo, ariko Imana yamuzuye mu bapfuye, turi abagabo bo kubihamya. 17None rero bavandimwe, nzi yuko ibyo mwabikoze mubitewe n’ubujiji kimwe n’abatware banyu. 18Nyamara Imana yujuje ityo ibyo yari yaravugishije Abahanuzi bose mbere y’uko biba, ko Kristu yagombaga kubabara. 19Nimwisubireho rero kandi mugarukire Imana, kugira ngo ibyaha byanyu bihanagurwe.»
Iryo ni Ijambo ry’Imana
ZABURI Zab 4, 2, 7, 9
Inyik/ Uhoraho, dusakazeho umucyo ugukomokaho.
Cyangwa : Alleluya.
Igihe ntabaje jya unsubiza, Mana indenganura,
mu magorwa ni wowe unkura ahaga.
Gira ibambe, wumve isengesho ryanjye !
Hari benshi bajya bavuga ngo «Ni nde uzaduha guhirwa ?»
Uhoraho, dusakazeho umucyo ugukomokaho !
Kubera ko wankungahaje, ndaryama ngasinzira,
kuko wowe wenyine, Uhoraho, ungumisha mu mudendezo.
ISOMO RYA KABIRI
Isomo ryo mu ibaruwa ya mbere ya Mutagatifu Yohani Intumwa 1 Yh 2, l-5a
1Twana twanjye, ibi mbibandikiye kugira ngo mudacumura. Ariko n’aho umuntu yacumura, dufite Umuvugizi imbere y’Imana Data, ari we Yezu Kristu Intungane ; 2ni na We gitambo cy’impongano y’ibyaha byacu, ndetse atari ibyaha byacu byonyine, ahubwo n’iby’isi yose. 3Dore icyo tumenyeraho ko tumuzi : ni uko dukurikiza amategeko ye. 4Uvuga rero ati «Ndamuzi», ariko ntakurikize amategeko ye, aba ari umubeshyi kandi nta kuri kuba kumurimo. 5aNaho ukurikiza ijambo rye, muri we urukundo rw’Imana ruba rwuzuye koko.
Iryo ni Ijambo ry’Imana
IBANGONDIRIMBO RIBANZIRIZA IVANJILI Lk 24, 32
Alleluya Alleluya
Nyagasani Yezu wazutse yabonekeye Intumwa ze,
maze aziha amahoro ye.
Alleluya.
IVANJILI
✠ Amagambo yo mu Ivanjili Ntagatifu uko yanditswe na
Luka Lk 24, 35-48
Muri icyo gihe, abigishwa bari bavuye Emawusi batekererezaga Intumwa na bagenzi babo 35uko byagenze mu nzira, n’uburyo bamumenye amanyura umugati. 36Igihe bakivuga ibyo Yezu ubwe aba nguyu ahagaze hagati yabo, arababwira ati «Nimugire amahoro.» 37Barakangarana bashya ubwoba, bakeka ko babonye umuzimu. 38Nuko arababwira ati «Ubwo bwoba bwose mufite ni ubw’iki ? Kandi mutewe n’iki gushidikanya mu mitima yanyu ? 39Nimurebe ibiganza n’ibirenge byanjye : ni jyewe ubwanjye. Nimunkoreho, maze mumenye ko umuzimu atagira umubiri cyangwa amagufwa nk’uko muruzi mbifite.» 40Avuga ibyo abereka ibiganza n’ibirenge bye. 41Uko bakamazwe n’ibyishimo ntibanyurwa, baba abo gutangara gusa; noneho arababwira ati «Hari icyo kurya mufite hano ?» 42Bamuhereza igice cy’ifi yokeje ; 43aracyakira akirira imbere yabo.
44Nuko arababwira ati «Ibyo ni byo nababwiraga nkiri kumwe namwe nti ‘Ni ngombwa ko huzuzwa ibinyerekeyeho byose byanditswe mu mategeko ya Musa, mu bitabo by’Abahanuzi no muri Zaburi.» 45Aherako ahugura ubwenge bwabo ngo bajye bumva Ibyanditswe. 46Maze arababwira ati «Handitswe ko Kristu agomba kubabara, maze ku munsi wa gatatu akazuka mu bapfuye, 47kandi ko uhereye i Yeruzalemu abantu bo mu mahanga yose bagomba kwigishwa mu izina rye, ibyerekeye ukwisubiraho n’ibabarirwa ry’ibyaha. 48Ibyo ni mwe bagabo bashinzwe kubihamya.»
Iyo ni Ivanjili Ntagatifu
KU CYUMWERU CYA 4 CYA Pasika
ISOMO RYA MBERE
Isomo ryo mu gitabo cy’Ibyakozwe n’Intumwa Intu 4,8-12
Petero atumizwa imbere y’Inama Nkuru ya Israheli, 8ubwo yuzuye Roho Mutagatifu arabasubiza ati 9«Batware namwe bakuru b’umuryango, uyu munsi turabazwa iby’ineza yagiriwe ikirema, no gusobanura uburyo uyu muntu yakijijwe. 10Nimumenye neza rero, mwebwe mwese n’umuryango wose wa Israheli, ko izina rya Yezu Kristu w’i Nazareti mwebwe ubwanyu mwabambye, Imana ikamuzura mu bapfuye, ari ryo uyu muntu akesha kuba ahagaze imbere yanyu ari mutaraga. 11Yezu uwo ni we rya buye ryajugunywe namwe abubatsi, nyamara rigahinduka insanganyarukuta. 12Bikaba rero nta wundi wundi twakesha umukiro usibye we, kuko ku isi nta rindi zina abantu bahawe, ngo abe ari ryo turonkeramo uburokorwe.»
Iryo ni Ijambo ry’Imana
ZABURI Zab 118 (117), 1.4, 8-9, 22-23, 28-29
Inyik/ Ibuye abubatsi bari barajugunye,
ni ryo ryahindutse ibuye ry’indemyanzu !
Cyangwa : Alleluya.
Nimusingize Uhoraho kuko ari umugwaneza,
kandi urukundo rwe rugahoraho iteka !
Abatinya Uhoraho nibabivuge babisubiremo,
bati «Urukundo rwe ruhoraho iteka !»
Ibyiza ni ukwisunga Uhoraho,
aho kwiringira abantu !
Ibyiza ni ukwisunga Uhoraho,
aho kwiringira abanyamaboko.
Ibuye abubatsi bari barajugunye,
ni ryo ryahindutse ibuye ry’indemyanzu !
Uhoraho ni we wagennye ko biba bityo,
maze biba agatangaza mu maso yacu.
Ni wowe Imana yanjye, ndagushimira,
Mana yanjye, ndakurata.
Nimusingize Uhoraho kuko ari umugwaneza,
kandi urukundo rwe rugahoraho iteka !
ISOMO RYA KABIRI
Isomo ryo mu ibaruwa ya mbere ya Mutagatifu Yohani Intumwa 1 Yh 3,1-2
Nkoramutima zanjye, 1 nimurebe urukundo ruhebuje Imana Data yadukunze, kugeza n’aho twitwa abana b’Imana, kandi tukaba turi bo koko ! Dore impamvu isi idashobora kutumenya : ni uko itamenye Imana. 2Nkoramutima zanjye, ubu turi abana b’Imana, ariko uko tuzamera ntibiragaragazwa. Gusa tuzi ko igihe Kristu azigaragariza tuzaba dusa na We, kuko tuzamureba uko ari mu by’ukuri.
Iryo ni Ijambo ry’Imana
IBANGONDIRIMBO RIBANZIRIZA IVANJILI Yh 10, 14-15
Alleluya Alleluya.
Yezu, Umushumba mwiza,
amenya intama ze, na zo zikamumenya :
Yemeye guhara ubugingo bwe kubera intama ze.
Alleluya.
IVANJILI
✠ Amagambo yo mu Ivanjili Ntagatifu uko yanditswe na
Yohani Yh 10,11-18
Muri icyo gihe, Yezu abwira Abayahudi ati11 «Ni jye mushumba mwiza. Umushumba mwiza yigurana intama ze. 12Naho umu- canshuro utari umushumba, ntabe na nyir’intama, abona ikirura kije agatererana intama agahunga ; ikirura kikaziraramo kikazi- tatanya. 13Agenza atyo abitewe n’uko aba ari umucanshuro, maze intama ntizibe zimushishikaje. 14Ni jye mushumba mwiza ; nzi intama zanjye na zo zikamenya, 15mbese nk’uko Data anzi, nanjye kandi nkamenya Data. Ndetse nemera guhara ubugingo bwanjye, nkabutangira intama zanjye. 16Mfite n’izindi ntama zitari muri uru rugo, na zo ngomba kuzizana zikazumva ijwi ryanjye, maze hakaba igikumba kimwe n’umushumba umwe. 17Ngicyo igitera Data kunkunda, kuko ntanga ubuzima bwanjye kugira ngo mbusubirane. 18Nta we ubunyaga, ahubwo ni jye ubwanjye ubutanga. Mfite ububasha bwo kubutanga, nkagira n’ububasha bwo kubwisubiza. Iryo ni itegeko nahawe na Data.»
Iyo ni Ivanjili Ntagatifu
KU CYUMWERU CYA 5 CYA Pasika
ISOMO RYA MBERE
Isomo ryo mu gitabo cy’Ibyakozwe n’Intumwa Intu 9, 26-31
Sawuli amaze kwemera Nyagasani Yezu, 26 agaruka i Yeruzalemu agerageza kwegera abigishwa ; ariko bose bakamutinya, kuko batemeraga ko na we ari umwigishwa koko. 27Nuko Barinaba aramujyana amushyikiriza Intumwa, azitekerereza uko yabonanye na Nyagasani mu nzira n’uko yamubwiye, n’ukuntu i Damasi yigishije mu izina rya Yezu ashize amanga. 28Nuko Sawuli agumana na bo, akagenda hose muri Yeruzalemu nta cyo yishisha, ari na ko yigisha mu izina rya Yezu ashize amanga. 29Yakundaga kuganira n’Abayahudi bavugaga ikigereki kandi akajya impaka na bo ; ariko bo bagashaka kumwica. 30Abavandimwe ngo babimenye, baramuherekeza bamugeza i Kayizareya, maze bamwohereza i Tarisi.
31Ubwo Kiliziya yariho mu mahoro muri Yudeya yose, muri Galileya no muri Samariya, ishinga imizi kandi ikomeza kubaha Nyagasani, bityo irushaho kujya mbere ikomejwe na Roho Mutagatifu.
Iryo ni Ijambo ry’Imana
ZABURI Zab 22 (21), 26-27b, 28-29, 31-32
Inyik/ Nyagasani, ni wowe nzaharira ibisingizo byanjye,
mu ikoraniro rigari.
Cyangwa : Alleluya.
Nyagasani, ni wowe nzaharira ibisingizo byanjye
mu ikoraniro rigari,
imbere y’abagutinya nzubahiriza amasezerano nakugiriye.
Abakene bazarya maze bahage,
abashakashaka Uhoraho bazamusingiza.
Isi yose aho iva ikagera izabyibuka maze igarukire Uhoraho,
imiryango yose y’amahanga imupfukamire,
kuko ubwami ari ubw’Uhoraho,
akaba ari we ugenga amahanga.
Urubyaro rwabo ruzamukeza,
ruzamenyekanye Uhoraho mu bisekuruza bizaza.
Ruzamamaza ubutungane bwe,
imbaga izavuka nyuma ruyitekerereze ibyo Uhoraho yakoze.
ISOMO RYA KABIRI
Isomo ryo mu ibaruwa ya mbere ya Mutagatifu Yohani Intumwa 1 Yh 3,18-24
18Twana twanjye, ntitugakundane mu magambo no ku rurimi, ahubwo mu bikorwa no mu kuri. 19Ni ibyo tuzamenyeraho ko turi ab’ukuri, maze tuzabonereho guhesha ituze umutima wacu imbere y’Imana ; 20kuko n’aho umutima wacu waducira urubanza, tuzi ko Imana isumba kure umutima wacu, kandi ko ibona byose. 21Nkoramutima zanjye, niba umutima wacu udafite icyo udushinja, dufite amizero yuzuye ku Mana, 22maze icyo dusabye cyose tukagihabwa, kuko dukurikiza amategeko yayo kandi tugakora ikiyinyura. 23Dore rero itegeko ry’Imana : ni uko twakwemera izina ry’Umwana wayo Yezu Kristu, kandi tugakundana nk’uko yabidutegetse. 24Ukurikiza amategeko y’Imana aguma mu Mana, na Yo ikamugumamo. Kandi aho tumenyera ko Imana iturimo, ni uko yaduhaye Roho wayo.
Iryo ni Ijambo ry’Imana
IBANGONDIRIMBO RIBANZIRIZA IVANJILI Zab 1,3
Alleluya Alleluya.
Hahirwa umuntu wibanira n’Uhoraho :
ameze nk’igiti cyatewe iruhande rw’umugezi,
kikera imbuto uko igihe kigeze.
Alleluya.
IVANJILI
✠ Amagambo yo mu Ivanjili Ntagatifu uko yanditswe na
Yohani Yh 15,1-8
Muri icyo gihe,Yezu agiye kuva kuri iyi si ngo asange Se, yabwiye abigishwa be ati 1«Ndi umuzabibu w’ukuri, naho Data akaba umuhinzi. 2Ishami ryose riterera imbuto muri jye araritema ; naho ishami ryera imbuto araryicira, agira ngo rirusheho kwera imbuto. 3Mwe murakeye kubera ijambo nababwiye. 4Nimube rero muri jyewe, nanjye mbe muri mwe. Uko ishami ridashobora kwera imbuto ku bwaryo ritari ku muzabibu, namwe ni ko mutakwera mutandimo. 5Jye ndi umuzabibu, mwe mukaba amashami. Uba rero muri jye, nanjye nkaba muri we, yera imbuto nyinshi ; koko tutari kumwe nta cyo mwashobora. 6Utaba muri jye, azajugunywa nk’ishami ritera maze yumagane, kandi bene ayo mashami barayasakuma, bakayajugunya mu muriro agashya. 7Nimumbamo n’amagambo yanjye akababamo, muzasabe icyo muzashaka cyose muzagihabwa. 8Igihesha Data ikuzo ni uko mwakwera imbuto nyinshi, mukaba n’abigishwa banjye.»
Iyo ni Ivanjili Ntagatifu
KU CYUMWERU CYA 6 CYA Pasika
Mu bihugu bahimbaza Umunsi imikuru wa Asensiyo ku Cyumweru cya 7 cya Pasika, uyu munsi bashobora gufata amasomo y’Icyumweru cya karindwi. Reba ku rupapuro rwa 149.
ISOMO RYA MBERE
Isomo ryo mu gitabo cy’Ibyakozwe n’Intumwa
Intu 10, 25-26. 34-35. 44-48
Petero agera i Kayizareya, mu rugo rw’umutegeka w’ingabo z’Abanyaroma witwaga Koruneli. 25Ngo ajye kwinjira Koruneli aramusanganira, agwa hasi imbere ye aramupfukamira. 26Petero aramuhagurutsa amubwira ati «Haguruka ! Nanjye ndi umuntu nkawe.» 34 Nuko Petero aterura agira ati «Noneho numvise mu by’ukuri ko Imana itarobanura, 35ahubwo inyurwa n’umuntu wa buri hanga iryo ari ryo ryose uyitinya kandi agaharanira ubutungane.»
44Petero akivuga ibyo, Roho Mutagatifu amanukira ku bumvaga iryo jambo bose. 45Nuko abemera bo mu bagenywe bari baraherekeje Petero, batangazwa no kubona ingabire ya Roho Mutagatifu yasesekaye no ku banyamahanga. 46Koko rero, bumvaga abo bantu bavuga mu ndimi kandi bakuza Imana. Petero ni ko kungamo ati 47«Hari uwashobora se kubuza aba bantu kubatirishwa amazi, kandi na bo bahawe Roho Mutagatifu kimwe natwe ?» 48Nuko ategeka ko bababatiza mu izina rya Yezu Kristu. Maze basaba Petero kugumana na bo iminsi mike.
Iryo ni Ijambo ry’Imana
ZABURI Zab 98 (97), 1, 2-3ab, 3c-4a, 6b
Inyik/ Uhoraho yagaragaje ugutsinda kwe,
mu maso y’amahanga yose.
Cyangwa : Alleluya.
Nimuririmbire Uhoraho indirimbo nshya,
kuko yakoze ibintu by’agatangaza.
Indyo ye, ukuboko kwe k’ubutagatifu,
byatumye atsinda.
Uhoraho yagaragaje ugutsinda kwe,
atangaza ubutabera bwe mu maso y’amahanga.
Yibutse ubuntu bwe n’ubudahemuka bwe,
agirira inzu ya Israheli.
Imipaka yose y’isi yabonye ugutsinda kw’Imana yacu.
Nimusingize Uhoraho ku isi hose,
nimusingize Umwami, Uhoraho.
ISOMO RYA KABIRI
Isomo ryo mu ibaruwa ya mbere ya Mutagatifu Yohani Intumwa 1 Yh 4, 7-10
7Nkoramutima zanjye, nidukundane kuko urukundo rukomoka ku Mana, kandi umuntu wese ukunda aba yarabyawe n’Imana, akanayimenya. 8Naho udakunda, uwo ntiyamenye Imana kuko Imana ari Urukundo. 9Dore uko urukundo rw’Imana rwigaragaje muri twe: Imana yohereje Umwana wayo w’ikinege ku isi, kugira ngo tubeshweho na We. 10Nguko uko urukundo ruteye: si twebwe twabanje gukunda Imana, ahubwo ni Yo yadukunze mbere, maze yohereza Umwana wayo ngo abe igitambo cyo guhongerera ibyaha byacu.
Iryo ni Ijambo ry’Imana
IBANGONDIRIMBO RIBANZIRIZA IVANJILI Yh 13, 34
Alleluya Alleluya.
Nyagasani yadusigiye itegeko rishya ati
«Nimukundane, kandi mukundane nk’uko nabakunze.»
Alleluya.
IVANJILI
✠ Amagambo yo mu Ivanjili Ntagatifu uko yanditswe na
Yohani Yh 15, 9-17
Muri icyo gihe, Yezu agiye kuva kuri iyi si ngo asange Se, yabwiye abigishwa be ati 9 «Uko Data yankunze, ni ko nanjye nabakunze. Nimugume mu rukundo rwanjye. 10Nimwubaha amategeko yanjye, muzaguma mu rukundo rwanjye, nk’uko nanjye nubaha amategeko ya Data, maze nkaguma mu rukundo rwe.
11Ibyo mbibabwiye ngira ngo ibyishimo byanjye bibabemo, kandi ngo ibyishimo byanyu bisendere. 12Ngiri itegeko mbahaye : nimujye mukundana nk’uko nanjye nabakunze. 13Nta wagira urukundo ruruta urw’umuntu uhara amagara ye kubera incuti ze. 14Muba muri incuti zanjye, igihe mukora icyo mbategetse. 15Jye sinkibita abagaragu, kuko umugaragu atamenya icyo shebuja akora; ahubwo mbise incuti, kuko nabamenyesheje ibyo numvanye Data byose. 16Si mwe mwantoye, ahubwo ni jye wabatoye, maze mbashyiraho kugira ngo mugende mwere imbuto, kandi imbuto yanyu igumeho; bityo icyo muzasaba Data cyose mu izina ryanjye azakibahe. 17Icyo mbategetse ni uko mukundana.»
Iyo ni Ivanjili Ntagatifu
KU WA KANE UKURIKIRA ICYUMWERU CYA 6 CYA
Pasika (CYANGWA KU CYUMWERU CYA 7 CYA Pasika)
UMUNSI MUKURU W’ISUBIRA
MU IJURU RYA NYAGASANI
(Asensiyo)
ISOMO RYA MBERE
Isomo ryo mu gitabo cy’Ibyakozwe n’Intumwa Intu 1, 1-11
1Tewofili we, mu gitabo cyanjye cya mbere nanditse ibyo Yezu yakoze n’ibyo yigishije byose, kuva mu ntangiriro 2kugera ubwo ajyanywe mu ijuru, amaze guha intumwa yari yaritoreye amabwiriza ye, abigirishije Roho Mutagatifu. 3Ni na bo yari yariyeretse nyuma y’ibabara rye ari muzima, abihamya akoresheje ibimenyetso byinshi. Nuko ababonekera mu minsi mirongo ine, abaganirira iby’Ingoma y’Imana.
4Igihe yariho asangira na bo, abategeka ko batazatirimuka i Yeruzalemu, ahubwo ko bazahategerereza ibyo Imana Data yasezeranye. Arababwira ati «Ni na byo mwanyumvanye : 5ngo Yohani yabatirishije amazi, naho mwebwe muzabatirizwa muri Roho Mutagatifu, nyuma y’iminsi mikeya.» 6Nuko bakaba bate- raniye hamwe, maze baramubaza bati «Nyagasani, ubu se ni ho ugiye kubyutsa ingoma ya Israheli ?» 7Arabasubiza ati «Si mwebwe mugenewe kumenya ibihe n’amagingo Data yageneye ubutegetsi bwe bwite, 8ahubwo mugiye guhabwa imbaraga za Roho Mutagatifu uzabazamo, bityo muzambere abahamya i Yeruzalemu, muri Yudeya yose no muri Samariya, ndetse no kugera ku mpera y’isi.»
9 Amaze kuvuga atyo azamurwa mu ijuru bamureba, maze igicu kiramukingiriza ntibongera kumubona. 10Uko bagahanze amaso ejuru Yezu amaze kugenda, babona abantu babiri bambaye imyambaro yererana bahagaze iruhande rwabo. 11Barababaza bati «Yemwe bagabo b’i Galileya, ni iki kibahagaritse aho mureba mu ijuru ? Yezu uwo ubavanywemo akajyanwa mu ijuru, azaza nk’uko mumubonye ajya mu ijuru.»
Iryo ni Ijambo ry’Imana
ZABURI Zab 47 (46), 2-3, 6-7, 8-9
Inyik/ Imana izamutse bayiha impundu,
Uhoraho azamutse avugirwa n’impanda.
Cyangwa : Alleluya.
Miryango mwese nimukome yombi,
musingize Imana mu rwamu rw’ibyishimo,
kuko Uhoraho, Umusumbabyose ari Ruterabwoba,
akaba Umwami w’igihangange ku isi yose.
Imana izamutse bayiha impundu,
Uhoraho azamutse avugirwa n’impanda.
Nimucurangire Uhoraho, nimucurange !
Nimucurangire Umwami wacu, nimucurange !
Kuko Imana ari yo mwami w’isi yose ;
nimucurange mwimazeyo, mubyamamaze.
Uhoraho ni Umwami ugenga amahanga,
Imana itetse ku ntebe yayo yuje ubutungane.
ISOMO RYA KABIRI
Bashobora guhitamo Isomo rya kabiri ry’Umwaka A : Ef 1, 17-23, cyangwa iri rikurikira:
Isomo ryo mu ibaruwa Mutagatifu Pawulo Intumwa yandikiye Abanyefezi Ef 4,1-16
Bavandimwe, 1ubu rero jyewe uri ku ngoyi nzira Nyagasani, ndabi-nginga ngo mugenze mu buryo bukwiranye n’ubutore bwanyu: 2nimubane mu rukundo, murangwe n’ubwiyoroshye, n’ituze n’ubwiyumanganye, mwihanganirane muri byose, 3kandi mwihatire kugumana umutima umwe ubahuza mu mahoro.
4Nk’uko Umubiri ari umwe na Roho akaba umwe, ni na ko mwahamagariwe gusangira ukwizera kumwe. 5Nyagasani ni umwe, ukwemera ni kumwe, batisimu ni imwe ; 6n’ïmana ni imwe Yo Mubyeyi wa bose, usumba bose, agakorera muri bose kandi agatura muri bose.
7Buri wese muri twe yahawe ingabire ye bwite, uko Kristu yayi-mugeneye. 8Ni cyo gituma mu Byanditswe hari ahavuga ngo «Yarazamutse atumbagira ashoreye imbohe, maze aha abantu ingabire». 9Kuba yarazamutse bivuga iki, atari uko yabanje kumanuka akagera ku isi yacu ? 10Uwari waramanutse ni na We wazamutse mu bushorishori bw’ijuru kugira ngo aganze muri byose. 11Ni na We wahaye bamwe kuba intumwa, abandi abaha kuba abahanuzi, abandi abaha kuba abogezabutumwa, abandi abaha kuba abashumba cyangwa se abigisha. 12Nguko uko yatunganyije abatagatifujwe be, anabategurira gukomeza umurimo bashinzwe wo kungura umubiri wa Kristu,13 kugeza igihe twese tuzunga ubumwe mu kwemera no mu kumenya Umwana w’Imana, tukazaba abantu bashyitse bageze ku rugero ruhamye, ruyingayinga igihagararo cya Kristu.
14Ubwo rero ntituzaba tukiri abana basabayangwa, maze ngo twangaranwe n’umuyaga ubonetse wose w’inyigisho ziturutse ku buhendanyi bw’abantu no ku buriganya bwabo bubayobya.
15Ahubwo nitubaho mu rukundo rutaryarya, tuzakura kandi twiyongere ubudahwema twifatanyije na Kristu utubereye umutwe. 16Ni We uha umubiri wose gutera hamwe mu ngingo nyinshi ziwugize, zikawutunga, zikawucunga, buri rugingo ku rugero rwarwo, akanawuha gukura no kwiyubaka mu rukundo.
Iryo ni Ijambo ry’Imana
IBANGONDIRIMBO RIBANZIRIZA IVANJILI Zab 47(46), 6a.10d
Alleluya Alleluya.
Imana izamutse bayiha impundu,
yatumbagiye hejuru ya byose.
Alleluya.
IVANJILI
✠ Amagambo yo mu Ivanjili Ntagatifu uko yanditswe na
Mariko Mk 16,15-20
Yezu amaze kuzuka yabonekeye ba Cumi n’umwe, arababwira ati 15«Nimujye mu isi hose, mwamamaze Inkuru Nziza mu biremwa byose. 16Uzemera akabatizwa azakira ; utazemera azacibwa. 17Dore kandi n’ibimenyetso bizaranga abazaba bemeye : mu izina ryanjye bazirukana roho mbi, bazavuga indimi nshya, 18bazafata inzoka ; nibagira kandi icyo banywa cyica nta cyo kizabatwara ; bazaramburira ibiganza ku barwayi bakire.» 19Nuko Nyagasani Yezu amaze kubabwira atyo ajyanwa mu ijuru, maze yicara iburyo bw’Imana. 20Naho bo baragenda, bajya kwigisha hose. Nyagasani yabibafashagamo, kandi ijambo ryabo akarikomeresha ibimenyetso byariherekezaga.
Iyo ni Ivanjili Ntagatifu
KU CYUMWERU CYA 7 CYA Pasika
ISOMO RYA MBERE
Isomo ryo mu gitabo cy’Ibyakozwe n’Intumwa
Intu 1, 15-17.20a. 20c-26
15Muri iyo minsi Petero arahaguruka, ahagarara hagati y’aba- vandimwe bari bateraniye aho, bageze nko ku ijana na makumyabiri. Nuko arababwira ati 16«Bavandimwe, ibyo Roho Mutagatifu yavugishije Dawudi mu Byanditswe ku byerekeye Yuda wayoboye abafashe Yezu, byagombaga kubaho koko ! 17Uwo yari umwe muri twe kandi yari yaratorewe uyu murimo wacu. 20aKoko rero ni ko byanditswe no mu gitabo cya Zaburi 20c ngo ‘Umurimo we uzahabwe undi’.21 None rero hari abagabo twagendanye igihe cyose Nyagasani Yezu yari kumwe na twe, 22uhereye kuri batisimu ya Yohani ukageza ku munsi atuvanywemo. Ni ngombwa rero ko umwe muri bo yafatanya natwe kuba umuhamya w’izuka rya Yezu.»
23Nuko bazana babiri muri bo ; umwe akaba Yozefu witwaga Barisaba, wari waranahimbwe ‘Ntungane’, undi akaba Matiyasi. 24Hanyuma basenga bagira bati «Nyagasani, wowe uzi imitima ya bose, garagaza muri aba bombi uwo wihitiyemo, 25kugira ngo ahabwe umwanya mu murimo wa gitumwa Yuda yaretse, akajya ahamukwiye.» 26Nuko bakora ubufindo maze bwerekana Matiyasi, guhera ubwo abarwa hamwe n’Intumwa cumi n’imwe.
Iryo ni Ijambo ry’Imana
ZABURI Zab 103 (102), 1-2,11-12,19.22
Inyik/ Uragasingizwa Nyagasani,
wowe uganje iburyo bw’Imana Data.
Cyangwa : Alleluya.
Mutima wanjye, singiza Uhoraho,
n’icyo ndi cyo cyose gisingize izina rye ritagatifu !
Mutima wanjye, singiza Uhoraho,
kandi ntiwibagirwe na kimwe mu byo yaguhaye.
Uko ijuru ryisumbuye kure hejuru y’isi,
ni ko impuhwe ze zisagiranira abamutinya.
Uko uburasirazuba butandukanye n’uburengerazuba,
ni ko adutandukanya n’ibicumuro byacu.
Uhoraho yashinze mu ijuru ijabiro rye,
maze ingoma ye ikagenga byose.
Nimusingize Uhoraho, biremwa bye mwese,
aho muri hose mu ngoma ye.
ISOMO RYA KABIRI
Isomo ryo mu ibaruwa ya mbere ya Mutagatifu Yohani Intumwa 1 Yh 4,11-16
11Nkoramutima zanjye, ubwo Imana yadukunze bigeze aho, natwe tugomba gukundana. 12Nta muntu wigeze abona Imana, ariko niba dukundana, Imana idutuyemo kandi urukundo rwayo ruba ruganje muri twe. 13Aho tumenyera ko turi mu Mana, na Yo ikatubamo, ni uko yaduhaye kuri Roho wayo. 14Natwe twarabyitegereje, none turahamya ko Imana Data yohereje Umwana wayo kuba Umukiza w’isi. 15Umuntu wese uhamya ko Yezu ari Umwana w’Imana, Imana imuturamo, na we akayituramo. 16Twebwe twamenye urukundo Imana yatugaragarije, kandi turarwemera. Imana ni urukundo : umuntu uhorana urukundo aguma mu Mana, na Yo ikamugumamo.
Iryo ni Ijambo ry’Imana
IBANGONDIRIMBO RIBANZIRIZA IVANJILI Yh 14, 18
Alleluya Alleluya.
Nyagasani Yezu ntabasize muri imfubyi :
azagaruka abasange,
maze imitima yanyu yigiremo ibyishimo.
Alleluya.
IVANJILI
✠ Amagambo yo mu Ivanjili Ntagatifu uko yanditswe na
Yohani Yh 17, 11b-19
Muri icyo gihe, Yezu agiye kuva kuri iyi si ngo asange Se, yubuye amaso areba hejuru maze asenga agira ati 11b«Dawe Nyir’ubutagatifu, abo wampaye bakomereshe izina ryawe, kugira ngo babe umwe nkatwe. 12Igihe nari kumwe na bo, abo wampaye narabaragiye mu izina ryawe ; narabakomeje ntihagira n’umwe muri bo nzimiza, kereka umwana nyagucibwa kugira ngo Ibyanditswe byuzuzwe. 13Ubu rero nje ngusanga, kandi ibi mbivuze nkiri mu isi, kugira ngo bankeshe kwigiramo ibyishimo bisendereye. 14Nabagejejeho ijambo ryawe maze isi irabanga, kuko atari ab’isi nk’uko nanjye ntari uw’isi. 15Singusabye kubakura ku isi, ahubwo ndagira ngo ubarinde ikibi. 16Si ab’isi nk’uko nanjye ntari uw’isi. 17Batagatifurize mu kuri: ijambo ryawe ni ukuri. 18Nk’uko wantumye mu nsi nanjye ni ko nabatumye ku isi, 19kandi ndakwiyeguriye ubwanjye ari bo ngirira, kugira ngo na bo babe abakwiyeguriye mu kuri.»
Iyo ni Ivanjili Ntagatifu
UMUNSI MUKURU WA PENTEKOSITI
MISA Y’IGITARAMO CYO KU MUGOROBA
UBANZIRIZA PENTEKOSITI
ISOMO RYA MBERE
Bashobora guhitamo rimwe muri aya masomo uko ari ane :
1. Isomo ryo mu gitabo cy’Intangiriro Intg 11,1-9
1Ku isi yose hari ururimi rumwe, n’imvugo imwe. 2Mu iyimuka ry’abantu bava mu burasirazuba, babona ikibaya mu gihugu cya Shineyari barahatura. 3Nuko barabwirana bati «Nimuze tubumbe amatafari tuyatwikire mu itanura.» Amabuye bayasimbuza amatafari, n’urwondo rwo kuyafatanisha barusimbuza ubujeni. 4Nuko bati «Nimuze twiyubakire umugi n’umunara ukora ku ijuru, maze izina ryacu ribe ikirangirire kugira ngo tutazatatana ku isi hose.»
5Uhoraho aramanuka, aza kureba uwo mugi n’uwo munara bene Muntu bubakaga. 6Nuko Uhoraho aravuga ati «Dore bose hamwe baremye umuryango umwe, bafite n’imvugo imwe. Ubwo batangiye gukora biriya, nta wundi mugambi uzabananira ! 7Reka tumanuke maze ururimi bavuga turusobanye, hatazagira uwongera kumva icyo undi avuze !» 8Nuko Uhoraho abakura aho abanyanyagiza ku isi hose, ibyo kubaka wa mugi barabireka. 9Ni cyo cyatumye uwo mugi bawita Babeli (ari byo kuvuga isobanya), kuko ari ho Uhoraho yasobanyirije indimi zo ku isi yose.
Iryo ni Ijambo ry’Imana
2. Isomo ryo mu gitabo cy’Iyimukamisiri Iyim 19,3-8a. 16-20
Mu kwezi kwa gatatu nyuma y’aho Abayisraheli baviriye mu Misiri, bagera ku musozi wa Sinayi.3 Musa rero azamuka umusozi asanga Imana. Uhoraho amuhamagarira mu mpinga y’umusozi avuga ati «Bwira utya inzu ya Yakobo, kandi utangarize Abayisraheli uti 4‘Mwiboneye ubwanyu ibyo nakoreye Misiri, n’ukuntu mwebwe nabahetse nk’uko kagoma iguruka ihetse abana bayo, maze nkabazana mbiyegereza. 5None rero nimwumva ibyo mbabwira, muzaba abanjye bwite mu miryango yose n’ubwo isi yose na yo ari iyanjye ; 6ariko mwebwe muzambera urugaga rw’intore zinshengerera n’umuryango mutagatifu’. Ngayo amagambo uza kubwira Abayisraheli.» 7Musa araza akoranya abakuru ba rubanda, maze abasubirira muri ayo magambo yose, uko Uhoraho yari yabimutegetse. 7Imbaga yose uko yakabaye isubiza nk’umuntu umwe iti «Ibyo Uhoraho yavuze byose tuzabirangiza !»
16Ku munsi wa gatatu bugicya, inkuba zirahinda, imirabyo irarabya, igicu kirabudika hejuru y’umusozi, n’ijwi ry’impanda riroroma cyane, maze imbaga yose aho iri mu ngando iradagadwa. 17Musa asohora imbaga mu ngando ngo basanganire Imana, maze bahagarara munsi y’umusozi. 18Umusozi wa Sinayi wose wacucumukaga umwotsi, kuko Uhoraho yari yawumanukiyeho mu muriro; umwotsi wawo wacucumukaga nk’uw’itanura, n’umusozi wose ukanyeganyega bikomeye. 19Imyoromo y’impanda igenda irushaho gusakabaka : Musa yaravugaga maze Imana ikamusubirisha imyoromo y’inkuba. 20Uhoraho rero amanukira ku musozi wa Sinayi, mu mpinga yawo, maze Uhoraho ahamagara Musa ngo aze mu mpinga y’umusozi ; nuko Musa azamuka umusozi.
Iryo ni Ijambo ry’Imana
3. Isomo ryo mu gitabo cy’Umuhanuzi Ezekiyeli Ezk 37,1-14
Muri iyo minsi 1ububasha bw’Uhoraho bunzaho, antwarisha umwuka we maze angeza rwagati mu kibaya cyari cyuzuyemo amagufa. 2Nuko anzengurukana muri icyo kibaya aho yari akikije hose, maze nsanga ayo magufa ari menshi cyane kandi yarumye rwose. 3Uhoraho arambaza ati «Mwana w’umuntu, aya magufa se yabasha kongera kuba mazima ?» Ndamusubiza nti «Nyagasani Uhoraho, ni wowe wabimenya.» 4Arambwira ati «Ngaho hanurira aya magufa maze uyabwire uti ‘Yemwe mwa magufa yumiranye mwe, nimutege amatwi ijambo ry’Uhoraho. 5Dore uko Nyagasani Uhoraho ababwiye : Ngiye kubashyiramo umwuka maze mwongere mubeho. 6Ngiye kubateraho imitsi, mbashyireho inyama, mboroseho uruhu, mbashyiremo umwuka maze mubeho ; bityo muzamenye ko ndi Uhoraho’»
7Ubwo ndahanura nk’uko nari nabitegetswe. Igihe ndiho mpanura, ako kanya numva urusaku, ayo magufa arakorakorana rimwe rikegera irindi. 8Ngo ndebe mbona imitsi iyafasheho, inyama zirayatwikira n’uruhu rurayorosa, ariko nta mwuka wari urimo. 9Nuko arambwira ati «Ngaho mwana w’umuntu hanura, uhanurire umwuka. Wubwire uti ‘Dore uko Nyagasani Uhoraho avuze : Wa mwuka we, turuka mu mpande zose uko ari enye, uhuhere kuri iyi mirambo maze yongere ibeho’.» 10Igihe ndiho mpanura nk’uko nabitegetswe, umwuka uza muri ya mirambo yongera kugira ubuzima, nuko barahaguruka biremamo igitero kinini cyane.
11Hanyuma arambwira ati «Mwana w’umuntu, ayo magufa ni umuryango wa Israheli wose. Ngabo baravuga bati ‘Amagufa yacu yarumiranye, nta cyizere tugifite turashize.’ 12Ni yo mpamvu rero ugomba guhanura ubabwira uti ‘Dore ibyo Nyagasani Uhoraho avuze. Ngiye gukingura imva zanyu nzabavanemo, mwebwe muryango wanjye, maze nzabagarure ku butaka bwa Israheli. 13Muzamenya ko ndi Uhoraho, mwebwe muryango wanjye, ubwo nzaba nakinguye imva zanyu nkazibavanamo. 14Nzabashyiramo umwuka wanjye mubeho kandi mbatuze ku butaka bwanyu; bityo muzamenye ko ari jye Uhoraho wabivuze kandi nkabikora. Uwo ni Uhoraho ubivuze.’»
Iryo ni Ijambo ry’Imana
4. Isomo ryo mu gitabo cy’Umuhanuzi Yoweli Yow 3, 1-5a
Uhoraho aravuze ati 1«Nzasendereza Umwuka wanjye ku cyitwa ikiremwa cyose. Abahungu banyu n’abakobwa banyu bazahanure, abasaza banyu bazabonere mu nzozi, urubyiruko rwanyu ruzabone-kerwe. 2Koko muri iyo minsi, abagaragu n’abaja nzabasenderezamo Umwuka wanjye. 3Nzakora ibitangaje mu kirere no hasi ku isi, hazaboneke amaraso, umuriro n’inkingi y’umwotsi. 4Izuba rizijima, ukwezi guhinduke amaraso mbere y’uko haza Umunsi w’Uhoraho, umunsi ukomeye kandi uteye ubwoba ! 5aUbwo abaziyambaza izina ry’Uhoraho bose bazakizwa.»
Iryo ni Ijambo ry’Imana
ZABURI Zab 104 (103), 1-2a, 1a.24, 27-28, 29b-30
Inyik/ Nyagasani, wohereza umwuka wawe bikaremwa,
maze imisusire y’isi ukayihindura mishya.
Cyangwa : Alleluya.
Mutima wanjye, singiza Uhoraho,
Uhoraho Mana yanjye, uri igihangange rwose !
Wisesuyeho icyubahiro n’ububengerane,
wambaye urumuri nk’igishura.
Mutima wanjye, singiza Uhoraho !
Uhoraho, mbega ngo ibikorwa byawe biraba byinshi !
Byose wabikoranye ubwitonzi,
isi yuzuye ibiremwa byawe !
Byose ni wowe byiringira,
biteze ko ubiha icyo kurya mu gihe gikwiye.
Urabiha bikayoragura,
wabumbura ikiganza cyawe bigahaga ibyiza.
Ubivanamo umwuka bigahwera,
bigasubira mu mukungugu byavuyemo.
Wohereza umwuka wawe bikaremwa,
maze imisusire y’isi ukayihindura mishya.
ISOMO RYA KABIRI
Isomo ryo mu ibaruwa Mutagatifu Pawulo Intumwa yandikiye Abanyaroma Rom 8,22-27
Bavandimwe, 22tuzi neza ko na n’ubu ibiremwa byose binihira icyarimwe, nk’ibiri mu mibabaro yo kuramukwa. 7Nyamara si byo byonyine, ndetse natwe abahawe Roho Mutagatifu ho umu- ganura turaganyira mu mutima, dutegereje kugirwa abana b’Imana, ugucungurwa kw’imibiri yacu. 24Koko rero twarakijijwe mu bwizere; nyamara kureba ibyo wizeraga ntibiba bikiri ukwizera. Iyo umuntu yirebera aba acyizeye iki kindi ? 25Niba rero twizeye icyo tutareba ubu ngubu, twihanganiye kugitegereza. 26Bityo ni ko na Roho atabara intege nke zacu kuko tutazi icyo twasaba uko bikwiye, maze Roho ubwe akadutakambira mu miniho irenze imivugirwe. 27Kandi Nyirugusuzuma imitima akaba azi icyo Roho yifuza, kuko atakambira abatagatifujwe ku buryo buhuje n’Imana.
Iryo ni Ijambo ry’Imana
IBANGONDIRIMBO RIBANZIRIZA IVANJILI
Alleluya, Alleluya.
Ngwino Roho Mutagatifu,
usanganye imitima y’abayoboke bawe,
maze bagurumane umuriro w’urukundo rwawe.
Alleluya.
IVANJILI
✠ Amagambo yo mu Ivanjili Ntagatifu uko yanditswe na
Yohani Yh 7, 37-39
Muri icyo gihe, 37ku munsi usoza iminsi mikuru ari na wo uyirusha ibirori, Yezu arahagarara arangurura ijwi ati «Ufite inyota nansange anywe. 38Unyemera nk’uko byanditswe, imigezi y’amazi atanga ubugingo izamuvubukamo.» 39Ibyo yabivuze abyerekeje kuri Roho uzahabwa abamwemera. Kugeza icyo gihe Roho yari ataratangwa, kuko Yezu yari atarahabwa ikuzo rye.
Iyo ni Ivanjili Ntagatifu
MISA YO KU MUNSI MUKURU WA PENTEKOSITI
ISOMO RYA MBERE
Isomo ryo mu gitabo cy’Ibyakozwe n’Intumwa Intu 2,1-11
1Umunsi wa Pentekositi uragera, bose bakaba bakoraniye hamwe. 2Ako kanya umuriri umeze nk’inkubi y’umuyaga uva mu ijuru, maze wuzura mu nzu bari barimo. 3Nuko haboneka indimi zisa n’iz’umuriro, zigabanya zijya kuri buri muntu muri bo. 4Ubwo bose buzuramo Roho Mutagatifu, batangira kuvuga mu zindi ndimi, uko Roho abahaye kuzivuga.
5Aho rero i Yeruzalemu habaga Abayahudi bubaha Imana, bari bara-turutse mu mahanga yose ari mu nsi y’ijuru. 6Ngo bumve urwo rusaku, rubanda rwose barakorana maze barumirwa, kuko buri wese yabumvaga bavuga mu rurimi rwe bwite. 7Barashoberwa batangara bavuga bati «Mbese aba bose bavuga si Abanyagalileya ? 8Bishoboka bite se ko buri muntu muri twe abumva bavuga mu rurimi rwe kavukire ? 9Baba Abapariti, Abamedi n’Abelamu, baba abatuye muri Mezopotamiya, muri Yudeya no muri Kapadosiya, muri Ponti no muri Aziya, 10muri Furujiya no muri Pamfiliya, mu Misiri no mu turere twa Libiya duhereranye na Sireni, baba abashyitsi baturutse i Roma, «Abayahudi kavukire n’abayoboke b’idini yabo, Abanyakireta n’Abarabu, twese turabumva bamamaza mu ndimi zacu bwite ibitangaza by’Imana.»
Iryo ni Ijambo ry’Imana
ZABURI Zab 104 (103), lab.24ac, 29b-30, 31.34
Inyik/ Nyagasani, wohereza umwuka wawe bikaremwa,
maze imisusire y’isi ukayihindura mishya !
Cyangwa : Alleluya.
Mutima wanjye, singiza Uhoraho,
Uhoraho Mana yanjye, uri igihangange rwose !
Uhoraho, mbega ngo ibikorwa byawe biraba byinshi !
Isi yuzuye ibiremwa byawe !
Ubivanamo umwuka bigahwera,
bigasubira mu mukungugu byavuyemo.
Wohereza umwuka wawe bikaremwa,
maze imisusire y’isi ukayihindura mishya.
Ikuzo ry’Uhoraho riragahoraho ubuziraherezo !
Uhoraho arakishimira ibikorwa bye !
Icyampa ngo umuvugo wanjye umunyure,
maze Uhoraho ambere isoko y’ibyishimo !
ISOMO RYA KABIRI
Bashobora guhitamo isomo rya kabiri ry’umwaka A (1 Kor 12, 3b-7.12-13), cyangwa iri rikurikira:
Isomo ryo mu ibaruwa Mutagatifu Pawulo Intumwa yandikiye Abanyagalati Gal 5,16-25
Bavandimwe, 16mureke mbabwire : Roho nabayobore, ni bwo mutazakora ibyo umubiri urarikira. I7Kuko umubiri urarikira ibirwanya Roho, na Roho igakurikirana ibyo umubiri wangira. Ibyo byombi koko birazirana, ku buryo namwe mutagenza uko mwishakiye kose. 18None rero niba muyoborwa na Roho, nta bwo mukigengwa n’amategeko.
19Ibikorwa by’umubiri birigaragaza : ubusambanyi, ubuhabara, ubwomanzi, 20gusenga ibigirwamana, kuroga, kwangana, gukurura intonganya, ishyari, uburakari, kwikuza, amazimwe, amakimbirane, 21inzika, ubusinzi, ubusambo, n’ibindi nk’ibyo. Ndababuriye nk’uko nigeze kubibabwira : abakora bene ibyo, nta murage bazahabwa mu Bwami bw’Imana.
22Naho imbuto ya Roho ni urukundo: ibyishimo, amahoro, kwiha-ngana, ubugwaneza, ubuntu, ubudahemuka, 23imico myiza, kumenya kwifata. Nta tegeko ribuza imigirire nk’iyo. 24Aba Kristu Yezu babambye ku musaraba umubiri wa bo n’ingeso mbi ndetse n’irari. 25Niba tubeshejweho na Roho, nituyoborwe na Roho.
Iryo ni Ijambo ry’Imana
INDIRIMBO Y’IGISINGIZO
CY’IYOBERA RYA PENTEKOSITI
Ngwino Roho Mutagatifu, uze mu mitima yacu,
maze uduhe umucyo wawe wo mu ijuru.
Ngwino mubyeyi w’abakene,
ngwino wowe soko y’ingabire,
ngwino rumuri rw’imitima yacu.
Uri umuhoza usumba bose,
uri umushyitsi muhire wa roho zacu,
uri ihumure rigarura ubuyanja.
Ni wowe buruhukiro bw’abanyamiruho,
ni wowe ucubya ubushyuhirane,
ni wowe uhanagura amarira y’abarira.
Yewe ga rumuri ruhire !
Ngwino urwuzuze mu mitima
y’abayoboke bawe bose !
Utaduhagarikiye, umuntu nta cyo yashobora,
nta n’icyo yagira cyiza !
Sukura ibyanduye,
sukira utuzi ibyumiranye,
womore inkomere.
Oroshya imitima ikomeye,
ususurutse imitima ikonje,
ugarure imitima yayobye.
Abakwemera bose kandi bakakwizera,
bahe ingabire zawe ntagatifu uko ari indwi.
Urabahe n’igihembo cy’ibyiza bakoze,
uzabahe amaherezo mahire y’agakiza,
ubahe n’ibyishimo bidashira. Amen.
IBANGONDIRIMBO RIBANZIRIZA IVANJILI
Alleluya, Alleluya.
Ngwino Roho Mutagatifu,
usanganye imitima y’abayoboke bawe,
maze bagurumane umuriro w’urukundo rwawe.
Alleluya.
IVANJILI
Bashobora guhitamo Ivanjili ya Pentekositi y’Umwaka A (Yh 20, 19-23), cyangwa iyi ikurikira :
✠ Amagambo yo mu Ivanjili Ntagatifu uko yanditswe na
Yohani Yh 15, 26-27 ; 16,12-15
Muri icyo gihe, Yezu agiye kuva kuri iyi si ngo asange Se, yabwiye abigishwa be ati 15,26«Umuvugizi nzaboherereza aturutse kuri Data, Roho Nyir’ukuri ukomoka kuri Data, naza azambera umugabo. 27Namwe rero muzambera abagabo, kuko twabanye kuva mu ntangiriro. 16,12 Ndacyafite byinshi nababwira, ariko ubu ntimwashobora kubyakira. 13Ariko Roho Nyir’ukuri uwo naza, azabayobora mu kuri kose kuko atazavuga yitumirije, ahubwo azavuga ibyo yumvise byose kandi akazabahanurira n’ibizaza. 14Azampesha ikuzo, kuko azahabwa ku byanjye akabibamenyesha. 15Ibyo Data atunze byose ni ibyanjye; ni cyo kinteye kuvuga ko azafata ku byanjye maze akabibamenyesha. »
Iyo ni Ivanjili Ntagatifu
IMINSI MIKURU
IKOMEYE
YA NYAGASANI
IHIMBAZWA NYUMA YA PENTEKOSITI
KU CYUMWERU CYA 1 NYUMA YA PENTEKOSITI
UMUNSI MUKURU
W’UBUTATU BUTAGATIFU
ISOMO RYA MBERE
Isomo ryo mu gitabo cy’Ivugururamategeko Ivug 4,32-34.39-40
Musa yabwiye Abayisraheli ati32«Ngaho baza ibihe byakubanjirije uhereye ku munsi Imana yaremeyeho abantu ku isi, ubaririze kandi uhereye ku mpera y’isi ukagera ku yindi: Hari ikintu gikomeye nk’iki kigeze kubaho ? Hari uwigeze yumva ibintu nk’ibi ? 33Hari undi muryango w’abantu wigeze wumva nkawe ijwi ry’Imana rivugira mu muriro rwagati, maze bagakomeza kubaho? 34Cyangwa se hari indi mana yigeze igerageza kwikurira ihanga hagati y’irindi ikoresheje ibyago, ibimenyetso n’ibitangaza bikaze ? Ikabigirisha kandi imirwano, n’imbaraga n’umurego by’ukuboko kwayo, n’imidugararo ikanganye nk’uko Uhoraho Imana yanyu yabibagenjereje mu Misiri, mubyibonera n’amaso yanyu ? 39Uyu munsi rero ubimenye kandi ujye ubizirikana mu mutima wawe : Uhoraho ni we Mana mu ijuru no ku isi, nta yindi ibaho. 40Urajye ukurikiza amategeko n’amabwiriza ye nkugejejeho uyu munsi kugira ngo uzabone ubugira ihirwe, wowe n’abana bazagukomokaho, maze uzarambe ingoma ibihumbi mu gihugu Uhoraho Imana yawe aguhaye.»
Iryo ni Ijambo ry’Imana
ZABURI Zab 33 (32), 4-5, 6.9,18.20, 21-22
Inyik/Hahirwa umuryango Uhoraho yitoreye ngo ube imbata ye !
Ijambo ry’Uhoraho ni intagorama,
n’ibikorwa bye byose bikaba indahinyuka.
Akunda ubutungane n’ubutabera,
isi yuzuye ineza y’Uhoraho.
Ijuru ryaremwe n’ijambo ry’Uhoraho,
umwuka we uhanga ingabo zaryo zose.
Koko ibyo avuze byose biraba,
yategeka byose bikabaho.
Uhoraho aragira abamwubaha,
akita ku biringira impuhwe ze,
twebwe rero twizigiye Uhoraho :
ni we buvunyi bwacu n ingabo idukingira.
Ibyishimo biri mu mutima wacu ni we bikomokaho,
amizero yacu akaba mu izina rye ritagatifu.
Uhoraho, ineza yawe iraduhoreho,
nk’uko amizero yacu agushingiyeho.
ISOMO RYA KABIRI
Isomo ryo mu ibaruwa Mutagatifu Pawulo Intumwa yandikiye Abanyaroma Rom 8,14-17
Bavandimwe, l4abayoborwa na Roho w’Imana, abo ni bo bana b’Imana. 15Kandi rero ntimwahawe roho y’ubucakara ibasubiza nanone mu bwoba, ahubwo mwahawe roho ibagira abana bishingiwe kibyeyi, igatuma dutera hejuru tuti «Abba ! Data !» 16Roho uwo nyine afatanya na roho yacu guhamya ko turi abana b’Imana. 17Kandi ubwo turi abana, turi n’abagenerwamurage ; abagenerwamurage b’Imana, bityo n’abasangiramurage ba Kristu niba ariko tubabarana na We ngo tuzahabwe ikuzo hamwe na We.
Iryo ni Ijambo ry’Imana
IBANGONDIRIMBO RIBANZIRIZA IVANJILI Hish 1, 8
Alleluya Alleluya.
Hubahwe Imana Data na Mwana na Roho Mutagatifu :
Imana iriho, yahozeho kandi igiye kuza.
Alleluya.
IVANJILI
✠ Amagambo yo mu Ivanjili Ntagatifu uko yanditswe
na Matayo Mt 28,16-20
Nyuma y’Izuka rya Yezu, 16abigishwa cumi n’umwe bajya mu Galileya ku musozi Yezu yari yarabarangiye. 17Bamubonye barapfukama, bamwe ariko bashidikanya. 18Yezu arabegera arababwira ati «Nahawe ububasha bwose mu ijuru no ku isi. 19Nuko rero nimugende mwigishe amahanga yose, mubabatize ku izina ry’Imana Data na Mwana na Roho Mutagatifu, 20mubatoze gukurikiza ibyo nabategetse byose. Dore kandi ndi kumwe namwe iminsi yose, kugeza igihe isi izashirira.»
Iyo ni Ivanjili Ntagatifu
KU WA KANE UKURIKIRA UMUNSI MUKURU
W’UBUTATU BUTAGATIFU
UMUNSI MUKURU
W’ISAKRAMENTU RITAGATIFU
RY’UMUBIRI N’AMARASO BYA KRISTU
Mu bihugu atari umunsi mukuru utegetswe, bawuhimbaza ku cyumweru gikurikira icy’Ubutatu Butagatifu.
ISOMO RYA MBERE
Isomo ryo mu gitabo cy’Iyimukamisiri Iyim 24,3-8
Musa amanutse ku musozi wa Sinayi, 3amenyesha imbaga amagambo yose y’Uhoraho, hamwe n’amabwiriza ye yose. Nuko imbaga yose isubiza mu ijwi rimwe iti «Amagambo yose Uhoraho yavuze tuzayakurikiza !» 4Musa yandika amagambo y’Uhoraho yose. Hanyuma azinduka mu gitondo cya kare, yubaka urutambiro mu nsi y’umusozi, anahashinga amabuye cumi n’abiri yibutsa Imiryango cumi n’ibiri ya Israheli. 5Hanyuma yohereza abasore b’Abayisraheli batura Uhoraho ibitambo bitwikwa, maze ibimasa babitambaho ibitambo by’ubuhoro. 6Musa yenda igice cy’amaraso ayashyira mu nzeso, asigaye ayatera ku rutambiro. 7Nuko yenda igitabo cy’Isezerano, agisomera imbaga. Baravuga bati «Ibyo Uhoraho yavuze byose, tuzabikora kandi tuzamwumvira.» 8Musa yenda amaraso asigaye, ayatera imbaga avuga ati «Aya ni amaraso y’Isezerano Uhoraho yagiranye namwe, bishingiye kuri aya magambo yose yavuze.»
Iryo ni Ijambo ry’Imana
ZABURI Zab 116 (114-115), 12-13,15-16ac, 17-18
Inyik/ Dusangira inkongoro y’umukiro,
twiyambaza izina rya Nyagasani.
Ibyiza byose Uhoraho yangiriye,
rwose nzabimwitura nte ?
Nzashyira ejuru inkongoro y’umukiro,
kandi njye niyambaza izina ry’Uhoraho.
Koko Uhoraho ababazwa n’urupfu rw’abayoboke be !
Uhoraho, wagiriye ko ndi umugaragu wawe,
maze umbohora ku ngoyi !
Nzagutura igitambo cy’ishimwe,
kandi njye niyambaza izina ry’Uhoraho.
Nzarangiza amasezerano nagiriye Uhoraho,
imbere y’iteraniro ry’umuryango we wose.
ISOMO RYA KABIRI
Isomo ryo mu ibaruwa yandikiwe Abahebureyi Heb 9,11-15
Bavandimwe, «igihe Kristu ahingukiye yaje ari Umuherezagitambo mukuru w’ibyiza bizaza. Yambukiranyije ingoro isumbije iya mbere agaciro n’ubutungane, itubatswe n’ikiganza cy’abantu, ari byo kuvuga ko itari iyo muri ibi byaremwe. 12Yinjiye rimwe rizima ahatagatifu rwose, atahinjiranye amaraso ya za ruhaya n’ay’ibimasa, ahubwo aye bwite, aturonkera atyo ubucungurwe bw’iteka. 13Niba koko amaraso ya za ruhaya n’ay’ibimasa, kimwe n’umuyonga w’inyana yatwitswe, bishobora gusukura no gutagatifuza umubiri w’abo byuhagijwe, 14nk’amaraso ya Kristu wituye Imana ho igitambo kitagira inenge ku bwa Roho Uhoraho, yo azarushaho ate gusukura umutima wacu awukiza ibikorwa bitera urupfu, ngo dushobore gusingiza Imana Nzima? 15Ni cyo gituma Kristu yabaye ishingiro ry’Isezerano rishya, kuko yapfiriye gukiza ibicumuro by’abari bakigengwa n’Isezerano rya mbere, kandi ngo abatowe bazahabwe umurage w’iteka wabasezeranijwe.
Iryo ni Ijambo ry’Imana
INDIRIMBO Y’lGISINGIZO CY’IYOBERA
RY’UKARISTIYA NTAGATIFU
Rata, Siyoni, Umugaba,
Umucunguzi, Umushumba,
mu ndirimbo n’imbyino.
Uko ubasha wimareyo
nta bisingizo bareshya,
ntawamukabiriza.
None indirimbo ihimbaje
ni iy’ifunguro rizima
kandi ritubeshaho.
Bariherewe ku meza
ari cumi na babiri,
nta wubishidikanya.
Turate turanguruye
duhimbarwe, twizihirwe,
bidusabe umutima.
Uyu munsi mukuru tugira,
uratwibutsa ishingwa rya mbere
ry’ayo meza ya Yezu.
Ameza y’Umwami mushya,
Pasika nshya y’Iteka rishya
yakuyeho irya mbere.
Irishaje n’irishya,
ni igicucu n’ukuri,
ijoro riha amanywa.
Icyo Kristu yabimbuye,
yategetse ko gikorwa,
ari we ubitwibutsa.
Dukurikije iryo jambo,
umugati na divayi
bihinduka ubugingo.
Abakristu nibemere,
ko umugati ari umubiri
na divayi amaraso.
Icyo utumva ntukibone,
ni ukwemera kugihamya
by’agatangaza koko.
Hirya y’ibigaragara,
shaka ukuri bishushanya
uhasange inyamibwa.
Umubiri ni ikiribwa,
amaraso ni ikinyobwa,
hombi Kristu ni wese.
Umuhabwa ntabwo amwica,
ntamuvuna, ntamutubya,
amuhabwa muzima.
Ahabwa umwe, ahabwa benshi,
n’abo bose kimwe n’uwo,
ntabwo bamumaraho.
Ahabwa ababi n’abeza,
ariko biranyuranye
ni urupfu n’ubugingo.
Ubugingo ni ubw’abeza,
ababi bahabwa urupfu,
ni bo birobanura.
Manyura iryo Sakaramentu
ntiwikange jya wibuka
ko ari wese mu kimanyu
nko mu Hostiya yose.
Ntabwo isaturwa iyo mvaho,
hamanyurwa ikimenyetso,
bidatubya imimerere
n’indeshyo ya Nyirayo.
Dore uw’abamalayika
wagaburiwe abagenzi,
wa mugati ko w’abana
batajugunyira imbwa.
Wari warashushanyijwe
n’igitambo cya Izaki,
n’ituro ry’Intama ya Pasika,
na manu y’abakuru.
We mushumba nya Mushumba,
We mugati nyawo, Yezu,
turagire uturwaneho,
uzatuboneshe ibyiza,
iwabo w’abazima.
Wowe uzi byose ukabibasha,
twe abazapfa wemeye aha,
tuzasangire aho iwawe,
hamwe n’Abatagatifu,
udukwize umurage.
AMEN, ALLELUYA.
IBANGONDIRIMBO RIBANZIRIZA IVANJILI Yh 6,51-52
Alleluya Alleluya.
Nyagasani Yezu, uri umugati muzima wananutse mu ijuru.
Urya uwo mugati azabaho iteka.
Alleluya.
IVANJILI
✠ Amagambo yo mu Ivanjili Ntagatifu uko yanditswe na
Mariko Mk 14,12-16. 22-26
12Umunsi wa mbere wo kurya Imigati idasembuye ari na wo baba-gagaho intama za Pasika, abigishwa ba Yezu baramubaza bati «Urashaka ko tujya gutegura he, ngo uharire Pasika?» 13Yezu yohereza babiri mu bigishwa be, arababwira ati «Nimujye mu murwa, muri buhure n’umuntu wikoreye ikibindi cy’amazi, mumukurikire, 14maze aho yinjira mubwire nyir’urugo muti ‘Umwigisha aravuze ngo : Icyumba cyanjye nza kuriramo Pasika hamwe n’abigishwa banjye kiri hehe?’ 15Ari bubereke mu nzu yo hejuru icyumba kigari, gishashe kandi giteguye neza, abe ari ho mudutegurira ibya Pasika.» 16Abigishwa baragenda bagera mu murwa, maze basanga bimeze uko yabibabwiye, batunganya ibya Pasika.
22Nuko igihe bafunguraga Yezu afata umugati, amaze gushimira Imana, arawumanyura, arawubahereza avuga ati «Nimwakire: iki ni umubiri wanjye.» 23Hanyuma afata inkongoro, amaze gushimira Imana, arayibahereza maze bayinyweraho bose. 24Nuko arababwira ati «Iki ni amaraso yanjye y’Isezerano, amenewe abantu batabarika. 25Ndababwira ukuri: nta bwo nzongera kunywa ku mbuto y’imiza-bibu, kugeza ku munsi nzanywera divayi nshya mu Ngoma y’Imana.» 26Bamaze kuririmba Zaburi, barasohoka bagana ku musozi w’Imizeti.
Iyo ni Ivanjili Ntagatifu
KU WA GATANU UKURIKIRA ICYUMWERU
CYA 2 NYUMA YA PENTEKOSITI
UMUNSI MUKURU
W’UMUTIMA MUTAGATIFU WA YEZU
ISOMO RYA MBERE
Isomo ryo mu gitabo cy’Umuhanuzi Hozeya Hoz 11, 1. 3-4. 8c-9
Uhoraho aravuze ati 1Igihe Israheli yari akiri muto naramukunze, kandi nahamagaye umwana wanjye ngo ave mu Misiri. 3Nyamara Efurayimu ni jye wamufataga akaboko, nkamwigisha gutambuka, ariko ntibigeze bamenya ko ari jye wabitagaho. 4Narabiyegerezaga mbigiranye urukundo, nkabizirikaho nk’uko abantu babigenza; mbiyegamiza ku musaya nk’umubyeyi uteruye umwana we, nca bugufi ndabagaburira. 8cMu mutima wanjye nisubiyeho, impuhwe zanjye zirangurumanamo. 9Sinzakurikiza ubukana bw’uburakari bwanjye, kandi sinzarimbura ukundi Efurayimu ; kuko ndi Imana simbe umuntu, nkaba Nyir’ubutagatifu rwagati muri mwe, sinzongera kugusanga mfite uburakari.»
Iryo ni Ijambo ry’Imana.
INDIRIMBO Iz 12,2,4b-5a, 5b-6
Inyik/ Muzavoma amazi ku masoko y’agakiza mwishimye !
Dore Imana, Umukiza wanjye,
ndamwiringira kandi sinkigira ubwoba,
kuko imbaraga zanjye n’ indirimbo yanjye ari Uhoraho,
ni we wambereye agakiza.
Nimushimire Uhoraho, murate Izina rye,
nimwamamaze ibikorwa bye mu mahanga.
Nimuririmbire Uhoraho !
Nimumuririmbe kuko yakoze ibintu by’agatangaza,
kandi mubyamamaze mu nsi hose.
Rangurura ijwi uvuze impundu, wowe utuye i Siyoni,
kuko Nyir’ubutagatifu wa Israheli utuye iwawe rwagati,
ari Igihangange.
ISOMO RYA KABIRI
Isomo ryo mu ibaruwa Mutagatifu Pawulo Intumwa yandikiye Abanyefezi Ef 3,8-12.14-19
Bavandimwe, 8jyewe w’intamenyekana mu batagatifujwe bose, nahawe iyo ngabire yo kogeza mu banyamahanga ibyiza bitagereranywa bituruka kuri Kristu, 9no gusobanurira bose ukuntu Imana isohoza wa mugambi wari uhishe kuva kera na kare muri Yo, Rurema wahanze ibintu byose. 10Bityo guhera ubu ngubu, Ibikomangoma n’Ibihangange byo mu ijuru bimenyera kuri Kiliziya ubuhanga bw’Imana buteye kwinshi, 11nk’uko yabigambiriye kuva kera na kare muri Kristu Yezu Umwami wacu. 12Nuko ku bw’ukwemera tumufitiye, duhabwa gutunguka imbere y’Imana tuyiringiye. 14Ngiyo impamvu itumye mpfukama imbere y’Imana Data, 15Yo icyitwa ububyeyi cyose gikomokaho, ari mu ijuru ari no ku isi, 16ikaba na Nyir’ikuzo ryose, nkabasabira kugira ngo ibatere imbaraga ibigirishije Roho wayo, inakomeze umutima wa buri wese. l7Kristu nabaturemo mubikesha ukwemera ; mushore imizi mu rukundo, murushingemo n’imiganda, 18maze hamwe n’abatagatifujwe bose mushobore gusobanukirwa n’urukundo ruhebuje rwa Kristu, mumenye ubugari n’uburebure, ubujyejuru n’ubujyakuzimu byarwo. 19Ni bwo muzagera ku bumenyi busumba byose bw’urwo rukundo, maze musenderezwemo mutyo ubukungahare bw’Imana.
Iryo ni Ijambo ry’Imana.
IBANGONDIRIMBO RIBANZIRIZA IVANJILI 1 Yh 5,5-6
Inyik/Alleluya Alleluya.
Kristu Yezu, Umwana w’Imana yaje ku bw’amazi n’amaraso.
Urupfu rwe rwaturonkeye ubuzima.
Alleluya.
Cyangwa :
Alleluya Alleluya. 1 Yh 4,10b
Imana ni Yo yadukunze mbere, maze yohereza Umwana wayo
ngo abe igitambo cyo guhongerera ibyaha byacu.
Alleluya.
IVANJILI
✠ Amagambo yo mu Ivanjili Ntagatifu uko yanditswe na
Yohani Yh 19,31-37
Yezu yari amaze gupfa, 31ubwo hari ku munsi w’Umwiteguro wa Pasika. Kugira ngo rero imirambo itaguma ku misaraba kuri sabato, kandi iyo sabato ari umunsi mukuru cyane, Abayahudi binginga Pilato ngo bavune amaguru yabo, maze imirambo bayimanure. 32Nuko abasirikare baraza bavuna amaguru y’uwa mbere, n’ay’undi wari ubambanywe na we ; 33ariko bageze kuri Yezu basanga yapfuye, we ntibirirwa bamuvuna amaguru ; 34ahubwo umwe mu basirikare amutikura icumu mu rubavu, maze ako kanya havamo amaraso n’amazi. 35Uwabibonye ni we ubyemeza, kandi icyemezo cye ni ukuri ; na we azi ko avuga ukuri kugira ngo namwe mwemere. 36Ibyo byabaye ari ukugira ngo huzuzwe Ibyanditswe ngo «Nta gufwa rye rizavunika.» 37N’ahandi mu Byanditswe havuga ngo «Bazarangamira uwo bazaba bahinguranyije.»
Iyo ni Ivanjili Ntagatifu
IGIHE GISANZWE
CY’UMWAKA
* Icyo gihe gitangira Umunsi mukuru wa Batisimu ya Nyagasani waraye ubaye kugeza ku wa Gatatu w’ivu, kigakomeza nyuma ya Pentekositi kugeza kuri Adiventi.
* «Icyumweru cya 1 gisanzwe» gisimburwa n’Umunsi mukuru wa Batisimu ya Nyagasani.
KU CYUMWERU CYA 2 GISANZWE
ISOMO RYA MBERE
Isomo ryo mu gitabo cya mbere cya Samweli 1 Sam 3,3b-10. 19
Uwo munsi umwana 3bSamweli akaba aryamye mu Ngoro y’Uhoraho, hafi y’Ubushyinguro bw’Imana. 4Uhoraho ahamagara Samweli, arasubiza ati «Karame !» 5Yirukanka asanga Heli ati «Ndaje kuko umpamagaye.» Heli aramusubiza ati «Sinaguhamagaye mwana wanjye. Subira kwiryamira.» Ajya kuryama. 6Uhoraho ahamagara Samweli bundi bushya. Samweli arabyuka ajya kureba Heli, aramubwira ati «Ndaje kuko umpamagaye.» Heli aramusubiza ati «Sinaguhamagaye mwana wanjye. Subira kwiryamira.» 7Samweli yari ataramenya Uhoraho ; Ijambo ry’Uhoraho ryari ritaramwihishurira. 8Uhoraho yongera guhamagara Samweli ubwa gatatu. Arabyuka ajya kureba Heli, aramubwira ati «Ndaje kuko umpamagaye.» Ubwo Heli amenya ko ari Uhoraho uhamagara umwana. 9Heli abwira Samweli ati «Subira kwiryamira. Naguhamagara umubwire uti ‘Vuga Nyagasani, umugaragu wawe arumva.’» Nuko Samweli asubira kuryama mu mwanya we usanzwe. 10Uhoraho na none araza, ahamagara nka mbere ati : «Samweli, Samweli !» Samweli ati «Vuga, umugaragu wawe arumva.» 19Samweli arakura. Uhoraho yari kumwe na we, kandi ntiyatuma hagira ijambo rye na rimwe riba impfabusa.
Iryo ni Ijambo ry’Imana
ZABURI Zab 40 (39), 2.4ab, 7-8a, 8b-9, 10b.c.11c
Inyik/ Ngaha ndaje Nyagasani,
niyemeje gukora ibigushimisha.
Niringiye Uhoraho, mwiringira ntatezuka,
nuko anyitaho maze yumva amaganya yanjye.
Yampaye guhanika indirimbo nshya,
ndirimbira Imana yacu ibisingizo biyikwiye.
Ntiwifuje ibitambo cyangwa amaturo,
ahubwo wanzibuye amatwi ngo numve.
Ntiwigombye igitambo gitwikwa cyangwa icy’impongano,
ni yo mpamvu navuze nti «Ngaha ndaje !»
Mu muzingo w’igitabo handitswemo icyo unshakaho.
Mana yanjye, niyemeje gukora ibigushimisha,
maze amategeko yawe ajye ampora ku mutima.
Uhoraho, ibyo usanzwe ubizi,
sinigeze mbumba umunwa ngo nceceke,
sinahishahishe ineza n’ukuri byawe imbere y’ikoraniro rigari.
ISOMO RYA KABIRI
Isomo ryo mu ibaruwa ya mbere Mutagatifu Pawulo Intumwa yandikiye Abanyakorinti 1 Kor 6, 13b-15a. 17-20
Bavandimwe, 13bcyakora umubiri ntiwagenewe gusambana, ni uwa Nyagasani ; Nyagasani akaba ari we uwugenga. 14None rero Imana yazuye Nyagasani, izatuzura natwe ku bw’ububasha bwayo. 15aNtimuzi se ko imibiri yanyu ari ingingo za Kristu ? 17Nuko rero uwibumbira kuri Nyagasani, aba agize umutima umwe na we. 18Ubusambanyi nimubugendere kure. Icyaha cyose umuntu akoze usibye icyo, ntikigera ku mubiri we ; ariko usambana aba acumuriye umubiri we bwite. 19Ubundi se ntimuzi ko umubiri wanyu ari ingoro ya Roho Mutagatifu ubatuyemo, kandi ukomoka ku Mana, maze mukaba nta bubasha mwifiteho ? 20Mwacungujwe igiciro gihambaye! Nimusingirize rero Imana mu mubiri wanyu.
Iryo ni Ijambo ry’Imana
IBANGONDIRIMBO RIBANZIRIZA IVANJILI Yh 1,41.17b
Alleluya Alleluya.
Twabonye Umukiza, ari we Yezu Kristu :
ubuntu n’ukuri byatugejejweho binyujijwe kuri We.
Alleluya.
IVANJILI
✠ Amagambo yo mu Ivanjili Ntagatifu uko yanditswe na
Yohani Yh 1, 35-42
Muri icyo gihe, 35Yohani Batisita yari kumwe na babiri mu bigi- shwa be. 36Abonye Yezu ahise aravuga ati «Dore Ntama w’Imana.» 37Ba bigishwa be bombi bumvise avuze atyo, bakurikira Yezu. 38Yezu arahindukira abona bamukurikiye, arababaza ati «Murashaka iki?» Baramusubiza bati «Rabbi (ibyo bivuga ngo Mwigisha), utuye he ?» 39Arababwira ati «Nimuze murebe.» Baraza babona aho atuye. Nuko uwo munsi bagumana na we. Hari nk’igihe cy’isaha ya cumi. 40Andereya mwene nyina wa Simoni Petero, yari umwe muri abo babiri bari bumvise amagambo ya Yohani, bagakurikira Yezu. 41 Aza guhura mbere na mwene nyina Simoni, aramubwira ati «Twabonye Kristu» (ari byo kuvuga Umukiza). 42Nuko amugeza kuri Yezu. Yezu aramwitegereza aramubwira ati «Uri Simoni mwene Yohani ; none kuva ubu uzitwa Petero» (bisobanura Urutare).
Iyo ni Ivanjili Ntagatifu
KU CYUMWERU CYA 3 GISANZWE
ISOMO RYA MBERE
Isomo ryo mu gitabo cy’Umuhanuzi Yonasi Yon 3, 1-5. 10
1Ijambo ry’Uhoraho ribwirwa Yonasi riti 2«Haguruka ujye i Ninivi umugi mugari, maze ubamenyeshe icyo nzakubwira.» 3Yonasi arahaguruka maze ajya i Ninivi akurikije ijambo ry’Uhoraho. Ninivi rero ikaba umugi mugari bihebuje, kuwugenda byari iminsi itatu.4Yonasi yinjira mu mugi akora urugendo rw’umunsi umwe. Yigisha agira ati «Hasigaye iminsi mirongo ine maze Ninivi ikarimbuka.» 5Abantu b’i Ninivi bemera Imana, batangaza Igisibo, bambara ibigunira kuva ku mukuru kugeza ku muto. 10Imana ibonye ibyo bakoraga, n’uko bahinduye bakareka imigenzereze yabo mibi, na yo ihindura imigambi, icyago yari yabateguje ntiyakibateza.
Iryo ni Ijambo ry’Imana
ZABURI Zab 25 (24), 4-5b, 6-7ab, 8-9
Inyik/ Nyagasani, tumenyeshe inzira zawe.
Uhoraho menyesha inzira zawe,
untoze kugendera mu tuyira twawe.
Nyobora ku kuri kwawe kandi ujye umbwiriza,
kuko ari wowe Mana nkesha umukiro wose.
Uhoraho, wibuke ineza n’urukundo,
wagaragaje kuva kera na kare.
Ntiwite ku byaha n’amafuti nakoze nkiri muto,
ahubwo unyiteho ukurikije impuhwe zawe.
Uhoraho agwa neza kandi n’indakemwa,
ni cyo gituma abanyabyaha abagarura mu nzira nziza.
Abiyoroshya abaganisha ku butungane,
abacisha make akabatoza kunyura mu nzira ye.
ISOMO RYA KABIRI
Isomo ryo mu ibaruwa ya mbere Mutagatifu Pawulo Intumwa yandikiye Abanyakorinti 1 Kor 7, 29-31
29Mbibabwire rero bavandimwe, igihe kirabashirana. Aho bigeze abafite abagore nibabeho nk’aho batabagize; 30abarira bamere nk’aho batarira; abanezerewe bamere nk’aho batanezerewe; n’abacuruza bamere nk’aho nta cyo batunze; 31n’abakoresha iby’iyi si ntibagatwarwe na byo, kuko imisusire y’iyi si ihita bwangu.
Iryo ni Ijambo ry’Imana
IBANGONDIRIMBO RIBANZIRIZA IVANJILI Mk 1,15.
Alleluya Alleluya.
Ingoma y’Imana iregereje, nimwemere Inkuru Nziza.
Alleluya.
IVANJILI
✠ Amagambo yo mu Ivanjili Ntagatifu uko yanditswe na
Mariko Mk 1,14-20
Muri icyo gihe, 14Yohani Batisita amaze gutangwa Yezu aza mu Galileya. Yamamaza Inkuru Nziza y’Imana avuga ati 15«Igihe kirageze none Ingoma y’Imana iregereje. Nimwisubireho maze mwemere Inkuru Nziza !» 16Uko yagendaga akikiye inyanja ya Galileya, abona Simoni na Andereya murumuna we ; bariho baroha inshundura mu nyanja kuko bari abarobyi. 17Yezu arababwira ati «Nimunkurikire nzabagira abarobyi b’abantu.» 18Ako kanya basiga aho inshundura zabo baramukurikira. 19Yigiye imbere gatoya, abona Yakobo mwene Zebedeyi na Yohani murumuna we ; bariho batunganya inshundura zabo mu bwato. 20Ako kanya arabahamagara. Nuko basiga se Zebedeyi mu bwato hamwe n’abakozi be, baramukurikira.
Iyo ni Ivanjili Ntagatifu
KU CYUMWERU CYA 4 GISANZWE
ISOMO RYA MBERE
Isomo ryo mu gitabo cy’Ivugururamategeko Ivug 18,15-20
Musa abwira Abayisraheli ati 15«Uhoraho Imana yawe azitorera umuhanuzi umeze nkanjye, ukomoka muri mwe, mu bavandimwe bawe ; azabe ari we mwumva. 16Ni na cyo wasabye Uhoraho Imana yawe kuri Horebu, kuri wa munsi w’ikoraniro, igihe wavugaga uti ‘Sinshaka gukomeza kumva ijwi ry’Uhoraho Imana yanjye, sinshaka gukomeza kubona uwo muriro mwinshi kugira ngo ntapfa !’ 17Ni bwo Uhoraho yambwiraga ati ‘Bagize neza kuba bavuze batyo !’ 18Nzababonera umuhanuzi umeze nkawe, ukomoka mu bavandimwe babo ; nzashyira amagambo yanjye mu kanwa ke, ajye ababwira ibyo mubwirije byose. 19Kandi umuntu utazumva amagambo yanjye, ayo uwo muhanuzi nyine azavuga mu izina ryanjye, nzabimuryoza ubwanjye. 20Ariko uwo muhanuzi nahangara kuvuga mu izina ryanjye ijambo ntamubwirije kuvuga, cyangwa akavuga mu izina ry’imana zindi, icyo gihe uwo muhanuzi azapfa.’»
Iryo ni Ijambo ry’Imana
ZABURI Zab 95 (94), 1-2, 6-7b, 7d-8a.9
Inyik/ Uyu munsi ntitugundirize umutima wacu,
ahubwo dutege amatwi ijambo ry’Uhoraho.
Nimuze tuvugirize impundu Uhoraho,
turirimbe Urutare rudukiza.
Tumuhinguke imbere tumurata,
tumuririmbire ibisingizo.
Nimwinjire duhine umugongo twuname,
dutere ivi imbere y’Uhoraho waturemye.
Kuko we ari Imana yacu,
naho twe tukaba imbaga yo mu rwuri rwe.
Iyaba uyu munsi mwakundaga mukumva ijwi rye !
«Ntimugundirize umutima wanyu nko mu butayu,
aho abasekuruza banyu banyinjaga,
aho bangeragerezaga n’ubwo bari barabonye ibikorwa byanjye.»
ISOMO RYA KABIRI
Isomo ryo mu ibaruwa ya mbere Mutagatifu Pawulo Intumwa yandikiye Abanyakorinti 1Kor 7,32-35
Bavandimwe, 32icyo nabifuriza ni ukubaho nta mpagarara. Umuntu utashatse ahihibikanira ibyerekeye Nyagasani, ashaka uko yanyura Imana. 33Naho ufite umugore aharanira iby’isi, ashakashaka uko yanyura umugore we, 34maze akaba yisatuyemo kabiri. Bityo n’umugore cyangwa umukobwa batashatse bahihibikanira ibyerekeye Nyagasani, ngo bamutunganire ku mubiri no ku mutima. Naho umugore washatse aharanira iby’isi, ashakashaka uko yashimisha umugabo we. 35Ibyo mbibabwiriye kubafasha, atari umutego mbagushamo, ahubwo ari ukugira ngo mukore ikirushijeho gutungana, kandi mwegukire Nyagasani nta nkomyi.
Iryo ni Ijambo ry’Imana
IBANGONDIRIMBO RIBANZIRIZA IVANJILI Lk 1, 68. 79
Alleluya Alleluya.
Nihasingizwe Nyagasani Imana yacu,
abari batuye mu mwijima yababengeranishijeho urumuri.
Alleluya.
IVANJILI
✠ Amagambo yo mu Ivanjili Ntagatifu uko yanditswe na
Mariko Mk 1, 21-28
Muri icyo gihe Yezu yari aherekejwe n’abigishwa be, 21bagera i Kafarinawumu. Nuko ku munsi w’isabato yinjira mu isengero, arigisha. 22Batangariraga inyigisho ze, kuko yabigishaga nk’umuntu ufite ububasha, utameze nk’abigishamategeko babo.
23Ubwo nyine mu isengero ryabo hakaba umuntu wahanzweho na roho mbi. Nuko itera hejuru iti24 «Uradushakaho iki, Yezu w’i Nazareti ? Waje kuturimbura ! Nzi uwo uri we : uri Intungane y’Imana.» 25Yezu ayibwira ayikangara ati «Ceceka kandi uve muri uwo muntu !» 26Nuko iyo roho mbi iramutigisa cyane, imusohokamo ivuza induru. 27Bose barumirwa bituma babazanya bati «Ibi ni ibiki? Mbega inyigisho nshya itanganywe ububasha ! Arategeka na roho mbi zikamwumvira !» 28Nuko bidatinze, inkuru ye ikwira mu ntara yose ya Galileya.
Iyo ni Ivanjili Ntagatifu
KU CYUMWERU CYA 5 GISANZWE
ISOMO RYA MBERE
Isomo ryo mu gitabo cya Yobu Yobu 7,1-4.6-7
Yobu afata ijambo maze aravuga ati 1«Hano ku isi kubaho k’umuntu ni nko kurwana intambara, kandi ubuzima bwe nta ho butaniye n’ubw’umucancuro. 2Jyewe rero nsa n’umucakara wifuza amafu, cyangwa umucancuro uharanira agahembo ke. 3Incuro yanjye yabaye amezi yo kumanjirwa, amajoro y’ububabare ambera igihembo. 4Iyo ndyamye ndavuga ngo ‘icyampa ngo mbyuke’ ; naba mbyutse nti ‘Ntibwira nkiriho’. Nuko nkirirwa mbunza imitima ntyo umugoroba ugakika. 6Iminsi y’ukubaho kwanjye iriruka amasigamana, irazimira ubutagaruka. 7Ibuka ko ubugingo bwanjye ari nk’umuyaga, amaso yanjye ntakibonye ihirwe ukundi.»
Iryo ni Ijambo ry’Imana
ZABURI Zab 147 (146-147), 1.3, 4-5, 6-7
Inyik/ Nimuze dusingize Nyagasani,
we womora ibikomere byacu !
Cyangwa : Alleluya.
Mbega ukuntu ari byiza kuririmba Imana yacu,
ntibigire uko bisa kuyisingiza uko bikwiye !
Uhoraho ni we ukiza abafite intimba ku mutima,
maze akomora ibikomere byabo.
Amenya kubarura inyenyeri zibaho,
akazivuga zose mu mazina yazo.
Umutegetsi wacu ni igihangange n’umunyamaboko,
ubwenge bwe ntibugira urugero.
Uhoraho ashyigikira ab’intamenyekana,
naho abagome akabacisha bugufi.
Nimuhanikire Uhoraho indirimbo imushimagiza,
mucurangire Imana yacu umurya w’inanga.
ISOMO RYA KABIRI
Isomo ryo mu ibaruwa ya mbere Mutagatifu Pawulo Intumwa yandikiye Abanyakorinti 1 Kor 9,16-19.22-23
Bavandimwe, l6kuba naramamaje Inkuru Nziza si byo byatuma nirata, kuko ari umurimo ngombwa nashinzwe ; ndiyimbire rero niba ntamamaje Inkuru Nziza ! 17Yabaye rero nabikoraga ku bwende bwanjye, nari nkwiye kubihemberwa ; ariko ubwo mbitegetswe ni umuzigo nahawe. 18Ubwo se ishimwe ryanjye rishingiye he ? Rishingiye mu kwamamaza Inkuru Nziza ku buntu, ntarambirije ku burenganzira mpabwa na yo. 19N’ubwo nigenga kuri bose nahisemo kwigira umugaragu wa bose, kugira ngo nigarurire benshi muri bo. 22Nigize umunyantege nke mu banyantege nke, ngo niyegereze abanyantege nke. Nihwanyije na bose muri byose, kugira ngo ngire abo mbarokoramo. 23Ibyo kandi mbikorera Inkuru Nziza kugira ngo nzayigireho uruhare.
Iryo ni Ijambo ry’Imana
IBANGONDIRIMBO RIBANZIRIZA IVANJILI Mt 8, 17
Alleluya Alleluya.
Yezu Kristu yatwunamuye mu ntege nke zacu,
yigerekaho n’indwara zacu.
Alleluya.
IVANJILI
✠ Amagambo yo mu Ivanjili Ntagatifu uko yanditswe na
Mariko Mk 1, 29-39
Muri icyo gihe, 29Yezu akiva mu isengero ajya kwa Simoni na Andereya, ari kumwe na Yakobo na Yohani. 30Ubwo rero nyirabukwe wa Simoni yari aryamye ahinda umuriro. Bahita babwira Yezu iby’uburwayi bwe. 31Ni ko kumwegera, amufata ukuboko aramuhagurutsa. Nuko umuriro urazima atangira kubazimanira.
32Bugorobye izuba rimaze kurenga, bamuzanira abarwayi bose n’abahanzweho na roho mbi; 33mbese umugi wose ukoranira imbere y’umuryango. 34Nuko akiza abarwayi benshi bari bababajwe n’indwara z’amoko menshi, kandi yirukana roho mbi nyinshi, ariko akazibuza kumuvuga kuko zari zizi uwo ari we. 35Bukeye bwaho Yezu abyuka mu rukerera, arasohoka ajya ahantu hiherereye, nuko arasenga. 36Simoni na bagenzi be bajya kumushakashaka. 37Bamubonye baramubwira bati «Rubanda rwose ruragushaka.» 38We rero arabasubiza ati «Nimucyo tujye ahandi mu nsisiro za hafi, na ho mpamamaze Inkuru Nziza kuko ari cyo cyazanye.» 39Nuko azenguruka Galileya yose, yamamaza Inkuru Nziza mu masengero yabo kandi yirukana roho mbi.
Iyo ni Ivanjili Ntagatifu
KU CYUMWERU CYA 6 GISANZWE
ISOMO RYA MBERE
Isomo ryo mu gitabo cy’Abalevi Lev 13,1-2. 45-46
1Uhoraho abwira Musa na Aroni ati 2«Ku mubiri w’umuntu nihavukaho ikibyimba, amahumane cyangwa isekera, maze bikamuviramo indwara yo mu bwoko bw’ibibembe, bazamushyikirize umuherezabitambo Aroni cyangwa undi muherezabitambo mu bahungu be. 45Umubembe wafashwe n’iyo ndwara yambara imyenda y’ibishwangi, ntasokoze umusatsi we, ndetse n’ubwanwa bwe akabupfuka. Ubundi kandi aho ageze agomba kurangurura ati ‘Uwahumanye ! Uwahumanye !’ 46Aba yaranduye kuko nyine indwara yamufashe iba ihumanya. Azatura ukwe wenyine, urugo rwe azarushinga kure y’ingando.»
Iryo ni Ijambo ry’Imana
ZABURI Zab 102 (101), 2-3,4-5,6.13,20-21
Inyik/ Nyagasani, ntiwibagirwe induru y’abanyabyago.
Uhoraho umva isengesho ryanjye,
induru yanjye nikugereho !
Ntukampishe uruhanga rwawe umunsi nasumbirijwe.
Koko iminsi yanjye irayoyoka nk’umwotsi,
n’amagufwa yanjye agakongoka nk’inkekwe y’umuriro,
Umutima wanjye urarabirana nk’ubwatsi batemye,
bikanyibagiza no kurya umugati wanjye.
Aho ndi hose mpora nganya,
ku buryo nsigaye ndi uruhu rusa.
Nyamara wowe, Uhoraho, uri umwami ubuziraherezo,
kandi imbyaro zose zizahora zikwibuka !
Kuko Uhoraho yarungurukiye mu bushorishori bw’ijuru,
aho ari mu Ngoro ye, akareba ku isi,
kugira ngo yumve amaganya y’imfungwa,
kandi abohore abaciriwe urwo gupfa.
ISOMO RYA KABIRI
Isomo ryo mu ibaruwa ya mbere Mutagatifu Pawulo Intumwa yandikiye Abanyakorinti 1 Kor 10, 31-33; 11,1
Bavandimwe, 10,31ari igihe murya ari n’igihe munywa, icyo mukoze cyose mujye mugikorera guhesha Nyagasani ikuzo. 32Ntimukagire uwo mutera imbogamizi, yaba Umuyahudi, yaba Umugereki, yaba uwo mu Kiliziya y’Imana. 33Nguko uko nanjye ngerageza gushimisha bose muri byose ntaharanira inyungu yanjye bwite, ahubwo ifitiye abenshi akamaro ngo bakurizeho gukira. 11,1Nimube rero abakurikiza banjye, nk’uko nanjye nkurikiza Kristu.
Iryo ni Ijambo ry’Imana
IBANGONDIRIMBO RIBANZIRIZA IVANJILI
Alleluya Alleluya.
Umuhanuzi ukomeye yaduturutsemo,
kandi Imana yasuye umuryango wayo.
Alleluya.
IVANJILI
✠ Amagambo yo mu Ivanjili Ntagatifu uko yanditswe na
Mariko Mk 1, 40-45
Muri icyo gihe, 40umubembe aza agana Yezu apfukama imbere ye, amwinginga agira ati «Ubishatse wankiza !»41Yezu amugirira impuhwe, arambura ukuboko amukoraho avuga ati «Ndabishatse kira !» 42Ako kanya ibibembe bimuvaho arakira. 43Yezu aramwihanangiriza, amusezerera ako kanya 44amubwira ati «Uramenye ntugire uwo ubibwira, ahubwo genda wiyereke umuherezabitambo kandi uture ibyo Musa yategetse abahumanuwe, maze bibabere icyemezo cy’uko wakize.» 45We ariko ngo amare kugenda, atangira gutangaza no gukwiza hose iyo nkuru, bituma Yezu atagishoboye kwinjira mu mugi ku mugaragaro, ahubwo yigumira ahantu hadatuwe, akaba ari ho abantu bamusanga baturutse impande zose.
Iyo ni Ivanjili Ntagatifu
KU CYUMWERU CYA 7 GISANZWE
ISOMO RYA MBERE
Isomo ryo mu gitabo cy’Umuhanuzi Izayi Iz 43,18-19.21-22.24c-25.
Uhoraho aravuze ati 18«Mwikwibuka ibyabayeho mbere ngo mukurwe umutima n’ibya kera, 19dore ngiye gukora ikintu gishya ndetse cyatangiye no kugaragara ; ntimukiruzi se ? Ni ukuri rwose ndahanga inzira rwagati mu butayu, inzuzi zitembe ahantu h’amayaga. 21Uyu muryango nihangiye kandi uzahora uvuga ibisingizo byanjye. 22Yakobo, uwo watakambiye si jyewe, kuko umaze igihe waranyibagiwe, Israheli we ! 24cAhubwo wangeretseho ibyaha byawe, urananiza kubera amafuti yawe. 25Nyamara jye ni ko meze ; ku bw’izina ryanjye nkubabariye ibyaha byawe, sinzibuka amakosa yawe.»
Iryo ni Ijambo ry’Imana
ZABURI Zab 41 (40), 2-3a.4a, 5-6, Ua.l2a-13
Inyik/ Uhoraho ngirira ibambe,
maze unkize kuko nagucumuyeho.
Hahirwa uwita ku mukene no ku munyantege nke :
ku munsi w’amakuba, Uhoraho aramukiza !
Uhoraho azamukomeza amuhe guhirwa ku isi,
amuterere inkunga aho arwariye.
Naratakambye nti «Uhoraho, ngirira ibambe,
maze unkize kuko nagucumuyeho !»
Naho abanzi banjye bo bakamvuga nabi,
ngo «Mbese azapfa ryari ? Izina rye rizazima ryari ?»
Ariko wowe Uhoraho, ungirire ibambe umpagurutse,
rwose nzamenya ko unkunda.
Kubera ubudakemwa bwanjye wakomeje kunshyigikira,
maze ungarura iruhande rwawe ubuziraherezo.
ISOMO RYA KABIRI
Isomo ryo mu ibaruwa ya kabiri Mutagatifu Pawulo Intumwa yandikiye Abanyakorinti 2 Kor 1,18-22
Bavandimwe, 18Imana irandeba : ibyo nababwiye sinari ngambiriye guhita mbihindagura. 19Koko rero Umwana w’Imana, Kristu Yezu twamamaje iwanyu, jyewe, Silivani na Timote, si uko ateye. Ntiyabaye icyarimwe «yego» na «oya», yabaye «yego» gusa ! 20Ku buryo amasezerano yose y’Imana yabaye muri we «yego», natwe tugakurizaho gukuza Imana tuvuga tuti «Amen». 21Ni Yo ubwayo idukomeza muri Kristu, ikadutorera kuba abayo 22idushyiramo ikimenyetso cyayo, ikaduha no gutunga Roho wayo mu mitima yacu, kugira ngo atubere ingwate y’ibyiza yatugeneye.
Iryo ni Ijambo ry’Imana
IBANGONDIRIMBO RIBANZIRIZA IVANJILI Lk 4,18-19
Alleluya Alleluya.
Nyagasani yohereje Yezu umugaragu we,
kugira ngo ageze Inkuru Nziza ku bakene,
kandi atangarize imbohe ko zibohowe.
Alleluya.
IVANJILI
✠ Amagambo yo mu Ivanjili Ntagatifu uko yanditswe na
Mariko Mk 2,1-12
Muri icyo gihe, 1Yezu asubira i Kafarinawumu ; bamenya ko ari imuhira. 2Abantu benshi barahakoranira, bituma habura umwanya ndetse n’imbere y’umuryango ; nuko arabigisha. 3Haza abantu bamuzaniye ikirema gihetswe mu ngobyi. 4Kuko batashoboraga kukimugezaho bitewe n’ikivunge cy’abantu, basenya igisenge hejuru y’aho yari ari. Bamaze kuhaca icyuho bururutsa ingobyi ikirema cyari kiryamyemo. 5Yezu abonye ukwemera kwabo abwira icyo kirema ati «Mwana wanjye, ibyaha byawe urabikijijwe.» 6Ubwo hakaba abigishamategeko bamwe bari bicaye aho, bakibaza bati 7«Igituma uriya avuga atyo ni iki ? Aratuka Imana. Ni nde ushobora gukiza ibyaha atari Imana yonyine ?» 8Ako kanya Yezu amenya ibitekerezo byabo, ni ko kubabwira ati «Ni iki gituma mutekereza mutyo mu mutima wanyu ? 9Icyoroshye ni ikihe, ari ukubwira ikirema nti ‘Ibyaha byawe urabikijijwe’ cyangwa kuvuga nti ‘Haguruka ufate ingobyi yawe maze ugende’ ? 10None rero kugira ngo mumenye ko Umwana w’umuntu afite ububasha ku isi bwo gukiza ibyaha...», abwira ikirema ati 11«Ndabikubwiye : haguruka ufate ingobyi yawe witahire!» I2Ako kanya arahaguruka, afata ingobyi ye asohoka bose bamureba ; bagwa mu kantu basingiza Imana bavuga bati «Nta na rimwe twigeze tubona ibintu nk’ibi ngibi !»
Iyo ni Ivanjili Ntagatifu
KU CYUMWERU CYA 8 GISANZWE
ISOMO RYA MBERE
Isomo ryo mu gitabo cy’Umuhanuzi Hozeya Hoz 2,16.17b. 21-22.
Uhoraho aravuze ati 16«Umugore wanjye w’umuhemu, ubu ni jye ugiye kumuhendahenda, nzamujyane mu butayu maze mwurure umutima. 17bAzahanganiriza nk’igihe cy’ubuto bwe, mbese nk’igihe yazamukaga ava mu gihugu cya Misiri. 21Nzagucyura ube uwanjye iteka ryose, dushyingiranwe bishingiye ku butabera n’ubutungane, duhorane urugwiro n’urukundo. 22Nzashyingiranwa nawe nkugara-garize ubudahemuka, maze uzamenye Uhoraho.»
Iryo ni Ijambo ry’Imana
ZABURI Zab 103 (102), 1-2, 3-4, 8.10,12-13
Inyik/. Uhoraho ni umunyambabazi n’umunyampuhwe.
Mutima wanjye singiza Uhoraho,
n’icyo ndi cyo cyose gisingize izina rye ritagatifu !
Mutima wanjye singiza Uhoraho,
kandi ntiwibagirwe na kimwe mu byo yaguhaye !
We ubabarira ibicumuro byawe byose,
akakuvura indwara zawe zose.
We warura ubugingo bwawe mu mva,
akagutamiriza ubutoneshwe n’impuhwe.
Uhoraho ni umunyambabazi n’umunyampuhwe,
atinda kurakara kandi akagira ibambe.
Ntaduhana bihwanye n’ibicumuro byacu,
ntatwihimura akurikije amafuti yacu.
Uko uburasirazuba butandukanye n’uburengerazuba,
ni ko adutandukanya n’ibicumuro byacu.
Uko umubyeyi agirira ibambe abana be,
ni ko Uhoraho agirira ibambe abamutinya.
ISOMO RYA KABIRI
Isomo ryo mu ibaruwa ya kabiri Mutagatifu Pawulo Intumwa yandikiye Abanyakorinti 2 Kor 3, lb-6
Bavandimwe, lbmbese dukeneye kugenza nka bamwe bitwaza inzandiko zibashingana iwanyu, cyangwa aho mubohereje ? 2Ibaruwa idushingana ni mwe, ikaba kandi yanditse mu mutima wacu, izwi kandi isomwa na bose. 3Biragaragara rwose ko muri urwandiko rwa Kristu yandikishije umurimo wacu, rutandikishijwe wino ahubwo Roho w’Imana Nyir’ubuzima, atari ku bisate by’amabuye, ahubwo rwanditswe ku mitima y’abantu. 4Ngicyo icyizere dufitiye Imana ku bwa Kristu. 5Bityo ku bwacu tukaba nta cyo dushobora kwiratana kidukomotseho, kuko ubushobozi bwacu buturuka ku Mana. 6Ni Yo yatugize abogeza b’Isezerano Rishya, ridashingiye ku byanditswe ahubwo kuri Roho ; kuko ibyanditswe bikurura urupfu, naho Roho we agatanga ubuzima.
Iryo ni Ijambo ry’Imana
IBANGONDIRIMBO RIBANZIRIZA IVANJILI Mk 2,22
Alleluya Alleluya.
Hahirwa abatumiwe mu bukwe bw’Ingoma y’ijuru :
divayi nshya y’Isezerano rishya ni bo igenewe.
Alleluya.
IVANJILI
✠ Amagambo yo mu Ivanjili Ntagatifu uko y audits we
na Mariko Mk 2,18-22
18Umunsi umwe abigishwa ba Yohani n’Abafarizayi bari basibye kurya. Nuko baraza babaza Yezu bati «Ni iki gituma abigishwa ba Yohani n’Abafarizayi basiba kurya, naho abigishwa bawe ntibasibe?» 19Yezu arabasubiza ati «Birakwiye se ko abakwe basiba kurya, umukwe akiri kumwe na bo ? Igihe cyose bakiri kumwe n’umukwe ntibakwiye gusiba kurya. 20Ariko hari igihe umukwe azabavanwamo, ubwo rero bazasiba kurya kuri uwo munsi. 21Nta we utera igitambaro gishya ku mwenda ushaje, kuko abigenje atyo, igishya cyakurura igishaje maze umwenda ukarushaho gucika. 22Nta n’ushyira divayi nshya mu masaho ashaje, kuko divayi yasandaza amasaho maze divayi ikameneka, n’amasaho agapfa ubusa. Ubundi divayi nshya bajye bayishyira mu masaho mashya !»
Iyo ni Ivanjili Ntagatifu
KU CYUMWERU CYA 9 GISANZWE
ISOMO RYA MBERE
Isomo ryo mu gitabo cy’Ivugururamategeko Ivug 5,12-15
Ku musozi wa Sinayi Imana itanga iri tegeko iti 12«Urajye wubahiriza umunsi w’isabato, uwegurire Imana nk’uko Uhoraho Imana yawe yabigutegetse. 13Uzakore imirimo yawe yose mu minsi itandatu, 14naho uwa karindwi ni isabato y’Uhoraho Imana yawe. Ntuzagire umurimo n’umwe ukora : ari wowe, ari umuhungu wawe, ari umukobwa wawe, ari umugaragu wawe, ari umuja wawe, ari ikimasa cyawe, ari indogobe yawe, ari irindi tungo ryawe iryo ari ryo ryose, ari n’umusuhuke waje iwanyu, kugira ngo umugaragu wawe n’umuja wawe na bo baruhuke nkawe. 15Ujye wibuka ko wari umucakara mu gihugu cya Misiri, maze Uhoraho Imana yawe akagukuzayo imbaraga n’umurego by’ukuboko kwe : ngicyo igituma Uhoraho Imana yawe yagutegetse kubahiriza umunsi w’isabato.»
Iryo ni Ijambo ry’Imana
ZABURI Zab 81 (80), 3-4, 5-6ab, 6c-8a, 10-llb
Inyik/ Nimuze tuvugirize impundu Uhoraho, we mbaraga zacu.
Ngaho nimuririmbe, muvuze ishako,
mucurange inanga ijyane n’iningiri.
Nimuvuze impanda ku mboneko y’ukwezi,
no ku nzora yako, umunsi wacu w’ibirori.
Iryo ni itegeko muri Israheli,
ryishyiriweho n’Imana ya Yakobo.
Itegeko yashinze inzu ya Yozefu,
igihe yibasiye igihugu cya Misiri.
Ndumva imvugo idasanzwe ngo
«Urutugu rwe naruruhuye umuzigo,
n’ibiganza bye birekura agatebo !
Igihe untakambiye uri mu kaga ndagutabara.
Iwawe ntihakabe imana yindi,
ntugapfukamire imana y’imvamahanga !
Ndi Uhoraho Imana yawe,
yakuvanye mu gihugu cya Misiri !»
ISOMO RYA KABIRI
Isomo ryo mu ibaruwa ya kabiri Mutagatifu Pawulo Intumwa yandikiye Abanyakorinti 2 Kor 4,6-11
Bavandimwe, 6Imana yivugiye iti «Urumuri nirwakire mu mwijima», ni Yo ubwayo yamurikiye mu mitima yacu ngo tumenye ikuzo ryayo ribengerana ku ruhanga rwa Kristu. 7Ariko uwo mukiro tuwutwaye mu tubindi tumeneka ubusa, bigatuma bose babona ko ubwo bubasha buhanitse buturuka ku Mana, aho kutwitirirwa. 8Baraduhutaza hirya no hino ariko ntidutembagara ; turagirijwe ariko tugatambuka ; 9turaburagizwa ariko ntidushyikirwa ; twatuwe hasi ariko ntiduheranwa. 10Igihe cyose tugendana imibabaro y’urupfu rwa Kristu, kugira ngo n’ubuzima bwe bwigaragaze mu mubiri wacu. 11N’ubwo turi bazima bwose duhora tugabizwa urupfu duhorwa Yezu, kugira ngo ubugingo bwe bugaragarire muri iyi mibiri yacu y’impfabusa.
Iryo ni Ijambo ry’Imana
IBANGONDIRIMBO RIBANZIRIZA IVANJILI 2 Kor 3, 6. 17
Alleluya Alleluya.
Roho w’Imana atanga ubuzima,
kandi aho Roho wa Nyagasani ari ni ho haba ubwisanzure.
Alleluya.
IVANJILI (Isomo rirerire)
✠ Amagambo yo mu Ivanjili Ntagatifu uko yanditswe na
Mariko Mk 2, 23-28 ; 3,1-6
2,23Umunsi umwe ku isabato Yezu anyura mu mirima y’ingano, abigishwa be batangira kugenda bazimamfuza. 24Abafarizayi ni ko kumubwira bati «Dore re ! Kuki bakora ibibujijwe ku isabato ?» 25 Arabasubiza ati «Ntimwasomye uko Dawudi yabigenjeje, igihe ashonje akabura uko agira, we n’abo bari kumwe? 26N’uko yinjiye mu Ngoro y’Imana mu gihe cy’Abiyatari umuherezabitambo mukuru, akarya imigati y’umumuriko atashoboraga kurya kuko yari igenewe abaherezabitambo bonyine, kandi akayihaho n’abari kumwe na we ?» 27Nuko Yezu arababwira ati «Isabato ibereyeho umuntu, nta bwo ari umuntu ubereyeho isabato ! 28Ni cyo gituma Umwana w’umuntu agenga ndetse n’isabato !»
3,1 Nuko yongera kwinjira mu isengero, maze ahasanga umuntu wari ufite ikiganza cyumiranye. 2Ubwo bagenzuraga Yezu ngo barebe ko amukiza ku munsi w’isabato, bagira ngo babone icyo bamurega. 3Nuko abwira uwo muntu wari ufite ikiganza cyumiranye ati «Haguruka uze hano hagati !» 4Maze arababwira ati «Ni iki cyemewe ku munsi w’isabato, ari ukugira neza cyangwa ari ukugira nabi? Ari ugukiza umuntu cyangwa se kumwica?» Nyamara bo baraceceka. 5Nuko abararanganyamo amaso arakaye, ashavujwe n’imitima yabo yanangiye. Ni ko kubwira uwo muntu ati «Rambura ikiganza cyawe.» Nuko arakirambura kirakira. 6Abafarizayi basohotse, baherako bajya inama n’Abaherodiyani yo gushaka uko bamwicisha.
Iyo ni Ivanjili Ntagatifu
IVANJILI (Isomo rigufi)
✠ Amagambo yo mu Ivanjili Ntagatifu uko yanditswe na
Mariko Mk 2, 23-28
7Umunsi umwe ku isabato, Yezu anyura mu mirima y’ingano, abigishwa be batangira kugenda bazimamfuza. 24Abafarizayi ni ko kumubwira bati «Dore re ! Kuki bakora ibibujijwe ku isabato?» 25Arabasubiza ati «Ntimwasomye uko Dawudi yabigenjeje igihe ashonje akabura uko agira, we n’abo bari kumwe ? 26N’uko yinjiye mu Ngoro y’Imana mu gihe cy’Abiyatari umuherezabitambo mukuru, akarya imigati y’umumuriko atashoboraga kurya kuko yari igenewe abaherezabitambo bonyine, kandi akayihaho n’abari kumwe na we ?» 27Nuko Yezu arababwira ati «Isabato ibereyeho umuntu, nta bwo ari umuntu ubereyeho isabato ! 28Ni cyo gituma Umwana w’umuntu agenga ndetse n’isabato !»
Iyo ni Ivanjili Ntagatifu
KU CYUMWERU CYA 10 GISANZWE
ISOMO RYA MBERE
Isomo ryo mu gitabo cy’Intangiriro Intg 3, 9-15
Muntu yamaze gusuzugura Imana, 9maze Uhoraho Imana ara- muhamagara, aramubaza ati «Uri hehe ?» 10Undi arasubiza ati «Numvise ijwi ryawe mu busitani, ngira ubwoba kuko nambaye ubusa ndihisha.» 11Uhoraho Imana ati «Ni nde waguhishuriye ko wambaye ubusa ? Aho ntiwariye ku giti nari nakubujije kuryaho?» 12Muntu arasubiza ati «Umugore wanshyize iruhande ni we wampaye kuri cya giti ndarya.» 13Uhoraho Imana abwira umugore ati «Wakoze ibiki?» Umugore arasubiza ati «Inzoka yampenze ubwenge ndarya.» 14Uhoraho Imana abwira inzoka ati «Kuko wakoze ibyo, ubaye ruvumwa mu nyamaswa zose z’agasozi, uzakurura inda hasi maze urye umukungugu iminsi yose y’ukubaho kwawe. 15Nshyize inzigo hagati yawe n’umugore, hagati y’urubyaro rwawe n’urubyaro rwe ; ruzakujanjagura umutwe, nawe urukomeretse ku gatsinsino.»
Iryo ni Ijambo ry’Imana
ZABURI Zab 130 (129), 1-2, 3-4, 5-6ab, 7bc-8
Inyik/ Nyagasani ahorana imbabazi,
akagira ubuntu butagira urugero.
Uhoraho, ndagutakambira ngeze kure,
Uhoraho, umva ijwi ryanjye.
Utege amatwi ijwi ry’amaganya yanjye !
Uhoraho, uramutse witaye ku byaha byacu,
Nyagasani, ni nde warokoka ?
Ariko rero usanganywe imbabazi,
kugira ngo baguhoranire icyubahiro.
Nizeye Uhoraho n’umutima wanjye wose,
nizeye ijambo rye.
Umutima wanjye urarikiye Uhoraho,
kurusha uko umuraririzi ategereza umuseke.
Kuko Uhoraho ahorana imbabazi,
akagira ubuntu butagira urugero,
ni we uzakiza Israheli ibicumuro byayo byose.
ISOMO RYA KABIRI
Isomo ryo mu ibaruwa ya kabiri Mutagatifu Pawulo Intumwa yandikiye Abanyakorinti 2 Kor 4,13 - is ; 5,1
Bavandimwe, 4,13ubwo dushyigikiwe n’ukwemera kw’Ibyanditswe bivuga biti «Naremeye bintera kwamamaza», natwe turemera ikaba ari yo mpamvu twamamaza. 14Koko turabizi, Uwazuye Nyagasani Yezu natwe azatuzurana na We, kandi twese azatwakire iruhande rwe. 15Ibyo byose ni mwe bigirirwa kugira ngo musenderezwe ineza y’Imana, maze murusheho kuba benshi bashimira Imana bayihesha ikuzo. 16Ni cyo gituma tudacogora ; kabone n’ubwo umubiri ugenda uyonga, umutima wo wivugurura buri munsi. 17Kandi n’amagorwa yacu muri iki gihe gihita nta cyo adutwaye, uyagereranije n’ ikuzo adutegurira ry’akataraboneka kandi rizahoraho. 18Bityo tukaba tutarangamiye ibigaragara, ahubwo ibitagaragara, kuko ibigaragarira amaso bihitana n’igihe, naho ibitagaragara bigahoraho iteka. 5,1Tuzi neza ko uyu mubiri utubereye nk’icumbi kuri iyi si. Umunsi ryasenyutse tukazimukira mu ngoro ihoraho yo mu ijuru, itubatswe n’ukuboko k’umuntu, ahubwo yubatswe n’Imana.
Iryo ni Ijambo ry’Imana
IBANGONDIRIMBO RIBANZIRIZA IVANJILI Hish 12,10 ;
Yh 12,32
Alleluya Alleluya.
Ngiki igihe cy’ubucunguzi bw’Imana yacu n’ubutegetsi bwa Kristu wayo kirageze :
Umwana w’umuntu wererejwe ku musaraba, arareshya bose abiyegereza.
Alleluya.
IVANJILI
✠ Amagambo yo mu Ivanjili Ntagatifu uko yanditswe na
Mariko Mk 3, 20-35
Muri icyo gihe, Yezu n’abigishwa be 20bageze imuhira, abantu benshi bongera guterana bituma badashobora kugira icyo barya. 21Nuko bene wabo wa Yezu babyumvise baza kuhamuvana ; kuko bavugaga ngo «Yasaze !» 22N’abigishamategeko bari bavuye i Yeruzalemu baravugaga ngo «Yahanzweho na Belizebuli !», kandi ngo «Umutware wa roho mbi ni we yirukanisha roho mbi !» 23Nuko abakoranyiriza iruhande rwe, ababwirira mu migani ati «Sekibi yabasha ate kwiyirukana ? 24Ingoma yibyayemo amahari ntishobora gukomera. 25N’umuryango wabyaye amahari, na wo ntushobora gukomera. 26Niba rero Sekibi yirwanya akicamo ibice ntaba agikomeye, ake kaba kashobotse ! 27Kandi nta muntu ushobora kwinjira mu nzu y’umunyamaboko ngo asahure ibintu bye, ata- banje kuboha uwo munyamaboko, hanyuma ngo abone uko asahura inzu ye. 28Ndababwira ukuri, abana b’abantu bazakizwa ibyaha byose bakoze, ndetse n’ibitutsi batutse Imana. 29Nyamara uzaba yaratutse Roho Mutagatifu nta bwo azagirirwa imbabazi bibaho ; ahubwo azashinjwa igicumuro cye iteka.» 30Yezu yababwiye ibyo, abitewe n’uko bavugaga ngo «Yahanzweho na roho mbi.» 31Nyina wa Yezu n’abavandimwe be baraza bahagarara hanze, bamutumaho ngo aze babonane. 32Abantu benshi bakaba bicaye bamukikije. Baramubwira bati «Dore nyoko n’abavandimwe bawe bari hanze baragushaka.» 33Arabasubiza ati «Mama ni nde, n’abavandimwe banjye ni bande?» 34Nuko azengurutsa amaso mu bari bicaye bamukikije, aravuga ati «Dore mama, dore n’abavandimwe banjye. 35Umuntu wese ukora icyo Imana ishaka ni we muvandimwe wanjye, ni we mushiki wanjye kandi ni we mama.»
Iyo ni Ivanjili Ntagatifu
KU CYUMWERU CYA 11 GISANZWE
ISOMO RYA MBERE
Isomo ryo mu gitabo cy’Umuhanuzi Ezekiyeli Ezk 17, 22-24
22Dore Nyagasani Uhoraho aravuze ati «Nanjye nzafata ishami ryo mu bushorishori bw’isederi nini, mu mashami yo hejuru cyane nzacemo rimwe ritoshye, maze nditere jye ubwanjye ku musozi muremure kandi wirengeye. 23Nzaritera ku musozi muremure wa Israheli, na ryo rizakure rigabe amashami, rizere imbuto kandi ribe isederi itagira uko isa. Inyoni z’amoko yose zizayarikamo, ibisiga by’amoko yose bizugame mu mashami yayo. 24Bityo ibiti byose byo mu gasozi bizamenye ko ari jye Uhoraho ucisha bugufi igiti kirekire, ngashyira ejuru ikigufiya, ngatuma igiti gitoshye cyuma, n’icyumye gitoha. Ni jye Uhoraho ubivuze kandi nzabikora.»
Iryo ni Ijambo ry’Imana
ZABURI Zab 92 (91), 2-3,13-14,15-16
Inyik/ Nyagasani, ni byiza kugusingiza !
Ni byiza kugusingiza, Uhoraho,
no gucurangira Izina ryawe, Musumbabyose,
kwamamaza ineza yawe kuva mu gitondo,
n’ubudahemuka bwawe ijoro ryose.
Umuntu w’intungane yatumburutse nk’umukindo,
asagamba nka sederi yo muri Libani.
Ameze nk’igiti cyatewe mu Ngoro y’Uhoraho,
akisanzurira mu nkike z’Imana yacu.
No mu busaza bwe aba akera imbuto,
aba acyuzuyemo ubuzima n’ubutohagire,
kugira ngo yamamaze ko Uhoraho ari Umunyabutungane,
we Rutare rwanjye ntiyigiramo uburiganya.
ISOMO RYA KABIRI
Isomo ryo mu ibaruwa ya kabiri Mutagatifu Pawulo Intumwa yandikiye Abanyakorinti 2 Kor 5,6-10
Bavandimwe, 6n’ubwo ariko duhorana icyizere, tuzi neza ko igihe tuzaba dutuye muri uyu mubiri, tuzasa n’abari ishyanga kure ya Nyagasani. 7-Kuko ubu tugendera mu kwemera, tutayobowe n’uko tubona neza. - 8Koko duhorana icyizere bigatuma duhitamo kwimuka muri uyu mubiri, ngo twigire gutura iruhande rwa Nyagasani. 9Twaba muri uyu mubiri cyangwa twawimukamo, icyo tugambiriye ni uko tumushimisha. 10Kuko twese tuzahinguka imbere y’urukiko rwa Kristu, ngo buri wese ahabwe igikwiye ibyo yakoze akiri buzima bw’umubiri, byaba ibyiza cyangwa ibibi.
Iryo ni Ijambo ry’Imana
IBANGONDIRIMBO RIBANZIRIZA IVANJILI Mk 4, 26-34
Alleluya Alleluya.
Umubibyi yarasohotse ajya kubiba Inkuru Nziza.
Hahirwa abakira iyo Nkuru Nziza ikera imbuto nyinshi.
Alleluya.
IVANJILI
✠ Amagambo yo mu Ivanjili Ntagatifu uko yanditswe na
Mariko Mk 4, 26-34
Muri icyo gihe, Yezu abwira imbaga y’abantu mu migani ati 26«Iby’Ingoma y’Imana byagereranywa n’umuntu watera imbuto mu gitaka. 27Yasinzira cyangwa yaba maso, haba nijoro cyangwa ku manywa, izo mbuto ntizihwema kumera no gukura, we atazi uko bigenda. 28Igitaka ku bwacyo kibanza kumera ingemwe, hanyuma zikagengarara, hanyuma imbuto z’ingano zikuzura mu mahundo. 29Izo mbuto zamara kwera, ako kanya bakazitemesha urusaruzo kuko imyaka iba yeze.»
30Arongera ati «Iby’Ingoma y’Imana twabigereranya n’iki, cyangwa se twabivuga mu wuhe mugani ? 31Bimeze nk’imbuto ya sinapisi ibibwa mu gitaka, ari ntoya kurusha imbuto zose ziba ku isi ; 32ariko yamara kubibwa igakura ikaruta ibindi bihingwa byose, ikagira amashami manini bigatuma inyoni zo mu kirere ziza kwarika mu gicucu cyayo.» 33Nguko uko yabigishaga Ijambo ry’Imana abacira imigani myinshi, iringaniye n’ibyo bashoboraga kumva. 34Kandi ntiyigishaga adaciye imigani, ariko abigishwa be akabasobanurira byose biherereye.
Iyo ni Ivanjili Ntagatifu
KU CYUMWERU CYA 12 GISANZWE
ISOMO RYA MBERE
Isomo ryo mu gitabo cya Yobu Yobu 38,1.8-11
1Uhoraho asubiriza Yobu mu nkubi y’umuyaga agira ati 8«Ni nde wafatishije inyanja inkombe ebyiri igihe yapfupfunukaga mu nda y’isi ; 9maze nkayisesuraho ibicu, nkayikindikiza ibihu bibuditse ? 10Nayishingiye urubibi, nyitangiriza inkombe n’ibigomezo «ndavuga nti ‘Uzagarukira hano ntuzaharenga ; aha ni ho ingufu z’imivumba yawe zizacogorera’»
Iryo ni Ijambo ry’Imana
ZABURI Zab 107 (106), 21a.22a.24, 25-26a.27b, 28-29, 30-31
Inyik/ Nidushimire Uhoraho impuhwe ze,
n’ibitangaza akorera bene muntu.
Cyangwa : Alleluya.
Nibashimire rero Uhoraho impuhwe ze,
nibature ibitambo byo kumusingiza,
abo ngabo biboneye ibikorwa by’Uhoraho,
n’ibitangaza agaragariza mu ngeri y’inyanja.
Yavuze rimwe maze habyuka umuyaga w’inkubi,
ututumbisha ibitunda mu nyanja.
Nuko bakajya mu birere, hanyuma bagacubira ikuzimu,
ubuhanga bari basanganywe bukayoyoka.
Nuko batakambira Uhoraho mu mage barimo,
na we abakiza imibabaro yabo.
Wa muyaga w’inkubi awugaruramo ituze,
ibitunda by’inyanja birahwama.
Nuko bishimira ko ituze rigarutse,
maze Uhoraho abajyana mu mwaro bashakaga.
Nibashimire rero Uhoraho impuhwe ze,
n’ibitangaza akorera bene muntu !
ISOMO RYA KABIRI
Isomo ryo mu ibaruwa ya kabiri Mutagatifu Pawulo Intumwa yandikiye Abanyakorinti 2 Kor 5,14-17
Bavandimwe, 14urukundo rwa Kristu ruraduhihibikanya iyo tuzirikanye ukuntu umwe yapfiriye bose, bikaba rero ko bose bapfuye. 15Kandi koko yapfiriye bose, kugira ngo abariho bataberaho bo ubwabo, ahubwo babereho uwabapfiriye kandi akazukira kubakiza. 16Ni cyo gituma kuva ubu nta muntu n’umwe tukimenya ku buryo busanzwe ; ndetse na Kristu niba twarigeze kumumenya ku buryo bw’abantu, ubu ntitukimumenya dutyo. 17Bityo umuntu wese uri muri Kristu yabaye ikiremwa gishya. Ibishaje byarayoyotse, none ngaha byose bihindutse bishya.
Iryo ni Ijambo ry’Imana
IBANGONDIRIMBO RIBANZIRIZA IVANJILI Zab 66, 5; 29,3 ; 65,8
Alleluya Alleluya.
Nimuze mwirorere ibikorwa by’Imana :
ijwi ry’Uhoraho rihindiye hejuru y’amazi,
Uhoraho ahosheje urusaku rw’inyanja.
Alleluya.
IVANJILI
✠ Amagambo yo mu Ivanjili Ntagatifu uko yanditswe na
Mariko Mk 4, 35-41
Muri icyo gihe, Yezu yari yiriwe yigisha imbaga y’abantu avu- gira mu migani, 35umugoroba ukubye abwira abigishwa be ati «Twambuke dufate hakurya.» 36Nuko basiga rubanda aho, bamujyana muri bwa bwato yahozemo, andi mato aramukurikira. 37Ni bwo haje umuhengeri mwinshi, maze imivumba irenga ubwato butangira gusendera. 38Yezu we yari ku irango asinziriye ku musego. Bamukangura bamubwira bati 39«Mwigisha, nta cyo bigutwaye ko tugiye gushira ?» Nuko arakanguka akangara umuyaga, abwira inyanja ati «Ceceka ! Tuza !» Nuko umuyaga urahosha maze ituze riba ryose. 40Hanyuma arababwira ati «Icyabateye ubwo bwoba ni iki ? Mbese ntimuragira ukwemera?» 41Bagira ubwoba bwinshi barabazanya bati «Uyu yaba ari nde, wumvirwa n’umuyaga n’inyanja?»
Iyo ni Ivanjili Ntagatifu
KU CYUMWERU CYA 13 GISANZWE
ISOMO RYA MBERE
Isomo ryo mu gitabo cy’Ubuhanga Buh 1, 13-15 ; 2,23-24
1,13Imana si yo yaremye urupfu, ntinashimishwa n’ukurimbuka kw’ibiriho. 14Ahubwo yaremye byose ngo bikomeze kubaho, kandi ibyaremwe byo mu isi bigenerwa gutanga ubuzima. Nta burozi bwica bubirangwamo, n’ububasha bw’Ukuzimu ntibutegeka ku isi, 15kuko ubutabera budashobora gupfa. 2,23Koko rero Imana yaremeye muntu kudashanguka, imurema ari ishusho ryayo bwite ; 24nyamara kubera ishyari rya Sekibi, urupfu rwinjiye mu isi, bityo rwigarurira abamuyoboka !
Iryo ni Ijambo ry’Imana
ZABURI Zab 30 (29), 3-4, 5-6ab,6cd.l2,13
Inyik/ Ndakurata Uhoraho, kuko wampaye kwegura umutwe.
Uhoraho Mana yanjye,
naragutakiye maze urankiza.
Uhoraho, wanzamuye ikuzimu,
maze ungarurira kure nenda gupfa.
Nimucurangire Uhoraho mwebwe abayoboke be,
mumwogeze muririmba ubutungane bwe.
Kuko uburakari bwe butamara akanya,
naho ubutoneshe bwe bugahoraho iteka.
Ijoro ryose riba amarira gusa,
ariko igitondo kigatangaza impundu z’ibyishimo.
Nuko amaganya yanjye uherako uyahindura imbyino,
ikigunira nari nambaye ugisimbuza imyenda y’ibirori.
Ni yo mpamvu umutima wanjye uzakuririmba ubudatuza, Uhoraho Mana yanjye, nzagusingiza iteka ryose.
ISOMO RYA KABIRI
Isomo ryo mu ibaruwa ya kabiri Mutagatifu Pawulo Intumwa yandikiye Abanyakorinti 2 Kor 8, 7. 9.13-15
Bavandimwe, 7ubwo musanganywe ubukungahazwe muri byose, haba mu kwemera no mu kuvuga neza, mu bumenyi n’ishyaka muri byose ndetse no mu rukundo twabatoje, nimukataze no muri iyo ngabire yo kugira ubuntu. 9Musanzwe muzi ubugiraneza bw’Umwami wacu Yezu Kristu, We mukire wemeye kwigira umukene ari mwe abigirira, ngo abakungaharishe ubukene bwe. 13Si ukuvuga ko mugomba kwikokora ngo murarwana ku bandi, ahubwo muharanire kuringaniza. 14Kuri ubwo buryo icyo akarusho mutunze kizatabarure abari mu bwinazi ; maze umunsi umwe icyo na bo bazabarusha kizabatabare mu bukene bwanyu, mukomeze mutyo kuba magirirane. 15Koko byaranditswe ngo «Uwayoye byinshi nta cyo yarengejeho, n’uwayoye bike nta cyo yabuzeho.»
Iryo ni Ijambo ry’Imana
IBANGONDIRIMBO RIBANZIRIZA IVANJILI 2 Tim 1,10
Alleluya Alleluya.
Yezu Kristu Umukiza wacu yatsinze urupfu ;
maze atangaza ubugingo abigirishije Inkuru Nziza.
Alleluya.
IVANJILI (Isomo rirerire)
✠ Amagambo yo mu Ivanjili Ntagatifu uko yanditswe na
Mariko Mk 5, 21-43
Muri icyo gihe, 21 Yezu ngo amare kugera ku nkombe yo hakurya ari mu bwato, ikivunge cy’abantu kimuhombokaho bamusanga aho yari ahagaze ku nkombe y’inyanja. 22Ubwo rero haza umwe mu batware b’isengero, akitwa Yayiro. Abonye Yezu apfukama imbere ye, 23amutakambira akomeje ati «Umukobwa wanjye yarembye cyane; ngwino umuramburireho ibiganza akire, abeho.» 24Yezu ajyana na we, na cya kivunge cy’abantu kiramukurikira kimubyiganaho.
25Ubwo rero hakaba umugore wari urwaye indwara yo kuva amaraso, ayimaranye imyaka cumi n’ibiri. 26Yari yarahababariye cyane kubera abavuzi benshi, ahamarira ibintu bye byose ariko ntibyagira icyo bimumarira, ahubwo akarushaho kumererwa nabi. 27Uwo mugore rero yari yarumvise ibyo bavugaga kuri Yezu, aturuka inyuma ye mu kivunge cy’abantu, nuko akora ku myambaro ya Yezu. 28Yaribwiraga ati «Byibuze ninkora ku myambaro ye ndakira.» 29Akiyikoraho isoko y’amaraso irakama, maze yumva mu mubiri we akize icyo yari arwaye. 30Ako kanya Yezu yumva ko ububasha bumuvuyemo. Arahindukira abaza ikivunge cy’abantu ati «Ni nde ukoze ku myambaro yanjye?» 31Abigishwa be baramubwira bati «Urabona iki kivunge cy’abantu bakubyiga impande zose, maze ukavuga ngo ‘Ni nde unkozeho ?’» 32Nuko areba impande zose ngo amenye uwakoze ibyo. 33Umugore rero wari uzi ibyamubayeho, aza afite ubwoba kandi ahinda umushyitsi, amupfukama imbere amubwiza ukuri kose. 34Yezu aramubwira ati «Mwana wanjye, ukwemera kwawe kuragukijije. Genda amahoro kandi ukire indwara yawe.»
35Mu gihe akivuga ibyo haza abantu bavuye kwa wa mutware w’isengero, baramubwira bati «Umukobwa wawe amaze guca. Uraruhiriza iki kandi Umwigisha ?» 36Yezu aba yabumvise, abwira umutware w’isengero ati «Witinya ! Upfa kwemera gusa !» 37Nuko ntiyareka hagira undi umukurikira, uretse Petero na Yakobo, na Yohani murumuna wa Yakobo. 38Bageze mu rugo rw’umutware w’isengero, Yezu ahasanga urusaku rw’abantu bariraga bacura imiborogo. 39Ngo yinjire arababwira ati «Urwo rusaku n’ayo marira ni iby’iki ’? Umwana ntiyapfuye ahubwo arasinziriye.» 40Nuko baramuseka. Amaze guheza bose, ajyana na se na nyina b’umwana, n’abari kumwe na we, maze yinjira aho umwana yari ari. 41Nuko afata umwana ukuboko aramubwira ati «Talita kumi», bigasobanura ngo «Mukobwa, ndabikubwiye : haguruka !» 42Ako kanya umukobwa arahaguruka atangira kugenda, kuko yari afite imyaka cumi n’ibiri. Nuko ubwoba bwinshi burabataha bose. 43Abihanangiriza akomeje ngo ntihagire umuntu ubimenya, maze arababwira ngo bamugaburire.
Iyo ni Ivanjili Ntagatifu
IVANJILI (Isomo rigufi)
✠ Amagambo yo mu Ivanjili Ntagatifu uko yanditswe na Mariko Mk 5, 21-24. 35b-43
Muri icyo gihe, 2lYezu ngo amare kugera ku nkombe yo hakurya ari mu bwato, ikivunge cy’abantu kimuhombokaho bamusanga aho yari ahagaze ku nkombe y’inyanja. 22Ubwo rero haza umwe mu batware b’isengero, akitwa Yayiro. Abonye Yezu apfukama imbere ye, 23amutakambira akomeje ati «Umukobwa wanjye yarembye cyane; ngwino umuramburireho ibiganza akire, abeho.» 24Yezu ajyana na we, na cya kivunge cy’abantu kiramukurikira kimubyiganaho. 35bNuko haza abantu bavuye kwa wa mutware w’isengero, baramu-bwira bati «Umukobwa wawe amaze guca. Uraruhiriza iki kandi Umwigisha ?» 36 Yezu aba yabumvise, abwira umutware w’isengero ati «Witinya ! Upfa kwemera gusa !» 37Nuko ntiyareka hagira undi umukuriki- ra, uretse Petero na Yakobo, na Yohani murumuna wa Yakobo. 38Bageze mu rugo rw’umutware w’isengero, Yezu ahasanga urusaku rw’abantu bariraga bacura imiborogo. 39Ngo yinjire arababwira ati «Urwo rusaku n’ayo marira ni iby’iki ? Umwana ntiyapfuye ahubwo arasinziriye.» 40Nuko baramuseka. Amaze guheza bose, ajyana na se na nyina b’umwana n’abari kumwe na we, maze yinjira aho umwana yari ari. 41Nuko afata umwana ukuboko aramubwira ati «Talita kumi», bigasobanura ngo «Mukobwa, ndabikubwiye : haguruka !» 42Ako kanya umukobwa arahaguruka atangira kugenda, kuko yari afite imyaka cumi n’ibiri. Nuko ubwoba bwinshi burabataha bose. 43Abihanangiriza akomeje ngo ntihagire umuntu ubimenya, maze arababwira ngo bamugaburire.
Iyo ni Ivanjili Ntagatifu
KU CYUMWERU CYA 14 GISANZWE
ISOMO RYA MBERE
Isomo ryo mu gitabo cy’Umuhanuzi Ezekiyeli Ezk 2,2-5
2Ijwi numvaga rikivuga, umwuka unyinjiramo, utuma mpagarara maze numva uwamvugishaga. 3Arambwira ati «Mwana w’umuntu, ngutumye ku Bayisraheli, kuri ibyo birara byanyigometseho. Bo n’abasekuruza babo banyigometseho kugeza uyu munsi. 4Urwo rubyaro rufite umutwe ukomeye n’umutima unangiye ; ndugutumyeho ngo uzarubwire uti ‘Ni ko Nyagasani Uhoraho avuze.’ 5Bakumva cyangwa batakumva, kuko ari inyoko y’ibirara, ariko nibura bazamenya ko barimo umuhanuzi.»
Iryo ni Ijambo ry’Imana
ZABURI Zab 123 (122), l-2a, 2bcd, 3-4
Inyik/ Amaso yacu tuyahanze Uhoraho, dutegereje ko ari butugirire impuhwe.
Nubuye amaso ari wowe ndangamiye,
wowe uganje mu ijuru,
nk’uko abagaragu bahanga amaso
ibiganza bya shebuja.
Nk’uko umuja adakura amaso
ku kiganza cya nyirabuja,
ni na ko natwe amaso twayahanze
Uhoraho Imana yacu,
dutegereje ko ari butugirire impuhwe.
Tugirire impuhwe, Uhoraho, tugirire impuhwe,
kuko twahagijwe agashinyaguro !
Tumaze guhazwa agasuzuguro k’abirasi,
n’agashinyaguro k’abikuza.
ISOMO RYA KABIRI
Isomo ryo mu ibaruwa ya kabiri Mutagatifu Pawulo Intumwa yandikiye Abanyakorinti 2 Kor 12,7-10
Bavandimwe, 7kugira ngo ibintu bihanitse nahishuriwe bitante- ra kwirarika nashyizwe umugera mu mubiri, ari yo ntumwa ya Sekibi ngo ijye inkubita nirinde kwikuza. 8Ibyo byatumye nsaba Nyagasani gatatu kose ngo ayinkize. 9Maze aransubiza ati «Ingabire yanjye iraguhagije ; kuko ububasha bwanjye bwigaragariza cyane cyane mu banyantegenke.» Ni yo mpamvu mpisemo kwiratira mu ntege nke zanjye, kugira ngo ububasha bwa Kristu bunyituriremo. 10Bityo mpimbarirwe mu ntege nke zanjye, mu bitutsi, mu mage, mu bitotezo no mu ihagarikamutima mbigirira Kristu. Kuko igihe cyose mba mfite intege nke, ari bwo nyine mba nkomeye.
Iryo ni Ijambo ry’Imana
IBANGONDIRIMBO RIBANZIRIZA IVANJILI Lk 4,18
Alleluya Alleluya.
Nyagasani yohereje Yezu Umugaragu we,
kugira ngo ageze ku bakene Inkuru Nziza y’agakiza.
Alleluya.
IVANJILI
✠ Amagambo yo mu Ivanjili Ntagatifu uko yanditswe na
Mariko Mk 6, 1-6
Muri icyo gihe 1Yezu ajya mu karere k’iwabo, abigishwa be baramu-kurikira. 2Isabato igeze atangira kwigishiriza mu isengero. Abenshi ngo bamwumve baratangara cyane bati «Biriya avuga byose abikura he ? Buriya buhanga afite na biriya bitangaza akora, abikomora he ? 3Uriya si wa mubaji tuzi mwene Mariya ; akaba umuvandimwe wa Yakobo na Yozeto, na Yuda na Simoni ? Na bashiki be ntitubatunze ?» Ibyo bibabera intandaro yo kumwanga. 4Yezu arababwira ati «Nta handi umuhanuzi asuzugurwa uretse mu gihugu cye, muri bene wabo no mu rugo iwabo.» 5Ntiyashobora kuhakorera igitangaza na kimwe, uretse gukiza abarwayi bakeya abaramburiraho ibiga- nza. 6Maze atangazwa no kutemera kwabo. Yazengurukaga insisiro zihegereye yigisha.
Iyo ni Ivanjili Ntagatifu
KU CYUMWERU CYA 15 GISANZWE
ISOMO RYA MBERE
Isomo ryo mu gitabo cy’Umuhanuzi Amosi Am 7,12-15
Muri iyo minsi, 12Amasiya umuherezabitambo w’i Beteli abwira umuhanuzi Amosi ati «Ngaho genda wa mubonekerwa we, cika ujye mu gihugu cya Yuda ; ho uzashobora kwirwanaho no guhanura! 13Naho hano i Beteli ntuzongere kuhahanurira kuko ari ingoro y’umwami, urusengero rwa cyami !» 14Amosi asubiza Amasiya ati «Sinari umuhanuzi, sinari numwe mu itorero ry’abahanuzi ; nari umworozi ngakonora n’ibiti byera imbuto. 15 Nyamara Uhoraho yankuye inyuma y’amatungo, nuko arambwira ati ‘Genda uhanurire umuryango wanjye Israheli !’»
Iryo ni Ijambo ry’Imana
ZABURI Zab 85 (84), 9ab-10,11-12,13-14
Inyik/ Uhoraho, twereke impuhwe zawe kandi uduhe
agakiza kawe.
Ndashaka kumva icyo Uhoraho Imana avuze,
aravuga iby’amahoro y’umuryango we n’abayoboke be.
Koko ubuvunyi bwe buba hafi y’abamutinya,
kugira ngo ikuzo rye rigume mu gihugu cyacu.
Impuhwe n’ubudahemuka byarahuriranye,
ubutabera n’amahoro birahoberana.
Ubudahemuka buzamera busagambe ku isi,
maze ubutabera bubururukireho buva mu ijuru.
Uhoraho ubwe azabaha ihirwe,
maze isi yacu izarumbuke imbuto.
Ubutabera buzamugenda imbere,
n’intambwe ze zigaragaze inzira.
ISOMO RYA KABIRI (Isomo rirerire)
Isomo ryo mu ibaruwa Mutagatifu Pawulo Intumwa yandikiye Abanyefezi Ef 1, 3-14
3Nihasingizwe Imana Se w’Umwami wacu Yezu Kristu, Yo yadusakajemo imigisha y’amoko yose ituruka kuri Roho mu ijuru, ku bwa Kristu. 4Nguko uko yadutoreye muri We nyine mbere y’ihangwa ry’ibiriho byose, kugira ngo tuzayihore imbere mu rukundo turi intungane n’abaziranenge. 5Igena ityo mbere y’igihe ko tuzayibera abana yihitiyemo, tubikesheje Yezu Kristu. Uko ni ko yabyishakiye ku buntu bwayo,6 kugira ngo izahore isingirizwa ingabire yaduhereye ubuntu mu Mwana wayo w’Inkoramutima. 7Ni We dukesha ugucunguzwa amaraso ye, tukamuronkeramo imbabazi z’ibyaha byacu ku rugero rw’ubusendere bw’ineza yayo, 8ikaba yarabudusesekajemo ibigiranye ubuhanga n’ubumenyi bwose. 9Yaduhishuriye ibanga ry’ugushaka kwayo, wa mugambi wuje urugwiro yari yifitemo kuva kera 10ngo izawuzuze ibihe bigeze: umugambi wo gukoranyiriza ibintu byose ku Mutware umwe rukumbi Kristu, ari ibiri mu ijuru, ari n’ibiri ku isi. 11Ni we kandi twatorewemo, tugenwa mbere y’igihe ku buryo buhuye n’umugambi w’Ugenga byose, 12kugira ngo twebwe abashyize amizero muri Kristu tubonereho gusingiza ikuzo ryayo. 13Namwe rero aho mumariye kumvira ijambo ry’ukuri, ari yo Nkuru Nziza y’ugukizwa kwanyu, mukaryemera, ni We mukesha kuba mwarashyizweho ikimenyetso cya Roho Mutagatifu wasezeranywe, 14ari na We musogongero w’umugabane twagenewe, ubanziriza icungurwa ry’umuryango Imana yironkeye ngo ihore isingirizwa ikuzo ryayo.
Iryo ni Ijambo ry’Imana
ISOMO RYA KABIRI (Isomo rigufi)
Isomo ryo mu ibaruwa Mutagatifu Pawulo Intumwa yandikiye Abanyefezi Ef 1,3-10
3Nihasingizwe Imana Se w’Umwami wacu Yezu Kristu, Yo yadusa-kajemo imigisha y’amoko yose ituruka kuri Roho mu ijuru, ku bwa Kristu. 4Nguko uko yadutoreye muri We nyine mbere y’ihangwa ry’ibiriho byose, kugira ngo tuzayihore imbere mu rukundo turi intungane n’abaziranenge. 5Igena ityo mbere y’igihe ko tuzayibera abana yihitiyemo, tubikesheje Yezu Kristu. Uko ni ko yabyishakiye ku buntu bwayo, 6 kugira ngo izahore isingirizwa ingabire yaduhereye ubuntu mu Mwana wayo w’Inkoramutima. 7Ni We dukesha ugucunguzwa amaraso ye, tukamuronkeramo imbabazi z’ibyaha byacu ku rugero rw’ubusendere bw’ineza yayo, 8ikaba yarabudusesekajemo ibigiranye ubuhanga n’ubumenyi bwose. 9Yaduhishuriye ibanga ry’ugushaka kwayo, wa mugambi wuje urugwiro yari yifitemo kuva kera 10ngo izawuzuze ibihe bigeze: umugambi wo gukoranyiriza ibintu byose ku Mutware umwe rukumbi Kristu, ari ibiri mu ijuru, ari n’ibiri ku isi.
Iryo ni Ijambo ry’Imana
IBANGONDIRIMBO RIBANZIRIZA IVANJILI Zab 19 (18), 5
Alleluya Alleluya.
Ijambo ry’Imana riramamazwa ku isi hose,
n’Inkuru Nziza ikagera ku mpera z’isi.
Alleluya.
IVANJILI
✠ Amagambo yo mu Ivanjili Ntagatifu uko yanditswe na
Mariko Mk 6, 7-13
Muri icyo gihe, 7Yezu ahamagara ba bandi Cumi na babiri abo- hereza babiri babiri mu butumwa, abaha n’ububasha kuri roho mbi. 8Abategeka kutagira icyo bajyana mu rugendo, kereka inkoni yonyine ; nta mugati, nta ruhago, nta biceri mu mukandara, 9keretse kwambara inkweto z’urugendo, ariko ati «Ntimwambare amakanzu abiri.» 10Yungamo ati «Urugo muzinjiramo rwose muzarugumemo kugeza igihe muhaviriye. «Nimugera ahantu ntibabakire kandi ntibabumve, mujye muhava mubanje gukunguta umukungugu uri ku birenge byanyu, bibabere ikimenyetso kibashinja.» I2Nuko baragenda batangaza ko abantu bagomba kugarukira Imana. 13Birukana roho mbi nyinshi, kandi basiga abarwayi benshi amavuta barabakiza.
Iyo ni Ivanjili Ntagatifu
KU CYUMWERU CYA 16 GISANZWE
ISOMO RYA MBERE
Isomo ryo mu gitabo cy’Umuhanuzi Yeremiya Yer 23,1-6
1Baragowe abashumba batererana ubushyo bwanjye bukagwa mu rwuri ! Uwo ni Uhoraho ubivuze. 2None rero, Uhoraho Imana ya Israheli avuze atya ku bashumba baragiye umuryango wanjye: Ni mwebwe mwatereranye ubushyo bwanjye murabutatanya, ntimwabwitaho. Nyamara ariko jyewe - uwo ni Uhoraho ubivuze - ngiye kubahagurukira mbahanire ubugome bwanyu ! 3Jyewe nzakoranya ayarokotse mu mashyo yanjye, nyavane mu bihugu byose nayatatanyirijemo, nyagarure mu biraro byayo maze yororoke. 4Nzayashinga abashumba bayaragire ; kuva ubwo ntazongera kugira ubwoba cyangwa ngo akangarane, kandi nta na rimwe muri yo rizongera kuzimira - uwo ni Uhoraho ubivuze.
5Igihe kiregereje - uwo ni Uhoraho ubivuze - maze nzagoborere Dawudi umumero, umwuzukuruza w’indahemuka; azaza ari umwami ufite ubushishozi, kandi uharanira ubutabera n’ubutungane mu gihugu. 6Ku ngoma ye Yuda izarokorwa, maze Israheli iture mu mutekano. Izina azitwa ni iri : «Uhoraho ni we butabera bwacu.»
Iryo ni Ijambo ry’Imana
ZABURI Zab 23 (22), l-2a, 2b- 3,4, 5, 6
Inyik/ Uhoraho ni we mushumba wanjye, ntacyo nzabura.
Uhoraho ni we mushumba wanjye,
ntacyo nzabura !
Andagira mu rwuri rutoshye.
Anshora ku mariba y’amazi afutse,
maze akankomeza umutima.
Anyobora inzira y’ubutungane,
abigiriye kubahiriza izina rye.
N’aho nanyura mu manga yijimye,
nta cyankura umutima kuko uba uri kumwe nanjye,
inkoni yawe y’ubushumba intera ubugabo.
Imbere yanjye uhategura ameza,
abanzi banjye bareba.
Ukansiga amavuta mu mutwe,
inkongoro yanjye ukayisendereza.
Koko ineza n’urukundo byawe biramperekeza,
mu gihe cyose nzaba nkiriho.
Nanjye rero nzaza niturire mu Ngoro y’Uhoraho,
abe ari ho nibera iminsi yose.
ISOMO RYA KABIRI
Isomo ryo mu ibaruwa Mutagatifu Pawulo Intumwa yandikiye Abanyefezi Ef 2,13-18
Bavandimwe, 13ubu ngubu muri Yezu Kristu, mwebwe abari kure y’Imana kera mwigijwe bugufi yayo mubikesha amaraso ya Kristu. 14Koko rero ni We mahoro yacu ; Abayahudi n’abatari bo yabahurije mu muryango umwe, maze aca urwango rwabatandukanyaga rwari rumeze nk’urukuta ruri hagati yabo. 15Yakuyeho itegeko n’amabwiriza ariherekeza, kimwe n’imigenzo yabyo, kugira ngo bombi ari Umuyahudi ari n’utari we, abahindure umuntu umwe mushya muri We bityo agarure amahoro, 16maze bombi abagire umubiri umwe, abagorore n’Imana abigirishije umusaraba we, awutsembeshe inzangano zose. 17Yazanywe no kubamamazamo inkuru nziza y’amahoro, mwebwe mwari kure kimwe n’abari hafi. 18Ubu rero twese uko twari amoko abiri, tumukesha guhinguka imbere y’Imana Data tubumbwe na Roho umwe.
Iryo ni Ijambo ry’Imana
IBANGONDIRIMBO RIBANZIRIZA IVANJILI Yh 10,14-15
Alleluya Alleluya.
Yezu Umushumba mwiza, amenya intama ze na zo zikamumenya. Yemeye guhara ubugingo bwe abutangira intama ze.
Alleluya.
IVANJILI
✠ Amagambo yo mu Ivanjili Ntagatifu uko yanditswe na
Mariko Mk 6, 30-34
Muri icyo gihe, Intumwa zivuye mu butumwa bwazo ari na bwo bwa mbere 30ziteranira iruhande rwa Yezu, maze zimumenyesha ibyo zari zakoze byose n’ibyo zari zigishije byose.31 Nuko arazibwira ati «Nimuze ahitaruye hadatuwe, maze muruhuke gatoya.» Koko rero abazaga n’abagendaga bari benshi, bigatuma batabona n’umwanya wo kurya. 32 Nuko bajya mu bwato bambukira ahantu hadatuwe bagira ngo biherere. 33Abenshi mu bababonye bagenda barabamenya, nuko baza ku maguru baturuka mu migi yose bahirukira, ndetse barahabatanga. 34Yezu amaze kwambuka abona iyo mbaga nyamwi- nshi y’abantu, abagirira impuhwe kuko bari bameze nk’ intama zitagira umushumba, atangira kubigisha byinshi.
Iyo ni Ivanjili Ntagatifu
KU CYUMWERU CYA 17 GISANZWE
ISOMO RYA MBERE
Isomo ryo mu gitabo cya kabiri cy’Abami 2 Bami 4,42-44
Muri iyo minsi, mu gihugu hose hari harateye inzara, nuko 42haza umuntu aturutse i Behali-Shalisha, azanira Elisha umuntu w’Imana ibiryo by’umuganura : byari imigati makumyabiri y’ifu y’ingano, n’umufuka umwe wuzuye ingano zigisarurwa. Elisha aravuga ati «Nimubigaburire abantu barye !» 43Umugaragu we aramusubiza ati «Nashobora nte kubigaburira abantu ijana ?» Aramusubiza ati «Bibagaburire barye, kuko Uhoraho avuze ngo bazarya kandi basigaze !» 44 Umugaragu agaburira abantu, bararya kandi baranabisigaza nk’uko Uhoraho yari yabivuze.
Iryo ni Ijambo ry’Imana
ZABURI Zab 145 (144), 10-11,15-16,17-18
Inyik/ Nyagasani, ubumbura ikiganza cyawe,
maze twese ukaduhaza ibyiza.
Uhoraho, ibiremwa byawe byose nibijye bigushima,
abayoboke bawe bagusingize !
Bazarate ikuzo ry’Ingoma yawe,
batangaze ubushobozi bwawe.
Bose ni Wowe bahanga amaso bakwiringiye,
maze ukabaha icyo barya igihe kigeze.
Ubumbura ikiganza cyawe,
maze ibinyabuzima byose ukabihaza icyo byifuza.
Uhoraho ni umunyabutungane mu nzira ze zose,
akarangwa n’urukundo mu bikorwa bye byose.
Uhoraho aba hafi y’abamwiyambaza,
hafi y’abamwiyambaza babikuye ku mutima.
ISOMO RYA KABIRI
Isomo ryo mu ibaruwa Mutagatifu Pawulo Intumwa yandikiye Abanyefezi Ef 4,1-6
Bavandimwe, ‘ubu rero jyewe uri ku ngoyi nzira Nyagasani, ndabi-nginga ngo mugenze mu buryo bukwiranye n’ubutore bwanyu: 2nimubane mu rukundo, murangwe n’ubwiyoroshye, n’ituze, n’ubwiyumanganye, mwihanganirane muri byose, 3kandi mwihatire kugumana umutima umwe ubahuza mu mahoro. 4Nk’uko Umubiri ari umwe na Robo akaba umwe, ni na ko mwahamagariwe gusangira ukwizera kumwe. 5Nyagasani ni umwe, ukwemera ni kumwe, batisimu ni imwe, 6n’Imana ni imwe Yo Mubyeyi wa bose, usumba bose, agakorera muri bose kandi agatura muri bose.
Iryo ni Ijambo ry’Imana
IBANGONDIRIMBO RIBANZIRIZA IVANJILI Lk 7, 16
Alleluya Alleluya.
Umuhanuzi ukomeye yaduturutsemo,
kandi Imana yasuye umuryango wayo.
Alleluya.
IVANJILI
✠ Amagambo yo mu Ivanjili Ntagatifu uko yanditswe na
Yohani Yh 6,1-15
Muri icyo gibe, ‘Yezu ajya hakurya y’inyanja ya Galileya ari yo Tiberiya. 2Abantu benshi baramukurikira, bitewe n’uko babona- ga ibimenyetso yerekanaga akiza abarwayi. 3Nuko Yezu aterera umusozi, ageze mu mpinga aricara ari kumwe n’abigishwa be. 4Ubwo Pasika, umunsi mukuru w’Abayahudi yari yegereje.
5Yezu arambura amaso abona cya kivunge cy’abantu kije kimugana. Ni ko kubaza Filipo ati «Turagura he imigati yo kugaburira bariya bantu ?» 6Ibyo yabimubwiye amwinja kuko yari azi icyo ari bukore. Tilipo aramusubiza ati «N’uwagura imigati y’amadenari magana abiri, umuntu ntiyabonaho na kanzinya.» 8Umwe mu bigishwa be witwaga Andereya, mwene nyina wa Simoni Petero, aramubwira ati 9«Hano hari agahungu gafite imigati itanu y’ingano za bushoki n’amafi abiri, ariko se byamarira iki abantu bangana batya ?» 10Yezu ati «Nimwicaze abantu.» Aho hantu hari ibyatsi byinshi. Nuko baricara, abagabo bari nk’ibihumbi bitanu. nMaze Yezu afata imigati arashimira, ayigaburira abari bicaye aho, abaha n’ifi uko bazishakaga. 12Bamaze guhaga Yezu abwira abigishwa be ati «Nimurundarunde ibimanyu bisigaye ntihagire ibipfa ubusa.» 13Babishyira hamwe, maze buzuza inkangara cumi n’ebyiri z’ibimanyu kuri ya migati itanu y’ingano za bushoki, byashigajwe n’abari bariye. 14Abo bantu babonye ikimenyetso Yezu amaze gukora baravuga bati «Koko ni ukuri, uyu ni wa Muhanuzi ugomba kuza mu isi.» 15Yezu rero amenya ko bagiye kuza kumujyana ku mbaraga bakamwimika, arongera ahungira ku musozi ari wenyine.
Iyo ni Ivanjili Ntagatifu
KU CYUMWERU CYA 18 GISANZWE
ISOMO RYA MBERE
Isomo ryo mu gitabo cy’Iyimukamisiri Iyim 16,2-4.12-15
Igihe bari 2mu butayu, ikoraniro ryose ry’Abayisraheli ryito- tombera Musa na Aroni. 3Abayisraheli barababwira bati « Yewe ! Iyo byibura twicwa n’ukuboko k’Uhoraho tukiri mu gihugu cya Misiri, igihe twari twiyicariye iruhande rw’inkono z’inyama, twirira n’imigati uko dushaka ! Ubu mwatuzanye muri ubu butayu kugira ngo mwicishe inzara iyi mbaga yose!» 4Nuko Uhoraho abwira Musa ati «Dore ngiye kubagushaho nk’imvura umugati uturutse mu ijuru. Uko bukeye rubanda bazajya basohoka, batoragure ibyo bakeneye uwo munsi. Nzabagerageza ntyo, ndebe niba bazakurikiza amategeko yanjye cyangwa niba batazayakurikiza.
12Numvise umwijujuto w’Abayisraheli. Babwire uti ‘Nimugoroba mu kabwibwi murarya inyama; n’ejo mu gitondo muzahage umugati, maze mumenyereho ko ari jye Uhoraho Imana yanyu.’» 13Ngo bugorobe haduka inkware zigwa ari nyinshi mu ngando; na mu gitondo basanga mu mpande z’ingando hatonze ikime kibambitse. 14Icyo kime kimaze kweyuka, babona mu butayu utuntu tumeze nk’utubuto twererana nk’urubura ku butaka. 15Abayisraheli baritegereza maze barabazanya bati «Man hu», ari byo kuvuga ngo «Iki ni iki?» kuko batari bazi icyo ari cyo. Musa arababwira ati « Icyo ni umugati Uhoraho abahaye ngo murye. »
Iryo ni Ijambo ry’Imana
ZABURI Zab 78 (77), 3-4ac, 23-24, 25.52a.54a
Inyik/ Nyagasani, duhe umugati uturutse mu ijuru.
Ibyo twabwiwe kandi tumenyereye,
ibyo ba data batugejejeho,
natwe ntituzabihisha abana bacu,
ibyo bazakurizaho gusingiza Uhoraho.
Imana itegeka ibicu byo hejuru,
maze yugurura amarembo y’ijuru,
ibanyanyagizaho manu ngo barye,
ibaha ingano zo mu ijuru.
Muntu arya umugati w’abamalayika,
Imana iboherereza ibiribwa bibamaze ipfa.
Hanyuma ihagurutsa imbaga y’umuryango wayo,
maze ibinjiza mu gihugu cyayo gitagatifu.
ISOMO RYA KABIRI
Isomo ryo mu ibaruwa Mutagatifu Pawulo Intumwa yandikiye Abanyefezi Ef 4,17. 20-24
Bavandimwe, 17dore rero icyo mbabwira kandi mbashishikariza muri Nyagasani : ntimuzongere kugenza nk’abatazi Imana, bikurikirira ubupfu bwabo. 20Mwebweho si uko mwigishijwe kumenya Kristu : 21niba koko ari We mwabwiwe, niba ari We mwigishijwe kumenya, mukumva ibihuje n’ukuri kuganje muri Yezu. 22Mugomba rero guca ukubiri n’imibereho yanyu yo hambere, mukivanamo imigenzereze ya muntu w’igisazira ugenda yiyangiza mu byifuzo bibi bimuroha. 23Ahubwo nimuvugurure imitima yanyu hamwe n’ibitekerezo byanyu, 24muhinduke muntu mushya waremwe uko Imana ibishaka, mu budakemwa no mu butungane nyakuri.
Iryo ni Ijambo ry’Imana
IBANGONDIRIMBO RIBANZIRIZA IVANJILI Zab 78 (77), 24
Alleluya Alleluya.
Uhoraho yagaburiye umuryango we mu butayu,
awuha umugati uturutse mu ijuru.
Alleluya.
IVANJILI
✠ Amagambo yo mu Ivanjili Ntagatifu uko yanditswe na
Yohani Yh 6, 24-35
Muri icyo gihe, 24imbaga y’abantu ibonye ko Yezu n’abigishwa be batakiri ku nkombe y’inyanja, bajya mu mato bagana i Kafarinawumu kuhashakira Yezu. 25Bamusanze hakurya y’inyanja baramubaza bati «Mwigisha, wageze hano ryari?» 26Yezu arabasubiza ati «Ndababwira ukuri koko : ntimunshakira ko mwabonye ibimenyetso, ahubwo muranshakira ko mwariye imigati mugahaga. 27Nimujye mukora mudaharanira ibiribwa bishira, ahubwo nimuharanire ibiribwa bihoraho mu bugingo bw’iteka, ibyo Umwana w’umuntu azabaha kuko ari we Imana Data yashyizeho ikimenyetso.» 28Baramubaza bati «Twagenza dute kugira ngo dukore ibyo Imana ishima?» 29Yezu arabasubiza ati «Igikorwa Imana ishima, ni uko mwakwemera uwo yatumye.» 30Nuko baramubwira bati «Ikimenyetso utanze ni ikihe ngo tukibone maze tukwemere? Ukoze iki ? 31Mu butayu ba sogokuruza bacu bariye ‘manu’, nk’uko byanditswe ngo ‘Yabagaburiye umugati uturutse mu ijuru’.» 32Nuko Yezu arabasubiza ati «Ndababwira ukuri koko : Musa si we waba- haye umugati wo mu ijuru, ahubwo ni Data ubaha umugati w’ukuri wo mu ijuru. 33Kuko umugati Imana itanga ari umanuka mu ijuru kandi ukazanira isi ubugingo.» 34Nuko baramubwira bati «Mwigisha, jya uhora uduha uwo mugati utubwiye.» 35Yezu arababwira ati «Ni jyewe mugati utanga ubugingo. Unsanga wese ntazasonza bibaho, n’unyemera ntazagira inyota bibaho.»
Iyo ni Ivanjili Ntagatifu
KU CYUMWERU CYA 19 GISANZWE
ISOMO RYA MBERE
Isomo ryo mu gitabo cya mbere cy’Abami 1Bami 19, 4-8
Muri iyo minsi, umuhanuzi Eliya mu guhunga umwamikazi Yezabeli, 4agenda urugendo rw’umunsi umwe mu butayu. Ahageze yicara mu nsi y’igiti cyari cyonyine, yisabira gupfa agira ati «Nta cyo ngishoboye. None Uhoraho, akira ubuzima bwanjye kuko ntaruta abasokuruza banjye.» 5Nuko aryama mu nsi y’icyo giti cyari cyonyine, arasinzira. Umumalayika araza amukoraho amubwira ati «Byuka urye !» 6Aritegereza abona ku musego we umugati wavumbitswe mu mabuye ashyushye n’akabindi k’amazi; ararya, aranywa, hanyuma arongera araryama. 7Umumalayika w’Uhoraho aragaruka amukoraho maze aramubwira ati «Byuka urye kuko ugifite urugendo rurerure.» 8Eliya arahaguruka ararya kandi aranywa, hanyuma amaze kumva ahembutse, agenda iminsi mirongo ine n’amajoro mirongo ine kugera i Horebu, umusozi w’Imana.
Iryo ni Ijambo ry’Imana
ZABURI Zab 34 (33), 2-3,4-5, 6-7, 8-9
Inyik/ Nimushishoze maze mwumve ukuntu Uhoraho anogera umutima.
Nzashimira Uhoraho igihe cyose,
ibisingizo bye bizahora ubudahwema mu munwa wanjye.
Ishema mfite ryose ndikesha Uhoraho,
ab’intamenyekana nibabyumve maze bishime !
Nimwogeze Uhoraho hamwe nanjye,
twese hamwe turatire izina rye icyarimwe.
Nashakashatse Uhoraho aransubiza,
nuko ankiza ibyankuraga umutima byose.
Abamurangamira bahorana umucyo,
mu maso habo ntiharangwa ikimwaro.
Umunyabyago yaratabaje Uhoraho aramwumva,
maze amuzahura mu magorwa ye yose.
Umumalayika w’Uhoraho aca ingando
hafi y’abamutinya, akabagoboka.
Nimushishoze maze mwumve ukuntu Uhoraho anogera umutima, hahirwa umuntu abereye ubuhungiro !
ISOMO RYA KABIRI
Isomo ryo mu ibaruwa Mutagatifu Pawulo Intumwa yandikiye Abanyefezi Ef 4, 30-32 ; 5,1-2
Bavandimwe, 4,30muramenye ntimugashavuze Roho Mutagatifu w’Imana, wa wundi mwahawe ngo abe ikimenyetso kizabaranga ku munsi w’ukubohorwa kwanyu. 31Icyitwa ubwisharirize cyose numwaga, n’uburakari, n’intonganya, no gutukana, kimwe n’icyitwa ububisha cyose bicibwe muri mwe. 32Ahubwo nimugirirane ineza n’impuhwe, mubabarirane ibyaha nk’uko Imana yabababariye muri Kristu. 5,1Nimwigane rero Imana ubwo muri abana bayo ikunda ; 2mujye mukundana nk’uko Kristu yadukunze, maze ubwe akatwitangira aba igitambo n’ituro bimeze nk’umubavu uhumura neza, bigashimisha Imana.
Iryo ni Ijambo ry’Imana
IBANGONDIRIMBO RIBANZIRIZAIVANJILI Yh 6,51
Alleluya Alleluya.
Nyagasani Yezu, uri umugati muzima wamanutse mu ijuru,
urya uwo mugati azabaho iteka.
Alleluya.
IVANJILI
✠ Amagambo yo mu Ivanjili Ntagatifu uko yanditswe na
Yohani Yh 6, 41-51
Muri icyo gihe,41 Abayahudi barijujuta bitewe n’uko Yezu yari yavuze ati «Ndi umugati wamanutse mu ijuru.» 42 Maze baravuga bati «Uriya si Yezu mwene Yozefu ? Se na nyina ntitubazi ? Ubu ashobora ate kuvuga ati ‘Namanutse mu ijuru’?» 43Yezu arabasubiza ati «Nimureke kuvugana mwijujuta. 44Nta we ushobora kungeraho atabihawe na Data wanyohereje, nanjye nkazamuzura ku munsi w’imperuka. 45Mu gitabo cy’Abahanuzi haranditse ngo ‘Bose baziyigishirizwa n’Imana.’ Umuntu wese wumvise Data akigishwa aransanga. 46Nta wigeze abona Data uretse uwaturutse ku Mana; uwo nguwo ni we wabonye Data. 47Ndababwira ukuri koko : uwemera agira ubugingo bw’iteka. 48Ni jye mugati w’ubugingo. 49Ba sogokuruza banyu baririye manu mu butayu, maze bararenga barapfa. 50Nguyu umugati wamanutse mu ijuru, kugira ngo uwuriye wese ye kuzapfa. 51Ni jye mugati muzima wamanutse mu ijuru. Urya uwo mugati azabaho iteka ; kandi umugati nzatanga ni umubiri wanjye kugira ngo isi igire ubugingo.»
Iyo ni Ivanjili Ntagatifu
KU CYUMWERU CYA 20 GISANZWE
ISOMO RYA MBERE
Isomo ryo mu gitabo cy’Imigani Imig 9,1-6
1Ubuhanga bwubatse inzu yabwo, burayinogereza buteramo inkingi ndwi, 2bubaga amatungo yabwo, butegura divayi, maze ndetse butunganya ameza. 3Bwohereje abaja babwo, na bwo bwigira mu mpinga z’umugi burangurura ijwi bugira buti 4«Ushaka kujijuka nanyure hano !» Bubwira n’uw’igicucu buti 5«Nimuze murye ku mugati wanjye, munywe no kuri divayi nabateguriye. 6Nimureke ubupfayongo, muboneze inzira y’ubwenge maze muzabeho !»
Iryo ni Ijambo ry’Imana
ZABURI Zab 34 (33), 2-3,10-11,12-13,14-15
Inyik./ Nimushishoze maze mwumve ukuntu Uhoraho anogera
umutima.
Nzashimira Uhoraho igihe cyose,
ibisingizo bye bizahora ubudahwema mu munwa wanjye.
Ishema mfite ryose ndikesha Uhoraho,
ab’intamenyekana nibabyumve maze bishime !
Nimutinye Uhoraho mwebwe abo yitoreye,
kuko abamutinya nta cyo babura.
Abakire bageza aho bakena bagasonza,
naho abashakashaka Uhoraho nta cyo babura.
Bana banjye, nimuze muntege amatwi,
mureke mbigishe uko mutinya Uhoraho.
Ari hehe umuntu ukunda ubugingo,
akifuza guhirwa mu buzima bwe bwose ?
Ururimi rwawe rero urarurinde ikibi,
n’umunwa wawe uwurinde amazimwe.
Zibukira ikibi ukore ikiri cyiza ;
shaka amahoro abe ari yo uharanira.
ISOMO RYA KABIRI
Isomo ryo mu ibaruwa Mutagatifu Pawulo Intumwa yandikiye Abanyefezi Ef 5,15-20
Bavandimwe, 15nimwitondere imibereho yanyu, ntimube abapfayongo ahubwo mube abantu bashyira mu gaciro, 16bako- resha neza igihe barimo kuko iminsi ari mibi. 17Ntimukabe rero abapfu, ahubwo mwihatire kumenya icyo Nyagasani ashaka. 18Ntimugasindishwe na divayi kuko byabatera kwifata nabi, ahubwo nimwuzure Roho Mutagatifu. 19Nimufatanye kuvuga Zaburi, ibisingizo n’indirimbo mubwirijwe na Roho Mutagatifu ; muririmbe, mwogeze Nyagasani n’umutima wanyu wose. 20Igihe cyose no muri byose, mushimire Imana Data mu izina ry’Umwami wacu Yezu Kristu.
Iryo ni Ijambo ry’Imana
IBANGONDIRIMBO RIBANZIRIZA IVANJILI Zab 145 (144), 15
Alleluya Alleluya.
Bose ni wowe bahanga amaso bakwiringiye,
maze ukabaha icyo barya igihe kigeze :
Umubiri n’amaraso bya Ntama witanzeho igitambo.
Alleluya.
IVANJILI
✠ Amagambo yo mu Ivanjili Ntagatifu uko yanditswe na
Yohani Yh 6, 51-58.
Muri icyo gihe, Yezu abwira imbaga y’abantu ati 51 «Ni jye mugati muzima wamanutse mu ijuru. Urya uwo mugati azabaho iteka; kandi umugati nzatanga ni umubiri wanjye kugira ngo isi igire ubugingo.»
52Ni bwo Abayahudi batangiye kujya impaka ubwabo bati «Ashobora ate kuduha umubiri we ngo uribwe ?».53 Yezu arabasubiza ati «Ndababwira ukuri koko : nimutarya umubiri w’Umwana w’umuntu, ntimunywe n’amaraso ye, ntimuzagira ubugingo muri mwe. 54Naho urya umubiri wanjye, akanywa n’amaraso yanjye agira ubugingo bw’iteka, kandi nzamuzura ku munsi w’imperuka. 55Kuko umubiri wanjye ari ikiribwa koko, n’amaraso yanjye akaba ikinyobwa koko. 56Urya umubiri wanjye kandi akanywa amaraso yanjye, angumamo nanjye nkamugumamo. 57Mbese nk’uko Data wantumye ariho, nanjye nkabaho ku bwa Data, bityo undya na we azabaho ku bwanjye. 58Nguyu umugati wamanutse mu ijuru : si nk’uwo ba sogokuruza banyu bariye bakarenga bagapfa ; urya uyu mugati azabaho iteka ryose.»
Iyo ni Ivanjili Ntagatifu
KU CYUMWERU CYA 21 GISANZWE
ISOMO RYA MBERE
Isomo ryo mu gitabo cya Yozuwe Yoz 24, l-2a. 15-17.18b
Muri iyo minsi, 1 Yozuwe akoranyiriza imiryango ya Israheli yose i Sikemu maze ahamagaza abakuru ba Israheli, abatware, abacamanza, abayobozi b’imirimo ; baza imbere y’Imana. 2aYozuwe abwira rubanda rwose ati 15«Niba gukorera Uhoraho bitabashimishije, uyu munsi muhitemo uwo mushaka gukorera: byaba ibigirwamana ba so bayobotse bakiri hakurya y’Uruzi, cyangwa se iby’Abahemori mubereye mu gihugu. Naho jye n’inzu yanjye tuzakorera Uhoraho.»
16 Rubanda baramusubiza bati «Hehe n’igitekerezo cyo kwimura Uhoraho ngo dukorere ibigirwamana ! 17Uhoraho ni We Mana yacu, We watuvanye mu Misiri twe n’ababyeyi bacu, akatuvana mu nzu y’ubucakara, agakorera ibyo bimenyetso bikomeye mu maso yacu. Yaturwanyeho mu rugendo rurerure twakoze, no mu mahanga yose twagiye tunyuramo. 18bNatwe rero tuzakorera Uhoraho kuko ari We Mana yacu.»
Iryo ni Ijambo ry’Imana
ZABURI Zab 34 (33), 2-3,16-17, 20-21, 22-23
Inyik/ Nimushishoze maze mwumve ukuntu Uhoraho anogera umutima.
Nzashimira Uhoraho igihe cyose,
ibisingizo bye bizahora ubudahwema mu munwa wanjye.
Ishema mfite ryose ndikesha Uhoraho,
ab’intamenyekana nibabyumve maze bishime !
Amaso y’Uhoraho ayahoza ku bantu b’intungane,
amatwi ye agahora yitaye ku maganya yabo.
Uhoraho ashyamirana n’abagiranabi,
kugira ngo azimanganye ku isi icyatuma babibuka.
Intungane igira ibyago byinshi,
ariko buri gibe Uhoraho akabiyikiza.
Arinda umubiri wayo wose,
ntihagire igufwa ryayo na rimwe rivunika.
Nyamara icyago gihitana umugome,
abanga intungane bagahabwa igihano.
Uhoraho arengera amagara y’abayoboke be,
kandi nta n’umwe mu bamuhungiraho uzahabwa igihano.
ISOMO RYA KABIRI
Isomo ryo mu ibaruwa Mutagatifu Pawulo Intumwa yandikiye Abanyefezi Ef 5, 21-32
Bavandimwe,21 mujye mworoherana kubera igitinyiro mufitiye Kristu. 22Abagore borohere abagabo babo nk’aho babigirira Nyagasani ; 23koko rero umugabo agenga umugore we, nk’uko Kristu agenga Kiliziya akanayibera umutwe ukiza umubiri wose. 24Nk’uko rero Kiliziya yumvira Kristu, bityo n’abagore nibajye bumvira abagabo babo muri byose. 25Namwe bagabo, nimukunde abagore banyu nk’uko Kristu yakunze Kiliziya, maze akayitangira. 26Yarayitagatifuje, ayisukuza amazi n’ijambo ribiherekeza, 27kugira ngo ayihingutse imbere ye ibengerana, nta bwandu n’iminkanyari cyangwa indi nenge, ahubwo ari Kiliziya ntagatifu kandi itagira amakemwa. 28Nguko uko abagabo bagomba gukunda abagore babo, mbese nk’imibiri yabo bwite. Ukunda umugore we aba yikunze ubwe. 29Koko rero nta wigeze yanga umubiri we, ahubwo arawugaburira, akawitaho cyane mbese nk’uko na Kristu agenzereza Kiliziya. 30Muyobewe se ko turi ingingo z’umubiri we, (nk’uko Ibyanditswe bivuga ngo) 31 «Ni cyo gituma umugabo azasiga se na nyina, akifatanya n’umugore we, bakaba umubiri umwe». 32Iryo yobera rirakomeye, cyakora ibyo mbivuze nzirikana Kristu na Kiliziya.
Iryo ni Ijambo ry’Imana
IBANGONDIRIMBO RIBANZIRIZA IVANJILI Yh 6, 63. 68
Alleluya Alleluya.
Amagambo yawe Nyagasani,
aturuka kuri Roho kandi agatanga ubugingo.
Ni wowe ufite amagambo y’ubugingo bw’iteka.
Alleluya.
IVANJILI
✠ Amagambo yo mu Ivanjili Ntagatifu uko yanditswe na
Yohani Yh 6, 60-69
Muri icyo gihe, Yezu yari yavugiye mu isengero ry’i Kafarinawumu ati «Urya umubiri wanjye, akanywa n’amaraso yanjye, agira ubugingo bw’iteka.» 60Abenshi mu bigishwa be bamaze kumwumva baravuga bati «Aya magambo arahambaye, ni nde washobora kuyatega amatwi ?» 61Yezu amenya ko abigishwa be bijujutiye ayo magambo, arababwira ati «Mbese ibyo birabatsitaje ? 62Noneho ubwo hacura iki mubonye Umwana w’umuntu azamutse ajya aho yahoze mbere hose? 63Roho ni we ubeshaho, umubiri nta kavuro. Amagambo naba- bwiye aturuka kuri Roho kandi agatanga ubugingo. 64Ariko muri mwe harimo abatemera.» Koko Yezu yari azi mbere hose abatemera, ndetse yari azi n’uzamugambanira. 65Arongera ati «Ngiyo impamvu yatumye mbabwira ko ari nta we ushobora kunsanga atabihawe na Data.» 66Kuva ubwo benshi mu bigishwa be bavanamo akabo karenge, ntibongera kugendana na we ukundi. 67Nuko Yezu abwira ba Cumi na babiri ati «Namwe se murashaka kwigendera ?» 68Simoni Petero aramusubiza ati «Nyagasani, twasanga nde wundi ko ari wowe ufite amagambo y’ubugingo bw’iteka. 69Twe twaremeye kandi tuzi ko uri Intungane y’Imana.»
Iyo ni Ivanjili Ntagatifu
KU CYUMWERU CYA 22 GISANZWE
ISOMO RYA MBERE
Isomo ryo mu gitabo cy’Ivugururamategeko Ivug 4,1-2.6-8
Musa abwira imbaga y’Abayisraheli ati 1Israheli, umva amategeko n’imigenzo mbigisha ubwanjye gukurikiza, maze muzabone kubaho no kwinjira mu gihugu Uhoraho Imana y’abasokuruza banyu abahaye ngo mukigarurire. 2Ntimuzagire icyo mwongera ku magambo y’amategeko mbahaye, ntimuzagire n’icyo mugabanyaho, kugira ngo mukomeze amategeko y’Uhoraho Imana yanyu mbashyikirije. 6 Muzayakomereho muyakurikize ; ni cyo kizatuma muba abanyabwenge mu maso y’amahanga. Abazabwirwa iby’aya mategeko yose bazavuga bati ‘Nta kabuza, iri hanga rikomeye ritya rigomba kuba ari ary’abantu b’abanyabwenge kandi b’impuguke!’ 7 Koko se hari irindi hanga rikomeye ryagira imana ziriba hafi, nk’uko Uhoraho Imana yacu abigenza igihe cyose tumutabaje ? 8Ni irihe hanga rikomeye ryagira amategeko n’imigenzo biboneye nk’iri Tegeko mbagejejeho uyu munsi ?»
Iryo ni Ijambo ry’Imana
ZABURI Zab 15 (14), la-2, 3b-4a, 5
Inyik/ Koko uri hafi yacu Nyagasani,
dufashe kwibanira nawe.
Uhoraho, ni nde ukwiye kwinjira mu ngoro yawe?
Ni umuntu utajorwa mu mibereho ye,
agakurikiza ubutabera,
kandi akavugisha ukuri k’umutima we.
Ntagirira abandi nabi,
cyangwa ngo yihe gusebya mugenzi we.
Uwo muntu arebana agasuzuguro uwigize ruvumwa,
maze akubaha abatinya Uhoraho.
Iyo agurije undi ntamutegaho urwunguko,
ntiyemera ruswa ngo arenganye utacumuye.
Ugenza atyo wese azahora ari indatsimburwa.
ISOMO RYA KABIRI
Isomo ryo mu ibaruwa ya Mutagatifu Yakobo Intumwa
Yak 1,17-18. 21b-22. 27
Bavandimwe nkunda, 17icyitwa ingabire y’agaciro cyose n’ituro rishyitse iryo ari ryo ryose, bikomoka mu ijuru ku Mubyeyi w’urumuri, we udahinduka kandi ntatume habaho umwijima uturutse ku mihindagurike y’ibihe. 18Ni ku bwende bwe bwite yatwibyariye akoresheje ijambo rye ry’amanyakuri, kugira ngo tube imena mu biremwa bye.21b Nimwakirane urugwiro ijambo ryababibwemo kandi rishobora kubakiza. 22Mube abantu bagaragaza mu bikorwa ijambo ry’Imana, kuko kwishimira kuryumva byonyine ari ukwibeshya. 27Iyobokamana risukuye kandi ritagira amakemwa mu maso y’Imana Data ni iri ngiri : ni ugusura imfumbyi n’abapfakazi mu magorwa yabo, kwirinda ubwandu bwose bwo kuri iyi si kugira ngo ube umuziranenge.
Iryo ni Ijambo ry’Imana
IBANGONDIRIMBO RIBANZIRIZA IVANJILI 1 Sam 16, 7
Alleluya Alleluya.
Imana ntireba igihagararo nk’uko abantu babigenza,
ahubwo ireba umutima.
Alleluya.
IVANJILI
✠ Amagambo yo mu Ivanjili Ntagatifu uko yanditswe na
Mariko Mk 7,1-8.14-15. 21-23
Muri icyo gihe, 1 Abafarizayi na bamwe mu bigishamategeko bari baturutse i Yeruzalemu, bateranira iruhande rwa Yezu. 2Babona bamwe mu bigishwa be barisha intoki zanduye, ari byo kuvuga zidakarabye. 3Koko rero, Abafarizayi n’Abayahudi bose ntibarya batabanje gukaraba ibiganza kugeza ku nkokora, bakurikije akamenyero k’abakurambere, 4n’iyo bavuye mu materaniro ntibarya batabanje kwitera amazi. Hariho kandi n’indi migenzo myinshi bakurikiza by’akarande, nko koza ibikombe, ibibindi, n’amasahani... 5Nuko rero Abafarizayi n’abigishamategeko baramubaza bati «Ni iki gituma abigishwa bawe badakurikiza umuco w’abakurambere, bakarisha intoki zanduye ?» 6Arabasubiza ati «Izayi yabahanuye neza, mwa ndyarya mwe ! Nk’uko byanditswe ngo ‘Uyu muryango unyubahisha akarimi gusa, naho imitima yabo indi kure. 7Icyubahiro bampa ni amanjwe : inyigisho bigisha ni amategeko y’abantu gusa 8Murenga ku itegeko ry’Imana mukibanda ku muco w’abantu.»
14Yongera guhamagara rubanda arababwira ati «Nimutege amatwi mwese kandi munyumve neza ! 15Nta kintu kijya mu muntu giturutse inyuma kimuhumanya, ahubwo ikivuye mu muntu ni cyo kimuhumanya. 21 Kuko mu mutima w’abantu ari ho haturuka imigambi mibi : ubusambanyi, ubujura, ubwicanyi, 22ubuhabara, umururumba, ubugome, uburyarya, ingeso mbi, ishyari, gutukana, ubwirasi n’amafuti. 7Ibyo bintu byose bibi biva mu mutima ni byo bihumanya umuntu.»
Iyo ni Ivanjili Ntagatifu
KU CYUMWERU CYA 23 GISANZWE
ISOMO RYA MBERE
Isomo ryo mu gitabo cy’Umuhanuzi Izayi Iz 35,4-7a
4Nimubwire abakutse umutima muti «Nimukomere mwoye gutinya ; dore Imana yanyu. Ije guhora abanzi banyu, ni cyo gihembo cyanyu. Iraje ubwayo kubakiza.» 5Nuko impumyi zizabone, n’ibipfamatwi bizumve. 6Abacumbagira bazasimbuke nk’impara, n’iminwa y’ibiragi itere urwamo rw’ibyishimo. Ubutayu buzavubukamo amasoko, n’imigezi itembe ahantu h’amayaga. 7aUbutaka butwika buzahinduka ikiyaga, akarere kishwe n’inyota kavubukemo amasoko y’amazi.
ZABURI Zab 146 (145), 7, 8, 9ab-10bc
Inyik/ Nzasingiza Uhoraho mu buzima bwanjye bwose.
Uhoraho arenganura abapfa akarengane,
abashonji akabaha umugati,
Uhoraho abohora imfungwa.
Uhoraho ahumura amaso y’impumyi,
Uhoraho agorora ingingo z’abahinamiranye,
Uhoraho agakunda ab’intungane.
Uhoraho arengera abavamahanga,
agashyigikira imfubyi n’umupfakazi.
Uhoraho ni Imana yawe,
uko ibihe bigenda bisimburana iteka.
ISOMO RYA KABIRI
Isomo ryo mu ibaruwa ya Mutagatifu Yakobo Intumwa Yak 2,1-5
1Bavandimwe, ntimukitiranye kwikundira abantu bamwe n’ukwemera mufite muri Nyagasani Yezu Kristu wisesuyeho ikuzo. 2Koko rero niba mu ikoraniro ryanyu hinjiye umuntu ufite impeta za zahabu, wambaye neza cyane, hakinjira n’umukene wambaye imyenda y’ibishwangi, 3maze mukarangamira umuntu wambaye imyambaro myiza mukamubwira muti «Wowe icara muri uyu mwanya w’icyubahiro», naho umukene mukamubwira muti «Wowe hagarara hariya», cyangwa se «Wicare mu nsi y’akabaho nkandagizaho ibirenge byanjye», 4ubwo se ntimuba mwivanguye ubwanyu ? Ntimuba se mubaye abacamanza b’ibitekerezo bifutamye ? 5Nimwumve, bavandimwe nkunda ! Mbese nyine, Imana si Yo yahisemo abakene muri iyi si, kugira ngo babe abakungahazwe mu kwemera, n’abagenerwamurage b’Ingoma Imana yasezeranyije abayikunda ?
Iryo ni Ijambo ry’Imana
IBANGONDIRIMBO RIBANZIRIZA IVANJILI Mt 4,23
Alleluya Alleluya.
Yezu yatangazaga Inkuru Nziza y’lngoma,
kandi agakiza umuryango we icyitwa indwara n’ubumuga cyose.
Alleluya.
IVANJILI
✠ Amagambo yo mu Ivanjili Ntagatifu uko yanditswe na
Mariko Mk 7, 31-37
Muri icyo gihe, 31Yezu ava mu gihugu cya Tiri yambukiranya igihugu cya Sidoni, agaruka ku nyanja ya Galileya yerekeje kuri Dekapoli. 32Nuko bamuzanira igipfamatwi kidedemanga, baramwinginga ngo amuramburireho ibiganza. 33Amuvana muri rubanda amujyana ahitaruye, ashyira intoki ze mu matwi ye, nuko acira amacandwe ayamukoza ku rurimi. 34Hanyuma yubura amaso ayerekeje ku ijuru, asuhuza umutima ati «Efata», bikavuga ngo «Zibuka.» 35Ako kanya amatwi ye arazibuka n’ururimi rwe ruragobodoka, maze atangira kuvuga neza. 36Maze Yezu abihanangiriza kutagira uwo babibwira, nyamara uko abihanangiriza, akaba ari ko barushaho kubyamamaza. 37Bagatangara cyane bakavuga bati «Byose yabikoze neza ; atuma ibipfamatwi byumva n’ibiragi bivuga.»
Iyo ni Ivanjili Ntagatifu
KU CYUMWERU CYA 24 GISANZWE
ISOMO RYA MBERE
Isomo ryo mu gitabo cy’Umuhanuzi Izayi Iz 50,5-9a
Dore amagambo y’Umugaragu w’Imana : 5Nyagasani Uhoraho yanzibuye amatwi, nanjye sinabyangira ndetse sinatezuka. 6Nategeye umugongo abankubitaga, imisaya yanjye nyitegeza abamfuraga ubwanwa ; uruhanga rwanjye sinaruhisha abantukaga bancira mu maso. 7Cyakora Nyagasani Uhoraho arantabara, agatuma ibitutsi bitanca intege. Uruhanga rwanjye ndarukomeza nk’ibuye, kandi nzi ko ntazakorwa n’ikimwaro. 8None se ko undenganura ari hafi, ni nde watinyuka kumburanya ? Naze tujyane imbere y’umucamanza ! Ni nde uzanshinja mu rubanza ? Ngaho niyigaragaze maze anyegere ! 9aNi byo rwose Nyagasani Uhoraho arantabara, ni nde rero wanshinja icyaha ?
Iryo ni Ijambo ry’Imana
ZABURI Zab 116 (114-115), 1-2, 3ac-4, 5-6, 8ac-9
Inyik/ Nzakomeza gutunganira Uhoraho ku isi y’abazima.
Cyangwa : Alleluya.
Icyo nkundira Uhoraho,
ni uko yumva ijwi ryanjye iyo mutakambiye,
maze akunama akantega amatwi.
Mu buzima bwanjye bwose sinzareka kumwiyambaza.
Ingoyi z’urupfu zari zamboshye,
ishavu n’agahinda byari byanyishe,
maze niyambaza izina ry’Uhoraho,
nti «Uhoraho, kiza amagara yanjye!»
Uhoraho ni umunyampuhwe n’intarenganya,
koko Imana yacu ni Nyir’imbabazi !
Uhoraho aragira ab’intamenyekana,
nari umunyantege nke maze arantabara.
Ubwo amagara yanjye wayakuye mu nzara z’urupfu,
n’ibirenge byanjye ukabirinda gutsitara,
nzakomeza gutunganira Uhoraho ku isi y’abazima.
ISOMO RYA KABIRI
Isomo ryo mu ibaruwa ya Mutagatifu Yakobo Intumwa Yak 2,14-18
14Byaba byunguye iki se bavandimwe banjye, umuntu avuze ko afite ukwemera niba adafite ibikorwa ? Uko kwemera se gushobora kumukiza ?15Niba umuvandimwe wawe cyangwa mushiki wawe bambaye ubusa, cyangwa se badafite ibyo kurya bya buri munsi, l6maze muri mwe hakagira ubabwira ati «Nimugende amahoro, mwote kandi muryoherwe», atabahaye ibibatunga byaba bimaze iki ? 17Bityo rero n’ukwemera kutagira ibikorwa kuba kwarapfuye ubwako. 18Ariko wenda hagira uvuga ati «Wowe ufite ibikorwa, naho jye nkagira ukwemera !» Uwo nguwo namusubiza nti «Nyereka ukwemera kwawe kutagira ibikorwa, naho jye nkwereke ibikorwa bigaragaza ukwemera kwanjye.»
Iryo ni Ijambo ry’Imana
IBANGONDIRIMBO RIBANZIRIZA IVANJILI Gal 6,14
Alleluya Alleluya.
Nta kindi twakwiratana kitari umusaraba wa Nyagasani !
Ni wo iby’isi bimbambiweho, nanjye nkaba mbibambiweho. Alleluya.
IVANJILI
✠ Amagambo yo mu Ivanjili Ntagatifu uko yanditswe na
Mariko Mk 8, 27-35
Muri icyo gihe, 27 Yezu ajyana n’abigishwa be agana mu nsisiro za Kayizareya ya Filipo. Bakiri mu nzira abaza abigishwa be ati «Abantu bavuga ko ndi nde ?» “Baramusubiza bati «Ngo uri Yohani Batisita, abandi ngo uri Eliya ; naho abandi ngo uri umwe mu bahanuzi.» 29Ati «Mwebwe se muvuga ko ndi nde ?» Petero aramusubiza ati «Uri Kristu.» 30Nuko Yezu arabihanangiriza ngo ntibagire uwo babibwira.
31Nuko atangira kubigisha ko Umwana w’umuntu agomba kuzababara cyane, agacibwa n’abakuru b’imiryango, n’aba- herezabitambo bakuru, n’abigishamategeko, akicwa ariko akazazuka nyuma y’iminsi itatu. 32Ibyo yabibabwiye akomeje. Nuko Petero aramwihugikana atangira kumutonganya. 33We ariko arahindukira maze areba abigishwa be, acyaha Petero amubwira ati «Hoshi mva iruhande, Sekibi ! Kuko ibitekerezo byawe bitavuye ku Mana, ahubwo ku bantu !»
34Nuko ahamagara rubanda hamwe n’abigishwa be, arababwira ati «Niba hari ushaka kunkurikira yiyibagirwe ubwe, aheke umusaraba we maze ankurikire ! 35Kuko uzashaka gukiza ubugingo bwe azabubura, naho uzahara ubugingo bwe kubera jyewe n’Inkuru Nziza, azabukiza.»
Iyo ni Ivanjili Ntagatifu
KU CYUMWERU CYA 25 GISANZWE
ISOMO RYA MBERE
Isomo ryo mu gitabo cy’Ubuhanga Buh 2,12.17 -20
Abagome barabwirana bati 12 «Twibasire intungane kuko itubangamiye, ikarwanya ibikorwa byacu, ikanadushinja ko twarenze Amategeko, tugahemukira umuco mwiza badutoje. 17Nimureke turebe niba ibyo ivuga ari ukuri, dusuzume uko ibyayo bizarangira. 18Niba intungane ari umwana w’Imana koko, izayitabara iyigobotore mu nzara z’abanzi bayo. 19Tuyigeragereshe ibitutsi n’ibitotezo kugira ngo tumenye ubwiyumanganye bwayo, turebe n’ukwihangana kwayo. 20Nimureke tuyitange yicwe uruteye isoni kuko icyo gihe Imana izayihagararaho, dukurikije nanone uko ibyivugira.»
Iryo ni Ijambo ry’Imana
ZABURI Zab 54 (53), 3-4, 5.7b, 6.8
Inyik/ Nyagasani, banguka untabare,
wowe buvunyi bwanjye n’umukiza wanjye.
Mana yanjye, girira izina ryawe maze untabare,
koresha ububasha bwawe maze undenganure !
Rwose Mana yanjye, umva isengesho ryanjye,
utege amatwi amagambo nkubwira !
Kuko abanyamahanga bampagurukiye,
abanyarugomo bakaba bahigiye kunyica :
Imana ntibayitayeho na busa,
koresha ububasha bwawe maze ubatsembe !
None Imana ni yo intabaye,
Nyagasani ni we wenyine umbereye ikiramiro !
Nzagutura ibitambo mbikuye ku mutima,
Uhoraho, nzasingiza izina ryawe kuko ryuje ineza !
ISOMO RYA KABIRI
Isomo ryo mu ibaruwa ya Mutagatifu Yakobo Intumwa
Yak 3,16-18 ; 4,1-3
Bavandimwe, 3,16ahari ishyari n’ubucabiranya, haba umuvurungano n’ibikorwa bibi by’amoko yose. 17Naho ubuhanga bukomoka mu ijuru, icya mbere cyo ni ubuziranenge, ni ubunyamahoro, ni ubunyarugwiro n’ubunyampuhwe, bukaba busendereye ineza kandi bukarumbuka imbuto nziza, ntibugire aho bubogamira kandi ntibugire uburyarya. 18Imbuto y’ubutungane ibibwa mu mahoro, ku baharanira amahoro.
4.1Amakimbirane akomoka he ? Cyangwa se intambara muri mwe zituruka he ? Aho ibyo byose ntibyaba bituruka ku byifuzo byanyu, birwanira mu myanya y’umubiri wanyu ? 2Murararikira ariko ntimugire icyo mutunga ; muri abicanyi n’abanyeshyari nyamara nta cyo muronka ; murarwana kandi mukavurungana, ariko ntimugire icyo mugeraho kuko mutazi gusaba. 3Murasaba ariko ntimuronke, kuko ugusaba kwanyu nta kindi kugamije uretse gutagaguza ibyifuzo byanyu.
Iryo ni Ijambo ry’Imana
IBANGONDIRIMBO RIBANZIRIZA IVANJILI 2 Tes 2, 14
Alleluya Alleluya.
Mu kwamamaza Inkuru Nziza,
Imana iduhamagarira gusangira ikuzo
ry’Umwami wacu Yezu Kristu.
Alleluya.
IVANJILI
✠ Amagambo yo mu Ivanjili Ntagatifu uko yanditswe na
Mariko Mk 9, 30-37
Muri icyo gihe, Yezu n’abigishwa be 30bambukiranya Galileya, ariko Yezu ntiyashakaga ko babimenya. 31Yigishaga abigishwa be ababwira ati «Umwana w’umuntu agiye gushyirwa mu maboko y’abantu bakazamwica, ariko yamara gupfa akazazuka ku munsi wa gatatu.» 32Iryo jambo ariko ntibaryumva, batinya no kumubaza.
33Nuko bagera i Kafarinawumu. Bari mu nzu Yezu arababaza ati «Mu nzira mwajyaga impaka z’iki ?» 34Baraceceka kuko mu nzira bari bagiye impaka zo kumenya umukuru muri bo. 35Amaze kwicara ahamagara ba Cumi na babiri, arababwira ati «Ushaka kuba uwa mbere azigire uwa nyuma muri bose, abe n’umugaragu wa bose.» 36Nuko afata umwana amuhagarika hagati yabo, aramuhobera arababwira ati 37«Umuntu wese wakira umwana nk’uyu nguyu ari jye abigirira, ni jye aba yakiriye. Kandi unyakira wese si jyewe aba yakiriye, ahubwo aba yakiriye Uwantumye.»
Iyo ni Ivanjili Ntagatifu
KU CYUMWERU CYA 26 GISANZWE
ISOMO RYA MBERE
Isomo ryo mu gitabo cy’Ibarura Ibar 11, 25-29
Muri iyo minsi, 25 Uhoraho amanukira mu gacu avugisha Musa. Agabanyaho muke ku mwuka wari muri Musa kugira ngo awuhe ba bakuru mirongo irindwi b’imiryango. Wa mwuka ubagezemo batangira guhanura, ariko baza kurekeraho. 26Hari abagabo babiri Elidadi na Medadi, bari basigaye mu ngando. Bari mu murongo w’abagombaga guhabwa umwuka, uretse ko batari basohotse ngo bajye ku ihema ry’ibonaniro. Ariko na bo umwuka ubajyaho, nuko bahanurira mu ngando. 27Umwana w’umuhungu aza yiruka abwira Musa ati «Elidadi na Medadi barimo barahanurira mu ngando !» 28 Yozuwe mwene Nuni wari umufasha wa Musa ku va mu buto bwe, aravuga ati «Shobuja Musa, babuze !» 29Musa aramusubiza ati «Waba se wabagiriye ishyari kubera jyewe ? lyaba Uhoraho yarasakaje umwuka we ku muryango we wose, maze bose bagahinduka abahanuzi !»
Iryo ni Ijambo ry’Imana
ZABURI Zab 19 (18), 8,10,12-13,14
Inyik/ Amategeko y’Uhoraho anezereza umutima.
Itegeko ry’Uhoraho ni indakemwa,
rikaramira umutima.
Amabwiriza y’Uhoraho ni amanyakuri,
abacisha make akabungura ubwenge.
Igitinyiro cy’Uhoraho kiraboneye,
kigahoraho iteka ryose.
Ibyo Uhoraho yemeje ni amanyakuri,
byose biba bitunganye.
Ni cyo gituma umugaragu wawe abikesha kwitonda,
kubikurikiza bikamugirira akamaro.
Ni nde wamenya amakosa yose yokoze ?
Nyagasani, urangire umwere w’ibyaha ntiyiziho.
Urarinde umugaragu wawe abirasi,
ntibakangireho ububasha !
Ubwo rero nzaba intungane rwose,
n’umwere w’igicumuro gikomeye !
ISOMO RYA KABIRI
Isomo ryo mu ibaruwa ya Mutagatifu Yakobo Intumwa Yak 5,1-6
1Mwebwe abakungu nimurire, muboroge kubera amakuba abategereje ! 2Ubukungu bwanyu bwaraboze, imyambaro yanyu yaramunzwe ; 3zahabu yanyu na feza byaguye ingese kandi iyo ngese ni yo izabashinja, ikazatwika imibiri yanyu nk’umuriro. Ngaho mwihunikiye ubukungu muri iyi minsi y’indunduro ! 4Umushahara w’abakozi basaruye imyaka mu mirima yanyu mwarawubahuguje none ngaha uravuza induru, kandi n’imiborogo y’abo bakozi yageze mu matwi ya Nyagasani Umutegetsi w’ingabo. 5Kuri iyi si mwibereyeho mu murengwe no mu byishimo, kandi ku munsi batotezaga intungane ntimwaretse kugwa ivutu. 6Mwaciriye urubanza rubi intungane maze murayica, nyamara itabarwanyije.
Iryo ni Ijambo ry’Imana
IBANGONDIRIMBO RIBANZIRIZA IVANJILI Yh 17, 17
Alleluya Alleluya.
Nyagasani, Ijambo ryawe ni ukuri.
Dutagatifurize muri uko kuri :
Alleluya.
IVANJILI
✠ Amagambo yo mu Ivanjili Ntagatifu uko yanditswe na
Mariko Mk 9, 38-43.45.47-48
Muri icyo gihe, 38Yohani umwe muri ba Cumi na babiri abwira Yezu ati « Mwigisha, twabonye umuntu wirukana roho mbi mu izina ryawe kandi atadukurikira ; turabimubuza kuko atadukurikira.» 39Yezu ati «Mwibimubuza, kuko nta muntu ushobora gukora igitangaza mu izina ryanjye, maze ngo ahindukire amvuge nabi. 40Utaturwanya wese ari kumwe natwe. 41Umuntu wese uzabaha ikirahuri cy’amazi yo kunywa abitewe n’uko muri aba Kristu, ndababwira ukuri, ntazabura igihembo cye. 42Ariko nihagira ugusha mu cyaha umwe muri aba bato bemera, ikimukwiye ni uko bamuhambira ku ijosi urusyo rusheshwa n’indogobe, bakamuroha mu nyanja.
43Niba ikiganza cyawe kigutera gukora icyaha ugice, kuko ikiruta ari ukwinjirana akanimfu mu bugingo, aho kujyana ibiganza byawe byombi mu nyenga y’umuriro utazima. 45Niba ikirenge cyawe kigutera gukora icyaha ugice, kuko ikiruta ari ukwinjira mu bugingo ucumbagira, aho kurohwa mu nyenga ufite ibirenge bwawe byombi. 47Niba ijisho ryawe rigutera gukora icyaha rinoboremo; kuko ikiruta ari uko wakwinjirana rimwe mu Ngoma y’Imana, aho kwinjirana yombi mu nyenga, 48aho urunyo rudapfa n’umuriro ntuzime.»
Iyo ni Ivanjili Ntagatifu
KU CYUMWERU CYA 27 GISANZWE
ISOMO RYA MBERE
Isomo ryo mu gitabo cy’Intangiriro Intg 2,18-24
Mu ntangiriro, Uhoraho Imana amaze kurema isi n’ijuru 18aravuga ati «Si byiza ko Muntu aba wenyine, ngiye kumugenera umufasha bakwiranye.» 19Uhoraho Imana abumba mu gitaka inyamaswa zose zo mu ishyamba, n’inyoni zose zo mu kirere, azizanira Muntu ngo arebe uko Muntu azita amazina, maze ikinyabuzima cyose kigire izina cyiswe na we. 20Muntu yita amazina ibitungwa byose, n’inyoni zose zo mu kirere, n’inyamaswa zose zo mu ishyamba. Ariko Muntu ntiyabonamo umufasha bakwiranye. 21 Nuko Uhoraho Imana atera Muntu gusinzira ibitotsi bikomeye arasinzira ; afata rumwe mu mbavu ze maze asubiranya umubiri. 22Urwo rubavu Uhoraho Imana avanye mu mugabo akoramo umugore, umugore amushyira umugabo. 23Umugabo ariyamira aravuga ati «Noneho dore igufwa ryo mu magufwa yanjye, n’umubiri uvuye mu mubiri wanjye ; uyu azitwa umugore kuko mu mugabo ariho avuye.» 24Ni cyo gituma umugabo asiga se na nyina, akizirika ku mugore we bakaba umubiri umwe.
Iryo ni Ijambo ry’Imana
ZABURI Zab 128 (127), 1-2, 3,4.5ac.6a
Inyik/ Uhoraho araduhe umugisha,
iminsi yose y’ubugingo bwacu.
Hahirwa umuntu wese utinya Uhoraho,
agakurikiza inzira ze !
Uzatungwa n’ibivuye mu maboko yawe,
uzahirwe kandi byose bigutunganire.
Umugore wawe azamera nk’umuzabibu,
warumbukiye mu nzu yawe.
Abana bawe bazamera nk’ingemwe z’imitini,
zikikije ameza yawe.
Nguko uko ahabwa umugisha, umuntu utinya Uhoraho.
Uhoraho araguhere umugisha i Siyoni,
iminsi yose y’ubugingo bwawe,
maze uzabone abana b’abana bawe !
ISOMO RYA KABIRI
Isomo ryo mu ibaruwa yandikiwe Abahebureyi Heb 2,9-11
Bavandimwe, 9nyamara dore icyo tubona : Yezu uwo wagizwe muto ku bamalayika mu gihe kigufi, ubu kubera ko yababaye agapfa, tumubona atamirije ikamba ry’ikuzo n’icyubahiro. Bityo ku bw’ineza y’Imana, urupfu yigabije rwagiriye buri muntu akamaro. 10Mu by’ukuri byari bikwiye ko Imana, Yo irema byose ikabibeshaho, igira ikirenga Umwana wayo - ari we uburokorwe bwose buturukaho-, imunyujije mu bubabare ngo ibonereho kwigarurira abana batabarika basangira ikuzo ryayo. 11Koko rero utagatifuza n’abatagatifujwe basangiye inkomoko, bigatuma adashidikanya kubita abavandimwe.
Iryo ni Ijambo ry’Imana
IBANGONDIRIMBO RIBANZIRIZA IVANJILI 1 Yoh 4, 16
Alleluya Alleluya.
Imana ni urukundo :
niba duhorana urukundo tuguma mu Mana.
Alleluya.
IVANJILI (Isomo rirerire)
✠ Amagambo yo mu Ivanjili Ntagatifu uko yanditswe na
Mariko Mk 10, 2-16
Muri icyo gihe 2Abafarizayi begera Yezu, maze bamubaza niba umugabo afite uruhushya rwo gusenda umugore we, ariko bamwinja. 3Arababwira ati «Musa yabategetse iki ?» 4Baramusubiza bati «Musa yemereye umugabo kwandika icyemezo cyo gusenda umugore, akabona kumusezerera.» 5Yezu arababwira ati «Icyamuteye kwandika iryo tegeko, ni uko umutima wanyu unangiye. 6Naho mu ntangiriro y’isi, ‘Imana yaremye umugabo n’umugore ; 7ni yo mpamvu umugabo azasiga se na nyina, akifatanya n’umugore we, 8maze bombi bakaba umubiri umwe. Bityo ntibaba bakiri babiri, ahubwo baba ari umubiri umwe. 9Nuko rero ntihakagire umuntu utandukanya icyo Imana yafatanyije.» 10Basubiye imuhira, abigishwa bongera kumusobanuza ibyerekeye iyo ngingo. 11 Arababwira ati «Koko umugabo usenda umugore we akazana undi aba asambana ; 12umugore na we utandukana n’umugabo we agacyurwa n’undi, aba asambana.»
13Nuko bamuzanira abana bato ngo abakoreho, maze abigishwa barabakabukira.14 Yezu abibonye ararakara maze arababwira ati «Nimureke abana bansange, mwibabuza kuko Ingoma y’Imana ari iy’abameze nka bo. 15Ndababwira ukuri : umuntu wese utazakira Ingoma y’Imana nk’umwana, ntazayinjiramo bibaho.» 16Nuko arabahobera, abasabira umugisha abashyizeho ibiganza.
Iyo ni Ivanjili Ntagatifu
IVANJILI (Isomo rigufi)
✠ Amagambo yo mu Ivanjili Ntagatifu uko yanditswe na
Mariko Mk 10, 2-12
Muri icyo gihe 2Abafarizayi begera Yezu, maze bamubaza niba umugabo afite uruhushya rwo gusenda umugore we, ariko bamwinja. 3Arababwira ati «Musa yabategetse iki ?» 4Baramusubiza bati «Musa yemereye umugabo kwandika icyemezo cyo gusenda umugore, akabona kumusezerera.» 5Yezu arababwira ati «Icyamuteye kwandika iryo tegeko, ni uko umutima wanyu unangiye. 6Naho mu ntangiriro y’isi, ‘Imana yaremye umugabo n’umugore ; 7ni yo mpamvu umugabo azasiga se na nyina, akifatanya n’umugore we, 8maze bombi bakaba umubiri umwe. Bityo ntibaba bakiri babiri, ahubwo baba ari umubiri umwe. 9Nuko rero ntihakagire umuntu utandukanya icyo Imana yafatanyije.» 10Basubiye imuhira, abigishwa bongera kumusobanuza ibyerekeye iyo ngingo. «Arababwira ati «Koko umugabo usenda umugore we akazana undi aba asambana ; 12umugore na we utandukana n’umugabo we agacyurwa n’undi, aba asambana.»
Iyo ni Ivanjili Ntagatifu
KU CYUMWERU CYA 28 GISANZWE
ISOMO RYA MBERE
Isomo ryo mu gitabo cy’Ubuhanga Buh 7, 7-11
7Nasabye ubushishozi ndabuhabwa ; ndambaza maze umwuka w’Ubuhanga unzamo. 8Ni bwo nahisemo mbugurana inkoni n’intebe bya cyami, nsanga ubukungu nta cyo bumaze, ubugereranyije n’Ubuhanga. 9Siniruhije mbugereranya n’ibuye ry’agaciro, kuko zahabu y’isi yose ari nk’umusenyi ungana urwara, naho feza ikaba nk’icyondo uyigereranyije na bwo. 10Nabukunze kuruta ubuzima n’ubwiza bw’umubiri, kandi nabuhisemo bundutira urumuri, kuko icyezezi cyabwo kitagabanuka. 11Ariko kubana na bwo byanzaniye ibyiza byose icyarimwe, bwari bucigatiye mu biganza ubukungu butagira ingano.
Iryo ni Ijambo ry’Imana
ZABURI Zab 90 (89), 12-13,14-15,16-17
Inyik/ Nyagasani, utugwirize ineza yawe kugira ngo duhimbarwe.
Utwumvishe ko iminsi yacu ibaze,
bityo tuzagire umutima ushishoza.
Uhoraho, tugarukire ! Uzaturakarira na ryari ?
Babarira abagaragu bawe.
Utugwirize ineza yawe kuva mu gitondo,
kugira ngo duhimbarwe iminsi yose y’ubugingo bwacu
Udushimishe mu minsi ingana n’iyo waduhannyemo,
n’imyaka ingana n’iyo twababayemo !
Ibikorwa byawe nibigaragarire abagaragu bawe,
n’ubuhangare bwawe bwiyereke abana babo !
Nyagasani Mana yacu, utugaragarize ubugwaneza bwawe,
ukomeze imirimo y’amaboko yacu,
kandi uyihe kugira akamaro karambye !
ISOMO RYA KABIRI
Isomo ryo mu ibaruwa yandikiwe Abahebureyi Heb 4,12-13
Bavandimwe, 12koko Ijambo ry’Imana ni irinyabuzima, ni irinyabushobozi kandi riratyaye kurusha inkota y’amugi abiri. Riracengera kugeza aho umutima n’ubwenge bitandukanira, hagati y’ingingo n’imisokoro ; rigasobanura ibyifuzo n’ibitekerezo byihishe muri muntu. 13Nta kiremwa na kimwe kiribera intaboneka, ahubwo byose biratamuruye kandi biritaragaje mu maso y’Uwo tuzagomba kumurikira ibyacu.
Iryo ni Ijambo ry’Imana
IBANGONDIRIMBO RIBANZIRIZA IVANJILI Mt 5,3
Alleluya Alleluya.
Hahirwa abakene ku mutima, kuko Ingoma y’ijuru ari iyabo.
Alleluya.
IVANJILI (Isomo rirerire)
✠ Amagambo yo mu Ivanjili Ntagatifu uko yanditswe na
Mariko Mk 10,17-30
Muri icyo gihe, 17Yezu agihaguruka umuntu aza yiruka amu- pfukama imbere, aramubaza ati «Mwigisha mwiza, nkore iki kugira ngo nzabone ubugingo bw’iteka ho umurage ?» 18Yezu aramubwira ati «Kuki unyita mwiza ? Nta mwiza ubaho, keretse Imana yonyine. 19Uzi amategeko : ntuzice, ntuzasambane, ntuzibe, ntuzahamye ibinyoma, ntuzagirire abandi nabi, urajye wubaha so na nyoko.» 20Uwo muntu aramusubiza ati «Mwigisha, ibyo byose nabikurikije kuva mu buto bwanjye.» 21Yezu aramwitegereza yumva amukunze ; aramubwira ati «Ubuze ikintu kimwe gusa : genda ugurishe ibyo utunze ubihe abakene, uzagira ubukire mu ijuru, hanyuma uze unkurikire.» 22We ariko abyumvise arasuherwa, agenda ababaye kuko yari atunze ibintu byinshi.
23Nuko Yezu araranganya amaso, abwira abigishwa be ati «Mbega ukuntu kuzinjira mu Ngoma y’Imana biruhije ku bakungu !» 24Abigishwa batangazwa n’ayo magambo ; Yezu ariko abibasubiriramo ati «Bana banjye, mbega ukuntu biruhije kwinjira mu Ngoma y’Imana. 25Byoroheye ingamiya guca mu mwenge w’urushinge, kurusha uko byoroheye umukungu kwinjira mu Ngoma y’Imana !» 26Abigishwa barushaho gutangara barabazanya bati «Ubwo se ni nde ushobora kurokoka ?» 27Yezu arabitegereza maze arababwira ati «Ku bantu ntibishoboka, ariko ku Mana birashoboka kuko nta kinanira Imana.»
28Nuko Petero araterura, aramubwira ati «Dore twebwe twasize byose turagukurikira.» 29Yezu arasubiza ati «Ndababwira ukuri, nta we uzaba yarasize urugo, cyangwa abavandimwe be, cyangwa bashiki be, cyangwa nyina, cyangwa se, cyangwa abana, cyangwa isambu ye ari jye abigirira n’Inkuru Nziza, 30ngo abure kwiturwa karijana muri iki gihe, ari amazu, ari abavandimwe, ari na bashiki be, na ba nyina, n’abana n’amasambu, ariko n’ibitotezo bitabuze, kandi no mu gihe kizaza akaziturwa ubugingo bw’iteka.»
Iyo ni Ivanjili Ntagatifu
IVANJILI (Isomo rigufi)
✠ Amagambo yo mu Ivanjili Ntagatifu uko yanditswe na
Mariko Mk 10,17-27
Muri icyo gihe, 17 Yezu agihaguruka umuntu aza yiruka amupfukama imbere, aramubaza ati «Mwigisha mwiza, nkore iki kugira ngo nzabone ubugingo bw’iteka ho umurage ?» 18Yezu aramubwira ati «Kuki unyita mwiza ? Nta mwiza ubaho, keretse Imana yonyine. 19Uzi amategeko : ntuzice, ntuzasambane, ntuzibe, ntuzahamye ibinyoma, ntuzagirire abandi nabi, urajye wubaha so na nyoko.» 20Uwo muntu aramusubiza ati «Mwigisha, ibyo byose nabikurikije kuva mu buto bwanjye.» 21Yezu aramwitegereza yumva amukunze; aramubwira ati «Ubuze ikintu kimwe gusa : genda ugurishe ibyo utunze ubihe abakene, uzagira ubukire mu ijuru, hanyuma uze unkurikire.» 22We ariko abyumvise arasuherwa, agenda ababaye kuko yari atunze ibintu byinshi.
23Nuko Yezu araranganya amaso, abwira abigishwa be ati «Mbega ukuntu kuzinjira mu Ngoma y’Imana biruhije ku bakungu !» 24Abigishwa batangazwa n’ayo magambo ; Yezu ariko abibasubiriramo ati «Bana banjye, mbega ukuntu biruhije kwinjira mu Ngoma y’Imana. 25Byoroheye ingamiya guca mu mwenge w’urushinge, kurusha uko byoroheye umukungu kwinjira mu Ngoma y’Imana !» 26Abigishwa barushaho gutangara barabazanya bati «Ubwo se ni nde ushobora kurokoka ?» 27Yezu arabitegereza maze arababwira ati «Ku bantu ntibishoboka, ariko ku Mana birashoboka kuko nta kinanira Imana.»
Iyo ni Ivanjili Ntagatifu
KU CYUMWERU CYA 29 GISANZWE
ISOMO RYA MBERE
Isomo ryo mu gitabo cy’Umuhanuzi Izayi Iz 53,10-11
10 Uhoraho yashatse kujanjaguza Umugaragu we imibabaro, kandi namara gutura ubuzima bwe ho impongano z’ibyaha, azabona abamukomokaho, azarambe, maze azuzuze atyo umugambi w’Uhoraho. nNyuma y’iyo mibabaro yose azabona urumuri, azanezerwe ; namara kumenyekana ko ari intungane, azageza benshi ku butungane. Umugaragu wanjye azakiranura imbaga y’abantu, kuko yikoreye ubwe ibicumuro byabo.
Iryo ni Ijambo ry’Imana
ZABURI Zab 33 (32), 4-5,18-19, 20.22
Inyik/ Uhoraho, ineza yawe iraduhoreho,
nk’uko amizero yacu agushingiyeho.
Koko ijambo ry’Uhoraho ni intagorama,
n’ibikorwa bye byose bikaba indahinyuka.
Akunda ubutungane n’ubutabera,
isi yuzuye ineza y’Uhoraho.
Uhoraho aragira abamwubaha,
akita ku biringira impuhwe ze,
kugira ngo abakize urupfu,
anababesheho mu gihe cy’inzara.
Twebwe rero twizigiye Uhoraho,
ni we buvunyi wacu n’ingabo idukingira.
Uhoraho, ineza yawe iraduhoreho,
nk’uko amizero yacu agushingiyeho.
ISOMO RYA KABIRI
Isomo ryo mu ibaruwa yandikiwe Abahebureyi Heb 4,14-16
Bavandimwe, 14ubwo dufite Umuherezagitambo mukuru uhe- buje watashye mu ijuru, Yezu Umwana w’Imana, nitwikomeze- mo ukwemera. 15Koko rero ntidufite Umuherezagitambo mukuru wananirwa kudutabara mu ntege nke zacu ; yageragejwe muri byose ku buryo bumwe natwe, ariko ntiyatsindwa n’icyaha. 16Nitwegerane rero ubwizere intebe ya Nyir’ineza kugira ngo tugirirwe impuhwe, kandi duhabwe imbaraga zizadufasha igihe kigeze.
Iryo ni Ijambo ry’Imana
IBANGONDIRIMBO RIBANZIRIZA IVANJILI Mk 10, 45
Alleluya Alleluya.
Umwana w’umuntu yazanywe no gukorera abantu,
no gutanga ubugingo bwe ngo bube incungu ya benshi.
Alleluya.
IVANJILI (Isomo rirerire)
✠ Amagambo yo mu Ivanjili Ntagatifu uko yanditswe na
Mariko Mk 10, 35-45
Muri icyo gihe,35 Yakobo na Yohani bene Zebedeyi begera Yezu baramubwira bati «Mwigisha, turashaka ko udukorera icyo tugiye kugusaba.» 36Arababaza ati «Murashaka ko mbakorera iki ?» 37Baramusubiza bati «Uraduhe kuzicarana nawe, umwe iburyo, undi ibumoso mu ikuzo ryawe.» 38Yezu arababwira ati «Ntimuzi icyo musaba. Mushobora se kunywera ku nkongoro nzanyweraho, cyangwa se guhabwa batisimu nzahabwa ?»
39Baramusubiza bati «Turabishobora !» Yezu arababwira ati «Koko inkongoro nzanyweraho muzayinywesha, na batisimu nzahabwa muzayihabwa; 40naho ibyo kwicara iburyo bwanjye cyangwa ibumoso bwanjye si jye ubitanga ; bizahabwa ababigenewe.»
Abandi uko ari icumi babyumvise, batangira kurakarira Yakobo na Yohani. 42Yezu arabahamagara arababwira ati «Muzi ko abahawe kugenga amahanga bayagenga uko bashatse, kandi ko abatware bayo bayategekesha agahato. 43Kuri mwebwe rero si ko bimeze. Ahubwo ushaka kuba mukuru muri mwe, ajye yigira umugaragu wanyu, 44maze ushaka kuba uwa mbere, yihindure umucakara wa bose. 45Dore n’Umwana w’umuntu ntiyazanywe no gukorerwa, ahubwo yazanywe no gukorera abandi, no gutanga ubugingo bwe ngo bube incungu ya benshi.»
Iyo ni Ivanjili Ntagatifu
IVANJILI (Isomo rigufi)
✠ Amagambo yo mu Ivanjili Ntagatifu uko yanditswe na
Mariko Mk 10, 42-45
Muri icyo gihe, Yezu ahamagara abigishwa be arababwira ati 42«Muzi ko abahawe kugenga amahanga bayagenga uko bashatse, kandi ko abatware bayo bayategekesha agahato. 43Kuri mwebwe rero si ko bimeze. Ahubwo ushaka kuba mukuru muri mwe, ajye yigira umugaragu wanyu, 44maze ushaka kuba uwa mbere, yihindure umucakara wa bose. 45Dore n’Umwana w’umuntu ntiyazanywe no gukorerwa, ahubwo yazanywe no gukorera abandi, no gutanga ubugingo bwe ngo bube incungu y a benshi.»
Iyo ni Ivanjili Ntagatifu
KU CYUMWERU CYA 30 GISANZWE
ISOMO RYA MBERE
Isomo ryo mu gitabo cy’Umuhanuzi Yeremiya Yer 31,7-9
Uhoraho avuze atya : Nimuvugirize Yakobo impundu z’ibyishimo, nimwakirane amashyi y’urufaya umutware w’amahanga ! Nimwiyamire, mwishime mugira muti «Uhoraho yakijije umuryango we, agasigisigi ka Israheli !»
8Nzabavana mu gihugu cyo mu majyaruguru, mbakoranye mbakuye mu mpera z’isi. Muri bo hari impumyi, ibirema, abagore batwite n’abaramutswe, bose bagarutse hano ari imbaga nyamwinshi. 9Baje barira, bantakira ngo ‘Tubabarire’ ; maze mbajyana mu bibaya bitemba amazi, banyuze mu nzira iboneye, aho batazatsikira. Ni koko ndi umubyeyi wa Israheli, Efurayimu ni we buriza bwanjye.
Iryo ni Ijambo ry’Imana
ZABURI Zab 126 (125), l-2b, 2c-3,4-5, 6
Inyik/ Uhoraho yadukoreye ibintu by’agatangaza,
none twasazwe n’ibyishimo !
Igihe Uhoraho agaruye i Siyoni abari barajyanywe bunyago,
twabanje kugira ngo turi mu nzozi !
Ubwo umunwa wacu wuzura ibitwenge,
n’ururimi rwacu rutera Indirimbo z’ibyishimo.
Nuko mu mahanga bakavuga bati
«Uhoraho yabakoreye ibintu by’agatangaza !»
Koko Uhoraho yadukoreye ibintu by’agatangaza,
ni yo mpamvu twasazwe n’ibyishimo !
Uhoraho, cyura amahoro abacu bajyanywe bunyago,
ubazane nk’isumo y’amazi atembera mu butayu.
Ni koko, umuhinzi ubibana amarira,
asarurana ibyishimo.
Uko agiye agenda arira, yitwaje ikibibiro cy’imbuto.
Yagaruka akaza yishimye, yikoreye imiba y’umusaruro.
ISOMO RYA KABIRI
Isomo ryo mu ibaruwa yandikiwe Abahebureyi Heb 5,1-6
Bavandimwe, umuherezabitambo mukuru wese atorwa mu bantu, kandi agashyirirwaho gufasha abantu mu mubano wabo n’Imana; ashinzwe guhereza amaturo n’ibitambo bihongerera ibyaha. 2Ubwo na we ari umunyantege nke muri byinshi, ashobora kumva abatarasobanukirwa bagihuzagurika ; 3kandi nk’uko atambirira ibyaha by’imbaga, na we aboneraho guhongerera ibye bwite. 4Nta wiha ubwe bwite icyo cyubahiro, ahubwo gihabwa uwo Imana ibihamagariye kimwe na Aroni. 5Mbese nk’uko Kristu atihaye ubwe iryo kuzo ryo kuba Umuherezagitambo mukuru, ahubwo akaba yararihawe n’Uwamubwiye ati «Uri umwana wanjye, ni jye wakwibyariye uyu munsi» ; 6kimwe n’uko avuga ahandi ati «Uri umuherezagitambo iteka ryose, wo mu cyiciro cya Malekisedeki.»
Iryo ni Ijambo ry’Imana
IBANGONDIRIMBO RIBANZIRIZA IVANJILI Lk 1,68.79
Alleluya Alleluya.
Nihasingizwe Nyagasani Imana yacu :
abatuye mu mwijima yababengeranishijeho urumuri rwe.
Alleluya.
IVANJILI
✠ Amagambo yo mu Ivanjili Ntagatifu uko yanditswe na
Mariko Mk 10, 46b-52
Muri icyo gihe, 46bYezu agisohoka muri Yeriko ari kumwe n’abigishwa be n’imbaga y’abantu benshi, umuntu w’impumyi witwaga Baritimeyo mwene Timeyo, akaba yari yicaye iruhande rw’inzira asabiriza. 47Yumvise ko ari Yezu w’i Nazareti, atera hejuru ati «Yezu, Mwana wa Dawudi, mbabarira !» 48Benshi baramucyaha ngo aceceke, ariko we arushaho gusakuza ati «Mwana wa Dawudi, mbabarira !» 49Yezu arahagarara aravuga ati «Nimumuhamagare.» Bahamagara iyo mpumyi barayibwira bati «Humura, haguruka dore araguhamagaye.» 50Ajugunya igishura cye, ahaguruka bwangu asanga Yezu. 51Yezu aramubaza ati «Urashaka ko ngukorera iki?» Impumyi iramusubiza iti «Mwigisha, mpa kubona !» 52Yezu aramubwira ati «Genda, ukwemera kwawe kuragukijije.» Ako kanya arahumuka, maze akurikira Yezu.
Iyo ni Ivanjili Ntagatifu
KU CYUMWERU CYA 31 GISANZWE
ISOMO RYA MBERE
Isomo ryo mu gitabo cy’Ivugururamategeko Ivug 6,2-6
Muri iyo minsi, Musa abwira imbaga y’Abayisraheli ati 2«Utinye Uhoraho Imana yawe, ari wowe, ari umwana wawe, ari numwu-zukuru wawe, ubigire wubahiriza igihe cyose amategeko n’amabwi-riza nguhaye, kugira ngo uzabone kuramba. 3Israheli, tega amatwi kandi uzihatire kubikurikiza, bityo uzagira amahirwe kandi ni bwo muzagwira mube benshi cyane mu gihugu gitemba amata n’ubuki, nk’uko Uhoraho Imana y’abasokuruza bawe yabigusezeranyije. 4Israheli, tega amatwi ! Uhoraho Imana yacu ni we Nyagasani wenyine. 5Urakunde Uhoraho Imana yawe n’umutima wawe wose, n’amagara yawe yose, n’imbaraga zawe zose. 6Amategeko nguhaye uyu munsi araguhore ku mutima.»
Iryo ni Ijambo ry’Imana
ZABURI Zab 119 (118), 97.99,101-102,103-104,105-106
Inyik/ Uzakunde Nyagasani Imana yawe,
n’umutima wawe wose,
kugira ngo uzagire ubuzima.
Mbega ukuntu nkunda amategeko yawe !
Iminsi yose ndayazirikana.
Ubujijuke mburusha abarezi banjye bose,
kuko nakunze kuzirikana ibyemezo byawe.
Nanze gukurikira inzira zose z’ikibi,
kugira ngo nkomeze ijambo ryawe.
Ntabwo nacishije ukubiri n’amateka waciye,
kuko ari wowe uyantoza.
Mbega ngo amasezerano yawe arandyohera,
kurusha ubuki mu kanwa kanjye !
Amabwiriza yawe yampaye gusobanukirwa,
bituma nanga inzira zose z’ibinyoma.
Ijambo ryawe rimurikira intambwe zanjye,
rikaboneshereza inzira yanjye.
Narahiriye gukurikiza amateka atunganye waciye,
kandi ni na ko nzabikomeza.
ISOMO RYA KABIRI
Isomo ryo mu ibaruwa yandikiwe Abahebureyi Heb 7,23-28
Bavandimwe, mu Isezerano rya kera 23abaherezabitambo bakuri-kiranye ari benshi kuko urupfu rwabatwaraga; 24ariko We kuko ari uw’iteka ryose, ubuherezagitambo bwe ntibusimburanwaho. 25Ni cyo gituma ashobora kurokora burundu abamunyuraho bagana Imana, kuko abereyeho kubingingira iteka ryose.
26Uwo ni we koko muherezagitambo mukuru twari dukeneye w’intungane, w’umuziranenge, w’umuzirabwandu, utabarirwa mu banyabyaha, wakiriwe ahasumbye ijuru. 27Ntameze nk’abandi baherezabitambo bakuru bagomba gutamba buri munsi, bakabanza guhongerera ibyaha byabo bwite, bakabona guhongerera iby’imbaga; ibyo We yabigize rimwe rizima yitangaho igitambo ubwe. 7Abo Amategeko ashyiriraho kuba abaherezabitambo bakuru ni abanyantege nke, ariko Uwashyirishijweho indahiro yakuye Amategeko, ni Umwana w’Imana wuje ubutungane iteka ryose.
Iryo ni Ijambo ry’Imana
IBANGONDIRIMBO RIBANZIRIZA IVANJILI
Alleluya Alleluya.
Imana ni urukundo :
ukunda aba yarabyawe n’Imana kandi akayimenya.
Alleluya.
IVANJILI
✠ Amagambo yo mu Ivanjili Ntagatifu uko yanditswe na
Mariko Mk 12, 28b-34
Muri icyo gihe, 28umwe mu bigishamategeko yegera Yezu ara- mubaza ati « Itegeko riruta ayandi ni irihe ?» 29Yezu aramusubiza ati «Irya mbere ni iri ngiri : Tega amatwi Israheli, Nyagasani Imana yacu ni We Nyagasani umwe rukumbi : 30Urajye ukunda Nyagasani Imana yawe n’umutima wawe wose, n’amagara yawe yose, n’ubwenge bwawe bwose, n’imbaraga zawe zose. 31Irya kabiri na ryo ngiri : Urajye ukunda mugenzi wawe nk’uko wikunda. Nta rindi tegeko riruta ayo yombi.» 32Uwo mwigishamategeko aramubwira ati «Ni koko Mwigisha, uvuze ukuri ko Nyagasani ari umwe rukumbi, kandi nta yindi mana ibaho uretse Yo yonyine. 33Kandi kuyikunda n’umutima wawe wose, n’ubwenge bwawe bwose, n’imbaraga zawe zose, ugakunda mugenzi wawe nk’uko wikunda, ibyo biruta ibitambo n’amaturo byose.» 34Yezu yumvise ko amushubije neza, aramubwira ati «Nta bwo uri kure y’Ingoma y’Imana.» Nuko ntihagira utinyuka kongera kugira icyo amubaza.
Iyo ni Ivanjili Ntagatifu
KU CYUMWERU CYA 32 GISANZWE
ISOMO RYA MBERE
Isomo ryo mu gitabo cya mbere cy’Abami 1 Bami 17,10-16
Muri iyo minsi 10Eliya arahaguruka ajya i Sareputa, yinjira mu mugi. Ahasanga umugore w’umupfakazi watashyaga inkwi. Aramuhamagara maze aramubwira ati «Ndakwinginze, jya kunzanira amazi make muri urwo rweso kugira ngo nywe !» «Umugore ajya kuyazana. Eliya aramuhamagara maze aravuga ati «Ndakwinginze, unzanire n’agasate k’umugati.» 12Umugore aramusubiza ati «Ndahiye Uhoraho Nyir’ubuzima, Imana yawe! Nta ko mfite, usibye agafu ku rushyi nsigaranye kari mu kebo, n’utuvuta turi mu keso ; nimara gutora udukwi ndataha nkavugemo umutsima, jyewe n’umwana wanjye tuwurye, ahasigaye twipfire.» 13Eliya aramubwira ati «Wigira ubwoba ! Taha ubigenze uko ubivuze ; ariko ubanze umvugireho akanjye ukanzanire, maze ubone kwivugira akawe n’umwana wawe, 14kuko Uhoraho Imana ya Israheli avuze atya : Mu kebo ntihazaburamo ifu, amavuta yo mu keso ntazatuba, kugeza umunsi Uhoraho azagusha imvura ku butaka.» 15Umugore aragenda, agenza uko Eliya yabivuze ; amara iminsi afite icyo arya, we na Eliya n’urugo rwe. 16Mu kebo ntihaburamo ifu, n’amavuta yo mu keso ntiyatuba nk’uko Uhoraho yari yabivugishije Eliya.
Iryo ni Ijambo ry’Imana
ZABURI Zab 146 (145), 5-6a, 6c-7b, 8b-9a, 9b.l0
Inyik/ Nzasingiza Uhoraho mu buzima bwanjye bwose.
Hahirwa uwo Imana ya Yakobo ibereye umuvunyi,
maze akiringira gusa Uhoraho Imana ye,
We Muremyi w’ijuru n’isi.
Uhoraho ni mudahemuka iteka ryose,
arenganura abapfa akarengane,
abashonji akabaha umugati.
Uhoraho agorora ingingo z’abahinamiranye,
Uhoraho akunda ab’intungane,
Uhoraho arengera abavamahanga.
Uhoraho ashyigikira impfubyi n’umupfakazi,
ni nyir’ingoma ubuziraherezo,
akaba Imana yawe Siyoni,
uko ibihe bigenda bisimburana iteka.
ISOMO RYA KABIRI
Isomo ryo mu ibaruwa yandikiwe Abahebureyi Heb 9,24-28
Bavandimwe,24 Kristu ntiyinjiye mu ngoro yubatswe n’abantu yacaga amarenga y’Ingoro y’ukuri, ahubwo yatashye mu ijuru ubwaryo, kugira ngo aduhagararire ubu ngubu imbere y’Imana. 25Kandi ntiyagombaga kwitamba ubwe incuro nyinshi, nk’uko umuherezabitambo mukuru yinjiranaga buri mwaka ahatagatifu rwose amaraso atari aye. 26Iyo biba ibyo, Kristu aba yaragombye kubabara incuro nyinshi kuva isi ikiremwa. Mu by’ukuri yahingutse rimwe rizima ibihe byuzurijwe, kugira ngo icyaha agihanagurishe igitambo cye. 27Nk’uko kandi umuntu wese yagenewe gupfa rimwe rizima, nyuma agacirwa urubanza, 28ni na ko Kristu yatuwe ho igitambo rimwe rizima kugira ngo avaneho ibyaha by’abantu batabarika, nyuma akazaza ubwa kabiri bitagifite amahuriro n’icyaha, azaniye uburokorwe abamutegereje bose.
Iryo ni Ijambo ry’Imana
IBANGONDIRIMBO RIBANZIRIZA IVANJILI Mt 5, 3
Alleluya Alleluya.
Hahirwa abakene ku mutima, kuko Ingoma y’ijuru ari iyabo.
Alleluya.
IVANJILI (Isomo rirerire)
✠ Amagambo yo mu Ivanjili Ntagatifu uko yanditswe na
Mariko Mk 12, 38-44
Muri icyo gihe 7Yezu yigishaga avuga ati «Murajye mwirinda abigishamategeko, bakunda gutembera bambaye amakanzu maremare, no kuramukirizwa mu materaniro. 39Bakunda kandi guhabwa intebe z’icyubahiro mu masengero , n’imyanya y’imbere aho batumiwe. 40Icyabo ni ukurya ingo z’abapfakazi, maze bakiha kuvuga amasengesho y’urudaca. Abo bazacirwa urubanza rukaze kurusha abandi.»
41Yezu yari yicaye mu Ngoro y’Imana, ahateganye n’ububiko bashyiragamo amaturo, yitegereza uko rubanda batura. Abakungu benshi bashyiragamo byinshi. 42Maze haza umupfakazi w’umukene, ashyiramo uduceri tubiri. 43Yezu ahamagara abigishwa be arababwira ati «Ndababwira ukuri : Uriya mupfakazi w’umukene yarushije abandi bose gutura. 44Kuko bariya bose bashyizemo ku by’ikirenga, naho we yashyizemo ibyari bimutunze byose.»
Iyo ni Ivanjili Ntagatifu
IVANJILI (Isomo rigufi)
✠ Amagambo yo mu Ivanjili Ntagatifu uko yanditswe na
Mariko Mk 12,41-44
Muri icyo gihe, 41Yezu yari yicaye mu Ngoro y’Imana ahateganye n’ububiko bashyiragamo amaturo, yitegereza uko rubanda batura. Abakungu benshi bashyiragamo byinshi. 42Maze haza umupfakazi w’umukene, ashyiramo uduceri tubiri. 43Yezu ahamagara abigishwa be arababwira ati «Ndababwira ukuri : Uriya mupfakazi w’umukene yarushije abandi bose gutura. 44Kuko bariya bose bashyizemo ku by’ikirenga, naho we yashyizemo ibyari bimutunze byose.»
Iyo ni Ivanjili Ntagatifu
KU CYUMWERU CYA 33 GISANZWE
ISOMO RYA MBERE
Isomo ryo mu gitabo cy’Umuhanuzi Daniyeli Dan 12,1-3
Jyewe Daniyeli, dore ijambo numwise riturutse ku Uhoraho : 1Icyo gihe Mikayeli, Umutware mukuru urenganura abana b’umuryango wawe, azahaguruka. Kizaba ari igihe cy’amakuba atigeze kubaho ku va aho ihanga ribereyeho kugeza ubu. Icyo gihe kandi umuryango wawe uzarokoka, mbese abanditswe mu Gitabo cy’ubugingo bose. 2Abantu benshi basinziriye bari mu mukungugu w’ikuzimu, bamwe bakangukire guhabwa ubugingo buhoraho, abandi bakangukire gukozwa isoni n’ubucibwe bw’iteka ryose. 3Ababaye abahanga bazabengerana nk’ikirere cy’ijuru, n’abazaba baratoje ubutungane imbaga itabarika, bazabengerane nk’inyenyeri iteka ryose.
Iryo ni Ijambo ry’Imana
ZABURI Zab 16 (15) 5.8, 9-10, lb.ll
Inyik/ Mana yanjye, unyiragirire kuko ari wowe mizero yanjye.
Uhoraho, wowe munani wanjye n’umugabane wanjye,
uko nzamera ni wowe ukuzi.
Uhoraho mpora muzirikana ubudahwema,
ubwo andi iruhande sinteze guhungabana.
Ni cyo gituma umutima wanjye unezerewe,
amagara yanjye akamererwa neza,
n’umubiri wanjye ukadendeza mu ituze.
Kuko utazantererana ngo mpere ikuzimu,
kandi ukaba utazemera ko umuyoboke wawe agupfana.
Mana yanjye, ni wowe buhungiro bwanjye.
Uzamenyesha inzira y’ubugingo,
hafi yawe ni ho haba umunezero usendereye,
iburyo bwawe hakaba umudabagiro udashira.
ISOMO RYA KABIRI
Isomo ryo mu ibaruwa yandikiwe Abahebureyi Heb 10,11-14.18
Bavandimwe, mu Isezerano rya kera 11 umuherezabitambo wese yahoraga ahagaze ngo akore buri munsi imihango, atura kenshi ibitambo bihora ari bimwe kandi bidashobora kuvanaho ibyaha. 12Kristu We aho amariye guhereza igitambo rukumbi gihongerera ibyaha, «yicaye iburyo bw’Imana ubuziraherezo», 13akaba kuva ubwo ategereje ko «abanzi be bahindurwamo akabaho ko mu nsi y’ibirenge bye.» 14Ku bw’iryo turo rimwe rukumbi yagejeje ku butungane abo yiyemeje gutagatifuza. 18Bityo rero ahari ibabarirwa, ntihaba hagikeneye ibitambo byo guhongerera ibyaha.
Iryo ni Ijambo ry’Imana
IBANGONDIRIMBO RIBANZIRIZA IVANJILI Lk 21, 36
Alleluya Alleluya.
Murabe maso kandi musenge igihe cyose,
kugira ngo muzashobore gutunguka mu maso
y’Umwana w’umuntu.
Alleluya.
IVANJILI
✠ Amagambo yo mu Ivanjili Ntagatifu uko yanditswe na
Mariko Mk 13, 24-32
Muri icyo gihe, Yezu yabwiraga abigishwa be ibyerekeye amaza ye ati 24«Muri iyo minsi kandi, nyuma y’icyorezo izuba rizacura umwijima, ukwezi ntikuzamurika, 25inyenyeri zizahanuka ku ijuru maze ibikomeye byo mu ijuru bihungabane. 26Ni bwo bazabona Umwana w’umuntu aje mu bicu, afite ububasha bukomeye n’ikuzo ryinshi. 27Ubwo rero azohereza abamalayika mu mpande enye z’isi, aho isi iherera kugeza ku mpera y’ijuru, maze akoranye intore ze.
28Nimugereranye muhereye ku giti cy’umutini maze mwumve: iyo amashami yacyo amaze gutoha akameraho amababi, mumenyeraho ko igihe cy’imbuto cyegereje. 29Namwe rero nimubona ibyo bibaye, muzamenye ko Umwana w’umuntu ari hafi, ndetse ko ageze ku miryango yanyu. 30Ndababwira ukuri, iki gisekuru ntikizahita ibyo byose bitabaye. 31Ijuru n’isi bizashira, ariko amagambo yanjye nta bwo azashira. 32Nyamara uwo munsi cyangwa iyo saha nta we ubizi, habe n’abamalayika bo mu ijuru, habe ndetse na Mwana; bizwi n’Imana Data wenyine.»
Iyo ni Ivanjili Ntagatifu
KU CYUMWERU GIHERUKA IBY’IGIHE GISANZWE
(Icyumweru cya 34)
UMUNSI MUKURU WA NYAGASANI
YEZU KRISTU
UMWAMI W’IBIREMWA BYOSE
ISOMO RYA MBERE
Isomo ryo mu gitabo cy’Umuhanuzi Daniyeli Dan 7, 13-14
Jyewe Daniyeli, 13nijoro nariho nitegereza ibyo nabonaga: mbona uje mu bicu byo mu kirere umeze nk’Umwana w’umuntu. Ubwo yigira hafi ya wa Mukambwe, maze ajyanwa imbere ye. 14Nuko yegurirwa ingoma, icyubahiro n’ubwami ; imiryango yose, amahanga yose n’indimi zose biramuyoboka. Ubwami bwe ni ubwami buhoraho iteka ntibuzashira, n’ ingoma ye ni ingoma itazagira ikiyitsimbura.
Iryo ni Ijambo ry’Imana
ZABURI Zab 93 (92), lab, lc-2, 5
Inyik/ Nyagasani Yezu Kristu, uri Umwami uganje mu ikuzo.
Uhoraho ni Umwami, yisesuyeho ubuhangare,
Uhoraho yambaye ububasha, yarabukindikije.
Isi yarayishinze arayikomeza.
Intebe yawe y’ubwami yashinzwe ubutajegajega,
uriho kuva kera na kare.
Ibyo waduhishuriye ni amanyakuri,
Ingoro yawe ikwiranye n’ubutungane,
Uhoraho, uko ibihe bizahora bisimburana.
ISOMO RYA KABIRI
Isomo ryo mu gitabo cy’Ibyahishuriwe Yohani Intumwa
Hish 1, 5-8
Nimugire ineza n’amahoro 5bituruka kuri Yezu Kristu, umuhamya w’indahemuka, umuvukambere mu bapfuye, n’umugenga w’abami bo ku isi. Koko Kristu aradukunda ; yadukijije ibyaha akoresheje amaraso ye, 6maze atugira ihanga rya cyami n’abaherezabitambo, kugira ngo dukorere Imana Se. Naharirwe rero ikuzo n’ububasha, uko ibihe bihora bisimburana iteka ! Amen ! 7Nguyu araje rwagati mu bicu, maze icyitwa ijisho cyose kizamubone, ndetse n’abamuhinguranyije : imiryango yose y’isi izajya mu cyunamo ku mpamvu ye. Ni byo koko ! Amen !
8Ni jyewe Alufa na Omega, Intangiriro n’Iherezo, - uwo ni Nyagasani Imana ubivuga - Uriho, Uwahozeho kandi Ugiye kuza, Umushoborabyose.
Iryo ni Ijambo ry’Imana
IBANGONDIRIMBO RIBANZIRIZA IVANJILI Mk 11, 10
Alleluya Alleluya.
Hasingizwe Ingoma y’umubyeyi wacu Dawudi itugezeho !
Hasingizwe uje mu izina rya Nyagasani.
Alleluya.
IVANJILI
✠ Amagambo yo mu Ivanjili Ntagatifu uko yanditswe na
Yohani Yh 18, 33b-37
Yezu ageze imbere ya Pilato, aramubaza ati 33b«Mbese ni wowe mwami w’Abayahudi koko ?» 34Yezu aramusubiza ati «Ibyo ubivuze ku bwawe, cyangwa se ni abandi babikumbwiyeho ?» 35Pilato arasubiza ati «Aho ntugira ngo nanjye ndi Umuyahudi ? Bene wanyu n’abatware b’abaherezabitambo ni bo bakunzaniye; wakoze iki ?» 36Yezu arasubiza ati «Ingoma yanjye si iyo kuri iyi si ; iyo ingoma yanjye iza kuba iyo kuri iyi si, abantu banjye baba bandwanyeho kugira ngo ntagabizwa Abayahudi. None rero Ingoma yanjye si iy’ino aha.» 37Nuko Pilato aramubaza ati «Noneho rero uri umwami?» Yezu aramusubiza ati «Urabyivugiye : ndi umwami! Cyakora icyo jyewe navukiye kandi kikanzana ku isi, ni ukugira ngo mpamye ibyerekeye ukuri. Unyurwa n’ukuri wese yumva icyo mvuga.»
Iyo ni Ivanjili Ntagatifu
IMWE MU MINSI
MIKURU Y’INGENZI
ISHOBORA GUHIMBAZWA
NK’ICYUMWERU
KU WA 2 GASHYANTARE
YEZU ATURWA IMANA MU NGORO
ISOMO RYA MBERE
Isomo ryo mu gitabo cy’Umuhanuzi Malakiya Mal 3,1-4
Nyagasani Uhoraho aravuze ati 1«Ngaha ngiye kohereza intumwa yanjye kugira ngo intunganyirize inzira. Ni bwo Umutegetsi mushaka azaza mu Ngoro ye abatunguye ; koko rero Umumalayika w’isezerano mwifuza nguyu araje ! Uwo ni Uhoraho, Umugaba w’ingabo ubivuga.
2Ni nde uzihanganira umunsi azazaho ? Ni nde uzakomeza agahagarara igihe azigaragariza ? Azaba ameze nk’umuriro w’umucuzi cyangwa nk’isabune y’umumeshi. 3Azicara hamwe kugira ngo ashongeshe kandi asukure. Azasukura bene Levi, abayungurure nk’uko bagenzereza zahabu na feza, maze baze- gurirwe Uhoraho kugira ngo bamuhereze amaturo bakurikije amategeko. 4Ubwo rero amaturo ya Yuda n’aya Yeruzalemu azongera kunyura Uhoraho, mbese nko hambere mu myaka ya kera.»
Iryo ni Ijambo ry’Imana
ZABURI Zab 24 (23), 7, 8, 9,10
Inyik/ Ikuzo niriharirwe Umukiza uturutse ku Mana,
niriharirwe Uwoherejwe na Nyagasani.
Marembo nimwaguke,
namwe miryango ya kera na kare nimukinguke,
maze hinjire umwami wuje ikuzo !
Uwo mwami wuje ikuzo yaba ari nde ?
Ni Uhoraho, Umunyabubasha, Umudatsimburwa,
ni Uhoraho, Umudatsimburwa ku rugamba.
Marembo nimwaguke,
namwe miryango ya kera na kare nimukinguke,
maze hinjire umwami wuje ikuzo !
Uwo mwami wuje ikuzo yaba ari nde ?
Uhoraho, Umutegetsi w’ingabo,
ni we mwami wuje ikuzo.
ISOMO RYA KABIRI
Isomo ryo mu ibaruwa yandikiwe Abahebureyi Heb 2,14-18
Bavandimwe, l4ubwo abana bafitanye ubumwe bw’amaraso n’umubiri, Yezu na We yasangiye na bo ubwo bumwe, kugira ngo mu rupfu rwe atsiratsize umugenga warwo ari we Sekibi, 15maze abohore abatinyaga urupfu rubahoza mu bucakara, igihe cy’ubuzima bwabo bwose.
16Koko ntiyaje atabaye abamalayika, ahubwo yaje atabaye inkomoko ya Abrahamu. 17Kubera iyo mpamvu yagombaga kwishushanya n’abavandimwe be muri byose, akaba Umuherezagitambo Mukuru w’umunyampuhwe, kandi wishyikira ku Mana ngo ahanagure ibyaha by’imbaga. 18Ubwo we yababaye kandi akageragezwa, ashobora no gutabara abageragezwa.
Iryo ni Ijambo ry’Imana
IBANGONDIRIMBO RIBANZIRIZA IVANJILI Lk 2,32
Alleluya Alleluya.
Dore urumuri ruboneshereza abanyamahanga,
akaba ikuzo ry’umuryango wa Israheli.
Alleluya.
IVANJILI (Isomo rirerire)
✠ Amagambo yo mu Ivanjili Ntagatifu uko yanditswe na Luka
Lk 2, 22-40
Muri icyo gihe, 22umunsi w’isukurwa ryabo wategetswe na Musa uragera, ababyeyi ba Yezu bamujyana i Yeruzalemu kumutura Nyagasani, 23nk’uko byanditse mu itegeko rya Nyagasani ngo «Umuhungu wese w’imfura azaba intore y’umwihariko wa Nyagasani.» 24Bari bajyanywe kandi no gutura igitambo cy’intungura ebyiri cyangwa inuma ebyiri, bakurikije itegeko rya Nyagasani.
25Icyo gihe i Yeruzalemu hari umuntu witwaga Simewoni ; yari intungane kandi yubaha Imana. Yari ategereje ihumure rya Israheli, kandi Roho Mutagatifu yari amurimo. 26Byongeye Roho Mutagatifu yari yaramuhishuriye ko atazapfa, atabonye Kristu wa Nyagasani. 27Nuko Simewoni aza mu Ngoro abibwirijwe na Roho Mutagatifu. Igihe Ababyeyi b’Umwana Yezu bamuzanye ngo bamurangirizeho ibyategetswe, 28na we amwakira mu biganza bye, ashimira Imana avuga ati 29«Nyagasani, noneho sezerera umugaragu wawe mu mahoro nk’uko wabivuze ; 30kuko amaso yanjye yabonye agakiza kawe, 31wageneye imiryango yose. 32Ni we rumuri ruboneshereza abanyamahanga, akaba n’ikuzo ry’umuryango wawe Israheli !»
13Se na nyina batangazwaga n’ibyo bamuvugagaho. 7Nuko Simewoni arabashima, maze abwira Mariya nyina wa Yezu ati «Dore uyu nguyu yashyiriweho kubera benshi muri Israheli impamvu yo koroma cyangwa gukira, azaba n’ikimenyetso bazagiriraho impaka.
35Nawe kandi inkota izakwahuranya umutima. Bityo ibitekerezo biri mu mitima ya benshi bigaragare.»
36Hakaba n’umuhanuzikazi Ana, umukobwa wa Fanuweli wo mu muryango wa Azeri ; yari ageze mu zabukuru. Nyuma y’ubusugi bwe yamaranye n’umugabo we imyaka irindwi, 37hanyuma aba umupfakazi kugeza mu kigero cy’imyaka mirongo inani n’ine. Ntiyavaga mu Ngoro, agakorera Imana umunsi n’ijoro, asiba kurya kandi asenga. 38Nuko uwo mwanya na we arahagoboka atangira gusingiza Imana, no gutekerereza iby’uwo mwana abari bategereje ugukira kwa Yeruzalemu. 39Bamaze gutunganya ibyategetswe na Nyagasani, basubira mu Galileya mu mugi wabo wa Nazareti. 40Nuko umwana arakura, arakomera, abyirukana ubwenge, yuzuye ubwitonzi, afite n’ubutoni ku Mana.
Iyo ni Ivanjili Ntagatifu
IVANJILI (Isomo rigufi)
✠ Amagambo yo mu Ivanjili Ntagatifu uko yanditswe na
Luka Lk 2,22-32
Muri icyo gihe, 22umunsi w’isukurwa ryabo wategetswe na Musa uragera, ababyeyi ba Yezu bamujyana i Yeruzalemu kumutura Nyagasani, 23nk’uko byanditse mu itegeko rya Nyagasani ngo «Umuhungu wese w’imfura azaba intore y’umwihariko wa Nyagasani.» 24Bari bajyanywe kandi no gutura igitambo cy’intungura ebyiri cyangwa inuma ebyiri, bakurikije itegeko rya Nyagasani.
25Icyo gihe i Yeruzalemu hari umuntu witwaga Simewoni ; yari intungane kandi yubaha Imana. Yari ategereje ihumure rya Israheli, kandi Roho Mutagatifu yari amurimo. 26Byongeye Roho Mutagatifu yari yaramuhishuriye ko atazapfa, atabonye Kristu
wa Nyagasani. 27Nuko Simewoni aza mu Ngoro abibwirijwe na Roho Mutagatifu. Igihe Ababyeyi b’Umwana Yezu bamuzanye ngo bamurangirizeho ibyategetswe, 28na we amwakira mu biganza bye, ashimira Imana avuga ati 29«Nyagasani, noneho sezerera umugaragu wawe mu mahoro nk’uko wabivuze ; 30kuko amaso yanjye yabonye agakiza kawe, 31wageneye imiryango yose. 32Ni we rumuri ruboneshereza abanyamahanga, akaba n’ikuzo ry’umuryango wawe Israheli !»
Iyo ni Ivanjili Ntagatifu
KU WA 19 WERURWE
YOZEFU MUTAGATIFU
UMUGABO WA BIKIRA MARIYA
ISOMO RYA MBERE
Isomo ryo mu gitabo cya kabiri cya Samweli 2 Sam 7,4-5a. 12-14a. 16
4Ijambo ry’Uhoraho rigera ku muhanuzi Natani muri aya magambo ngo 5«Genda ubwire umugaragu wanjye Dawudi uti ‘Dore uko Uhoraho avuze : 12Igihe iminsi yawe izaba yarangiye, maze ukazaba uri kumwe n’abasokuruza bawe, nzakomeza inkomoko yawe inyuma yawe ; nzimika uzagukomokaho wowe ubwawe, kandi nkomeze ubwami bwe. 13Uwo ni we uzubakira Inzu izina ryanjye, kandi nzakomeza ingoma ye iteka ryose. 14Nzamubera umubyeyi na we ambere umwana. 16Inzu yawe n’ubwami bwawe bizahora imbere yanjye iteka, n’ ingoma yawe izakomere iteka ryose.’»
Iryo ni Ijambo ry’Imana
ZABURI Zab 89 (88), 2-3, 4-5, 27.29
Inyik / Mana, wowe udahemuka ku isezerano ryawe,
izina ryawe nirisingizwe.
Nzaririmba iteka ryose impuhwe z’Uhoraho,
kuva mu gisekuruza kujya mu kindi.
Umunwa wanjye nzawamamarisha ubudahemuka bwawe,
kuko wavuze uti «Impuhwe zashyizweho ubuziraherezo,
ubudahemuka bwanjye bushinze umuzi mu ijuru.
«Nagiranye isezerano n’intore yanjye,
nuko ndahira Dawudi umugaragu wanjye nti
‘Inkomoko yawe nyishyizeho ubuziraherezo,
kandi intebe yawe y’ubwami,
nzayikomeza kuva mu gisekuruza kujya mu kindi.’
«We azanyiyambaza agira ati ‘Uri Data,
uri Imana yanjye, uri urutare nkesha agakiza !’
Nzamukomereza impuhwe zanjye ubuziraherezo,
kandi iryo sezerano ntirizasubirwaho.»
ISOMO RYA KABIRI
Isomo ryo mu ibaruwa Mutagatifu Pawulo Intumwa yandikiye Abanyaroma Rom 4,13.16-18.22
Bavandimwe, 13koko rero nta bwo ari amategeko yatumye Abrahamu cyangwa urubyaro rwe basezeranywa guhabwa isi yose ho umurage, ahubwo ni ubutungane butangwa n’ukwemera. 16Ni yo mpamvu ari ku bw’ukwemera isezerano ryabaye ihame, ritangwa ku buntu rigenerwa urubyaro rwose, atari abishingikirije amategeko bonyine, ahubwo ndetse n’abishingikirije ukwemera kwa Abrahamu, we mubyeyi wacu twese 17nk’uko byanditswe ngo «Nakugize sekuru w’amahanga menshi.» Yemeye Imana, Yo isubiza ubuzima abapfuye, igaha kubaho ibitariho. 18Yizeye ibidashoboka nyamara aremera, maze aba atyo umubyeyi w’amahanga menshi bikurikije rya jambo ngo «Dore uko urubyaro rwawe ruzangana.» 22Ni yo mpamvu ibyo byatumye agirwa intungane.
Iryo ni Ijambo ry’Imana
IBANGONDIRIMBO RIBANZIRIZA IVANJILI Lk 12, 42
Alleluya Alleluya
Hahirwa umugaragu w’indahemuka :
Imana izamushinga urugo rwayo.
Alleluya
(Mu gisibo : Ikuzo n’ibisingizo ni ibyawe, Nyagasani Yezu.)
IVANJILI
✠ Amagambo yo mu Ivanjili Ntagatifu uko yanditswe na
Matayo Mt 1,16,18-21.24a
Muri icyo gihe, 16Yakobo abyara Yozefu umugabo wa Mariya , ari we wabyaye Yezu witwa Kristu.
18Dore uko Yezu Kristu yavutse. Nyina Mariya yari yarasabwe na Yozefu ; mu gihe batarabana aza gusama inda ku bubasha bwa Roho Mutagatifu. 19Yozefu, umugabo we wari intungane kandi utashakaga kumuteza urubwa, yigira inama yo kumusezerera rwihishwa. 20Igihe yari akibizirikana, Umumalayika wa Nyagasani amubonekera mu nzozi, aramubwira ati «Yozefu mwana wa Dawudi, witinya kuzana umugeni wawe Mariya, kuko yasamye ku bubasha bwa Roho Mutagatifu. 21Azabyara umwana uzamwite Yezu, kuko ari we uzakiza umuryango we ibyaha byawo.» 24aYozefu akangutse abigenza uko Umumalayika wa Nyagasani yamutegetse.
Iyo ni Ivanjili Ntagatifu
Cyangwa iyi ikurikira :
✠ Amagambo yo mu Ivanjili Ntagatifu uko yanditswe na Luka
Lk 2,41-51a
41Uko umwaka utashye, ababyeyi ba Yezu bajyaga i Yeruzalemu guhimbaza umunsi mukuru wa Pasika. 42Nuko umwana amaze imyaka cumi n’ibiri, bajyanayo uko babimenyereye ku munsi mukuru. 43Iminsi mikuru irangiye barataha, umwana Yezu asigara i Yeruzalemu ababyeyi be batabizi. 44Bagenda urugendo rw’umunsi wose, bakeka ko ari mu bo bagendanaga. Hanyuma bamushakira muri bene wabo no mu bamenyi. 45Bamubuze basubira i Yeruzalemu bamushaka. 46Hashize iminsi itatu bamusanga mu Ngoro yicaye hagati y’abigisha, abateze amatwi kandi abasiganuza. 47Abamwu- mvaga bose batangariraga ubwenge bwe n’amagambo yabasubizaga. 48Ababyeyi be bamubonye barumirwa, maze nyina aramubwira ati «Mwana wanjye, watugenje ute ? Jye na so twagushakanye umutima uhagaze.» 49Arabasubiza ati «Mwanshakiraga iki ? Muyobewe ko ngomba kuba mu Nzu ya Data ?» 50Bo ariko ntibasobanukirwa n’ibyo ababwiye. 51aNuko ajyana na bo i Nazareti, agahora abumvira.
Iyo ni Ivanjili Ntagatifu
KU WA 24 KAMENA
IVUKA RYA YOHANI BATISITA
MUTAGATIFU
MISA YO KU MUGOROBA UBANZIRIZA UMUNSI MUKURU
(Ku wa 23 Kamena)
ISOMO RYA MBERE
Isomo ryo mu gitabo cy’Umuhanuzi Yeremiya Yer 1, 4-10
4Uhoraho yambwiye iri jambo agira ati 5«Ntarakuremera mu nda ya nyoko nari nkuzi ; nakwitoreye utaravuka nkugira umuhanuzi w’amahanga.» 6Ubwo nanjye ndatakamba nti «Rwose Nyagasani Mana, sinashobora kuvuga dore ndacyari muto !» 7Nuko Uhoraho arambwira ati «Wivuga ngo ndacyari muto kuko aho nkohereza hose uzajyayo, kandi n’ibyo ngutuma byose ukazabivuga. 8Ntugire umuntu utinya, humura turi kumwe ndagutabara. Uwo ni Uhoraho ubivuze.» 9Uhoraho anyegereza ikiganza, ankora ku munwa maze arambwira ati «Dore nshyize amagambo yanjye mu kanwa kawe. 10Umenye ko uyu munsi nguhaye ububasha ku mahanga no ku bihugu byose, kugira ngo urandure kandi uhirike, utsembe kandi usenye, kugira ngo wubake kandi utere imbuto.»
Iryo ni Ijambo ry’Imana
ZABURI Zab 71 (70), 5-6b, 7-8,15ab.l7,19.6c
Inyik/ Mbere y’uko amaso yanjye abona izuba,
warandindaga.
Ni wowe mizero yanjye Nyagasani,
Uhoraho, ni wowe niringira kuva mu buto bwanjye.
Narakwisunze kuva nkivuka,
unyitorera nkiva mu nda ya mama.
Abenshi baketse ko wamvumye,
kandi ari wowe buhungiro bwanjye.
Umunwa wanjye wuzuye ibisingizo byawe,
iminsi yose ndirimba ikuzo ryawe.
Nzatangaza ukuntu uri indahemuka,
iminsi yose namamaze agakiza kawe.
Mana, wanyiyigishir’ije kuva mu buto bwanjye,
na n’ubu ndacyarata ibyiza byawe.
Mana, ubudahemuka bwawe burahebuje,
wowe wakoze ibintu by’agatangaza,
Mana, ni nde uhwanye na we ?
Ni cyo gituma nzahora ngusingiza.
ISOMO RYA KABIRI
Isomo ryo mu ibaruwa ya mbere ya Mutagatifu Petero Intumwa. 1 Pet 1, 8-12a
Bavandimwe, 8koko Yezu Kristu ni We mukunda mutamurora, mukamwemera mutarigeze mumubona ; akaba ari na cyo gituma mwasazwe n’ibyishimo bitagira ivugiro kandi by’agatangaza, 9kuko mwashyikiriye igihembo cy’ukwemera kwanyu, ari cyo umukiro wanyu. 10Iby’uwo mukiro abahanuzi bagerageje kubikurikirana no kubisobanuza, maze bahanura ibyerekeye ineza mwari mugiye kugirirwa n’Imana. 11Bashakashakaga uko batahura igihe n’uburyo ibyo bari bumvishijwe na Roho wa Kristu wari ubarimo bizabera, nk’ibyerekeye ububabare Kristu yagombaga kubabara, hamwe n’ikuzo rizabukurikira.
12aAbo bahanuzi Imana yabahishuriye ko ubwo butumwa atari bo bwagenewe, ahubwo ko ari mwebwe bagomba kubushyikiriza, none ubu ngubu mukaba mubumenyeshejwe n’abigisha b’Inkuru Nziza bayobowe na Roho Mutagatifu woherejwe aturuka mu ijuru.
Iryo ni Ijambo ry’Imana
IBANGONDIRIMBO RIBANZIRIZA IVANJILI Yh 1,7 ; Lk 1,17
Alleluya Alleluya.
Yohani azaruta umuhanuzi ;
azaba umugabo wo guhamya iby’urumuri,
ategurire Nyagasani umuryango umutunganiye.
Alleluya.
IVANJILI
✠ Amagambo yo mu Ivanjili Ntagatifu uko yanditswe na Luka
Lk 1,5-17
5Ku ngoma ya Herodi umwami wa Yudeya, hari umuhere- zabitambo wo mu cyiciro cya Abiya, akitwa Zakariya, n’umugore we akaba uwo mu muryango wa Aroni, akitwa Elizabeti. 6Bombi bari intungane imbere y’Imana, bagakurikiza badatezu- ka amategeko n’amabwiriza yose ya Nyagasani. 7Ariko nta mwana bari bafite kuko Elizabeti yari ingumba ; byongeye bombi bari bageze mu zabukuru. 8Igihe rero Zakariya yariho akora imihango y’ubuherezabitambo imbere y’Imana mu mwanya ugenewe icyiciro cye, 9nk’uko abaherezabitambo babigenzaga, ubufindo buramufata ngo ajye gutwika ububani mu Ngoro ya Nyagasani. 10Rubanda rwose rwasengeraga hanze, igihe cyo gutwika ubunani.
l1Nuko Umumalayika wa Nyagasani amubonekera ahagaze iburyo bw’urutambiro rw’ububani. 12Zakariya amubonye arikanga, ubwoba buramutaha. 13Ariko Malayika aramubwira ati «Wigira ubwoba Zakariya, kuko isengesho ryawe ryashimwe : umugore wawe Elizabeti azakubyarira umuhungu, maze ukazamwita Yohani. 14Azagutera ibyishimo n’umunezero, kandi benshi bazashimishwa n’ ivuka rye, 15kuko azaba umuntu ukomeye mu maso ya Nyagasani. Ntazanywa divayi n’icyitwa inzoga cyose, kandi azuzura Roho Mutagatifu akiri mu nda ya nyina. 16Azagarura abana benshi ba Israheli kuri Nyagasani Imana yabo, 17kandi azagenda imbere y’Imana arangwa n’umutima n’ubushobozi nka Eliya, agira ngo yunge ababyeyi n’abana babo, no kugira ngo ab’ibigande abagire intungane, maze ategurire atyo Nyagasani umuryango umutunganiye.»
Iyo ni Ivanjili Ntagatifu
MISA YA KU MANYWA
ISOMO RYA MBERE
Isomo ryo mu gitabo cy’Umuhanuzi Izayi Iz 49,1-6
1Birwa nimunyumve ; bihugu bya kure muntege amatwi ! Uhoraho yampamagaye ntaravuka ; nkiri mu nda ya mama izina ryanjye yararivugaga. 2Umunwa wanjye yawugize nk’inkota ityaye, ankinga mu gacucu k’ikiganza cye, angira nk’umwambi utyaye ampisha mu mutana we. 3Yarambwiye ati «Uri umugaragu wanjye, (Israheli,) ni wowe nzagaragarizamo ikuzo ryanjye.» 4Ariko jye naribwiraga nti «Naruhiye ubusa, mvunwa n’ibidafite akamaro.» Nyamara Uhoraho ni we uzandenganura, igihembo nagiteguriwe iruhande rw’Imana yanjye. 5None ngaha Uhoraho yabyivugiye, we wandemeye kumubera umugaragu kuva nkiri mu nda ya mama, kugira ngo mugarurire Yakobo, mukorakoranyirize Israheli ; guhera ubu rero mfite ubutoni kuri Uhoraho, ububasha bwanjye bukaba ari Imana yanjye. 6Yarambwiye ati «Gusubiranya imiryango ya Yakobo no kugarura abarokotse ba Israheli, ibyo ntibihagije ku mugaragu wanjye; ahubwo nakugeneye kuba urumuri rw’amahanga, kugira ngo umukiro wanjye usakare kugera mu mpera z’isi.»
Iryo ni Ijambo ry’Imana
ZABURI Zab 139 (138), l-2.3b, 13-14a, 14b-15b
Inyik/ Ndagushimira Nyagasani Mana yanjye,
kubera ibikorwa byawe bitangaje.
Uhoraho, undeba mu nkebe z’umutima ukamenya wese ! Iyo nicaye n’iyo mpagaze byose uba ubizi,
imigambi yanjye uyimenya mbere y’igihe,
mu migenzereze yanjye yose nta na kimwe kigusoba.
Ni wowe waremye ingingo zanjye,
umbumbabumbira mu nda ya mama.
Ndagushimira ko wandemye ku buryo buhimbye !
Ibikorwa byawe biratangaje,
umutima wanjye urabizi neza rwose.
Amagufwa yanjye ntiyakwikinze,
igihe naremerwaga mu ibanga.
ISOMO RYA KABIRI
Isomo ryo mu gitabo cy’Ibyakozwe n’Intumwa Intu 13,22-26
Mu isengero ry’i Antiyokiya ho muri Pisidiya, Pawulo yabwiye Abayahudi ati 22«Imana yamaze guhigika Sawuli, ishyiraho Dawudi ngo ababere umwami, ari na we yatanzeho icyemezo iti ‘Nabonye Dawudi mwene Yese, umuntu unguye ku mutima, uzakora ibyo nshaka byose.’ 23Mu rubyaro rwe nk’uko Imana yari yarabimusezeranyije, ni ho yakuye Yezu, Umukiza wa Israheli. 24Mbere y’ukuza kwe, Yohani yatangarije Abayisraheli bose batisimu yo kwisubiraho. 25Nuko ajya kurangiza ubutumwa bwe aravuga ati ‘Nta bwo ndi uwo mukeka ! Ahubwo hari ugiye kuza ankurikiye, nkaba ntakwiriye no guhambura udushumi tw’inkweto ze.’ 26Bavandimwe, mwaba urubyaro rwa Abrahamu cyangwa se mwaba abatinya Imana, iri jambo ry’umukiro ni mwe ryohererejwe.»
Iryo ni Ijambo ry’Imana
IBANGONDIRIMBO RIBANZIRIZA IVANJILI Lk 1, 76
Alleluya Alleluya.
Nitwishimire ivuka rya Yohani Batisita :
azitwa umuhanuzi w’Umusumbabyose,
azabanziriza Nyagasani kugira ngo amutegurire inzira.
Alleluya.
IVANJILI
✠ Amagambo yo mu Ivanjili Ntagatifu uko yanditswe na
Luka Lk 1, 57-66.80
57Igihe cyo kubyara kigeze, Elizabeti abyara umwana w’umuhungu. 58Abaturanyi na bene wabo bumvise ko Nyagasani yamugiriye ubuntu, bafatanya na we kwishima. 59Ku munsi wa munani baza kugenya umwana, bashaka kumwita Zakariya nka se. 60Ariko nyina ravuga ati «Oya, aritwa Yohani.» 61Baramubwira bati «Nta muntu wo mu muryango wanyu wigeze kwitwa iryo zina !» 62Nuko babaza se mu marenga uko yifuza kwita umwana. 63Zakariya yaka akabaho maze yandikaho aya magambo : «Izina rye ni Yohani.» Bose baratangara. 64 Ako kanya umunwa we urabumbuka, n’ururimi rwe ruragobodoka, maze atangira kuvuga asingiza Imana. 65Nuko ubwoba butaha abaturanyi babo bose, n’abo mu misozi yo mu Yudeya, bakwiza hose ibyabaye. 66Ababyumvaga bose bakomezaga kubizirikana mu mitima, bibaza bati «Uyu mwana azamera ate, ko ububasha bwa Nyagasani buri kumwe na we ?» 80Umwana uko yakuraga, ni na ko yungukaga ubwenge. Nuko yibera ahantu h’ubutayu kugeza igihe yigaragaje imbere ya Israheli.
Iyo ni Ivanjili Ntagatifu
KU WA 29 KAMENA
ABATAGATIFU
PETERO NA PAWULO, INTUMWA
MISA YO KU MUGOROBA UBANZIRIZA UMUNSI MUKURU
(Ku wa 28 Ramena)
ISOMO RYA MBERE
Isomo ryo mu gitabo cy’Ibyakozwe n’Intumwa Intu 3, 1-10
1Umunsi umwe, saa cyenda ari cyo gihe cy’isengesho rusange, Petero na Yohani bazamuka bajya mu Ngoro y’Imana. 2Hakaba umuntu wavutse ari ikirema, buri munsi bakamuzana imbere y’umuryango w’Ingoro witwa «Uw’uburanga», kugira ngo asabe imfashanyo abinjiraga mu Ngoro bose. 3Ngo abone Petero na Yohani bagiye kwinjira mu Ngoro, abasaba imfashanyo. 4Nuko Petero ari hamwe na Yohani, aramwitegereza maze aramubwira ati «Ngaho turebe !» 5Uwo muntu agumya kubahanga amaso, kuko yari ategereje ko hari icyo bari bumuhe. 6Petero aramubwira ati «Ari zahabu ari na feza nta byo mfite ; ariko icyo mfite ndakiguhaye : mu izina rya Yezu Kristu w’i Nazareti, haguruka ugende !» 7Nuko amufata ikiganza cy’iburyo aramuhagurutsa. Ako kanya ibirenge bye n’utugombambari birakomera ; 8arabaduka arahagarara, aratambuka yinjirana na bo mu Ngoro, agenda asimbuka kandi asingiza Imana. 9Nuko rubanda rwose ngo bamubone agenda kandi asingiza Imana 10baramumenya: koko yari wa wundi wajyaga asabiriza, yicaye imbere y’Umuryango w’Uburanga w’Ingoro. Nuko abantu barumirwa, batangazwa n’ibimubayeho.
Iryo ni Ijambo ry’Imana
ZABURI Zab 19 (18), 2-3,4-5ab
Inyik/ Imvugo yabyo igera ku mpera z’isi.
Ijuru ryamamaza ikuzo ry’Imana,
n’ikirere kikagaragaza ibyiza yakoze.
Umunsi ubwira undi munsi inkuru yabyo,
ijoro rikabimenyesha irindi joro.
Nanone nta nkuru, nta n’amagambo,
kuko ijwi ryabyo ritumvikana!
Ariko ku isi hose urusobe rwabyo rurigaragaza,
n’imvugo yabyo ikagera ku mpera z’isi.
ISOMO RYA KABIRI
Isomo ryo mu ibaruwa Mutagatifu Pawulo Intumwa yandikiye Abanyagalati Gal 1, 11-20
11Mbibamenyeshe rero bavandimwe, iyo Nkuru Nziza nabigishije si iy’umuntu, 12si n’umuntu nyikesha kandi si umuntu wayinyigishije : ni Yezu Kristu wayimpishuriye. 13Mwumvise kandi imigirire yanjye kera nkiri mu kiyahudi : ko natotezaga bikabije Kiliziya y’Imana nshaka kuyitsemba. 14Kandi benshi mu bo tungana dusangiye n’ubwoko, nabarushaga gukurikiza idini ya kiyahudi, nkabasumbya ishyaka mu guharanira umuco karande w’abasokuruza. 15Nyamara umunsi Uwanyitoranyirije nkiri mu nda ya mama, yampamagaye ku bw’ineza ye 16ngo ampishurire Umwana we kugira ngo mwamamaze mu mahanga, ako kanya nahise mpaguruka nta we niriwe ngisha inama, 17habe no kuzamuka i Yeruzalemu ngo nsange abantanze kuba intumwa ; ahubwo nagiye muri Arabiya, nyuma ngaruka i Damasi. 18Nyuma y’imyaka itatu ni bwo nazamutse i Yeruzalemu kureba Petero, tumarana iminsi cumi n’itanu. 19Nta yindi ntumwa twabonanye, uretse Yakobo umuvandimwe wa Nyagasani. “Ibi mbandikira, dore ndi mu maso y’Imana simbeshya.
Iryo ni Ijambo ry’Imana
IBANGONDIRIMBO RIBANZIRIZA IVANJILI Yh 21, 17
Alleluya Alleluya.
Petero yabwiye Yezu wazutse ati
«Nyagasani, uzi byose, uzi ko ngukunda.»
Alleluya.
IVANJILI
✠ Amagambo yo mu Ivanjili Ntagatifu uko yanditswe na
Yohani Yh 21,15-19
Muri icyo gihe bari ku nkombe y’ikiyaga, 15bamaze kurya Yezu abaza Simoni Petero ati «Simoni mwene Yohani, urankunda kurusha aba ngaba ?» Aramusubiza ati «Yego Nyagasani, uzi ko ngukunda.» Yezu aramubwira ati «Ragira abana b’intama zanjye.» 16Yezu yongera kumubaza ubwa kabiri ati «Simoni mwene Yohani, urankunda ?» Petero aramusubiza ati «Yego Nyagasani, uzi ko ngukunda.» Yezu ati «Ragira intama zanjye.» 17Yongera kumubaza ubwa gatatu ati «Simoni mwene Yohani, urankunda ?» Petero ababazwa n’uko amubajije ubwa gatatu ati «Urankunda ?» Ni bwo amushubije ati «Nyagasani, uzi byose, uzi ko ngukunda.» Yezu aramubwira ati «Ragira intama zanjye.» 18Ndakubwira ukuri koko : igihe wari ukiri umusore warikenyezaga kandi ukajya aho ushaka, ariko numara gusaza uzatega amaboko undi agukenyeze, kandi akujyane aho udashaka.» 19Yavuze atyo ashaka kumuburira urupfu rumuteze, ruzahesha Imana ikuzo. Amaze kuvuga atyo aramubwira ati «Nkurikira.»
Iyo ni Ivanjili Ntagatifu
MISA YA KU MANYWA
ISOMO RYA MBERE
Isomo ryo mu gitabo cy’Ibyakozwe n’Intumwa Intu 12,1-11
1Icyo gihe umwami Herodi atangira kugirira nabi bamwe muri Kiliziya, 2yicisha inkota Yakobo, umuvandimwe wa Yohani. 3Abonye ko ibyo bishimishije Abayahudi yongera no gufata Petero, - ubwo hakaba mu minsi mikuru y’imigati idasembuye 4Amaze kumufata amushyira mu buroko, ategeka amatsinda ane, rimwe rigizwe n’abasirikare bane kumurinda. Yashakaga kumuhingutsa imbere ya rubanda nyuma y’umunsi mukuru wa Pasika. 5Petero aguma mu buroko, ariko Kiliziya ikamusabira ku Mana ubudatuza.
6Herodi araye ari bumutange ngo acirwe urubanza, muri iryo joro Petero akaba arasinziriye, akikijwe n’abasirikare babiri kandi aboheshejwe iminyururu ibiri, n’abarinzi bahagaze mu mwanya wabo imbere y’umuryango. 7Ako kanya umumalayika wa Nyagasani arahatunguka , maze urumuri rutangaza muri ubwo buroko. Uwo mumalayika akomanga Petero mu mbavu, amukangura amubwira ati «Haguruka bwangu !» Iminyururu ihita imuva ku maboko iragwa. 8Umumalayika aramubwira ati «Kenyera, wambare n’inkweto zawe !» Abigenza atyo, maze umumalayika yongera kumubwira ati «Ifubike igishura cyawe maze unkurikire !» 9Nuko Petero aso- hoka amukurikiye, ariko atazi ko ibyakorwaga n’umumalayika ari ukuri, ahubwo akibwira ko ari inzozi yarose. 10Banyura ku barinzi ba mbere, hanyuma no ku ba kabiri, maze bagera ku rugi rw’icyuma rwerekeraga mu mugi, rurikingura ubwarwo. Barasohoka barenga umuhanda umwe, ako kanya umumalayika amusiga aho. nNuko Petero ngo agarure umutima aravuga ati «Noneho menye by’ukuri ko Nyagasani yohereje umumalayika we, akangobotora mu biganza bya Herodi kandi akankiza n’imihigo yose y’imbaga y’Abayahudi.»
Iryo ni Ijambo ry’Imana
ZABURI Zab 34 (33), 2-3, 4-5, 6-7, 8-9
Inyik/ Ab’incuti za Nyagasani,
abakiza ibyabakuraga umutima byose.
Nzashimira Uhoraho igihe cyose,
ibisingizo bye bizahora ubudahwema mu munwa wanjye.
Ishema mfite ryose ndikesha Uhoraho,
ab’intamenyekana nibabyumve maze bishime !
Nimwogeze Uhoraho hamwe nanjye,
twese hamwe turatire izina rye icyarimwe.
Nashakashatse Uhoraho aransubiza,
nuko ankiza ibyankuraga umutima byose.
Abamurangamira bahorana umucyo,
mu maso habo ntiharangwa ikimwaro.
Umunyabyago yaratabaje Uhoraho aramwumva,
maze amuzahura mu magorwa ye yose.
Umumalayika w’Uhoraho aca ingando
hafi y’abamutinya, akabagoboka.
Nimushishoze maze mwumve
ukuntu Uhoraho anogera umutima !
Hahirwa umuntu abereye ubuhugiro !
ISOMO RYA KABIRI
Isomo ryo mu ibaruwa ya kabiri Mutagatifu Pawulo Intumwa yandikiye Timote 2 Tim 4, 6-8.17-18
Mwana wanjye, 6dore jyewe maze kumera nk’igitambo giseswa, n’amagingo y’ukwigendera kwanjye aregereje. 7Urugamba rwiza narurwanye inkundura, intera nagombaga kwiruka narayirangije, ukwemera nagukomeyeho. 8None dore ikamba rigenewe intungane rirantegereje, iryo Nyagasani umucamanza utabera azangororera kuri wa Munsi we, ariko atari jyewe jyenyine, ahubwo n’abandi bose bazaba barakunze Ukwigaragaza kwe. (16b)Bose barantereranye, 17naho Nyagasani we yambaye hafi, maze antera imbaraga kugira ngo mbashe kuhamamariza ubutumwa nshize amanga, kandi ngo abanyamahanga bose babwumve. Nuko nkizwa urwasaya rw’intare. 18Nyagasani azansimbukisha ikintu cyose kigamije kungirira nabi, maze ankize anjyana mu Ngoma ye y’ijuru. Naharirwe ikuzo uko ibihe bigenda bisimburana iteka ! Amen.
Iryo ni Ijambo ry’Imana
IBANGONDIRIMBO RIBANZIRIZA IVANJILI Mt 16,18
Alleluya Alleluya.
Nyagasani yubatse Kiliziya ye ku kwemera kwa Petero,
kandi ububasha bwo mu kuzimu ntibuzayitsinda.
Alleluya.
IVANJILI
✠ Amagambo yo mu Ivanjili Ntagatifu uko yanditswe na Matayo Mt 16,13-19
Muri icyo gihe, 13Yezu ageze mu gihugu cya Kayizareya ya Filipo atangira kubaza abigishwa be ati «Abantu bavuga ko Umwana w’umuntu ari nde ?» 14Baramusubiza bati «Bamwe bavuga ko ari Yohani Batisita, abandi ko ari Eliya, abandi ko ari Yeremiya cyangwa umwe mu bandi bahanuzi.» 15Yongera kubabaza ati «Mwebwe se muvuga ko ndi nde ?» 16Simoni Petero aramusubiza ati «Wowe uri Kristu, Umwana w’Imana Nzima !» I7Yezu amusubiza agira ati «Urahirwa, Simoni mwene Yonasi, kuko atari umubiri n’amaraso byabiguhishuriye, ahubwo ni Data uri mu ijuru. 18Noneho nkubwiye ko uri Urutare, kandi kuri urwo rutare nzubakaho Kiliziya yanjye, n’ ububasha bwo mu kuzimu ntibuzayitsinda. 19Nzaguha imfunguzo z’ingoma y’ijuru : icyo uzaba waboshye mu nsi, kizabohwa no mu ijuru ; n’icyo uzaba wabohoye mu nsi, kizabohorwa no mu ijuru.»
Iyo ni Ivanjili Ntagatifu
KU WA 6 KANAMA
YEZU YIHINDURA UKUNDI
ISOMO RYA MBERE
Isomo ryo mu gitabo cy’Umuhanuzi Daniyeli Dan 7, 9-10.13-14
Nijoro ndiho mbonekerwa, 9jyewe Daniyeli uko nakitegereje, mbona intebe z’ubucamanza ziratewe maze Umukambwe aricara. Umwambaro we wereranaga nk’urubura, imisatsi ye yera nk’ubwoya bw’intama. Intebe ye y’ubwami yari indimi z’umuriro, inziga zayo ari nk’umuriro ugurumana. 10Uruzi rw’umuriro rwaravubukaga maze rugatemba imbere ye. Urujya n’uruza rw’amagana n’amagana bariho bamukorera, ibihumbi n’ibihumbi bihagaze imbere ye. Ubwo urubanza rurashingwa, maze ibitabo birabumburwa.
13Nijoro kandi nariho nitegereza ibyo nabonaga : mbona uje mu bicu byo mu kirere umeze nk’Umwana w’umuntu. Ubwo yigira hafi ya wa Mukambwe, maze ajyanwa imbere ye. 14Nuko yegurirwa ingoma, icyubahiro n’ubwami ; imiryango yose, amahanga yose n’indimi zose biramuyoboka. Ubwami bwe ni ubwami buhoraho iteka ntibuzashira, n’ingoma ye ni ingoma itazagira ikiyitsimbura.
Iryo ni Ijambo ry’Imana
ZABURI Zab 97 (96), 1-2,4-5, 6.9
Inyik/ Kristu ni Nyagasani,
ni We bubengerane bw’ikuzo ry’Imana Data !
Uhoraho ni Umwami ! Isi nihimbarwe,
abaturiye inkombe nibasagwe n’ibyishimo !
Igicu cy’urwijiji kiramukikije,
ubutabera n’ubutarenganya ni ikibanza cy’intebe ye.
Imirabyo ye iboneshereza isi,
ubutaka burabirabukwa maze bugahinda umushyitsi.
Imisozi irashonga nk’ibishashara,
mu maso y’Uhoraho, Umutegetsi w’isi yose.
Ijuru riramamaza ubutabera bwe,
maze imiryango yose ikarangamira ikuzo rye.
Kuko wowe Uhoraho, uri Musumbabyose ku isi yose,
utambutse kure imana zose.
ISOMO RYA KABIRI
Isomo ryo mu ibaruwa ya kabiri ya Mutagatifu Petero Intumwa
2 Pet 1,16-19
Bavandimwe, 16koko rero nta bwo ari imigani yahimbwe n’ubwenge twakoresheje, kugira ngo tubamenyeshe ububasha n’ukuza by’Umwami wacu Yezu Kristu, ahubwo twaramwiboneye n’amaso yacu yisesuyeho ikuzo. l7Kuko Imana Data yamuhaye icyubahiro n’ikuzo, igihe ijwi ry’agatangaza ry’Imana rigize riti «Uyu ni Umwana wanjye nkunda cyane, unyizihira.» 18Natwe ubwacu iryo jwi twararyiyumviye rituruka mu ijuru, igihe twari kumwe na We ku musozi mutagatifu. 19Ikindi kandi kiruseho, twishingikirije ku ijambo rikomeye ry’abahanuzi ; mukaba rero mukora neza iyo murirangamira nk’itara rimurika ahantu h’umwijima, kugeza ubwo hatangira gucya, n’inyenyeri y’urukerera ikarasira mu mitima yanyu.
Iryo ni Ijambo ry’Imana
IBANGONDIRIMBO RIBANZIRIZA IVANJILI Zab 99, 9; 36, 10
Alleluya Alleluya.
Nimurate Uhoraho Imana yacu,
maze mupfukame imbere y’umusozi we mutagatifu :
urumuri rwe ni rwo natwe dukesha kubona urumuri.
Alleluya.
Bafata Ivanjili y’umwaka barimo, A, B cyangwa C nk’uko ayo mavanjili akurikiranye:
UMWAKA A
IVANJILI
✠ Amagambo yo mu Ivanjili Ntagatifu uko yanditswe na
Matayo Mt 17,1-9
Muri icyo gihe, 1Yezu ajyana na Petero na Yakobo na Yohani umuvandimwe we, ukwabo mu mpinga y’umusozi muremure. 2Nuko yihindurira ukundi mu maso yabo : uruhanga rwe rubengerana nk’izuba, imyambaro ye yererana nk’urumuri. 3Ubwo Musa na Eliya bababonekera baganira na we. 4Petero ni ko guterura abwira Yezu ati «Nyagasani, kwibera hano ntako bisa ; niba ubishaka ngiye kuhaca ibiraro bitatu, kimwe cyawe, ikindi cya Musa n’ikindi cya Eliya.» 5 Akivuga ibyo igihu kibengerana kirabatwikira ; ijwi riturukamo rivuga riti «Uyu ni Umwana wanjye nkunda cyane unyizihira ; nimumwumve !» 6Abigishwa babyumvise bitura hasi bubitse amaso, bafite ubwoba bwinshi. 7Nuko Yezu arabegera, abakoraho arababwira ati «Nimubaduke, mwitinya !» 8Bubuye amaso ntibagira undi babona kereka Yezu wenyine. 9Bamanuka umusozi Yezu arabihanangiriza ati «Ntimugire uwo mubwira ibyo mumaze kubona, kugeza ubwo Umwana w’umuntu azaba amaze kuzuka mu bapfuye.»
Iyo ni Ivanjili Ntagatifu
UMWAKA B
✠ Amagambo yo mu Ivanjili Ntagatifu uko yanditswe na
Mariko Mk 9, 2-10
Muri icyo gihe, 2Yezu ajyana na Petero na Yakobo na Yohani, ukwabo mu mpinga y’umusozi muremure. Nuko yihindura ukundi mu maso yabo. 3Imyambaro ye irererana, irabengerana bitambutse kure uburyo umumeshi wo ku isi yashobora kuyeza. 4Ubwo Eliya arababonekera hamwe na Musa, baganira na Yezu. 5Petero ni ko guterura abwira Yezu ati «Mwigisha, kwibera hano nta ko bisa ; reka tuhace ibiraro bitatu, kimwe cyawe, ikindi cya Musa n’ikindi cya Eliya.» 6Yari yabuze icyo avuga kuko bari bahiye ubwoba. 7Nuko igicu kirabatwikira, maze muri icyo gicu haturukamo ijwi riti «Uyu ni Umwana wanjye nkunda cyane, nimumwumve !» 8 Ako kanya barebye hirya no hino, ntibagira undi wundi bongera kubona, uretse Yezu wenyine wari kumwe na bo. 9Mu gihe bamanukaga umusozi, Yezu abategeka kutazagira uwo batekerereza ibyo bari bamaze kubona, kugera igihe Umwana w’umuntu azaba maze kuzuka mu bapfuye. 10Bakomeza kuzirikana iryo jambo, ariko banabazanya bati «Kuzuka mu bapfuye bivuga iki ?»
Iyo ni Ivanjili Ntagatifu
UMWAKA C
✠ Amagambo yo mu Ivanjili Ntagatifu uko yanditswe na
Luka Lk 9, 28b-36
Muri icyo gihe, 28bYezu ajyana na Petero na Yohani na Yakobo, aterera umusozi ajya gusenga. 29Mu gihe yasengaga mu maso he hahinduka ukundi, n’imyambaro ye irakirana nk’umurabyo. 30Nuko haza abagabo babiri baganira na we, ari bo Musa na Eliya. 31Bababonekera babengerana ikuzo, bavugana na we iby’urupfu rwe yari agiye gupfira i Yeruzalemu. 32Icyo gihe Petero na bagenzi be bari batwawe n’ibitotsi. Ngo bakanguke babona kuzo rya Yezu na ba bagabo babiri bari kumwe. 33Bagiye kugenda Petero abwira Yezu ati «Mwigisha, kwibera hano nta ko bisa. Reka tuhace ibiraro bitatu, kimwe cyawe, ikindi cya Musa n’ikindi cya Eliya.» Icyakora ntiyari azi icyo avuga. 34Akivuga ibyo igihu kiraza kirabatwikira ; kibarenzeho bashya ubwoba. 35Nuko ijwi rituruka muri cya gihu rivuga riti «Uyu ni Umwana wanjye nihitiyemo ; mujye mumwumvira !» 36Ijwi ngo rimare kuvuga babona Yezu ari wenyine. Nuko muri iyo minsi baryumaho, ntibagira uwo babwira ibyo bari babonye.
Iyo ni Ivanjili Ntagatifu
KU WA 15 KANAMA
BIKIRA MARIYA AJYANWA MU IJURU
MISA YO KU MUGOROBA UBANZIRIZA UMUNSI MUKURU
(Ku wa 14 Kanama)
ISOMO RYA MBERE
✠ Isomo ryo mu gitabo cya mbere cy’Amateka
1 Matek 15, 3-4.15-16 ; 16,1-2
Muri iyo minsi, 15,3Dawudi akoranyiriza Abayisraheli bose i Yeruzalemu, kugira ngo bazamure Ubushyinguro bw’Uhoraho babujyane ahantu yabuteganyirije. 4Akoranya na bene Aroni n’Abalevi, 15Abalevi baheka Ubushyinguro bw’Imana bashyize imijishi yabwo ku ntugu zabo, nk’uko Musa yabitegetse akurikije ijambo ry’Uhoraho. 16Maze Dawudi abwira abatware b’Abalevi gushyira abavandimwe babo b’abaririmbyi mu mwanya wabo, bitwaje ibikoresho byabo ari byo inanga, imiduri n’ibyuma birangira, kugira ngo babivuze cyane maze amajwi yabyo arangurure yuzuye ibyishimo. 16,1Binjiza Ubushyinguro bw’Imana, maze babushyira aho bwateguriwe hagati mu ihema Dawudi yari yarabwubakiye, hanyuma batura ibitambo bitwikwa n’iby’ubuhoro imbere y’Imana. 2Dawudi amaze gutura ibitambo bitwikwa n’iby’ubuhoro, aha umugisha rubanda mu izina ry’Uhoraho.
Iryo ni Ijambo ry’Imana
ZABURI Zab 132 (131), 7-8, 9-10, 13-14
Inyik/ Nyagasani, wakiriye Umubyeyi wawe mu rumuri rwawe.
Nimuhogi twinjire aho utuye,
dupfukame imbere y’umusego w’ibirenge bye !
Haguruka Uhoraho, uze mu buruhukiro bwawe,
wowe n’Ubushyinguro bw’ububasha bwawe !
Abaherezabitambo bawe nibambare ubutungane,
maze abayoboke bawe bavuze impundu.
Girira umugaragu wawe Dawudi,
woye gutererana umwami wisigiye amavuta.
Kuko Uhoraho yihitiyemo Siyoni,
ashaka ko imubera ingoro,
ati «Ni yo buruhukiro bwanjye iteka ryose,
ni ho nzatura kuko nabyifuje !»
ISOMO RYA KABIRI
Isomo ryo mu ibaruwa ya mbere Mutagatifu Pawulo Intumwa yandikiye Abanyakorinti 1Kor 15, 54-57
Bavandimwe, ku munsi w’imperuka Migihe uyu mubiri ugenewe kubora uzagezwa ku budashanguka, kandi uyu mubiri ugenewe gupfa ukagabirwa ukutazapfa, ubwo ngubwo ibyanditswe bizaba byujujwe ngo «Urupfu rwaburijwemo n’umutsindo. 55Rupfu we ! Ugutsinda kwawe kuri he ? Urubori rwawe ruri hehe, wa Rupfu we ?» 56Koko rero urubori rw’urupfu ni icyaha, naho ububasha bw’icyaha buturuka ku mategeko. 57Dushimire Imana yaduhaye gutsinda ku bw’Umwami wacu Yezu Kristu.
Iryo ni Ijambo ry’Imana
IBANGONDIRIMBO RIBANZIRIZA IVANJILI
Alleluya Alleluya.
Arahirwa Bikira Mariya , Umubyeyi w’Imana :
kuko yakiriye ijambo,
agakomeza kurizirikana mu mutima we.
Alleluya.
IVANJILI
✠ Amagambo yo mu Ivanjili Ntagatifu uko yanditswe na
Luka Lk 11, 27-28
27Igihe Yezu yavugaga, umugore arangurura ijwi rwagati mu mbaga, aramubwira ati «Hahirwa inda yagutwaye n’amabere yakonkeje!» 28Na we ati «Ahubwo hahirwa abumva ijambo ry’Imana bakarikurikiza !»
Iyo ni Ivanjili Ntagatifu
MISA YA KU MANYWA
ISOMO RYA MBERE
✠ Isomo ryo mu gitabo cy’Ibyahishuriwe Yohani Intumwa
Hish 11,19a ; 12, l-6a.l0a
11,19aNuko Ingoro y’Imana yo mu ijuru irakinguka, n’Ubushyinguro bw’Isezerano bugaragarira mu Ngoro yayo. 12,1Ikimenyetso gikomeye kigaragara mu ijuru : yari umugore wisesuye izuba, ukwezi kuri mu nsi y’ibirenge bye, naho ku mutwe atamirije ikamba ry’inyenyeri cumi n’ebyiri. 2Yari atwite kandi ariho atakishwa n’ibise, n’imibabaro y’iramukwa. 3Nuko ikindi kimenyetso kigaragara mu ijuru : cyari Ikiyoka nyamunini kandi gitukura nk’umuriro, kikagira imitwe irindwi n’amahembe cumi, n’amakamba arindwi kuri iyo mitwe uko ari irindwi. 4Umurizo wacyo usakuma igice cya gatatu cy’inyenyeri uzihananturira ku isi. Icyo Kiyoka rero gihagarara imbere y’uwo Mugore wari wegereje kubyara, kugira ngo giconcomere umwana ukivuka. 5Nuko abyara umwana w’umuhungu: ugomba kugenga amahanga yose n’inkoni y’icyuma. Maze uwo mwana we ajyanwa ku Mana no ku ntebe yayo y’ubwami. 6aHanyuma umugore ahungira mu butayu, aho Imana yamuteguriye umwanya. 10aHanyuma numva ijwi riranguruye rituruka mu ijuru riti «Ngiki igihe cy’ubucunguzi kirageze, igihe cy’ububasha n’ubwami by’Imana yacu, n’ubutegetsi bwa Kristu wayo.»
Iryo ni Ijambo ry’Imana
ZABURI Zab 45 (44), ll-12a, 12b-13,14-15a, 15b-16
Inyik/ Urahirwa Bikira Mariya,
aho uganje mu ikuzo ry’Umwana wawe.
Umva mukobwa, itegereze maze utege amatwi :
ibagirwa igihugu cyawe n’umuryango uvukamo,
maze umwami abenguke uburanga bwawe !
Ni we mutegetsi wawe : emera upfukame imbere ye !
Nuko rero mwari w’i Tiri, abakungu bo muri rubanda
bazakugana bitwaje amaturo ngo bagushakeho ubutoni.
Umukobwa w’umwami nguyu atungutse arabagirana,
yarimbanye umwambaro utatse zahabu,
bamuhingutsa imbere y’umwami bamutatse.
Ahagerana n’abakobwa bagenzi be bamuherekeje,
babinjiza mu ngoro y’ibwami,
batambagirana ibyishimo n’ubwuzu.
ISOMO RYA KABIRI
Isomo ryo mu ibaruwa ya mbere Mutagatifu Pawulo Intumwa yandikiye Abanyakorinti 1 Kor 15,20-27a
Bavandimwe, 20Kristu yazutse koko mu bapfuye, aba umuzukambere mu bapfuye bose. 21Nk’uko kandi urupfu rwakuruwe n’umuntu umwe, ni na ko izuka ry’abapfuye ryazanywe n’umuntu umwe. 22Kimwe n’uko bose boramye bitewe na Adamu, ni na ko bose bazasubizwa ubugingo biturutse kuri Kristu, 23nyamara buri wese mu rwego rwe : uw’ibanze ni Kristu, nyuma hateho abamuyobotse, igihe azazira. 24Nuko byose bizarangire igihe azegurira Ubwami Imana se, amaze gusenyagura icyitwa ubuhangange, ubutegetsi n’ububasha cyose. 25Kuko agomba kwima ingoma kugeza ko azashyira abanzi be bose mu nsi y’ibirenge bye. 26Umwanzi w’imperuka uzarimburwa ni urupfu, 27akuko byanditswe ngo «Byose yabishyize mu nsi y’ibirenge bye.»
IBANGONDIRIMBO RIBANZIRIZA IVANJILI
Alleluya Alleluya.
Uyu munsi irembo ry’ijuru ryikinguye : Bikira Mariya yinjiye mu ikuzo ry’Imana. Bamalayika bo mu ijuru mwese nimwishime !
Alleluya.
IVANJILI
✠ Amagambo yo mu Ivanjili Ntagatifu uko yanditswe na Luka Lk 1, 39-56
39Muri iyo minsi, Mariya yarahagurutse agenda yihuta, ajya mu misozi miremire mu mugi wa Yuda, 40agera kwa Zakariya aramutsa Elizabeti. 41Nuko Elizabeti yumvise indamutso ya Mariya, umwana atwite yisimbiza mu nda, maze Elizabeti yuzura Roho Mutagatifu. 42Arangurura ijwi ati «Wahebuje abagore bose umugisha, n’Umwana utwite arasingizwa, 43Mbikesha iki kugira ngo nyina w’umutegetsi wanjye angenderere ? 44Dore mbaye ncyumva indamutso yawe, umwana yisimbagizanya ibyishimo mu nda yanjye. 45Urahirwa wowe wemeye ko ibyo watumweho na Nyagasani bizaba.»
46Nuko Mariya na we aravuga ati 47«Umutima wanjye urasingiza Nyagasani, kandi uhimbajwe n’Imana Umukiza wanjye. 48Kuko yibutse umuja we utavugwaga ; rwose kuva ubu amasekuruza yose azanyita umuhire. 49Ushoborabyose yankoreye ibitangaza, Izina rye ni ritagatifu. 50Impuhwe ze zisesekarizwa abamutinya bo mu bihe byose. 51Yagaragaje ububasha bw’amaboko ye atatanya abantu birata ; 52yahanantuye abakomeye abakura ku ntebe zabo, maze akuza ab’intamenyekana ; 53abashonji yabagwirije ibintu, abakungu abasezerera amara masa ; 54yagobotse Israheli umugaragu we bityo yibuka impuhwe ze, 55nk’uko yari yarabibwiye abakurambere bacu, abigirira Abrahamu n’urubyaro rwe iteka.» 56Mariya yamaranye na Elizabeti nk’amezi atatu, abona gutaha.
Iyo ni Ivanjili Ntagatifu
KU WA 14 NZERI
UMUSARABA MUTAGATIFU
WUJE IKUZO
ISOMO RYA MBERE
Isomo ryo mu gitabo cy’Ibarura 1bar 21,4b-9
Igihe Abayisraheli bari mu rugendo mu butayu, 4bimbaga iza gucikira intege mu nzira, 5itangira kugaya Imana na Musa ivuga iti «Mwadukuriye iki mu Misiri ? Mwagira ngo tugwe muri ubu butayu butagira amazi ntibubemo n’umugati ! Twarambiwe guhora turya iriya ngirwamugati.» 6Uhoraho aterereza Abayisraheli inzoka zifite ubumara butwika, zirabarya bapfamo abantu benshi cyane. 7Imbaga iza isanga Musa iramubwira iti «Twakoze icyaha igihe twakugayaga wowe n’Uhoraho. None twingingire Uhoraho adukize ziriya nzoka!» Musa asabira imbabazi umuryango 8maze Uhoraho aramubwira ati «Curisha inzoka isa n’izo zabateye, uyimanike ku giti. Uwo zizajya zirya akayireba azajya akira.» 9Musa acurisha inzoka y’umuringa ayi- manika ku giti. Iyo rero inzoka yaryaga umuntu maze akareba iyo y’umuringa, yahitaga akira.
Iryo ni Ijambo ry’Imana
ZABURI Zab 78 (77), 3-4a.c, 34-35, 36-37, 38ab,39
Inyik/ Nyagasani, umusaraba wawe
ni wo wadusubirishije ubuzima.
Ibyo twabwiwe kandi tumenyereye,
ibyo ba data batugejejeho,
natwe ntituzabihisha abana bacu,
ibyo bazakurizaho gusingiza Uhoraho.
Iyo Imana yabiraragamo ni bwo bayishakashakaga,
bakisubiraho bakayigarukira !
Ubwo bakibuka ko Imana ari yo rutare begamiye,
ko Isumbabyose ari yo ibarengera !
Cyakora ntibayibwizaga ukuri,
yari amagambo yo ku rurimi gusa.
Umutima wabo wari uyiri kure,
n’Isezerano ryayo bataryizeye.
Nyamara yo Nyir’ibambe,
aho kubarimbura ikabababarira.
Yibuka ko ari abantu gusa,
barimo umwuka ushira vuba ntugaruke.
ISOMO RYA KABIRI
Isomo ryo mu ibaruwa Mutagatifu Pawulo Intumwa yandikiye Abanyafilipi Fil 2,6-11
Bavandimwe, Kristu Yezu 6n’ubwo we yari afite imimerere imwe n’iy’Imana, ntiyagundiriye kureshya na Yo. 7Ahubwo yihinduye ubusabusa yigira nk’umugaragu, maze mu migirire ye agaragaza ko ari umuntu. Nuko aho amariye kwishushanya n’abantu 8yicisha bugufi kurushaho, yemera kumvira ageza aho gupfa, apfiriye ndetse ku musaraba. 9Ni cyo cyatumye Imana imukiza, imuha Izina risumbye ayandi yose, 10kugira ngo nibamara kumva izina rya Yezu bose bamupfukamire, mu ijuru, ku isi n’ikuzimu, 11kandi indimi zose zamamaze ko Yezu Kristu ari We Nyagasani, biheshe Imana Se ikuzo.
Iryo ni Ijambo ry’Imana
IBANGONDIRIMBO RIBANZIRIZA IVANJILI
Alleluya Alleluya.
Turagusenga Kristu, turagushima,
kubera umusaraba wawe, wakijije isi.
Alleluya.
IVANJILI
✠ Amagambo yo mu Ivanjili Ntagatifu uko yanditswe na
Yohani Yh 3,13-17
Muri icyo gihe, Yezu abwira Nikodemu ati 13«Nta wigeze azamuka ajya mu ijuru, uretse Umwana w’umuntu wamanutse aturutse mu ijuru. 14Mbese nk’uko Musa yamanitse inzoka mu butayu, ni ko n’Umwana w’umuntu azagomba kumanikwa, 15kugira ngo umwemera wese agire ubugingo bw’iteka. 16Koko Imana yakunze isi cyane, bigeza aho itanga Umwana wayo w’ikinege, igira ngo umwemera wese atazacibwa, ahubwo agire ubugingo bw’iteka. 17Icyakora Imana ntiyohereje Umwana wayo ku isi ngo ayicire urubanza, ahubwo yagira ngo akize isi.»
Iyo ni Ivanjili Ntagatifu
KU WA 1 UGUSHYINGO
UMUNSI MUKURU W’ABATAGATIFU BOSE
ISOMO RYA MBERE
Isomo ryo mu gitabo cy’Ibyahishuriwe Yohani Intumwa
Hish 7, 2-4.9-14
Jyewe Yohani, 2ndongera mbona undi mumalayika azamuka ajya iburasirazuba, afite ikashe y’Imana nzima. Avuga mu ijwi riranguruye, abwira ba bamalayika bane bari bahawe ububasha bwo kugirira nabi isi n’inyanja ati 3«Muririnde kugirira nabi isi, inyanja cyangwa ibiti, mbere y’uko turangiza gushyira ikimenyetso ku gahanga k’abagaragu b’Imana yacu.» 4Nuko numva umubare w’abashyizweho ikimenyetso : abantu ibihumbi ijana na mirongo ine na bine bo mu miryango yose y’Abayisraheli.
9Nyuma y’ibyo mbona imbaga nyamwinshi y’abantu, umuntu atashoboraga kubarura, iturutse mu mahanga yose, mu miryango yose, mu bihugu byose no mu ndimi zose. Bari bahagaze imbere y’intebe y’ubwami n’imbere ya Ntama, bambaye amakanzu yererana kandi bafashe imikindo mu ntoki, 10bakavuga mu ijwi riranguruye bati «Ubucunguzi ni ubw’Imana yacu yicaye ku ntebe y’ubwami, bukaba n’ubwa Ntama.»
11Nuko abamalayika bose bari bakikije intebe y’ubwami, hamwe na ba Bakambwe na bya Binyabuzima bine, bagwa bubitse uruhanga ku butaka imbere y’intebe y’ubwami, maze basenga Imana bavuga bati 12«Amen ! Ibisingizo, ikuzo, ubuhanga, ishimwe, icyubahiro, imbaraga n’ububasha, ni iby’Imana yacu uko ibihe bizahora bisimburana iteka ! Amen !» 13Umwe mu Bakambwe afata ijambo maze arambaza ati «Aba bantu bambaye amakanzu yererana, ni bande kandi baturutse he ?» 14Ndamusubiza nti «Shobuja, ni wowe wabimenya !» Na we arambwira ati «Aba bavuye mu magorwa akaze, bameshe amakanzu yabo bayezereza mu maraso ya Ntama.»
Iryo ni Ijambo ry’Imana
ZABURI Zab 24 (23), 1-2, 3-4ab, 5-6
Inyik/ Dore imbaga itabarika y’abagushakashaka.
Isi ni iy’Uhoraho hamwe n’ibiyirimo,
yose ni iye hamwe n’ibiyituyeho byose.
Ni we wayitendetse hejuru y’inyanja,
anayitereka hejuru y’inzuzi ubutayegayega.
Ni nde uzazamuka ku musozi w’Uhoraho,
maze agahagarara ahantu he hatagatifu ?
Ni ufite ibiganza bidacumura n’umutima usukuye,
ntararikire na busa ibintu by’amahomvu.
Uwo azabona umugisha w’Uhoraho,
n’ubutungane bukomoka ku Mana Umukiza we.
Bene abo ni bo bagize ubwoko bw’abamushaka,
bagashakashaka uruhanga rwawe, Mana ya Yakobo.
ISOMO RYA KABIRI
Isomo ryo mu ibaruwa ya mbere ya Mutagatifu Yohani Intumwa 1 Yh 3,1-3
Nkoramutima zanjye, 1nimurebe urukundo ruhebuje Imana Data yadukunze, kugeza n’aho twitwa abana b’Imana, kandi tukaba turi bo koko ! Dore impamvu isi idashobora kutumenya : ni uko itamenye Imana. 2Nkoramutima zanjye, ubu turi abana b’Imana, ariko uko tuzamera ntibiragaragazwa. Gusa tuzi ko igihe Kristu azigaragariza tuzaba dusa na We, kuko tuzamureba uko ari mu by’ukuri. 3Umuntu wese kandi umufiteho ayo mizero, arisukura nk’uko na We ari umuziranenge.
Iryo ni Ijambo ry’Imana
IBANGONDIRIMBO RIBANZIRIZA IVANJILI Mt 11, 28
Alleluya Alleluya.
Nimugane Nyagasani,
mwebwe mwese abarushye n’abaremerewe,
azabaruhura.
Alleluya.
IVANJILI
✠ Amagambo yo mu Ivanjili Ntagatifu uko yanditswe na
Matayo Mt 5, l-12a
Muri icyo gihe, 7Yezu abonye ikivunge cy’abantu aterera umusozi. Aricara, abigishwa be baramwegera. 2Nuko araterura arigisha ati 3«Hahirwa abakene ku mutima, kuko ingoma y’ijuru ari iyabo. 4Hahirwa abiyoroshya, kuko bazatunga isi ho umurage. 5Hahirwa abababaye, kuko bazahozwa. 6Hahirwa abasonzeye ubutungane bakabugirira inyota, kuko bazahazwa. 7Hahirwa abagira impuhwe, kuko bazazigirirwa. 8Hahirwa abakeye ku mutima, kuko bazabona Imana. 9Hahirwa abatera amahoro, kuko bazitwa abana b’ Imana. 10Hahirwa abatotezwa bazira ubutungane, kuko Ingoma y’ijuru ari iyabo. l1Murahirwa nibabatuka, bakabatoteza, bakanababeshyera ku buryo bwose ari jye babahora. 12aNimwishime munezerwe, kuko ingororano yanyu izaba nyinshi mu ijuru !»
Iyo ni Ivanjili Ntagatifu
____________________________________________________
KU WA 2 UGUSHYINGO
UMUNSI WO KWIBUKA ABAYOBOKE BOSE B’IMANA BAPFUYE
* Bazahitamo mu masomo ateganyijwe mu Gitabo cy’imihango yo guhamba gikristu, bazirikana imihimbarize bwite y’Icyumweru, Umunsi w’lzuka rya Nyagasani.
______________________________________________________________________
KU WA 9 UGUSHYINGO
KILIZIYA Y’I LATERANO YEGURIRWA IMANA
ISOMO RYA MBERE
Isomo ryo mu gitabo cy’Umuhanuzi Ezekiyeli Ezk 47,1-2.8-9.12
Mu gihe nabonekerwaga n’Uhoraho, 1umuntu wanyoboraga aranjyana no ku muryango w’Ingoro, nuko mbona amazi yavubukaga mu nsi y’igitabo cy’umuryango w’Ingoro aherekera mu burasirazuba, kuko Ingoro nyine yarebaga mu burasirazuba. Ayo mazi yatembaga agana iburyo bw’Ingoro, akanyura mu majyepfo y’urutambiro. 2Uwo muntu aransohokana anyujije mu irembo ryo mu majyaruguru, antambagiza aho hanze kugeza ku irembo ryo hanze ryarebaga mu burasirazuba; ndebye mbona ya mazi atemba agana iburyo.
8Wa muntu arambwira ati «Ariya mazi aratemba agana mu ntara y’iburasirazuba, akamanukira muri Araba maze akiroha mu nyanja y’Umunyu; yamara kuyirohamo, amazi yayo agahinduka meza. 9Ikinyabuzima cyose kizaba kiri aho uwo mugezi unyura kizabaho; amafi azaba menshi cyane kuko aho ayo mazi yinjiye ayo ahasanze aba meza, n’ubuzima buzasagambe aho uwo mugezi uzanyura hose. 12Ku nkombe zombi z’umugezi hazamera amoko yose y’ibiti byera imbuto ziribwa, amababi yabyo ntazigera arabirana, n’imbuto zabyo ntizizahundura. Bizajya bihora byera buri kwezi, bibikesha aya mazi avubuka mu Ngoro. Imbuto zabyo bazazirya, naho amababi bayakuremo umuti.»
Iryo ni Ijambo ry’Imana
ZABURI Zab 46 (45), 2-3, 5-6, 8-9a. 10a
Inyik/ Dore Ingoro y’Imana mu bantu.
Imana ni yo buhungiro n’imbaraga zacu,
ni yo muvunyi utigera abura mu gihe cy’amage.
Ni cyo gituma tutagira ubwoba n’aho isi yabirinduka,
cyangwa imisozi igatengukira mu ngeri y’inyanja.
Ariko hari uruzi rwagabye amashami, agahimbaza umurwa w’Imana,
n’Ingoro y’Umusumbabyose irusha izindi ubutagatifu.
Imana iba muri wo rwagati ntuteze guhungabana ;
Imana iwutabara kuva bugicya.
Uhoraho Umugaba w’ingabo, ari kumwe natwe ;
Imana ya Yakobo itubereye ubuhungiro bucinyiye !
Nimuze mwirebere ibyo Uhoraho yakoze :
ahagarika intambara kugeza ku mpera z’isi.
ISOMO RYA KABIRI
Isomo ryo mu ibaruwa ya mbere Mutagatifu Pawulo Intumwa yandikiye Abanyakorinti 1 Kor 3,9b-n.16-17
Bavandimwe, 9muri inzu Imana yiyubakira. 10Ku bw’ingabire nahawe n’ Imana, nashije ikibanza nk’umufundi w’umuhanga, undi acyubakamo. Nyamara buri wese yitondere uburyo yubaka.
11Nta kindi kibanza kindi gishobora guhangwa, usibye igisanzwe : Yezu Kristu. 16Ubwo se ntimuzi ko muri ingoro y’Imana, kandi ko Roho w’Imana abatuyemo ? 17Nihagira rero usenya ingoro y’Imana, Imana na we izamusenya. Kuko ingoro y’Imana ari ntagatifu, kandi iyo ngoro ni mwebwe.
Iryo ni Ijambo ry’Imana
IBANGONDIRIMBO RIBANZIRIZA IVANJILI Yh 4, 23-24
Alleluya Alleluya.
Igihe kiregereje ndetse ngiki cyageze,
maze abasenga by’ukuri
bakazasengana Imana Data umutima utaryarya.
Alleluya.
IVANJILI
✠ Amagambo yo mu Ivanjili Ntagatifu uko yanditswe na
Yohani Yh 2,13-22
Muri icyo gihe 13Pasika y’Abayahudi yari yegereje ; Yezu azamuka ajya i Yeruzalemu. 14Asanga mu Ngoro y’Imana hari abantu bahagurira ibimasa, n’intama n’inuma, n’abicaye bavunja ibiceri. 15Nuko aboha imigozi mo ikiboko bakubitisha, bose abasuka hanze y’Ingoro, yirukanamo n’intama n’ibimasa ; anyanyagiza ibiceri by’abavunjaga, ahirika n’ameza yabo. 16Abwira abacuruzaga inuma ati «Nimuzikure aha ngaha ; inzu ya Data mwiyigira inzu y’ubucuruzi !» 17Nuko abigishwa be bibuka ko handitswe ngo «Ishyaka mfitiye Ingoro yawe riramparanya.»
18Nuko Abayahudi baramubaza bati «Utanze kimenyetso ki gitumye wiha kugira utyo ?» 19Yezu arabasubiza ati «Nimusenye iyi Ngoro, mu minsi itatu nzaba nongeye kuyubaka.» 20Abayahudi baramubwira bati «Kubaka iyi Ngoro byamaze imyaka mirongo ine n’itandatu, none wowe ngo wayihagarika mu minsi itatu ?» 21Iyo Ngoro Yezu yavugaga yari umubiri we.22Amaze kuzuka ava mu bapfuye, abigishwa be bibutse ko yari yarabivuze, nuko bemera ibyanditswe, bemera n’ijambo Yezu yari yaravuze.
Iyo ni Ivanjili Ntagatifu
KU WA 8 UKUBOZA
BIKIRA MARIYA UTASAMANYWE ICYAHA
ISOMO RYA MBERE
Isomo ryo mu gitabo cy’Intangiriro Intg 3,9-15.20
Muntu yamaze gusuzugura Imana, 9Uhoraho Imana ara- muhamagara, aramubaza ati «Uri hehe ?» 10Undi arasubiza ati «Numvise ijwi ryawe mu busitani, ngira ubwoba kuko nambaye ubusa ndihisha.» 11Uhoraho Imana ati «Ni nde waguhishuriye ko wambaye ubusa ? Aho ntiwariye ku giti nari nakubujije kuryaho?» 12Muntu arasubiza ati «Umugore wanshyize iruhande, ni we wampaye kuri cya giti ndarya.»
13Uhoraho Imana abwira umugore ati «Wakoze ibiki ?» Umugore arasubiza ati «Inzoka yampenze ubwenge ndarya.» 14Uhoraho Imana abwira inzoka ati «Kuko wakoze ibyo, ubaye ruvumwa mu nyamaswa zose z’agasozi ; uzakurura inda hasi, maze urye umukungugu iminsi yose y’ukubaho kwawe. 15Nshyize inzigo hagati yawe n’umugore, hagati y’urubyaro rwawe n’urubyaro rwe ; ruzakujanjagura umutwe, nawe urukomeretse ku gatsinsino.» 20Nuko Muntu yita izina umugore we, amwita Eva, kuko ari we wabaye nyina w’abazima bose.
Iryo ni Ijambo ry’Imana
ZABURI Zab 98 (97), 1, 2-3b, 3c-4a.6b
Inyik/ Bikira Mariya,
Uhoraho yagukoreye ibitangaza.
Nimuririmbire Uhoraho indirimbo nshya,
kuko yakoze ibintu by’agatangaza ;
indyo ye, ukuboko kwe k’ubutagatifu,
byatumye atsinda.
Uhoraho yagaragaje ugutsinda kwe,
atangaza ubutabera bwe mu maso y’amahanga.
Yibutse ubuntu bwe n’ubudahemuka bwe,
agirira inzu ya Israheli.
Imipaka yose y’isi,
yabonye ugutsinda kw’Imana yacu.
Nimusingize Uhoraho ku isi hose,
nimusingize umwami, Uhoraho.
ISOMO RYA KABIRI
Isomo ryo mu ibaruwa Mutagatifu Pawulo Intumwa yandikiye Abanyefezi Ef 1, 3-6.11-12
3Nihasingizwe Imana, Se w’Umwami wacu Yezu Kristu, Yo yadusakajemo imigisha y’amoko yose, ituruka kuri Roho mu ijuru, ku bwa Kristu. 4Nguko uko yadutoreye muri We nyine mbere y’ihangwa ry’ibiriho byose, kugira ngo tuzayihore imbere mu rukundo, turi intungane n’abaziranenge. 5Igena ityo mbere y’igihe ko tuzayibera abana yihitiyemo, tubikesheje Yezu Kristu. Uko ni ko yabyishakiye ku buntu bwayo, 6kugira ngo izahore isingirizwa ingabire yaduhereye ubuntu, mu Mwana wayo w’Inkoramutima. 11Ni we kandi twatorewemo tugenwa mbere y’igihe ku buryo buhuye n’umugambi w’Ugenga byose, 12kugira ngo twebwe abashyize amizero muri Kristu, tubonereho gusingiza ikuzo ryayo.
Iryo ni Ijambo ry’Imana
IBANGONDIRIMBO RIBANZIRIZA IVANJILI Lk 1,28.42
Alleluya Alleluya.
Nezerwa Bikira Mariya, mutoni w’Imana :
Nyagasani ari kumwe nawe,
wahebuje abagore bose umugisha.
Alleluya.
IVANJILI
✠ Amagambo yo mu Ivanjili Ntagatifu uko yanditswe na
Luka Lk 1, 26-38
Muri icyo gihe, 26Malayika Gaburiyeli atumwa n’Imana mu mugi wo mu Galileya witwa Nazareti, 27ku mukobwa w’isugi wari warasabwe n’umusore witwa Yozefu wo mu muryango wa Dawudi; uwo mukobwa yitwaga Mariya. 28Malayika aza iwabo aramubwira ati «Ndakuramutsa mutoni w’Imana ; Nyagasani ari kumwe nawe.» 29 Yumvise ayo magambo arikanga, yibaza icyo iyo ndamutso ivuga. 30Malayika aramubwira ati «Wigira ubwoba Mariya, kuko wagize ubutoni ku Mana. 31 Dore ugiye gusama inda ukazabyara umuhungu, maze ukazamwita izina rya Yezu. 32Azaba umuntu ukomeye kandi bazamwita Mwene Nyir’ijuru. Nyagasani Imana azamwegurira ingoma ya se Dawudi ; 33azategeka umuryango wa Yakobo ubuziraherezo, ingoma ye ntizashira.» 34Nuko Mariya abwira Malayika ati «Ibyo bizashoboka bite kandi nta mugabo mfite ?» 35Malayika aramusubiza ati «Roho Mutagatifu azakumanukiraho, maze ububasha bwa Nyir’ijuru bukubundikire mu gicucu cye, ndetse ugiye kuvuka azaba intungane kandi azitwa Umwana w’Imana. 36Dore Elizabeti mwene wanyu na we yasamiye mu zabukuru ; uku kwezi ni ukwa gatandatu kandi ubundi yitwaga ingumba, 37koko nta kinanira Imana.» 38Mariya aravuga ati «Ndi umuja wa Nyagasani; byose bimbeho nk’uko ubivuze.» Nuko Malayika amusiga aho aragenda.
Iyo ni Ivanjili Ntagatifu
AMASHAKIRO
Urupapuro
Igihe cy’Adventi
- Icyumweru cya 1 cy’Adiventi 5
- Icyumweru cya 2 cy’Adiventi 8
- Icyumweru cya 3 cy’Adiventi 11
- Icyumweru cya 4 cy’Adiventi 14
Igihe cya Noheli
- Ivuka rya Nyagasani (Noheli) 19
- Misa yo mu gicuku 24
- Misa yo mu rukerera 27
- Misa yo ku manywa 29
- Umuryango mutagatifu 33
- Mariya Mutagatifu umubyeyi w’imana 37
- Ukwigaragaza kwa Nyagasani 44
- Batisimu ya Nyagasani 47
Igihe cy’Igisibo
- Ku wa gatatu w’ivu 53
- Ku cyumweru cya 1 cy’Igisibo 56
- Ku cyumweru cya 2 cy’Igisibo 59
- Ku cyumweru cya 3 cy’Igisibo 62
- Ku cyumweru cya 4 cy’Igisibo 66
- Ku cyumweru cya 5 cy’Igisibo 70
- Mashami n’ububabare bwa Nyagasani 73
- Ku wa kane mutagatifu 89
- Ku wa gatanu mutagatifu 96
Igihe cya Pasika
- Umunsi w’izuka rya Nyagasani 107
- Ku cyumweru cya 2 cya Pasika 130
- Ku cyumweru cya 3 cya Pasika 133
- Ku cyumweru cya 4 cya Pasika 136
- Ku cyumweru cya 5 cya Pasika 139
- Ku cyumweru cya 6 cya Pasika 142
- Isubira mu ijuru rya Nyagasani (Asensiyo) 145
- Icyumweru cya 7 cya Pasika 149
- Umunsi mukuru wa Pentekositi 152
Iminsi mikuru ikomeye ya Nyagasani
- Umunsi mukuru w’Ubutatu butagatifu 165
- Umunsi mukuru w’Isakramentu ritagatifu 168
- Umunsi mukuru w’Umutima mutagatifu wa Yezu 174
Igihe gisanzwe cy’umwaka
- Ku cyumweru cya 2 gisanzwe 179
- Ku cyumweru cya 3 gisanzwe 182
- Ku cyumweru cya 4 gisanzwe 184
- Ku cyumweru cya 5 gisanzwe 187
- Ku cyumweru cya 6 gisanzwe 190
- Ku cyumweru cya 7 gisanzwe 193
- Ku cyumweru cya 8 gisanzwe 196
- Ku cyumweru cya 9 gisanzwe 199
- Ku cyumweru cya 10 gisanzwe 203
- Ku cyumweru cya 11 gisanzwe 206
- Ku cyumweru cya 12 gisanzwe 209
- Ku cyumweru cya 13 gisanzwe 212
- Ku cyumweru cya 14 gisanzwe 217
- Ku cyumweru cya 15 gisanzwe 219
- Ku cyumweru cya 16 gisanzwe 223
- Ku cyumweru cya 17 gisanzwe 226
- Ku cyumweru cya 18 gisanzwe 229
- Ku cyumweru cya 19 gisanzwe 232
- Ku cyumweru cya 20 gisanzwe 235
- Ku cyumweru cya 21 gisanzwe 238
- Ku cyumweru cya 22 gisanzwe 241
- Ku cyumweru cya 23 gisanzwe 244
- Ku cyumweru cya 24 gisanzwe 247
- Ku cyumweru cya 25 gisanzwe 250
- Ku cyumweru cya 26 gisanzwe 253
- Ku cyumweru cya 27 gisanzwe 256
- Ku cyumweru cya 28 gisanzwe 260
- Ku cyumweru cya 29 gisanzwe 264
- Ku cyumweru cya 30 gisanzwe 267
- Ku cyumweru cya 31 gisanzwe 270
- Ku cyumweru cya 32 gisanzwe 273
- Ku cyumweru cya 33 gisanzwe 276
- Ku cyumweru cya 34 gisanzwe 279
Umunsi mukuru wa Kristu Umwami 279
Imwe mu minsi mikuru y’ingenzi
- Yezu aturwa Imana mu ngoro 285
- Yozefu Mutagatifu umugabo wa Bikira Mariya 289
- Ivuka rya Yohani Batisita Mutagatifu 293
- Abatagatifu Petero na Pawulo Intumwa 300
- Yezu yihindura ukundi 306
- Bikira Mariya ajyanwa mu ijuru 311
- Umusaraba mutagatifu w’ikuzo 317
- Umunsi mukuru w’abatagatifu bose 320
- Umunsi wo kwibuka abayoboke bose bapfuye 322
- Kiliziya y’i Laterano yegurirwa Imana 323
- Mariya utasamanywe icyaha 326
Achevé d’imprimer en Novembre 2025
par Pallotti-Presse Ltd
B.P. 863 Kigali-Rwanda
